Әлчиләр
27 Италияға үзүп кетишимиз йешилгәндә, Паулни һәм башқа мәһбусларниң бирмунчилирини Авғуст қошуниниң Юлий исимлиқ йүзбешиға тапшурди. 2 Адрамиттин кәлгән кемигә олтирип, Асияниң қирғиғиға җайлашқан кемәҗайларға үзүшкә биз йол туттуқ һәм биз билән Салоникидин македонийәлик Аристарх болди. 3 Әтиси биз Сидонға чүштуқ вә Юлий Паулға меһриванларчә қарап, достлириниң униңға ғәмхорлуқ көрситишигә уларниң йениға беришни рухсәт қилди.
4 У җайдин биз деңизға чиқип, Кипрниң далда тәрипидә үздуқ, чүнки қарши шамаллар чиқивататти. 5 Биз очуқ деңизда Киликийә вә Памфилия тәвәлигидин өтүп, Ликиядики Мира шәһиригә кәлдуқ. 6 Шу йәрдә йүзбеши Италияға үзидиған Искәндәрияниң кемисини тепип, бизни униңға олтарғузди. 7 Биз көплигән күнләр давамида аста үздуқ һәм еғирчилиқлар билән Кинидосқа йетип бардуқ. Шамал бизгә илгириләшкә йол қоймиғанлиқтин, биз Критниң далдисида Салмонниң йенида үздуқ 8 вә аран қирғақниң йенидин өтүп, Қолайлиқ Кемәҗай дегән йәргә үзүп кәлдуқ. Униң қешида Ласея намлиқ шәһәр болған еди.
9 Нурғун вақитни жүтәрдуқ һәм әнди үзүш хәтәрлик еди, чүнки һәтта күзлүк роза күни өтүп болған. Шуңлашқа Паул уларни әскәртип: 10 «Үзүш пәқәт жүккә һәм кемигила чиқим әмәс, бәлки җанлиримизғиму зор зиян әкелидиғанлиғини көрүватимән»,— деди. 11 Бирақ йүзбеши Паулни әмәс, кеминиң егиси һәм жүргүзгүчини тиңшиди. 12 Кемәҗай қишлашқа ярамлиқ болмиғанлиқтин, көпчилик у йәрдин кетишни һәм Критниң кемәҗайи Финиксқа, у шималий-шәриқкә һәм җәнубий-шәриқкә чиқатти, берип қишлашни мәслиһәт қилди.
13 Йеник җәнубий шамал чиққанда, улар нийити орунланди дәп ойлап, ләңгәрни чиқирип, Крит қирғиғини бойлап өтти. 14 Амма аз вақит өтүп, Евракилон дәйдиған наһайити қаттиқ боран урди. 15 Боран кемини сөриди һәм у боранға қарши туралмиди, шуңлашқа биз қаршилиқ көрсәтмидуқ вә бизни боран елип маңди. 16 Һәтта Кавда атилидиған бир йоған әмәс аралниң далдисида үзүветип, биз кемә қуйруғидики қолвақни тәслик билән көтирип чиқардуқ. 17 Уни кемигә чиқарғанда, мәккәмләш үчүн кемини орап бағлидуқ. Сирт атилидиған җайдики қумлуққа тақишип қелиштин қорқуп, деңизчилар йәлкәнни жиғип чүшәрди вә бизни боран сөрәшни давамлаштурди. 18 Боран бизни қәһәрләрчә ташлаватқанлиқтин, әтиси улар кемини йеникләштүрди 19 вә үчинчи күни өз қоли билән кемә қураллирини ташлиди.
20 Узақ күнләр давамида йә қуяш, йә юлтузлар көрүнмиди, күчлүк боран чиқивататти һәм ахирида қутулушқа болған һәрқандақ үмүт йоқилишқа башлиди. 21 Адәмләр хелә вақит тамақланмиған үчүн, Паул арисида туруп: «Силәр Криттин деңизға чиқмас мәслиһитимни чоқум тиңшишиңлар керәк еди, шу чағда бундақ зиян билән чиқимни тартматтиңлар. 22 Әнди болсиму мән силәрни чүшкүнлүккә берилмәсликкә чақиримән, чүнки пәқәт кемидин башқа һечбир җан һалак болмайду. 23 Чүнки мошу кечидә мән мәнсүп болған һәм муқәддәс хизмәт атқуруватқан Худаниң пәриштиси алдимда туруп: 24 “Паул, қорқма. Сән қәйсәр алдида турушиң керәк, шуңлашқа Рәббиң сениң билән үзүватқанларниму саңа соға қилди”,— деди. 25 Шуңа қайғурмаңлар, чүнки мошундақ болиду, дәп ейтқузған Худаға мән ишинимән! 26 Бизни қандақту-бир аралға ташлиши керәк»,— деди.
27 Андин 14-түн кәлгәндә һәм бизни боран Адриатик деңизи бойичә сөригәндә, йерим түндә деңизчилар қандақту-бир йәргә йеқинлишиватқинимизни байқашқа башлиди. 28 Улар чоңқурлуқни өлчигәндә 36 метр, бираз үзгәндин кейин йәнә өлчигәндә 27 метрни тәшкил қилди. 29 Бизниң қияларға урулушимиздин қорқуп, улар кеминиң арқа тәрипидин төрт ләңгәрни ташлап, таң етишни тақәтсизлик билән күтти. 30 Бирақ деңизчилар кемидин қачмақчи болғанда, ләңгәрни ташлиғандәк болуп, қейиқни деңизға чүшәрди. 31 Буни байқиған Паул, йүзбеши һәм әскәрләргә: «Әгәр бу адәмләр кемидә қалмиса, силәр қутулалмайсиләр»,— деди. 32 Шу чағда әскәрләр қейиқниң ағамчилирини чепип, уни суға чүшүрүвәтти.
33 Таң сәһәрдә Паул барлиғиниң тамақлинивелишини сорап: «Мана, бүгүн силәрниң күтүштә болуп, һечнәрсигә тәгмәй, тамақсиз қеливатқиниңларға 14 күн болди. 34 Шуңлашқа тамақлинишиңларни өтүнүмән, бу силәрниң аман қелишиңлар үчүн һаҗәт. Һечқайсиңларниң һәтта бирталму чечиңлар чүшмәйду»,— деди. 35 Буни ейтип, у нанни алдидә, һәммисиниң алдида Худаға шүкүр ейтип, уни уштуп йейишкә башлиди. 36 Шу вақитта барлиғи җанлинип, тамаққа киришти. 37 Кемидә барлиғимиз болуп 276 җан болдуқ. 38 Тамаққа тойғандин кейин, буғдайни деңизға ташлап, улар кемини йеникләштүрди.
39 Йоруқ чүшкәндә, улар көрүнгән йәрни тоналмиди, бирақ қумлуқ деңиз қолтуғини көрди, шу йәргә, имканийәт яр беришичә, кемини апиришқа қарар қилди. 40 Ләңгәрләрни чепиветип, деңизға ташлиди. Шу пәйттә улар алдидики палақларниң бәкиткүчилирини аҗритип, шамалға қаритип алдинқи йәлкәнни көтирип, қирғаққа йөнәлди. 41 Икки тәрипидин деңиз бойлайдиған тез җайға тирилип, улар кемини шу йәргә тохтатти һәм кеминиң тумшуғи чөкүп қимирлалмай қалди, кәйни тәрипини долқунлар дәһшәтлик уруп, сундурушқа башлиди. 42 Шу чағда әскәрләр мәһбусларниң һечқайсисиниң қечип яки үзүп кәтмәслиги үчүн, уларни өлтүрмәкчи болди. 43 Лекин йүзбеши Паулни қутқузушни халап, уларни ойлиғинидин қайтурди һәм үзәләйдиғанларға деңизға сәкрәп, қурғақлиққа йетишни буйриди. 44 Қалғанлириға болса, бирлиригә тахтайларда, башқилириға кемидики бар нәрсиләрдә үзүшни буйриди. Шундақ қилип, барлиғи аман-есән қурғақлиққа йәтти.