Хизмәт ярдәмчилири қандақ вәзипиләрни атқуриду?

Муқәддәс китапта җамаәткә ғәмхорлуқ қилидиған әрләрниң икки топи һәққидә ейтилиду. Булар «назарәтчиләр билән хизмәт ярдәмчилири» (Филипиликләргә 1:1). Адәттә һәрбир җамаәттә бирнәччә бурадәр әшундақ хизмәт қилиду. Хизмәт ярдәмчилири қандақ вәзипиләрни атқуриду?

Улар ақсақаллар кеңишигә ярдәм бериду. Хизмәт ярдәмчилири — ишәнчлик вә роһий җәһәттин йетилгән кишиләр. Бу бурадәрләр җамаәттә тәшкилий вә башқиму муһим тапшуруқларни атқуриду. Мошу түпәйлидин ақсақаллар җамаәт әзалириға ғәмхорлуқ көрситишкә вә тәлим беришкә бағлиқ вәзипиләргә көпирәк көңүл бөләләйду.

Улар әмәлий ярдәм көрситиду. Бәзи хизмәт ярдәмчилири учришишларға келидиғанларни қарши елиш үчүн тайинлиниду. Башқилири болса аваз күчәйтиш қурулмилирини назарәт қилиш, әдәбиятларни тәхсим қилиш, җамаәтниң малийә һесавитини жүргүзүш вә җамаәт әзалириға вәз қилидиған территорияни бөлүп бериш қатарлиқ ишлар билән шуғуллиниду. Шундақла улар Ибадәт өйини сәрәмҗан тутушқа ярдәм бериду. Ақсақаллар улардин яшанған етиқатдашларға ярдәм беришни илтимас қилиши мүмкин. Хизмәт ярдәмчилири һәрқандақ ишни атқурушқа тәйяр болғанлиғи үчүн һөрмәткә лайиқ (Тимотийға 1-хәт 3:13).

Улар яхши үлгә көрситиду. Роһий җәһәттин йетилгән бурадәрләр хизмәт ярдәмчилири сүпитидә тайинлиниду. Улар учришишларда тапшуруқлар билән чиқип, етиқадимизни мустәһкәмләйду. Вәзилик хизмәткә рәһбәрлик қилип, бизни қизғин болушқа риғбәтләндүриду. Уларниң ақсақаллар кеңиши билән һәмкарлишиши җамаәтниң хурсән вә инақ болушиға һәссә қошиду (Әфәсликләргә 4:16). Вақит кәлгәндә улар ақсақал болуп хизмәт қилишқа лаяқәтлик болуши мүмкин.

• Хизмәт ярдәмчилири дегән кимләр?

• Җамаәтниң ишлирини орунлашқа хизмәт ярдәмчилири қандақ һәссә қошиду?