Әң күчлүк киши

БИЛӘМСИЗ, йәр йүзидә яшап өткән инсанлар арисидики әң күчлүк адәм ким? У адәм Шимшон исимлик һаким. Пәрвәрдигар Йәһва Шимшонға шундақ күч-қувәт бәргән еди. Һәтта Шимшон туғулуштин илгири, Йәһва униң анисиға: “Пат арида бир оғул туғисән. У башламчи болуп, исраилларни филистинликләрдин қутқузиду”, дегән еди.

Филистинликләр Қанан зиминида яшайдиған яман бир хәлиқ еди. Уларниң җәңчилири көп болуп, улар исраил хәлқигә һәқиқәтән көп зулум қилди. Бир қетим, Шимшон филистинликләр яшайдиған җайға маңғинида, чоң бир шир һөкүрәп униңға етилип кәлди. Бирақ, у қуруқ қол ширни өлтүрди. У йәнә нәччә йүзлигән яман нийәтлик филистинликләрни өлтүрди.

Кейин, Шимшон Диләйлаһ исимлик аял билән муһәббәтләшти. Филистин хәлқиниң йетәкчилири Диләйлаһқа, әгәр у Шимшонниң шунчә күчлүк болушиниң сирини ейтип бәрсә, һәр бири униңға 1100 парчә күмүч беридиғанлиғини вәдә бәрди. Диләйлаһ шу пулларға еришишни бәк арзу қилатти. У Шимшонниң яки Худа хәлқиниң һәқиқий дости әмәс еди. Шуңа, у Шимшондин неминиң уни шунчә бәк күчлүк қилғанлиғиниң сәвәвини қайта-қайта сориди.

Әң ахири, Диләйлаһ Шимшонни өзиниң қандақ күчлүк болғанлиғиниң сирини дәп беришкә қайил қилди. У: “Мениң чечим һеч қачан кесилгән әмәс. Мән туғулушумдин, Худа мени өзиниң, нәзир, дәп атилидиған алаһидә бир хизмәтчиси болушқа таллиған. Әгәр мениң чечим кесилсә, мениң күчүм йоқилиду”, дәп ейтип бәрди.

Диләйлаһ буни билгәндә, у Шимшонни аста өзиниң қучиғида ухлитивәтти. Андин кейин, униң чечини кесиш үчүн бир адәмни чақирди. Шимшон уйқидин ойғанғанда, униң күчи йоқалди. Андин филистинликләр кирип, уни тутти. Улар униң икки көзини оюп елип, уни қул қилип ишләтти.

Бир күни, филистинликләр өзлириниң илаһи Дагонға чоқунуш үчүн чоң бир зияпәт өткүзди. Һәм улар Шимшонни мазақ қилип ойнаш үчүн зиндандин елип чиқти. Шимшонниң чечи йәнә өскән еди. Шимшон уни йетиләп маңған балиға: “Мән бу қурулушни тирәп туридиған түврүкләрни тутай, мени башлап бар”, деди. Андин кейин, Шимшон Йәһвадин күч-қувәт тиләп дуга қилип, түврүкләрни иштирип: “Мән филистинликләр билән биргә өләй”, дәп вақириди. 3000 филистинлик бу зияпәткә қатнашқан еди. Шимшон егилип түврүкләрни қаттиқ иштәргәндә, у қурулуш өрүлүп чүшүп, шу яман нийәтлик кишиләрниң һәммиси өлди.