Падишалиқниң бөлүнүши

НЕМӘ үчүн, бу адәмниң өз тонини житип парчә қиливатқанлиғини биләмсиз? Йәһва у адәмгә шундақ қилишни буйруған еди. У адәм Худаниң пәйғәмбири Ахия. Пәйғәмбәрниң немә иш қилидиғанлиғини биләмсиз? Пәйғәмбәр — Йәһва Худаниң ярдими билән кәлгүсидә немә иш болидиғанлиғини алдин ейтиду.

Ахия һазир Йеробоамға сөз қиливатиду. Йеробоам болса Сулайман падиша қурулуш ишлирини башқурушқа қойған киши еди. Ахия йол үстидә Йеробоамни учратқанда, бу ғәлитә ишни қилған еди. Ахия учисиға кийгән йеңи тонини селип, 12 парчә қилип житти. Андин у Йеробоамға: “Бу 10 парчини сән ал”, деди. Ахияниң немә үчүн Йеробоамға 10 парчини бәргәнлигини биләмсиз?

Ахия чүшәндүрүп, Йәһваниң Сулаймандин падишалиқни тартип елип, Исраилниң 10 қәбилисини Йеробоамға беридиғанлиғини ейтти. Бу пәқәт Исраилниң икки қәбилисиниң Сулайманниң оғли Реһабамниң һөкүмранлиғида болидиғанлиғини көрситәтти.

Сулайман Ахияниң Йеробоамға немә дегәнлигини аңлиғанда, у қаттиқ ғәзәпләнди. Шуңа, Йеробоамни өлтүрмәкчи болди. Амма, Йеробоам Мисирға қечип кәтти. Узун өтмәй, Сулайман өлди. У 40 жил падиша болған еди. Мана әнди униң оғли Реһабам падиша болди. Йеробоам Мисирда Сулайманниң өлүм хәвирини аңлиған еди. Шуңа, у Исраил зиминиға қайтип кәлди.

Реһабам ақ көңүл падиша әмәс еди. У хәлиқләргә, һәтта атиси Сулаймандинму бәк зулум қилди. Йеробоам вә башқа йетәкчиләр падиша Реһабамниң қешиға берип, хәлиққә рәһим-шәпқәт қилишни сориди. Амма, Реһабам қулақ салмиди. Әксичә, у илгирикидинму бәк зулум қилди. Шуңа, хәлиқ Йеробоамни Исраилниң 10 қәбилисигә падиша қилди. Лекин, Бинямин билән Йәһуда қәбилиси йәнила Реһабамни өзлиригә падиша қилди.

Йеробоам өз хәлқиниң Йерусалимға берип, Йәһваниң ибадәтханисида ибадәт қилишини халимиди. Шуңа, у алтундин икки мозай ясап, 10 қәбилә падишалиғидики кишиләрни алтун мозай бутларға чоқундурди. Узун өтмәй, бу падишалиқ зимини җинайәтләр вә зораванлиқларға толуп кәтти.

Икки қәбилә падишалиғи һәм аваричилиққа учриди. Реһабам падиша болуп бәш жил өтмәй, Мисир падишаси Йерусалимға һуҗум қилип кәлди. У Йәһваниң ибадәтханисидин нурғун байлиқни елип кәтти. Шуңа, ибадәтхана пәқәт азғина бир мәзгил әслидики һалитини сақлиған еди.