Ибранийларға
9 Авалқи келишимниң муқәддәс хизмәткә һәм йәрдики муқәддәс чедирға мунасивәтлик қанун-көрсәтмилири бар еди. 2 Ушбу чедир икки бөлүмдин ибарәт еди. Чедирниң биринчи бөлүмидә чирақдан, үстәл вә униң үстигә қоюлған муқәддәс нан болатти һәм бу бөлүм «муқәддәс җай» дәп атилатти. 3 Иккинчи пәрдиниң кәйнидә «әң муқәддәс җай», дегән бөлүми бар еди. 4 Униңда алтун исриқдан вә пүтүнләй алтун билән қапланған келишим сандуғи бар еди. Униң ичидә манна селинған алтун қача, Һарунниң бихлиған һаса тайиғи вә келишимниң таш тахтилири барди. 5 Сандуқниң үстидә болса, сайиси униң шәпқәт қапқисиға чүшидиған шөһрәтлик хурабинлар туратти. Лекин һазир бу тоғрисида тәпсилий сөзләйдиған вақит әмәс.
6 Барлиғи мошу түрдә орунлаштурулғандин кейин, роһанийлар муқәддәс хизмәт билән бағлинишлиқ вәзипилирини орунлаш үчүн, чедирниң биринчи бөлүмигә һәр күни кирәтти. 7 Амма иккинчи бөлүмгә жилиға бир қетим пәқәт башроһаний қурбанлиқ қан билән кирәтти, у уни өзи үчүн вә хәлиқниң наданлиғидин қиливатқан гуналири үчүн әкирәтти. 8 Шундақ қилип, муқәддәс роһ биринчи чедир турғичә, әң муқәддәс җайға йол техи көрситилмигәнлигини билдүргән. 9 Бу чедир һазирқи вақитниң мисали болуп хизмәт қилиду, у җайда һәдийәләр һәм қурбанлиқлар техичә тәғдим қилинмақта. Амма улар әкәлгүчиниң вижданини мукәммәл қилалмайду, 10 чүнки улар пәқәт йемәк-ичмәккә вә һәрхил жуюнушларға* қаритилған. Бу қануний тәләпләр тәнгә мунасивәтлик еди һәм түзүтүш үчүн бәлгүләнгән вақитларғичила күчи бар еди.
11 Амма Мәсиһ кәлгән бәрикәтләрниң башроһанийидәк (һәм биз уларни алдук), у инсан қоллири қилған әмәс, бәлки толиму улуқ һәм камил, йәрдә болмиған чедирға қирди. 12 У бир қетим муқәддәс җайға кирип, өшкиләр һәм яш буқиларниң қанлири билән әмәс, бәлки өзиниң қени билән һәм биз үчүн мәңгү қутулушни тапти. 13 Сәвәви, әгәр өшкиләрниң һәм буқиларниң қени һәм ғунаҗунниң күли булғанғанларни муқәддәсләп, уларни Худа көзидә пак қилалиса, 14 нәқәдәр Әйсаниң қени булардин артуғирақтур, у әбәдий роһ васитиси арқилиқ өзини, нуқсансизни, Худаға атиди! Униң қени бизниң тирик Рәббкә муқәддәс хизмәт қилишимиз үчүн, вижданимизни өлүк ишлардин тазилиди.
15 Мана мошу сәвәптин, у йеңи келишимниң васитичисидур. У чақирилғанлар мәңгү мирасниң вәдисини елиши үчүн әшу болди. Буниң барлиғи униң өлүми түпәйли мүмкин болди, униң өлүми арқилиқ улар сетивелинди вә авалқи келишим астида қилған қилмишлиридин азат болди. 16 Келишим бар йәрдә, келишим түзгүчиниң вапати һаҗәтликтур. 17 Келишим түзгүчи тирик вақтида, келишим күчкә егә әмәс, әксичә, келишим түзгүчиниң вапатидин кейин у күчкә кириду. 18 Шуңлашқа бурунқи келишимму күчкә қан арқилиқ киргүзүлди. 19 Муса Қанунниң һәрбир вәсийитини барлиқ хәлиқ алдида елан қилғанда, у яш буқилар һәм өшкиләр қенини, суни, қип-қизил жуңни һәм өсүмлүкни елип, китап өзигә вә барлиқ хәлиқкә сепип: 20 «Бу Худа силәргә артқан келишим қени»,— дегән еди. 21 Худди шуниңдәк, у қан билән чедирға вә хизмәткә аталған барлиқ қачиларға сәпти. 22 Қанун бойичә һәммә нәрсә дегидәк қан арқилиқ тазилиниду һәм қан төкүлмәй, кәчүрүм болмайду.
23 Шуңа асманниң рәмзлик нәмунилири мошундақ җаниварлар қени билән тазилиниши керәк еди. Асмандики нәрсә болса, буниңдинму артуғирақ қурбанлиқлар билән паклиниши лазим. 24 Чүнки Мәсиһ адәм қоллири билән ясалған, әслиниң мисали болған муқәддәс җайға кирмиди, бәлки биз үчүн Худаниң алдида турушқа асманниң өзигә кирди. 25 Башроһаний жилму-жил әң муқәддәс җайға малниң қени билән киргәнгә охшаш, у өзини көп қетим қурбанлиққа әкелиши керәк әмәс. 26 Болмиса, униңға дуния яритилғандин башлап, көп қетим азап чекишкә тоғра келәтти. Лекин әнди у заманниң аяқлишиши вақтида гунани йоқ қилиш үчүн, бир қетим өзини намайән қилип, гунани йоқитиш үчүн җенини пида қилди. 27 Инсанлар бир қетим өлүп, андин сотланғандәк, 28 Мәсиһму нурғунлириниң гуналирини көтириш үчүн, бир қетим һәм мәңгүгә қурбанлиққа әкелингән еди. Иккинчи қетим у гунани йоқитиш үчүн кәлмәйду, бәлки уни қутқузулуши үчүн тақәтсизлик билән күтүватқанлар Әйсани көриду.