Бир пәйғәмбәрниң кәлгүси тоғрисидики ғайиванә көрүнүшләрни көрүши

ХУДАҒА садақәтлик болған яш жигит Даниял Йерусалим вәйран қилиништин илгири Бабилонға әсиргә елинип кетилди. У вә башқа йәһудийлар җәңдә мәғлуп болған җәнубий падишалиғи әсирликкә елинип кетилгән болсиму, бирақ уларға бәзи әркинликләр берилди. Даниял әсирдә яшиған узун жиллар давамида, у Худа тәрипидин көп бәрикәтләргә еришти. Һәтта, шир өңкүридә өлүмдин қечип қутулди вә Худадин кәлгүси тоғрисидики ғайиванә көрүнүшләрни көрди. Даниял пәйғәмбәрниң бәшарәтлириниң әң муһим асаслиғи Мәсиһ вә униң һөкүмранлиғиғи һәққидә еди.

Даниял Мәсиһниң қачан келидиғанлиғидин хәвәрдар болуши. Йерусалимниң тамлирини қайта қуруш буйруғи чүшкәндин башлап, 69 жил һәптиси өткәндин кейин, Худаниң хәлқи күткән Мәсиһниң мәйданға келидиғанлиғи Даниял пәйғәмбәргә ашкарә қилинған еди. Адәттә, бир һәптә йәттә күн болғандәк, бир жил һәптиси йәттә жил болған. Буйруқ Даниял өлүп көп жиллар өткәндин кейин, йәни миладидин илгәрки 455-жили чүшүрүлгән. Шу вақиттин башлап, 483 жил йәни 69 «һәптә» өтүп, милади 29-жилда ахирлашқан. Шу жили немә иш йүз бәргәнлиги тоғрисида, кейинирәк мошу китапчида көрүп өтүмиз. Даниял пәйғәмбәр гунаниң жуюлуши үчүн Мәсиһниң өлтүрүлиши һәққидә бәшарәт ейтқан (Даниял 9:24—26).

Мәсиһниң асманда падиша болуши. Даниял пәйғәмбәр, асмандики ғайиванә көрүнүштә, Худаниң тәхтигә йеқинлашқан «ибн адәмгә [инсан оғлиға] охшаш бир кимәрсә [киши]» йәни Мәсиһни көрди. Йәһва Мәсиһкә «сәлтәнәт, җалал [улуқлуқ] вә падишалиқ» бәрди. Шу падишалиқ мәңгү мәвҗут болиду. Даниял пәйғәмбәр, Мәсиһниң падишалиғи тоғрисида башқа бир әҗайип тәпсилатларни, йәни падиша билән «Һәқ Тааланиң муқәддәслири» дәп аталған топ кишиләрниң бирликтә һөкүмранлиқ қилидиғанлиғини көрди (Даниял 7:13, 14, 27).

Падишалиқниң бу дуниядики барчә һөкүмәтләрни йоқ қилиши. Худа Даниял пәйғәмбәргә, Бабилон падишаси Небоқаднәсарниң көңлини беарам қилған чүшини өрүп бәрди. Падиша чүшидә беши алтун, көкрәк вә биләклири күмүч, қосақ вә йотилири мис, пачақлири төмүр, путлири төмүр вә лайниң арилашмиси болған бир һәйкәлни вә тағдин ғулиған бир таш шу һәйкәлниң асан сунидиған путиға соқулуп, уни кукум талқан қиливәткәнлигини көргән. Даниял пәйғәмбәр һәйкәлниң һәр қайси бөләклири, алтун баш болған Бабилондин башланған дуния күчлириниң алмишишиға символ қилинған дәп чүшәндүргән. Даниял йәнә бу рәзил дунияниң әң ахирқи күчлири һөкүмранлиқ жүргүзгән дәвирдә, Худа Падишалиғиниң һәрикәткә келидиғанлиғини алдин көрүп, у Падишалиқ бу дуниядики барчә һөкүмәтләрни йоқ қилип, өзи мәңгү һакимийәт жүргүзидиғанлиғидин бәшарәт бәргән (Даниял 2).

Даниял пәйғәмбәр наһайити қерип кәткән болсиму, у Бабилонниң ишғал қилинғанлиғини өз көзи билән көрди. Пәйғәмбәрләр бәшарәт бәргәндәк, Корәш падиша Бабилон шәһирини ишғал қилди. Узун өтмәй, дәл бәшарәттә ейтилғандәк уларниң журти 70 жил қақас-чөл ташливетилгәндин кейин, йәһудийлар әсирликтин азат қилинди. Садақәтмән валийлар, роһанийлар вә пәйғәмбәрләрниң йол башчилиғи астида, йәһудийлар әң ахирда Йерусалимни қайта турғузуп, Йәһваниң ибадәтханисини өз қелипиға кәлтүрди. Ундақта, шу 483 жил өтүп кәткәндин кейин, немә иш йүз бәриши керәк еди?

Даниял китавиға асасланған.