57-ДӘРИС
Еғир гуна өткүзүп қойсиңиз, немә қилсиңиз болиду?
Сиз чоқум Йәһвани чин жүрәктин сөйүсиз вә Униң көңлини ағритидиған ишларни қилмаслиққа тиришисиз. Шундақтиму, анда-санда хаталиқларни өткүзүп қоюсиз. Амма бәзи гуналар башқилириға қариғанда толиму еғир (Коринтлиқларға 1-хәт 6:9, 10). Әгәр еғир гуна қилип қойсиңиз, Йәһваниң сизни сөйүшни тохтатмиғанлиғини есиңиздин чиқармаң. У сизни кәчүрүшни вә сизгә ярдәм беришни халайду.
1. Йәһваниң кәчүрүмигә еришиш үчүн чоқум немә қилалайсиз?
Йәһвани сөйидиғанлар өзлириниң еғир гуна өткүзгәнлигини тонуп йәткәндә қаттиқ азаплиниду. Амма Йәһва Өз хәлқигә қилған вәдилири арқилиқ кишиниң көңлигә тәсәлли бериду. У мундақ дәйду: «Силәрниң гунайиңлар қип-қизил болсиму, йәнила қардәк ақириду» (Йәшая 1:18, КТ). Әгәр биз чин дилимиздин товва қилсақ, Йәһва бизни пүтүнләй кәчүриду. Ундақта, товва қилғанлиғимизни қандақ көрситәләймиз? Чоңқур пушайман қилиш арқилиқ биз яман ишларни қилишни тохтитимиз вә Йәһвадин кәчүрүм тиләймиз. Андин бизни гунаға йетәкләйдиған ой-пикир яки адәтләрни өзгәртиш үчүн бар күчимизни чиқиримиз вә Йәһваниң пак өлчәмлиригә мас яшашқа тиришимиз (Йәшая 55:6, 7ни оқуң).
2. Гуна өткүзгинимиздә, Йәһва ақсақаллар арқилиқ бизгә қандақ ярдәм бериду?
Әгәр биз еғир гуна өткүзсәк, Йәһва бизгә: «Җамаәтниң ақсақаллирини чақиртип кәлсун»,— дәйду (Яқуп 5:14, 15ни оқуң). Бу тәйинләнгән кишиләр Йәһва Худани вә Униң қойлирини сөйиду. Улар Йәһва билән болған мунасивитимизни әслигә кәлтүрүшимизгә ярдәм берәләйду (Галатилиқларға 6:1).
Еғир гуна өткүзүп қойсақ, ақсақаллар бизгә қандақ ярдәм бериду? Икки яки үч ақсақал бизни Муқәддәс китаптики нәсиһәт сөзлирини ишлитип түзитиду. Улар йәнә қайта гуна қилиштин сақлинишимиз үчүн бизгә әмәлий мәслиһәт вә илһам-мәдәт бериду. Ақсақаллар башқа етиқатчиларни зиянлиқ тәсирдин қоғдайду. Буниң үчүн еғир гуна өткүзүп, гунасиға товва қилмиған киши җамаәттин чиқирилиду.
ЧОҢҚУРИРАҚ ҚЕЗИҢ
Әгәр еғир гуна өткүзүп қойсақ, Йәһваниң бизгә қандақ ярдәм беридиғанлиғини яхширақ биливелиң вә Униңға техиму чоңқур миннәтдарлиқ билдүрүшни үгинивелиң.
3. Йәһва билән болған мунасивәтни әслигә кәлтүрүш
Биз қилған һәрқандақ гуна Йәһваниң көңлини ағритиду, шуңа Униң билән болған мунасивитимизни әслигә кәлтүрүш үчүн, гунайимизни Униңға иқрар қилишимиз керәк. Зәбур 32:1—5ни оқуң, кейин төвәндики соалға җавап бериң:
Немә үчүн гуналиримизни йошурушниң орниға, Йәһваға иқрар қилиш яхширақ?
Биз Йәһваға гунайимизни иқрар қилиштин башқа, ақсақаллардин ярдәм сорисақ, өзүмизни техиму яхширақ һис қилимиз. ВИДЕОНИ көрүң, кейин төвәндики соал үстидә ойлинип көрүң.
Бу видеода Кэнонниң Йәһваға қайтип келишигә ақсақаллар қандақ ярдәм бәргән?
Биз һечнемини йошурмай, ақсақалларға растини ейтишимиз лазим. Улар бизгә һәрқачан ярдәм беришкә тәйяр. Яқуп 5:16ни оқуң, кейин төвәндики соалға җавап бериң:
Ақсақалларға растини ейтиш уларниң бизгә ярдәм қилишини қандақ асанлаштуриду?
Гуналириңизни иқрар қилип, ақсақалларға растини ейтиң вә Йәһваниң меһрибанлиқ билән көрсәткән ярдимини қобул қилиң
4. Җамаәттин чиқирилиш орунлаштурушиниң пайдиси
Еғир гуна өткүзгән киши Йәһваниң өлчәмлиригә әмәл қилишни рәт қилса, у җамаәттин чиқирилиду вә биз униң билән арилашмаймиз. Коринтлиқларға 1-хәт 5:6, 11ни оқуң, кейин төвәндики соалға җавап бериң:
Худди хемиртуруч хемирни ечитқанға охшаш, пушайман қилмиған гунакар билән арилишиш җамаәткә қандақ тәсир қилиду?
Йәһваниң намукәммәл гунакарларға көрсәткән рәһим-шәпқитини үлгә қилип, ақсақаллар җамаәттин чиқирилғанларға ярдәм беришкә тиришиду. Җамаәттин чиқирилған нурғун кишиләр җамаәткә қайтип кәлгән. Гәрчә җамаәттин чиқирилиш азаплиқ болсиму, бу уларниң өзиниң хаталиқлирини тонуп йетишигә ярдәм бәргән (Зәбур 141:5).
Йәһва Худаниң гуна килған хизмәтчилиригә болған муамилиси Униң адил, рәһим-шәпқәтлик вә көйүмчан екәнлигини қандақ көрситиду?
5. Биз товва қилғанда, Йәһва бизни кәчүриду
Бир киши товва қилғанда, Йәһваниң қандақ һис-туйғуда болидиғанлиғини чүшинишимизгә ярдәм бериш үчүн Әйса бир тәмсилни ейтип бәргән. Луқа 15:1—7ни оқуң, кейин төвәндики соал үстидәға җавап бериң:
Бу сизгә Йәһва һәққидә немиләрни үгитиду?
Әзәкиял 33:11ни оқуң, кейин төвәндики соалға җавап бериң:
Һәқиқий товва қилғанлиғимизни қандақ көрситәләймиз?
Худди бир Падичиға охшаш, Йәһва Өз қойлириға интайин көңүл бөлиду
БӘЗИЛӘР МУНДАҚ ДӘЙДУ: «Ақсақалларға өткүзгән гунайимни ейтип бәрсәм, җамаәттин чиқирилишимдин қорқумән».
Сиз бундақ ойлиғанларға немә дәйсиз?
ХУЛАСӘ
Һәтта биз еғир гуна өткүзүп қойсақму, амма чин көңлүмиздин пушайман қилип, яман ишларни қилишни тохтитишни қәтъий қарар қилсақ, Йәһва бизни кәчүриду.
Тәкрарлаш
Әгәр еғир гуна өткүзсәк, немә үчүн Йәһваға гунайимизни иқрар қилиш лазим?
Йәһва гунайимизни кәчүрүм қилиши үчүн чоқум немә қилишимиз керәк?
Еғир гуна өткүзүп қойсақ, немә үчүн ақсақаллардин ярдәм соришимиз керәк?
ИЗДИНИП КӨРҮҢ
Бир кишиниң Йәшая 1:18дә тәсвирләнгән Йәһваниң рәһим-шәпқитини қандақ баштин кәчүргәнлигини көрүң.
Ақсақаллар еғир гуна қилған кишигә қандақ ярдәм беришкә тиришиду?
Гунасиға товва қилмиған адәмләргә меһир-муһәббәт вә рәһим-шәпқәт қандақ көрситилидиғанлиғини биливелиң.
«Ақсақаллар җамаәттин чиқирилғанларға қандақ ярдәм берәләйду?» («Күзитиш мунари» 2024-жил, август)
«Мән Йәһваға қайтишим керәк еди» намлиқ тәрҗимиһалдин һәқиқәтни ташлап кәткән бир киши немә үчүн Йәһваға қайтип кәлгәнлиги тоғрилиқ оқуң.
«Муқәддәс китап һаятни өзгәртиду» («Күзитиш мунари» 2012-жил, 1-апрель)