Немә үчүн һаятимизни Худаға беғишлап, суға чөмдүрүлүшимиз керәк?

Өзүңизни Йәһва Худаға беғишлиғанда, дуа қилип, һаятиңизда пәқәт Униңғила ибадәт қилидиғанлиғиңизни вә Униң ирадисини биринчи орунға қоюдиғанлиғиңизни вәдә қилисиз (Зәбур 40:8). Униңдин кейин суға чөмдүрүлисиз. Шундақ қилиш арқилиқ башқиларға һаятиңизни Яратқучиға беғишлиғанлиғиңизни көрситисиз. Өзүмизни Йәһваға беғишлаш — һаятимизда чиқиридиған қарарлар арисидики әң муһим қарар. Немә сизни һаятиңизни өзгәртидиған бундақ муһим қарарни чиқиришқа дәвәт қилиши мүмкин?

1. Кишини һаятини Худаға беғишлашқа немә дәвәт қилиду?

Һаятимизни Йәһваға беғишлишимизға сөйгү-муһәббәт дәвәт қилиду (Йоһанниң 1-хети 4:10, 19). Муқәддәс китап бизни: «Йәһва Худани пүтүн жүригиң, пүтүн җениң, пүтүн әқлиң һәм пүтүн күчүң билән сөйгин» дегән әмиргә бойсунушқа үндәйду (Марк 12:30). Биз Худани сөйидиғанлиғимизни пәқәт сөзүмиздә әмәс, бәлки қилған ишимизда көрситимиз. Худди бир-бирини һәқиқий сөйидиған бир җүпләр той қилғанға охшаш, Йәһваға болған сөйгү-муһәббитимиз һаятимизни Униңға беғишлап, чөмдүрүлүшкә дәвәт қилиду.

2. Йәһва чөмдүрүлгән хизмәтчилирини қандақ бәрикәтләйду?

Суға чөмдүрүлгиниңиздә, Йәһваниң бәхитлик аилисиниң бир әзаси болисиз. Шуниң билән, Униң сизгә болған сөйгү-муһәббитини нурғун тәрәпләрдә һис қилисиз вә бүгүнки күндиму Униңға техиму йеқинлишисиз (Малаки 3:16—18ни оқуң). Йәһва Худа сизниң Атиңиз болиду, шундақла Уни вә сизни яхши көридиған дунияниң җай-җайлирида яшайдиған қериндашларға еришисиз (Марк 10:29, 30ни оқуң). Әлвәттә, сиз чөмдүрүлүштин илгири чоқум бәзи қәдәмләрни бесишиңиз лазим. Сиз Яратқучи Йәһва һәққидә билим елишиңиз, Уни сөйүшни үгинишиңиз вә Униң Оғлиға ишинишиңиз керәк. Ахирида, һаятиңизни чоқум Йәһваға беғишлишиңиз керәк. Әгәр бу қәдәмләрни бесип, кейин чөмдүрүлсиңиз, мәңгү шат-хорам яшаш имканийитиңиз болиду. Худа Сөзидә шундақ йезилған: чөмдүрүлүш силәрни қутқузалайду (Петрусниң 1-хети 3:21).

ЧОҢҚУРИРАҚ ҚЕЗИҢ

3. Кимгә ибадәт қилишни чоқум өзүмиз таллишимиз керәк

Қедимда бәзи исраиллар бирла вақитта һәм Йәһваға, һәм сахта илаһ Баалға ибадәт қилалаймиз дәп ойлиған. Амма Йәһва Худа бу кишиләрниң хата ой-пикрини түзитиш үчүн Илияс пәйғәмбәрни әвәткән. Падишалар 1-язма 18:21ни оқуң, кейин төвәндики соалға җавап бериң:

• Исраиллар чоқум немини қарар қилиши керәк еди?

Исраилларға охшаш, бизму кимгә ибадәт қилишни таллишимиз керәк. Луқа 16:13ни оқуң, кейин төвәндики соалларға җавап бериң:

• Немә үчүн биз бирла вақитта һәм Йәһваға, һәм башқа биригә яки нәрсигә ибадәт қилалмаймиз?

• Йәһва Худаға ибадәт қилишни таллиғанлиғимизни Униңға қандақ көрситимиз?

