Пәйғәмбәрләрдин үлгә алимиз. Һабаккук
1. Немишкә Һабаккукниң һис-туйғулири бизгә чүшинишлик?
1 Бу дуния рәзиллишиватқансири, биз өзүмизни Һабаккук пәйғәмбәргә охшаш һис қилишимиз мүмкин. У Йәһвадин: «Сән немишкә маңа қәбиһликни көргүзисән, немишкә Сән җапа-зулумға қарап турисән?»— дәп сориған (Һаб. 1:3; Тим. 2-х. 3:1, 13). Йәһваниң сот күнини күтүватқан екәнмиз, Һабаккукниң ейтқан хәвири билән садақәтмәнлик үлгиси һәққидә муһакимә қилғинимиз бизгә күч-қувәт бериду (Пет. 2-х. 3:7).
2. Биз садиқлиққа бенаән яшаватқанлиғимизни қандақ көрсәтсәк болиду?
2 Садиқлиққа бенаән яшаңлар. Һабаккук өзини һәддидин ташқири аяшниң орниға, паалийәтлик вә роһий сәгәк болған (Һаб. 2:1). Йәһва Һабаккук пәйғәмбәрни Униң сөзи өз вақтида әмәлгә ашидиғанлиғиға вә «һәққаний адәм өз етиқат-садиқлиғи билән һаят» болидиғанлиғиға ишәндүрди (Һаб. 2:2—4). Ахирқи заманниң ахирида яшаватқан мәсиһийләр үчүн бу немини билдүриду? Ахирниң қачан келидиғанлиғини билиштин у келидиғанлиғиға ишәшлик болушимиз муһимирақ. Етиқадимиз роһий җәһәттин сәгәк болуп, хизмитимизни биринчи орунға қоюшқа дәвәт қилиду (Ибр. 10:38, 39).
3. Немишкә хизмәттә хошаллиқни сақлап қелишимиз керәк?
3 Пәрвәрдигардин шатлиниңлар. Магог зиминидин болған Гог Йәһва Худаниң хәлқигә һуҗум қилғанда етиқадимиз синилиду (Әзәк. 38:2, 10—12). Уруш һәтта ахирида ғалибийәт қазинидиғанлар үчүнму қийинчилиқ туғдуриду. Озуқ-түлүк тапчиллиғи болуши, мал-мүлкимиздин айрилип, һаят шараитимиз начарлишип кетиши мүмкин. Бу қийинчилиқлар пәйда болғанда, биз буниңға қандақ инкас қайтуримиз? Һабаккук қийинчилиқларниң болидиғанлиғини алдин-ала билгән, шуниң үчүн у Йәһва Худаға болған хизмитидики хошаллиғини сақлап қелишқа қәтъий қарар қилған (Һаб. 3:16—19). «Пәрвәрдигардин шадлиниш» алдимизда болидиған синақларға тәқабил турушқа ярдәм бериду (Нәһ. 8:10; Ибр. 12:2).
4. Биз һазир вә келәчәктә қандақ хошаллиққа егә болалаймиз?
4 Йәһваниң келиватқан сот күнидин аман қалғанлар Худани тонуп-билишни давамлаштуривериду (Һаб. 2:14). Тирилгәнләрму Йәһва һәққидә билим алиду. Шуңа һазирниң өзидиму башқиларға Йәһва вә униң әҗайип ишлири тоғрилиқ җакалаш пурситини қолдин чиқармайли! (Зәб. 34:1; 71:17).