Йоел
3 Мана, шу күнләрдә һәм шу вақитта,
Мән Йәһудияниң вә Йерусалимниң
мәһбуслирини тутқундин қайтурғанда,
2 Мән барлиқ чәтәл хәлиқлирини жиғип,
уларни Йәһошафатниң вадисиға әкелимән.
Ушбу җайда уларни хәлқим Исраил вә
Мениң несивим билән қилған ишлири үчүн
сотлаймән. Чүнки улар уни хәлиқләр
арисида чечивәтти вә Мениң зиминимни
өз ара бөлүшивалди.
3 Улар Мениң хәлқим һәққидә чәк ташлап,
паһишигә баһасини төләш үчүн оғул балини
беривәтти вә өсмүр қизни шарапқа алмаштурди.
4 Силәр, һәй, Тир вә Сидон һәм Филистияниң
өлкилири, Маңа қарши немә оюңлар бар?
Немә үчүн силәр Мениңдин өч еливатисиләр?
Әгәр силәр адавәт сақлисаңлар,
Мән бирдәмдила яманлиғиңларни
бешиңларға кийдүрүп қойимән.
5 Силәр Мениң күмүч билән алтунлиримни
алдиңлар вә Мениң ғәзнилиримни
өзәңларниң бутханилириңларға қойдуңлар.
6 Йәһуда һәм Йерусалимниң оғуллирини болса,
ана дияридин чәтнитиш үчүн,
грекларниң оғуллириға саттиңлар.
7 Мән уларни силәр сетивәткән йәрләрдин
елип келимән, хүнүк ишлириңларни
бешиңларға кийгүзимән.
8 Мән силәрниң оғул-қизлириңларни Йәһудиға
сетип беримән, улар болса, уларни жирақтики
хәлиқ, Сабаниң турғунлириға сетиветиду.
Сәвәви, Мән, Йәһва, буни дедим.
9 Хәлиқләр арисида мундақ сөзни җакалаңлар:
“Урушқа тәйярлиниңлар! Қәйсәр әркишиләрни
чақириңлар, барлиқ әскәрләр бирлишип,
һәрбий сәпәргә чиқсун!
10 Соқилардин қиличларни вә оғақлардин
нәйзиләрни ясаңлар. Һәтта әң қорқанчақ:
“Мән ғәйрәтлик!”— десун.
11 Бир-бириңларға ярдәмгә келиңлар,
әтраптики хәлиқләр, биргә жиғилиңлар!”»
Шу йәргә, Йәһва, Өз ләшкәрлириңни елип бар.
12 «Мәзкүр хәлиқләр илһамлинип турушиду
вә Йәһошафатниң вадисиға келиду.
Мән шу җайда олтирип, барлиқ ят
хәлиқләрни сотлаймән.
13 Оғақни қолға елиңлар, чүнки ома вақти кәлди
вә һосул пишти. Үзүмни чәйләңлар,
чүнки искәнҗә толди. Шарап һәтта
қирлардин қуюлуватиду — мана,
қанчилик хәлиқләрниң зулуми зор!
14 Сот вадисида топларниң кәйнидин топлар!
Йәһваниң сот күни һөкүм чиқиридиған
вадиға йеқинлишиватиду.
15 Қуяш билән ай өчүп қалди вә
юлтузлар йоруғини йоқатти.
16 Йәһва Пәрвәрдигар шир кәби Сиондин
ғарилдайду вә Йерусалимдин авазини қатиду.
Шу чағда асман билән йәр титрәп кетиду,
лекин Йәһва Өз хәлқи үчүн башпана
вә Исраил оғуллириға қорған болиду.
17 Шуниң билән силәр Мениң муқәддәс теғим
Сионда яшаватқан Йәһва Худайиңлар
Мән екәнлигимни тонуп-билисиләр!
Йерусалим муқәддәс йәр болиду вә
чәтәлликләр башқа униңға кирмәйду.
18 Ушбу күндә тағлардин татлиқ шараплар,
дөңләрдин сүтләр ақиду вә Йәһудияниң
дәриялири суға толиду. Йәһва өйидин
булақ чиқип, Ситтим вадисини суғуриду.
19 Мисир чөлдәрәйду вә Едум қақасқа айлиниду.
Бу җаза улар Йәһуда оғуллириниң бегуна
қенини төкүп, уларға шәпқәтсиз
қариғанлиғи үчүн болиду.
20 Амма Йәһудия мәңгү аһалилиқ болиду вә
Йерусалим — әвлаттин-әвлатқичә.
21 Мән улардин қан төкүштики гунайини
еливетимән һәм Мән, Йәһва,
дайим Сионда истиқамәт қилимән».