Йәшуа
7 Лекин Исраил оғуллири чоң бир қилмиш өткүзүп, ләнәткә учриған нәрсиләрдин бир затни алди. Йәһуда қәбилисидин Зара оғли, Завдий оғли, Хармия оғли Акан шу йоқитишқа тегиш затлардин өзигә бир нәрсиләрни алди. Шуниң үчүн Йәһваниң ғәзиви Исраил оғуллириға қайниди.
2 Йәшуа Йерихадин кишиләрни Бәйтавәндин, бу Бәйтәлниң шәрқий тәрипидә, Гайға әвәтип, мундақ деди: «Берип, йәрни көрүп келиңлар». Улар берип, Гайни қарап кәлди. 3 Улар Йәшуаға қайтип келип: «Барлиқ хәлиқ бармисун, пәқәт 2000 яки 3000 адәмла берип, Гайни вәйран қиливәтсун. Пүткүл хәлиқни әвәтишкә һаҗәт йоқ, чүнки улар аздур»,— дәп мәслиһәт бәрди.
4 Шундақ қилип, шу йәргә 3000ға йеқин адәм барди, лекин улар Гай турғунлиридин қачти. 5 Гайниң кишилири улардин 36 адәмни өлтүрди вә уларни дәрвазилиридин башлап қоғлап, тағдин чүшидиған җайда һалак қилди. Шуңлашқа хәлиқниң жүриги су болуп, бошап кәтти.
6 Йәшуа кийимини жиртип, Йәһваниң келишим сандуғиниң алдида йәргә үзи билән жиқилип, кәч киргичә дүм ятти. Буни униң билән Исраил ақсақаллириму қилди вә башлириға топа чачти. 7 Йәшуа товлап: «Йәһва Рәб Егимиз! Немә үчүн Сән бу хәлиқни Йордандин өткүздиң? Аморлиқларниң қолиға берип, һалак қилиш үчүнму? Биз Йорданниң у тәрипидә қелиш қарариға кәлсәк болаттикән! 8 Һәй Йәһва, Исраил дүшмәнлиригә дүмбисини көрсәткәндин кейин мән немә дәләләймән? 9 Қананлиқлар һәм йәрниң барлиқ турғунлири буни аңлап, бизни қоршап, исмимизни йәр йүзидин йоқитиду. Шу чағда Сениң улуқ исмиң билән немә болиду?»— дәп жиғлиди.
10 Йәһва Йәшуаға җававән ейтти: «Тур орнуңдин, немишкә сән үзүңгә жиқилдиң? 11 Исраил гуна өткүзди. Улар Мениң келишимимни бузди вә ләнәткә учриған мүлүктин алди. Уни елип, оғрилиди, йошурди вә өз затлириниң арисиға қойди. 12 Шуниң үчүн Исраил оғуллири дүшмәнлири алдида туралмиди вә уларға дүмбисини көрсәтти, чүнки улар ләнәткә үчриди. Әгәр өзәңлардин қарғишқа тәәллуқ затларни нери қилмисаңлар, Мән силәр билән башқа болмаймән. 13 Тур, хәлиқни муқәддәслә вә униңға: “Сәһәргичә паклиниңлар, чүнки Исраилниң Худаси Йәһва мундақ дәйду: “Исраил, сениң араңда ләнәткә тутулған нәрсә бар. Шуңлашқа сән дүшмәнлириңниң алдида уни йоқатмиғичә туралмайсән!” 14 Әтә һәммиңлар қәбилилириңлар бойичә келиңлар. Йәһва көрситидиған қәбилә нәсиллири бойичә кәлсун. Йәһва көрсәткән нәсил аилилири бойичә өтсун. Йәһва көрситидиған аилә болса, бир-бир кишидин өтсун. 15 Ләнәт нәрсини оғрилиған кишини паш қилип, от билән көйдүривәтсун. Уни һәм униңға мәнсүп һәммә нәрсини отта көйдүриңлар, чүнки у Йәһва билән болған келишимини бузди вә Исраил арисида қилмиш ясиди”».
16 Йәшуа таң сәһәрдә туруп, Исраилға қәбилиләр бойичә өтүшини буйриди. Шуниң билән Йәһуда қәбилиси көрситилди. 17 Андин Йәһуданиң қәбилисидин Зара нәсли көрситилди. Зараниң нәслидин бир-бирдин аилә башчилири өткәндә, Завдийниң аилиси көрситилди. 18 Ушбу аилидин бир-бир киши өткәндә, Йәһуда қәбилиси Зара нәсли Завдий аилисидин Хармийниң оғли Акан көрситилди. 19 Шу чағда Йәшуа Аканға: «Оғлум, Исраил Худаси Йәһваға мәдһийә оқиғин вә Униң алдида қилмишиңни баян қилғин. Мениңдин йошурмай, һәммини ейтқин»,— деди.
20 Акан җававән: «Раст, мән Исраил Худайи Йәһваниң алдида гуна өткүзүп, мону ишларни қилдим. 21 Олҗиниң арисида мән бир әҗайип чирайлиқ Синар кийимини көрүп қалдим. Шундақла 200 шекәл күмүч вә 50 шекәл алтун маңа йеқип қалди һәм мән уни алдим. Буларниң һәммиси чедиримниң едәни астида көмүклүк вә күмүчму униң астида»,— дәп ейтип бәрди.
22 Йәшуа кишиләрни әвәтти. Улар қараргаһтики чедирға жүгрәп берип, буниң барлиғи униң чедирида йошурулғанлиғини көрди. 23 Улар буни чедирдин Йәшуаға, барлиқ Исраил оғуллириға әкәлди вә Йәһваниң алдиға қойди. 24 Йәшуа һәм барлиқ исраиллиқлар Зараниң оғли Аканни һәм униң билән күмүч, кийим вә алтунни елип, Акор вадисиға апарди. Униң билән биллә оғуллирини, қизлирини, мелини, чедирини вә барлиқ мүлкини қошуп, шу җайға әкәлди. 25 Шу вақитта Йәшуа мундақ деди: «Сән бизгә мошу дәрт-әләмни әкәлгиниң үчүн Йәһва саңа мәзкүр күндә мошу дәрт-әләмни чүшириватиду!» Шуниң билән уни аилиси билән барлиқ исраиллиқлар таш етип өлтүрүп, андин отта көйдүрүвәтти. 26 Андин улар үстигә ташлардин ташлап, йоған дөңни догилиди. У дөң мошу күнгичә сақлинип қалди. Мошуниңдин кейин Йәһваниң қәһәрлик ғәзиви тохтиди. Шуңлашқа шу җай бүгүнгичиму Акор вадиси дәп атилиду.