Зәбур
Нахша-мулаһизә. Зара қәбилисидин
Етанниң тәлими.
89 Йәһваниң вапа меһир-муһәббити һәққидә мәңгү
Нахша ейтимән, бар әвлатларға Сениң
Садиқлиғиң тоғрилиқ һәқиқәтни вәз җакалаймән.
2 Ишинишим камилки, шәпқитиң әбәткә асаслинип вә
Әршләрдә Сән һәқиқитиңни тәстиқләп,
Мундақ ейттиң:
3 «Мән келишимимни таллиған қулум
Давут билән қурдум:
4 “Мәңгүгә сениң уруғуңни мустәһкәмләймән,
Тәхтиңни болса, әвлаттин-әвлатқа чиңайтимән”».
(Селаһ)
5 Асманлар, Йәһва, Сениң карамәт ишлириңни
Җакалаватиду вә Муқәддәсләр жиғини
Һәқиқитиңни вәз қиливатиду.
6 Ким әрштә, булутлар үстидә, Йәһваға тәң
Болалайду? Худаниң оғуллири арисида ким
Йәһваға охшалайду?
7 Тәңри муқәддәс жиғинида улуқтур, Униң әтрапида
Болғанларға қорқунуч һәм әйминиш беғишлайду!
8 Йәһва — қошунларниң Сәрдари, ким Сениңдәк,
Йәһ, қадирдур? Сән һәммидин улуқ һәм садиқтур!
9 Сән қайнаватқан деңиз үстидин һаман һөкүмранлиқ
Қилисән. Униң долқунлири көтирилгәндә,
Сән уларни тизгинләйсән.
10 Һакавур Мисирни җараһәтләнгән һайвандәк
Пәсәйттиң, күчлүк қолуң
Билән дүшмәнләрни тарқаттиң.
11 Һәм асманму, һәм йәрму Сениң. Сән пүткүл
Каинатни һәм униң мәвҗудатлирини яраттиң.
12 Сән шимал билән җәнупни яраттиң. Табор вә
Һәрмон Сениң исмиң билән дайим шатлиниду.
13 Сениң булҗуңлириң чиң, Сениң қолуң қувәтлик
Һәм оң қолуң егиз көтириклик.
14 Тәхтиң асаси — яхшилиқ вә адаләтлик.
Вапа сөйүм билән һәқиқәт һәрдайим алдиңда.
15 Карнәй чақириғини чүшәнгән хәлиқ нәқәдәр
Бәхитлик! Йәһва, улар йүзүңниң йоруғида.
16 Улар күн давамида Сениң исмиңға зоқлиниду
Вә Сениң һәқлиғиң уларни үстүнлитиду.
17 Сәвәви, Сән улар қудритиниң гөзәллиги,
Сениң илтипатиң мүңгүзимизни егиз көтириду.
18 Йәһвадин бизниң һимайимиз вә Исраилниң
Муқәддиси — бизниң Падишайимиз!
19 Шу чағда Сән вападарлириңға мундақ ейтқандиң:
«Мән күчүмни җасурға бәрдим, хәлқимдин
Таллиғинимға ярдәм бәрдим.
20 Мән Давут қулумға егә болдум, уни қуддус
Май билән майлидим.
21 Қолум дайим униң билән вә
Қудритим уни мустәһкәмләйду.
22 Дүшмән уни мәғлуп қилалмайду,
Қанунсизлиқниң оғли тәқипләлмәйду.
23 Униң алдида қаршилашқучиларни Мән вәйран
Қилимән вә уни өч көргәнләрни қириветимән.
24 Униң билән һәқиқитим һәм вапа муһәббитим
Болиду. Мениң исмим Униң
Мүңгүзини күчләндүриду.
25 Мән униң қолини деңизға вә һоқуқини
Дәрияларға қаритимән.
26 У маңа: “Сән мениң Атам, Худайим һәм
Ниҗатимниң Ғартеши”,— дәйду.
27 Уни тунҗам қилип, зиминниң
Пүткүл падишалиридин егиз қойимән.
28 Мән уни вапалиқ билән сөйүмән, Мениң униң
Билән қурған келишимим һечқачан бузулмас!
29 Униң әвладини мәңгүгә узартип,
Тәхтини асманниң күнидәк қилимән.
30 Әгәр униң оғуллири Мениң қанунимни қалдурса
Вә Мениң вәсийәтлиримдә жүрмисә,
31 Әгәр улар низамлиримни бузуп,
Пәрманлиримни сақлимиса,
32 Унда Мән бойсунмаслиғини һасам билән җазалап,
Гуналирини қамчилаймән.
33 Бирақ мән шәпқитим түпәйли қулумдин
Вапалиғимни алмаймән вә Өз вәдәмни
Өзгәртмәймән.
34 Мән келишимимни қалдуруп, еғизимдин чиққан
Сөзлиримдин ваз кәчмәймән.
35 Бир рәт Өз муқәддәслигим билән қәсәм ичтим:
Давутқа Мән һәргиз ялған ейтмаймән.
36 Униң уруғи бақи яшайду һәм тәхти
Қуяштәк мәңгү туриду.
37 У айдәк, булутлардики кәби садиқ гувачи
Алдимда әбәт болиду». (Селаһ)
38 Лекин Сән майланған хизмәтчиңгә рәнҗидиң,
Уни Өзәңдин иштиривәттиң.
39 Қулуң билән келишимиңни рәт
Қилип, йәргә униң таҗини ташлидиң.
40 Униң таш қашалирини бузуп,
Қорғанлирини харапқа айландурдиң.
41 Қешидин өткән булаңчилиқ қилмақта,
Хошнилириниң көзидә у мәсхирә болуватиду.
42 Сән дүшмәнлириниң қолини көтирип,
Рәқиплириниң һәммисини хошал қиливәттиң.
43 Сән хизмәтчиңниң қиличини күчсизләндүрүп,
Униң җәңлирини қувәтлимәйдиған болдуң.
44 Униң шан-шәрипини тартивелип,
Униң тәхтини топиға ғулаттиң.
45 Сән униң яшлиғини қисқартип,
Шәрмәндичиликкә кийдүрдиң. (Селаһ)
46 Қай ваққичә, Йәһва, Сән йошурунисән?
Наһәтки Сениң қәһриң оттәк лавулдап көйиду?
47 Әскә алғина, мениң өмрүм немә дегән қисқа!
Қандақ пай-петәкчиликкә Сән Адәм атиниң
Барлиқ оғуллирини яритилишқа буйридиң?
48 Яшаватқан инсанлар ичидин ким өлүм көрмәйду?
Ким гөрдин өз җенини сақлап қалалайду? (Селаһ)
49 Йәһва Рәббимиз, қени Сениң авалқи
Рәһим-шәпқәтлириң? Сән Өзәң Давутқа вапа
Муһәббәттә болушни қәсәм қилғанғу.
50 Йәһва, әслигинә, қуллириң әнчисигә төкүлүватқан
Мәсхириләрни. Есиңға алғина, жүригимдә
Барлиқ хәлиқләрдин аброй төкүлүштин
Қандақ азаплиниватимән.
51 Йәһва, Сән көрдүңғу, Сениң дүшмәнлириң
Күлүшүп, Сениң майлиған хизмәтчиңниң
Һәрбир қәдимини күзәткинини.
52 Йәһва Худайимиз мәңгүгә мубарәк болсун!
Амин һәм амин.