4-ПАРЧӘ

Алла ким?

АДӘМЛӘР нурғун илаһларға ибадәт қилишиду. Амма Муқәддәс китап пәқәт бирла һәқ Алла бар дәп тәлим бериду. У йеганә тәңдиши йоқ, Әң Улуқ вә Мәңгү Бар Болғучидур. У асман вә йәрдики барлиқ мәвҗудатларни яратқан вә бизләргә һаятлиқ бәргән. Шуңа ялғуз Худағила ибадәт қилиш хастур.

Муса Он пәрман йезилған таш тахтайларни тутуп туриду — Пәриштиләр арқилиқ Муса пәйғәмбәргә Тәврат қануни чүширилгән

Алланиң нурғун нам-унванлири бар, амма Униң хас исми — ЙӘҺВА. У Муса пәйғәмбәргә: «Мана немини сән Исраил оғуллириға ейтисән: “Йәһва, әҗдатлириңларниң Рәбби, Ибраһимниң Худаси, Исһақниң Худаси вә Яқупниң Худаси мени силәргә әвәтти” дәйсән. Бу әсирләр бойи Мениң исмим вә мошу исим астида Мени әвлаттин әвлатқа әстә сақлайду»,— дәп буйруқ қилған (Чиқиш 3:15). Муқәддәс Язмиларда Йәһва дегән исим 7000 қетимчә учрайду. Зәбур 83:18-айәттә [ЙД] Худа тоғрисида: «Исми Йәһва болған Сән, пүткүл йәр йүзи үстидә Әң Улуқ Болғучидурсән»,— дәп йезилған.

Худаниң исми бәлгүләп қоюлған Өлүк деңиздики орам язмилар — Қедимқи өлүк деңиз қол язмилирида Худаниң исми көрситилгән

Һечбир инсан Худани көргини йоқ. Худа Муса пәйғәмбәргә: «Сән Мениң үзүмни көрәлмәйсән, чүнки һечбир адәм Мени көрүп, тирик қалмайду»,— дегән (Чиқиш 33:20). Худа асманда орун алған вә инсанлар уни көрәлмәйду. Худаға вәкиллик қилиду дәп бутлар вә сүрәтләрни ясап, уларға чоқунуш хата. Алла Йәһва Муса пәйғәмбәргә: «Өзүң үчүн жуқурида асманда, төвәндә йәрдә вә йәр астидики яки судики һечқандақ бир нәрсиниң шәклидә ойма бут яки сүрәтләрни ясима. Уларниң алдида сәҗдә қилма яки уларға қуллуқ қилма. Чүнки мән, Худайиң Йәһва, мутләқ садақәтни тәләп қилидиған Худадурмән»,— дәп буйруқ бәргән (Чиқиш 20:2—5, ЙД). Кейин Худа йәнә Йәшая пәйғәмбәргә: «Мән Пәрвәрдигардурмән [Йәһвадурмән]. Мениң намим шудур. Шан-шәривимни башқа бирисигә, Маңа тәвә болған мәдһийини ойма мәбудларға бәрмәймән»,— дегән (Йәшая 42:8, КТ).

Гәрчә бәзиләр Худаға ишәнсиму, У тоғрисида билиш вә Униңға йеқинлишиш мүмкин әмәс дәп қарап, уни сөйүшниң орниға вәһимигә чүшүп қорқишиду. Сиз өзүңиз қандақ қарайсиз? Яратқучи шәхсән сизгә көңүл бөләмду? Сиз Худа тоғрисида билимгә егә болаламсиз? Һәтта Униңға йеқинлишаламсиз? Төвәндә Муқәддәс Язмиларниң Худаниң есил пәзиләтлири тоғрисида немә дәйдиғанлиғини көрүп бақайли.

Худаниң муқәддәс роһи вә пәриштилири

Худа Өз ирадисини қандақ әмәлгә ашуриду? У бәзидә муқәддәс роһни әвәтиш арқилиқ әмәлгә ашуриду. Худаниң муқәддәс роһи у шәхс яки бир пәриштә әмәс. Бәлки у һәрикәт күч болуп, Худа ирадә қилған барчә ишларни вуҗутқа чиқиришта, мәсилән, асман билән йәрни яратқинида, мошу һәрикәт күчни ишләткән. Зәбур китавида: «Асманлар Йәһваниң сөзи билән яритилди, Униңдики барчә нәрсиләр еғизидин чиққан нәпәстин пәйда болди»,— дәп хатириләнгән (Зәбур 33:6, ЙД). Яритилиш 1:2-айәт, йәр йүзи су билән қапланған шу вақитларда, «Худаниң һәрикәт күчи сулар үстидә пәрваз қилип жүрәтти», у йәр йүзини инсанларға макан қилиш үчүн тәйяр қиливататти, дәп чүшәндүриду. Шу чағда Худа муқәддәс роһни ишлитип, йәр йүзидики барлиқ мәвҗудатларни яратқан.

Йәһва Худа Өз ирадисини әмәлгә ашурушта пәриштиләрниму ишләткән. У пәриштиләрни асманда Өзи билән биллә яшашқа яратқан. Пәриштиләр зор күч-қудрәткә егә болуп, Худаниң сөзлирини йәткүзгәндин башқа йәнә муһим вәзипиләрни орунлиған. Мәсилән, Муқәддәс Язмилар Тәврат қануниниң пәриштиләр арқилиқ Муса пәйғәмбәргә чүширилгәнлигини тилға алиду. Униңдин башқа, пәриштиләр Худаниң йәр йүзидики хизмәтчилиригә ярдәм қилған. Шу һәқтә, Муқәддәс китапта пәриштиләр һәққидә мундақ йезилған: «Уларниң һәммиси қутқузулуш мирасхорлириға хизмәт қилиш үчүн әвәтилгән роһлар» (Ибранийларға 1:14; 2:2).