Худаниң йәргә тегишлик нийити қандақ?

1. Худа йәрни немә үчүн яратти?

Йәһва Худа йәр йүзини адәмләр үчүн яратти. Йәр — бизниң өйүмиз. Худа биринчи инсан җүпи болған Адәм ата билән Һава анини Ерәм дәп атилидиған әҗайип җәннәт беғиға орунлаштурған (Яритилиш 2:15—17). Демәк, Худа уларни асманда әмәс, йәрдә яшаш үчүн яратқан. Асманни болса, улардин бурун яритилған пәриштиләрниң макани қилған (Аюп 38:4, 7). Йәһва Адәм атиға вә униң пүткүл әвладиға йәрдә мәңгү өмүр сүрүш мүмкинчилигини бәрди (Йоһанниң 1-хети 2:17; Әлчиләр 17:26 оқуп чиқиң).

Авал җәннәт пәқәт Ерәм беғидила болған. Худа тунҗа инсан җүпигә пүткүл йәр йүзини җәннәткә айландурушини вә уни әвлатлири билән толтурушини тапшурған еди (Яритилиш 1:28). Йәр шари һечқачан йоқ болмайду. У адәмләрниң мәңгү макани болуп қалиду (Зәбур 104:5 оқуп чиқиң).

«Худа йәрни немә үчүн яратти?» дегән видеони көрүң

2. Немишкә бүгүн йәр җәннәт әмәс?

Адәм ата билән Һава ана Худаға қулақ салмиди, шуңа Худа уларни Ерәм беғидин қоғлап чиқарди. Мошундақ қилип, җәннәт йоқитилди вә мошу вақитқичә уни һечким әксигә кәлтүрәлмиди. Чүнки Муқәддәс китапта ейтилғинидәк, йәр зулумларниң қолиға чүшти (Яритилиш 3:23, 24 оқуп чиқиң).

Йәһва Худа Өзиниң адәмзатқа болған нийитидин ваз кәчтиму? Яқ! Худаниң қудрити чәксиз болғанлиқтин, ейтқанлирини сөзсиз орунлайду (Йәшая 45:18). У адәмзатқа тегишлик дәсләпки нийитини чоқум орунлайду вә йәрдә яңливаштин җәннәт болиду (Зәбур 37:11, 34 оқуп чиқиң).

3. Җәннәт қандақ әксигә келиду?

Худаниң тайинлиған Падишаси Әйса Мәсиһниң һөкүмранлиқ қилған вақтида йәр йүзи қайтидин җәннәткә айлиниду. Һар-Магедон дәп атилидиған урушта Әйса пәриштиләр билән биллә Худаға қарши чиққан һәммисини вәйран қилиду. Андин Әйса Шәйтанни һаңға 1000 жилға ташлайду. Худаға хизмәт қиливатқанларни болса, Әйса көрсәтмиләрни берип, қутулдуруп қалиду. Улар йәрдики җәннәттә мәңгү яшайду (Вәһий 20:1—3; 21:3, 4 оқуп чиқиң).

4. Қайғу-һәсрәт болмайдиған вақит қачан болиду?

Худа йәрдики зулумлуқни қачан йоқ қилиду? Әйса Мәсиһ бу вақитниң келип қалғинини қандақ «бәлгүгә» қарап билишкә болидиғинини ейтип кәткән. Бүгүнки дунияда болуватқан вақиәләр адәмзатниң келәчигигә хәтәр туғдуриватиду. Бу бизниң мошу заманниң ахирида яшаватқинимизни көрситиватиду (Мәтта 24:3, 7—14, 21, 22 оқуп чиқиң).

Әйса миңжиллиқ һөкүмранлиғида йәр йүзидики барлиқ қайғу-һәсрәтләрни йоқ қилиду (Йәшая 9:6, 7; 11:9). У Падиша болуп Худани яхши көргәнләрни гуналиридин азат қилиду. Шундақ қилип Худа Әйса арқилиқ кесәлләрни, қерилиқни һәм өлүмни йилтизи билән йоқ қилиду (Йәшая 33:24; Вәһий 21:4 оқуп чиқиң).

5. Келәчәктики җәннәттә ким яшайду?

Җәннәттә Худаға қулақ салидиған адәмләр яшайду (Йоһанниң 1-хети 2:17). Йәрдә болған чағда, Әйса әгәшкүчилиригә мөмүн адәмләрни издәп, уларға Худаға лайиқ болуш үчүн немә қилиш керәклигини үгитишкә тапшурған. Бүгүн Йәһва Худа миллионлиған адәмләрни келәчәктики йәрдә болидиған җәннәттә яшаш үчүн тәйярлаватиду (Зәфания 2:3). Йәһва гувачиларниң җамаәт өтүватқан Ибадәт өйлиридә адәмләр яхши әр-аял, ата-ана болушни үгиниватиду. Балилар ата-анилири билән Худаға ибадәт қилип, Муқәддәс китаптики тәлимләрниң пайдисини көрүш үчүн билим еливатиду (Вәһий 15:4 оқуп чиқиң).