Муқәддәс Китап үгинишини нәтиҗилик өткүзәйли
1. Муқәддәс Китап үгинишини өткүзүватқан җакалиғучиларниң қандақ мәсъулийити бар?
1 Йәһваниң Өзи «җәлип қилмиса», һеч ким Униңға хизмәт қилалмайду (Йоһ. 6:44). Шундақ болсиму, Муқәддәс Китап үгинишини өткүзүватқан җакалиғучилар өз тәрипидин адәмләргә Худаға йеқинлишишқа ярдәм қилиши керәк (Яқуп 4:8). Бу яхши тәйярлиқ қилишни тәләп қилиду. Үгәнгүчиниң хуш хәвәрни чүшинип, роһий җәһәттин өсүши үчүн пәқәтла һәр абзацни оқуп, берилгән соални қоюш йетәрлик әмәс.
2. Муқәддәс Китап үгинишини нәтиҗилик өткүзүш арқилиқ қандақ утуққа еришишкә болиду?
2 Муқәддәс Китап үгиниши нәтиҗилик болуши үчүн җакалиғучи үгәнгүчигә 1) Муқәддәс Китап немигә тәлим бериватқинини чүшинишкә, 2) шуни қобул қилишқа һәм 3) әмәлийәттә қоллинишқа ярдәм қилиши керәк (Йоһ. 3:16; 17:3; Яқуп 2:26). Адәм мошундақ қәдәмләрни қилғичә бир нәччә ай өтүп кетиши мүмкин. Лекин мошу үч қәдәмниң һәрбири Йәһва Худа билән мунасивәтни риваҗландурушқа һәм Униңға беғишлинишқа апиридиған қәдәмләр болуп һесаплиниду.
3. Немишкә тәҗрибилик вәзичиләр адәмниң көзқаришини билишкә ярдәм беридиған соалларни қойиду?
3 Муқәддәс Китап үгәнгүчиниң көзқариши қандақ? Қизиққучи адәм үгиниватқинини чүшәнгәнлигини һәм қобул қилғанлиғини ениқлаш үчүн, пәқәт өзиңизла сөзлимәстин, уни өз ой-пикирлири билән бөлүшүшкә дәвәт қилиң (Яқуп 1:19). Муһакимә қилиниватқан мавзуға тегишлик Муқәддәс Китапниң көзқаришини у чүшинәмду? Мавзуни өз сөзи билән чүшәндүрәләмду? Үгәнгәнлири һәққидә немә ойлайду? Муқәддәс Китап үгитиватқан нәрсиләрни әқилгә сиғидиған нәрсә дәп ишинәмду? (Сал. 1-х. 2:13). Үгиниватқан нәрсилири униң һаятидин әкс әттүрүлүши керәк екәнлигини чүшинәмду? (Кол. 3:10). Бу соалларға җавап елиш үчүн, униңға өз пикрини ейтишқа ярдәмлишидиған хушмуамилә соалларни қоюң, андин тиңшаң (Мәт. 16:13—16).
4. Үгәнгүчигә қайси бир тәлиматни чүшиниш яки әмәлийәттә пайдилиниш қийин болса немә қилиш керәк?
4 Адәмгә сиңип кәткән адәтлири һәм көзқарашлиридин айрилиш үчүн көп вақит керәк (Кор. 2-х. 10:5). Үгәнгүчи адәм билгәнлирини қобул қилмиса яки әмәлийәттә пайдиланмиса, немә қилиш лазим? Худа Сөзи һәм муқәддәс роһ униң жүригигә тәсир қилиши үчүн йетәрлик вақит берип, чидамлиқ болуң (Кор. 1-х. 3:6,7; Ибр. 4:12). Үгәнгүчи Муқәддәс Китапниң тәлиматини чүшәнмисә яки әмәлийәттә пайдиланмиса, уни мәҗбурлашниң орниға келәрки мавзуға өтүш тоғра. Әгәр биз униңға чидамлиқ һәм меһир-муһәббәт билән тәлим бәрсәк, өз вақти кәлгәндә у һаҗәтлик өзгиришләрни қилиши мүмкин.