Вәһий
8 У йәттинчи мөһүрни бузғанда, асманда тәхминән йерим саат җим-җитлиқ һөкүм сүрди. 2 Һәм мән Худаниң алдида турған йәттә пәриштини көрдүм. Уларға йәттә карнәй берилди.
3 Андин йәнә бир пәриштә келип, қурбангаһниң қешида турди. Униңда исриқ селиш үчүн алтун қача болған вә тәхтниң алдидики алтун қурбангаһта муқәддәсләрниң дуалири билән биллә сунушқа униңға нурғун исриқ берилгән еди. 4 Пәриштиниң қолидин исриқниң иси муқәддәсләрниң дуалири билән Худаға көтирилди. 5 Шуниңдин кейин дәрру пәриштә исриқданни қурбангаһниң отиға толтуруп, йәргә ташлиди. Шу чағда һава гүлдүрләп, авазлар аңланди, чақмақлар чеқип, йәр тәвриди. 6 Йәттә пәриштә йәттә карнәйни челишқа тәйярланди.
7 Биринчи пәриштә карнәйни челиведи — қан арилашқан мөлдүр билән өрт йәргә төкүлди. Йәрниң үчинчи қисми, дәрәқләрниң үчинчи қисми вә барлиқ чим-кокат көйүп кәтти.
8 Иккинчи пәриштә карнәй челиведи — лавулдап көйүватқан йоған таққа охшаш бир нәрсә деңизға ташланди. Шу чағда деңизниң үчинчи қисми қанға айланди. 9 Деңиздики җаниварларниң үчинчи қисми һалак болди, кемиләрниң үчинчи қисми болса, вәйран болди.
10 Үчинчи пәриштә карнәй челиведи — мәшъәлдәк көйгән йоған юлтуз асмандин ғулиди. У дәрияларниң үчинчи қисмиға вә су мәнбәлиригә чүшти. 11 Әшу юлтузниң исми Әмән еди. Шу чағда суниң үчинчи қисми әмәнгә айланди вә су аччиқ болуп кәткәчкә, нурғун инсанлар өлди.
12 Төртинчи пәриштә карнәй челиведи — қуяшниң, айниң вә юлтузларниң үчинчи қисми қараңғулушти. Һәм күндүз билән түнниң үчинчи қисми йоруқлуқтин айрилиши үчүн, уларниң үчинчи қисми зәрбигә учриди.
13 Мән асман-пәләктә учуватқан бүркүтни көрдүм вә униң қаттиқ аваз билән: «Қалған үч пәриштиниң карнәй авазлирини аңлайдиған пәйт кәлгәндә йәрдә яшиғучиларға немә дәгән дәрт, дәрт, дәрт болиду!»— дегинини аңлидим.