Давутниң өйигә бала-қазаниң келиши

ДАВУТ Йерусалимда һөкүмранлиқ қилишқа башлиғандин кейин, Йәһва Давут падишаниң қошунини нурғун җәңләрдә дүшмәнлири үстидин ғалибигә ериштүрди. Алла Йәһва исраилларни Қанан зиминиға ериштүрүшни вәдә қилған еди. Мана һазир Йәһваниң ярдимидә, вәдә қилинған барлиқ зимин ахири уларниң болди.

Давут дана һөкүмран болуп, Йәһвани сөйәтти. Шуңа, у Йерусалимни егиләп, узун өтмәй, Йәһваниң әһдә сандуғини у йәргә йөткәп кәлди. У һәм әһдә сандуғини қоюш үчүн ибадәтхана селишни арзу қилди.

Кейинки күнләрдә, Давут падиша еғир бир гуна қилди. У башқиларға тәәллуқ нәрсиләрни елишниң хата екәнлигини биләтти. Шундақтиму, бир күни кәчтә, Давут өз ордисиниң өгүзисидә турғанда, пәскә қариди вә наһайити чирайлиқ бир аялни көрүп қалди. У аялниң исми Бәтшәба болуп, униң ериниң исми Урия еди. Урия Давутниң қошунида әскәр еди.

Давут Бәтшәбаға еришишни бәкму арзу қилған еди. Шуңа, адәм әвәтип, уни өз өйигә елип кәлди. Униң ери җәңгә кәткән еди. Давут Бәтшәба билән биллә ятти. Кейин, Бәтшәба һамилдар болуп қалғанлиғини билди. Давут падиша бәк әнсириди. Шуңа, у өз қошуниниң сәркәрдиси Йоабқа, Урияни алдинқи сәп җәң мәйданиға әвәтиңлар, җәңдә өлсун, дәп бири арқилиқ гәп әвәтти. Урия өлгәндин кейин, Давут Бәтшәбани аяллиққа алди.

Йәһва Давутниң бу иши үчүн қаттиқ аччиқланди. Шуңа, у хизмәтчиси Натанни Давутниң гунайини көрситип беришкә әвәтти. Қараң, Натан пәйғәмбәр Давут падишаға сөзләватиду. Давут өзиниң қилған гуналири үчүн пушайман қилди. Шуңа, Йәһва уни өлүмгә һөкүм қилмиди. Бирақ, Йәһва: “Сән шундақ рәзил ишларни қилғанлиғиң үчүн, сениң өйүңгә көп бала-қазалар келиду”, деди. Давутниң өйигә зади қандақ бала-қазалар кәлгәнду, һә!?

Авал, Бәтшәба туққан оғул өлүп кәтти. Андин кейин, Давутниң тунҗа оғли Амнон сиңлиси Тамар ялғуз қалғанда, мәҗбурий униң номусиға тәгди. Давутниң оғли Абсалом буниң үчүн қаттиқ аччиқлинип, Амнонни өлтүрүвәтти. Кейин, Абсалом хәлиқниң қарши елишиға еришти. Шуңа, у өзини падиша дәп атиди. Ахирида, Абсалом өлтүрүлүп, Давут Абсалом үстидин ғалибә қилди. Һәқиқәтән, Давут падиша нурғун аваричилиққа йолуқти.

Шу барлиқ ишлар йүз бериватқан мәзгилдә, Бәтшәба бир оғул туққан болуп, исми Сулайман еди. Давут қерип, кесәлчан болуп қалғанда, униң оғли Адонияһ падишалиқ тәхтидә олтурушқа урунди. Шуниң билән, Давут падиша Садоқ исимлиқ роһанийни, Сулайманниң бешиға яғ қуюп, униң падиша болидиғанлиғини җакалашқа әвәтти. Шуниңдин кейин, узун өтмәй Давут 70 йешида өлүп кәтти. У 40 жил һөкүмранлиқ қилған еди. Мана әнди, Сулайман Исраилға падиша болди.