Исраиллар арисидики оғри

У АДӘМНИҢ өз чедирида немини көмүп қоюватқанлиғиға қараң! Бир чирайлиқ тон, бир зихчә алтун вә бир қанчә парчә күмүч. У адәм мошуларни Ериха шәһиридин елип кәлгән еди. Бирақ, Ериха шәһиридики нәрсиләрни чоқум қандақ қилиши керәк еди? Ядиңизда барму?

Барлиқ нәрсиләр чоқум йоқ қилинип, пәқәт алтун-күмүчләр Йәһваниң ибадәт чедириниң ғәзнисигә тапшурулуши керәк еди. Амма, улар Йәһва Худаниң буйруғиға бойсунмиди. Йәни, униңға тәәллуқ нәрсини оғрилиди. Әву адәмниң исми Әкан вә униң билән турғанлар аилисидикиләр. Зади немә иш йүз бәргәнлигигә қарап бақайли.

Әкан бу нәрсиләрни оғрилиғандин кейин, Йәшу бәзи кишиләрни Ай, дегән шәһәргә қарши уруш қилишқа әвәтти. Амма, улар җәңдә мәғлуп болди. Бәзиләр өлтүрүлүп, қалғанлири қечип кәтти. Йәшу қаттиқ қайғуруп, жиқилип йүзини йәргә йеқип Пәрвәрдигар Йәһваға дуга қилди: “Немә үчүн мундақ мәғлуп болушимизға йол қойдуң?”.

Йәһва җавап берип: “Орниңдин тур! Исраил хәлқи гунаға патти. Улар чоқум йоқ қиливетиш вә Пәрвәрдигарниң ибадәт чедириға тапшурушқа тегишлик болған нәрсиләрниң бәзисини өзигә елип қалди. Чирайлиқ бир тонни оғрилап йошурди. Сән у нәрсиләрни вә шуларни алған кишини йоқ қилмиғичә, Мән силәрни бәрикәтлимәймән”, деди. Һәм Йәһва у яман ишни қилған кишини Йәшуға көрситип беридиғанлиғини ейтти.

Шуниң билән, Йәшу барлиқ хәлиқни бир йәргә жиғди. Йәһва Әкан дегән яман адәмни көрсәтти. Әкан: “Мән гуна қилдим. Мән чирайлиқ бир тонни вә зихчә алтунни вә бир қанчә парчә күмүчни көрүп, уларға егә болушни бәкму арзу қилғач, уларни мән алдим. Уларни чедиримниң ичигә көмүлгән җайдин тапалайсиләр”, деди.

Шу нәрсиләрни тепип, Йәшуниң қешиға елип кәлгәндә, у Әканға: “Немә үчүн хәлиққә зиянкәшлик қилип, уларға бала кәлтүрисән? Әнди Йәһва саңа бала кәлтүриду!”, деди. Шуниң билән, барлиқ хәлиқ Әкан вә униң аилисидикиләрни чалма-кесәк қилип өлтүрди. Мошу вақиә, өзимизгә тәәллуқ әмәс нәрсиләрни һәргизму алмаслиғимиз керәклигини көрситиду, шундақму?

Шу ишлардин кейин, исраил хәлқи қайта Ай шәһиригә қарши уруш қилди. Бу новәт Йәһва өз хәлқигә ярдәм бәргәч, улар җәңдә ғалибә қилди.