Җасарәтлик киши

ЙӘР йүзидә кишиләр көпийишкә башлиди. Нурғун кишиләр Қабилға охшаш яман ишларни қилғили турди. Амма бир киши башқиларға охшиматти. У кишиниң исми Һанух болуп, у наһайити җасарәтлик киши еди. Униң әтрапидики кишиләр яман ишларни қиливатқан болсиму, лекин Һанух йәнила Худаға хизмәт қилишни давамлаштурди.

Өтмүштә кишиләрниң немә үчүн шундақ яман ишларни қилғанлиғини биләмсиз? Ойлап беқиң, Адәм ата билән Һава аниниң Худаға итаәтсизлик қилип, Худа йемәңлар, дегән мевини йейишигә ким сәвәпчи болған? У дәл бир яман периштә болуп, Муқәддәс Китап уни, Шәйтан, дәп атиған еди. Шәйтан һәммә кишини яман иш қилишқа аздуриду.

Күнләрниң биридә, Йәһва Худа Һанух пәйғәмбәрни башқиларға бир ишни йәткүзүшкә буйриди, амма кишиләр униң сөзигә қулақ салмиди. У кишиләргә: “Худа бир күни, барлиқ яман кишиләрни йоқ қилиду”, деди. Кишиләр бу гәпни аңлиғанда, бәлким бәкму аччиқланған, һәтта улар Һанухни өлтүрүшни ойлиған болуши мүмкин. Шуңа, Һанух җасарәтлик болғандила, Худаниң немә қилмақчи болғанлиғи тоғрисида жүрәклик билән башқиларға ейталатти.

Худа, Һанух пәйғәмбәрниң шу яман адәмләрниң арисида узунирақ яшишини халимиди. Һанух пәқәт 365 жил яшиди. Немә үчүн пәқәтла “365 жил” яшиди, дәймиз? Сәвәви, шу заманларда, адәмләр бүгүнки күндики адәмләргә қариғанда, көп күчлүк болуп узун яшатти. Әмәлиятта, Һанухниң оғли Мәтушәлаһ 969 жил яшиған еди!

Һанух пәйғәмбәр өлгәндин кейин, кишиләр техиму көп яман ишларни қилди. Муқәддәс Китап: “Инсанларниң рәзиллигини, нийитиниң һәр қачан яманлиғини,.. Йәр йүзиниң зораванлиққа толғанлиғини”, баян қилиду.

Шу заманларда, йәр йүзиниң немә үчүн шунчә көп яман ишларға толғанлиғини биләмсиз? Сәвәви, Шәйтан йеңи бир усул билән кишиләрни яман ишларни қилишқа қутратқан еди. Кейинки парчә һекайидә, шу тоғрисида үгинимиз.