4. Йәһваниң сизгә көрсәткән сөйгү-муһәббити һәққидә чоңқур ойлиниң

Яратқучи Йәһва бизгә нурғун қиммәтлик соғиларни берип келиватиду. Биз Униңға немә берәләймиз? ВИДЕОНИ көрүң.

ВИДЕО: «Худаға берәләйдиған соғилириңиз» (3:04)

Йәһва қайси йоллар билән сизгә меһир-муһәббәт көрситип келиватиду? Зәбур 104:14, 15 вә Йоһан 4:9, 10ни оқуң, кейин төвәндики соалларға җавап бериң:

• Йәһва бәргән қайси соғилар үчүн сиз алаһидә миннәтдар?

• Әшу соғилар сизни Яратқучи һәққидә қандақ һис-туйғуға кәлтүриду?

Биз өзүмиз бәк яқтуридиған соғиға еришкәндә, шу соғини бәргән кишигә миннәтдарлиқ билдүрүшни халаймиз. Қанун шәрһи 16:17ни оқуң, кейин төвәндики соалға җавап бериң:

• Йәһваниң сиз үчүн қилған барлиқ ишлири үстидә чоңқур ойлиниш сизни немә қилишқа дәвәт қилиду?

5. Өзүңизни Йәһваға беғишлаш нурғун бәрикәтләргә ериштүриду

ВИДЕО: «Мән футбол үчүн яшиған едим» (5:45)

• Бу видеода футболчи доп ойнашни бәк яхши көрсиму, немә үчүн шу кәспидин ваз кәчти?

• У өз һаятини футболға әмәс, бәлки Йәһваға беғишлашни қарар қилған еди. Сизниңчә, у тоғра қарар чиқарғанму? Немә үчүн?

Әлчи Паул илгири даңлиқ устаздин йәһудийларниң қанунини үгәнгән. Мәсиһ әгәшкүчиси болуштин бурун, у һәммә киши һәвәс қилидиған мәртивилик кәсипни қоғлашқан еди. Амма у Әйсаниң әгәшкүчиси болуш үчүн кәспини ташлавәткән. Кейин Паул пушайман қилғанму? Филипиликләргә 3:8ни оқуң, кейин төвәндики соалларға җавап бериң:

• Немә үчүн Паул Әйсаниң әгәшкүчиси болуштин илгири қилған ишлирини «әхләт» дегән?

• У әшу ташлавәткәнлириниң орниға немигә еришкән?

• Сизниңчә, һаятиңизда Йәһваға хизмәт қилиштин яхширақ иш барму?

ХУЛАСӘ

Сөйгү-муһәббәт бизни һаятимизни Йәһваға беғишлашқа вә чөмдүрүлүшкә үндәйду.

Тәкрарлаш

• Немә үчүн Йәһва чин қәлбимиздин сөйүшкә вә ибадәт қилишқа лайиқ?

• Йәһва чөмдүрүлгән хизмәтчилирини қандақ мукапатлайду?

• Һаятиңизни Йәһваға беғишлашни халамсиз?

ИЗДИНИП КӨРҮҢ

Бир музыкант вә спортчи немә үчүн өзини Йәһваға беғишлашни қарар қилғанлиғини көрүң.

«Яшларниң соаллири. Һаятимни немигә беғишлаймән? Өтмүшни әсләш» (6:54)

Һаятиңизни Йәһва Худаға беғишлашниң йәнә қандақ башқа сәвәплири барлиғини ойлап беқиң.

«Немә үчүн өзүңизни Йәһваға беғишлайсиз?» («Күзитиш мунари» 2010-жил, 15-январь)

Бу музыкилиқ видеода һаятини Йәһваға беғишлиған кишиләрниң чирайидики хошаллиғиға диққәт қилиң.

«Мән һаятимни Саңа беримән» (4:30)

«Шунчә жиллардин бери “немә үчүн биз бу дунияға кәлдуқ?” дәп ойлап жүргән едим» дегән тәрҗимиһалдин бир аялни һаятта неминиң муһимлиғи һәққидә чоңқур ойлинишқа немә дәвәт қилғанлиғини көрүп беқиң.

«Муқәддәс китап һаятни өзгәртиду» («Күзитиш мунари» 2012-жил, 1-ноябрь)