Дәмәшққә баридиған йол үстидә

ЙӘРДӘ ятқан у адәм ким, биләмсиз? У Саул. Истипанни чалма-кесәк қилғанларниң чапанлириға қарап турған адәм, ядиңизда барму? Бу дәл шу адәм. Әву күчлүк нурға қараң! Зади немә иш йүз бериватқанду?

Истипан өлтүрүлгәндин кейин, Саул башчи болуп һәзрити Әйсаниң әгәшкүчилиригә зиянкәшлик қилиш үчүн, уларни издәп жүрди. У өйму-өй кирип, Әйсаниң әгәшкүчилирини тартип чиқип, зинданға ташлиди. Нурғун шагиртлар башқа шәһәрләргә қечип кетип, у йәрләрдә “хуш хәвәр” ни җакалашқа башлиди. Бирақ, Саул башқа шәһәрләргә берип, Әйсаниң әгәшкүчилирини тутти. Мана у һазир Дәмәшққә баридиған йол үстидә. Амма, йол үстидә мундақ бир әҗайип иш йүз бәрди:

Тосаттин, күчлүк бир нур асмандин чүшүп, Саулниң әтрапини йорутувәтти. Биз көрүп турғандәк, у йәргә жиқилди. Андин кейин, бир аваз: “Саул, Саул! Немишкә маңа зиянкәшлик қилисән?”, деди. Саул билән биллә маңған кишиләр нурни көрди вә авазни аңлиди. Бирақ, улар немә дегәнлигини чүшинәлмиди.

Саул: “Әй тәхсир, Сән Кимсән?”, деди.

Һелиқи аваз җавап берип: “Мән сән зиянкәшлик қиливатқан Әйса”, деди. Әйса Мәсиһ шундақ дегән еди, чүнки Саул Әйсаниң әгәшкүчилиригә зиянкәшлик қилғанда, Әйса худди өзи зиянкәшликкә учраватқандәк һис қилған еди.

Шуниң билән, Саул: “Әй устаз, немә иш қилишим керәк”, дәп сориди.

Әйса Мәсиһ: “Орнуңдин туруп, Дәмәшқ шәһиригә кир, немә қилишиң керәклигини бири саңа ейтип бериду”, деди. Саул орнидин туруп, көзини ачти. У һеч нәрсини көрәлмиди. У қарғу болди! Шуңа, униң билән кәлгән кишиләр Саулни қолидин йетиләп Дәмәшққә елип кирди.

Әйса Мәсиһ Дәмәшқтә туридиған шагиртлиридин биригә сөз қилип: “Һанания, орнуңдин тур. Сән Түз дегән кочиға бар. Йәһуданиң өйидин Саул исимлиқ бир адәмни тап. Мән уни мениң алаһидә хизмәтчим болушқа таллидим”, деди.

Һанания шу бойичә қилди. У Саул билән көрүшкәндә, у қолини униң учисиға қоюп: “Устаз, сени көридиған болсун вә сени муқәддәс роһқа чөмсун дәп, мени әвәтти”, деди. Шу һаман, Саулниң көзлиридин белиқ қасириғидәк нәрсиләр чүшүп, униң көзлири көридиған болди.

Әйса Мәсиһ Саулни алаһидә хизмәткә салди, йәни уни һәр хил милләт кишилиригә хуш хәвәр йәткүзүшкә әвәтти. У әлчи Павлус дегән исим билән һәммә кишигә тонулди. Кейинирәк, у тоғрисидики нурғун ишларни үгинимиз. Бирақ, биз авал Худа Петрусни немә иш қилишқа әвәтти, көрүп бақайли.