Вәһий
5 Тәхттә Олтарғучиниң оң қолида ичи-тешидин йезилған вә йәттә мөһүр билән бәкитилгән түртәкни көрдүм. 2 Шундақла мән күчлүк пәриштини көрдүм, у қаттиқ авази билән: «Ким түртәктики мөһүрләрни бузуп, уни ечишқа лайиқ?»— дәп җакалиди. 3 Бирақ йә асманда, йә йәрдә, йә зимин астида түртәкни ечип, уни қарап чиқидиған һечким болмиди. 4 Һәм түртәкни ечип, уни қарап чиқишқа лайиқ һечким тепилмиғини үчүн, мән көп жиғлидим. 5 Бирақ ақсақалларниң бирси маңа мундақ деди: «Жиғлима. Мана, Давутниң йилтизи, Йәһуданиң әвладидин болған Шир ғалибә қазанди вә түртәкниң йәттә мөһрини бузуп, уни ечишқа лайиқ».
6 Мән шуни көрдүм: тәхтниң, төрт мәхлуқниң вә ақсақалларниң оттурисида қурбанлиққа боғузланған бир Қоза турған, униң йәттә мүңгүзи һәм йәттә көзи бар еди. Көзлири йәрниң барлиқ тәрәплиригә әвәтилгән Худаниң йәттә роһини билдүриду. 7 У берип, тәхттә Олтарғучиниң оң қолидин түртәкни алди. 8 У түртәкни алған чағда, төрт мәхлуқ вә 24 ақсақал Қозиниң алдиға тиз пүкүп жиқилди. Ақсақалларниң һәрқайсида чилтар вә һәммисидә исриққа толған алтун қачилар болған. (Исриқ муқәддәс кишиләрниң дуалирини билдүриду). 9 Улар мону йеңи нахшини ейтти: «Сән түртәкни елип, униң мөһүрлирини бузушқа лайиқсән, чүнки сән қурбанлиққа боғузланған едиң вә өз қениң билән барчә қәбилә, хәлиқ вә милләттин Худа үчүн һәрқандақ тилларда сөзләйдиған инсанларни сетивалдиң. 10 Уларни Худайимизниң падишалири вә роһанийлири қилдиң һәм улар йәр үстидин һөкумранлиқ қилиду».
11 Мән қариғинимда, тәхтниң, тирик мәхлуқлар билән ақсақалларниң әтрапида турған көплигән пәриштиләрниң авазини аңлидим. Уларниң сани — миңларчә миңлар вә йүзлигән миллионлар еди. 12 Улар җараңлиқ авази билән: «Қурбанлиққа әкелингән Қоза һакимийәткә, байлиққа, даналиққа, күчкә, шәрәпкә, шөһрәткә вә мәдһийигә лайиқтур!»— дейишмәктә.
13 Асмандики, йәр йүзидики, зимин астидики һәм деңиздики мәвҗудатларниң һәммисиниң мундақ дегәнлирини аңлидим: «Тәхттә Олтарғучиға вә Қозиға әбәттин-әбәт қут-бәрикәт, шан-шәрәп, шан-шөһрәт вә қүч-қудрәт болсун!» 14 Һәм төрт тирик мәхлуқ: «Амин!»— деди вә ақсақаллар тиз пүкүп, тазим қилди.