Йәһваға болған меһир-муһәббитиңиз сизни чөмдүрүлүшкә дәвәт қилсун

1, 2. Әлчиләр 8:27—31, 35—38дин көргинимиздәк, эфиопиялик әмәлдарни чөмдүрүлүшкә немә дәвәт қилған?

СИЗ Мәсиһниң әгәшкүчиси сүпитидә чөмдүрүлүштин өтүшни халамсиз? Меһир-муһәббәт вә миннәтдарлиқ нурғун адәмләрни шундақ қарарни қилишқа дәвәт қилған. Эфиопиялик аял падишаниң сарийида хизмәт қилған әмәлдарниң мисалини көрүп чиқайли.

² Эфиопиялик әмәлдар Язмилардин чөмдүрүлүши керәклигини чүшәнгәндә, дәрру һәрикәт қилған (Әлчиләр 8:27—31, 35—38ни оқуң). Уни немә дәвәт қилған? У Худа Сөзини қәдирлигән. Бу униң ат һарвуда келиватқанда Йәшая китавини оқуғанлиғидин көрүниду. Филип билән сөзләшкәндин кейин, у Әйсаниң униң үчүн қилғанлириға миннәтдар болған. Лекин әмәлдар немә үчүн Йерусалимға сәпәр қилған? Чүнки у Йәһва Худани яхши көргән. Буни нәдин билимиз? У Йерусалимдин Йәһва Худаға ибадәт қилип келиватқан еди. Бу киши ата-бовилириниң динини ташлап, һәқиқий Худаға ибадәт қилған бирдинбир хәлиққә қошулған. Әмәлдар Йәһвани яхши көргәнликтин, йәнә бир муһим ишни қилишни қарар қилған — у чөмдүрүлүп, Мәсиһниң шагирти болған (Мәт. 28:19).

3. Чөмдүрүлүштин өтүшкә немә тосалғулуқ қилиши мүмкин? («Жүригиңиз қандақ йәргә охшайду?» намлиқ рамкиға қараң.)

³ Йәһва Худаға болған меһир-муһәббәт бизни чөмдүрүлүш мәрасимидин өтүшкә дәвәт қилиши мүмкин. Бирақ бу қәдәмни бесишимизға меһир-муһәббәт тосалғу болушиму мүмкин. Қандақларчә? Бирнәччә мисални көрүп чиқайли. Мәсилән, сиз Йәһваға хизмәт қилмайдиған достлириңиз вә уруқ-туққанлириңизни яхши көргәчкә, чөмдүрүлүштин өтсәм улар мени өч көриду дәп қорқидиғансиз (Мәт. 10:37). Болмиса, сиз үчүн Худа нәпрәтлинидиған адәтни өч көрүш вә уни ташлаш интайин тәскә тохтиши мүмкин (Зәб. 97:10). Яки болмиса, сиз сахта дин билән бағлиқ мәйрәмләрни нишанлап чоң болғансиз. Шу мәйрәмләрни сеғинип, Йәһва Худаниң көңлини рәнҗитидиған урп-адәтләргә әмәл қилишни тохтитиш сиз үчүн қийин болуши мүмкин (Кор. 1-х. 10:20, 21). Шуңа сиз кимни яки немини артуғирақ яхши көридиғанлиғиңизни қарар қилишиңиз керәк.

КИМНИ АРТУҒИРАҚ ЯХШИ КӨРