6. Дуа қилишниң пайдиси барму?

ДУА қилишниң пайдиси барму? Муқәддәс китап дуаниң пайдиси бар дәйду. Худаниң садиқ хизмәтчилириниң дуалири буни испатлайду (Луқа 22:40; Яқуп 5:13). Ениқки, дуа қилишниң пайдиси көп. Мәсилән, у бизгә роһий, һиссий, һәтта җисманий җәһәттин ярдәм бериду. Қандақ қилип?

Бир мисални кәлтүрәйли. Пәрзәнтиңиз бир соғатни тапшурувалди дәйли. Сиз униңға миннәтдарлиқ һис-туйғусида болса, йетәрлик екәнлигини ейтамсиз яки болмиса, миннәтдарлиқни ипадиләшни үгитәмсиз? Әгәр һис-туйғулиримизни сөзләр билән ипадилисәк, диққитимизни уларға мәркәзләштүримиз вә һәтта уларни күчләндүримиз. Худаға дуа қилиштиму шуниңға охшаш ейтишқа боламду? Әлвәттә шундақ болиду. Төвәндә бир нәччә мисалларни көрүп чиқайли:

Миннәтдарлиқ. Һаятимиздики соғатлар үчүн Худаға шүкүр ейтсақ, биз диққитимизни еришкән бәрикәтләргә ағдуридиған болимиз. Нәтиҗидә техиму миннәтдарлиқ вә шат-хорамлиқ һис-туйғусиға чөмүп, техиму иҗабий көзқарашта болимиз (Филипиликләргә 4:6).

Мисал. һәзрити Әйса өз дуалириға Атиси Йәһваниң қулақ салғанлиғи вә җавап бәргәнлиги үчүн миннәтдарлиғини ипадилигән (Йоһан 11:41).

Товва қилиш. Худадин кәчүрүм сорисақ, өткүзгән гунайимизға товва қилип, униң қанчилик еғир екәнлигини тонуп йетимиз вә вижданимизни тәрбийиләймиз. Йәнә һәддидин зиядә өз-өзүмизни әйипләштин қутулалаймиз.

Мисал. Давут падиша дуасида гуналириға товва қилип, кәчүрүм сориған (Зәбур 51 [50]).

Йол-йоруқ вә даналиқ сораш. Әгәр дуалиримизда Худадин муһим қарарларни чиқириш үчүн зөрүр йол-йоруқ вә даналиқни сорисақ, бу бизниң һәқиқий кәмтәр болушимизға ярдәм бериду. Бундақ дуалар қабилийәтлиримизниң чәклик екәнлигини есимизгә салиду вә асмандики Атимизға ишәнч бағлишимизға ярдәм бериду (Пәнд-нәсиһәтләр 3:5, 6).

Мисал. Сулайман падиша Исраил хәлқи үстидин һөкүмранлиқ қилиши үчүн дуада Худадин йол-йоруқ вә даналиқ сориған (Падишалар 1-язма 3:5—12).

Қийинчилиқларни тартиш. Бешимизға еғир күн чүшкәндә, Худаға ич-бағримизни төксәк, көңлүмиз тинч-хатирҗәмлик тепип, өзүмизгә әмәс, Худаға тайинидиған болимиз (Зәбур 62:8 [61:9]).

Мисал. Падиша Аса өзидин күчлигирәк дүшмәнләр һуҗум қилғанда, Худаға дуа қилған (Тарихнамә 2-язма 14:11).

Башқиларниң ғемини йейиш. Бундақ дуалар шәхсийәтчилик билән күрәш қилишқа һәм ич ағритиш вә һисдашлиқни йетилдүрүшкә ярдәм бериду.

Мисал. Әйса пәйғәмбәр өз әгәшкүчилири үчүн дуа қилған (Йоһан 17:9—17).

Һәмдусәна ейтиш. Әгәр Йәһва Худани әҗайип ишлири вә есил пәзиләтлири үчүн мәдһийилисәк, Униңға болған һөрмитимиз вә миннәтдарлиғимиз техиму ашиду. Дуада Атимиз Йәһваға һәмдусәна ейтиш Униңға йеқинлишимизға ярдәм бериду.

Мисал. Пәрвәрдигарниң яратқан мәвҗудатлири үчүн падиша Давут Уни чин жүрәктин мәдһийилигән (Зәбур 8).

Дуалар арқилиқ келидиған бәрикәтләрдин бири — «Худаниң кишиләрниң ойлиғинидинму ешип чүшидиған тиничлиғи» (Филипиликләргә 4:7, ҺЗ). Ениқки, бүгүнки күндә тинчлиқ йоқ дунияда көңүл хатирҗәмлигигә еришиш асан әмәс. Худадин келидиған тинч-хатирҗәмлик һәтта инсанниң тәң-саламәтлигигә пайдилиқ (Пәнд-нәсиһәтләр 14:30). Бирақ шундақ бәрикәтләргә өз күчимиз билән еришәләймизму? Бу соалға җавап тепиш үчүн кейинки мақалини көрүп бақайли.