4-БӨЛҮМ

Пулни қандақ хираҗәт қилиш керәк?

«Планлар мәслиһәт билән бекитиләр» (Пәнд-нәсиһәтләр 20:18).

Аилини барлиқ һаҗәтлик нәрсиләр билән тәминләш үчүн пул һаҗәт (Пәнд-нәсиһәтләр 30:8). Муқәддәс китапқа бенаән пул адәмни қоғдайду (Вәз 7:12). Пулға мунасивәтлик мәсилиләрни муһакимә қилиш әр-аял үчүн оңай әмәс болуши мүмкин, лекин пулниң аилигә соғақчилиқ елип келишигә йол қоймаңлар (Әфәсликләргә 4:32). Пулни немигә хираҗәт қилиш тоғрилиқ гәп болғанда, әр-аял бир-биригә ишинип, мәсилини әқил таразисиға селиши керәк.

1. ЙӘТТӘ ӨЛЧӘП, БИР КӘС

МУҚӘДДӘС КИТАПТА НЕМӘ ЙЕЗИЛҒАН? «Әгәр араңлардин бириңлар мунар салмақчи болса, у балдур олтирип, хираҗәтлири мунар селип түгитишкә йетәмду дәп, барлиқ хираҗитини һесаплап чиқмасму?» (Луқа 14:28). Хираҗәтни қандақ ишлитидиғанлиғиңларни биллә олтирип реҗиләш муһим (Амос 3:3). Силәргә һәқиқәтән немә керәклигини вә қанчилик пул сәрип қилидиғиниңларни йешивелиңлар (Пәнд-нәсиһәтләр 31:16). Янчуғиңизда пул болған үчүнла, бирәр нәрсини сетивелишниң һаҗити йоқ. Амал болса, қәризгә кирмәңлар. Мүмкинчилигиңларға қарап яшаңлар (Пәнд-нәсиһәтләр 21:5; 22:7).

ПАЙДИЛИҚ МӘСЛИҺӘТЛӘР

Айниң ахирида пулуңлар ешип қалса, уни қандақ тәхсим қилишни бирликтә қарар қилиңлар.
Аилә дарамитиңлардин артуқ чиқим чиқса, уни қандақ қисқартишқа болидиғанлиғини ойлап беқиңлар. Мәсилән, сиртта тамақлиништин көрә, өйдә тамақ тәйярлисаңлар болиду.

Әр-аял асасий чиқимлар тоғрилиқ мулаһизә қилишиватиду

2. ОЧУҚ-ЙОРУҚ МУАМИЛӘ ҚИЛИП, ТОҒРА КӨЗҚАРАШТА БОЛУҢ

МУҚӘДДӘС КИТАПТА НЕМӘ ЙЕЗИЛҒАН? «Пәқәт Йәһваниң алдидила әмәс, бәлки инсанларниң алдидиму мүлүк билән» растчил пайдилиниңлар (Коринтлиқларға 2-хәт 8:21). Қанчә пул тепип, қанчә хәшләватқанлиғиңизни өмүрлүк йолдишиңиздин йошурмаң.

Пул-бисатқа тегишлик муһим қарарларни қобул қилғанда, өмүрлүк җориңиз билән чоқум мәслиһәтлишиң (Пәнд-нәсиһәтләр 13:10). Пулға тегишлик мәсилиләрдә әр-аялниң бир-бири билән очуқ-йоруқ муамилә қилиши инақлиқни сақлашқа ярдәм бериду. Тапавитиңизни пәқәт өзүңизниңки дәп һесаплимай, бәлки аилиңизниң дәп қараң (Тимотийға 1-хәт 5:8).

Әр-аял керәк нәрсиләрни еливатқанда, сетип елинидиған нәрсиләрниң тизимини қараштуруватиду

ПАЙДИЛИҚ МӘСЛИҺӘТЛӘР

Һәрбириңлар өз мәйлиңларчә қанчә пул хәшләләйдиғиниңларни келишивелиңлар.
Пул һәққидә сөзлишиш үчүн, қийин мәсилиниң туғулушини күтүшниң һаҗити йоқ.

ПУЛҒА НИСБӘТӘН ТОҒРА КӨЗҚАРАШ

Гәрчә пул муһим болсиму, униң аиләңларниң иҗил-инақлиғини бузуп, һаҗәтсиз ғәм-тәшвишләрни пәйда қилишиға йол қоймаңлар (Мәтта 6:25—34). Бәхитлик өмүр сүрүш үчүн көп пул керәк әмәс. Муқәддәс китапта: «Һәрхил ачкөзлүктин сақлиниңлар»,— дәп мәслиһәт берилгән (Луқа 12:15). Пулға сетивелишқа мүмкин болған һеч нәрсә некариңизға тәң кәлмәйду. Шуңа, бариға шүкүр қилип, Худа билән болған мунасивитиңларға һечқачан сәл қаримаңлар. Шу чағда аилиңиз бәхитлик болуп, Алла Йәһваниң разилиғиға егә болисиләр (Ибранийларға 13:5).