Мордикай билән Әстир

ӘЗРА Йерусалимға қайтиштин бир нәччә жил илгирики вақитни әсләп бақайли. Мордикай билән Әстир Персия падишалиғида муһим орунға егә исраиллар болуп, Әстир болса ханим еди. Униң нәврә акиси Мордикайниң һоқуқи падишадин кейинки орунда туратти. Улар қандақларчә шундақ орунға егә болғанлиғини көрүп бақайли.

Әстирниң ата-анилири өлүп кәткәндә, у бәк кичик еди. Шуңа, уни Мордикай беқип чоң қилди. Персия падишаси Аһашвирушниң Шошан (Суза) дегән шәһәрдә бир ордиси бар болуп, Мордикай униң бир хизмәткари еди. Бир күни, ханим Вашти падишаға итаәт қилмиди. Шуңа, падиша өзиниң ханими болуш үчүн башқа бир аял таллиди. Падиша кимни таллиған биләмсиз? У дәл яш, чирайлиқ қиз Әстир.

У тәкәббур кишини көрдиңизму? Кишиләр униңға тизлинип салам бериватиду. Бу адәм болса Һаман. У Персиядә чоң һоқуққа егә киши еди. Қарисиңиз Мордикай бир яқта олтириду. Һаман Мордикайниңму униңға баш егишини көрүшни бәкму халатти. Бирақ, Мордикай һәргизму ундақ қилмиди. Чүнки у, мундақ яман адәмгә баш егиш тоғра әмәс, дәп қариған еди. Бу Һаманниң қаттиқ аччиғини кәлтүрди. Шуңа, у бир амал ойлап тапти.

Һаман берип падишаға исраиллар һәққидә ялған гәп қилди. У: “Силиниң қанунлириға бойсунмайдиған яман хәлиқ бар, улар өлүмгә лайиқ”, деди. Аһашвируш өз аяли Әстирниң исраил екәнлигини билмәтти. Шуңа, у Һаманниң сөзини аңлап, бәлгүләнгән күндә барлиқ исраиллар өлтүрүлсун, дәп қанун чиқарди.

Мордикай чиқирилған қанунни аңлап, униң көңли бәк беарам болди. Шуниң билән, у Әстиргә хәвәр йәткүзүп: “Сән чоқум падишаға ейтип, бизни қутқузуп қелиш үчүн униңдин өтүнгин”, деди. Персия падишалиғида, падиша чақирмай туруп, өзлигидин униң билән көрүшүшкә бериш қанунға хилап иш еди. Амма, Әстир падиша чақирмай туруп, униң билән көрүшүшкә барди. Падиша униңға алтун һасисини узатти, буниң мәнаси у өлтүрүлмәйду. Әстир падиша билән Һаманни чоң бир зияпәткә чақирди. Зияпәттә падиша Әстирдин қандақ илтипатқа еришишни халайдиғанлиғини сориди. Әгәр падиша билән Һаман әтидики йәнә бир зияпәткә кәлсә, Әстир шу вақитта падишаға өзиниң тәливини ейтидиғанлиғини деди.

Бу зияпәттә, Әстир падишаға: “Мән вә мениң хәлқим өлтүрүлидиған болдуқ”, деди. Падиша ғәзәплинип: “Ким шундақ қилишқа җүръәт қилалайдикән?”, дәп сориди.

Әстир: “Дүшминимиз, бу қара нийәт адәм, Һаман!”, деди.

Падиша техиму дәрғәзәп болди. Шуниң билән, у Һаманни өлтүрүшкә буйруқ қилди. Андин кейин, падиша өзидин кейинла туридиған иккинчи дәриҗидики һоқуқни Мордикайға бәрди. Мордикай шуниң билән, исраиллар өлтүрүлсун, дәп бәлгүләнгән шу күндә, уларниң һаятини қоғдап қелиши үчүн, дүшмәнлири билән җәң қилишқа рухсәт қилғанлиқ йеңи қанунини чиқарди. Мордикай һазир чоң һоқуққа егә киши болғач, нурғун башқа милләтләр исраилларниң өз дүшмәнлириниң қолидин қутулушиға ярдәм бәрди.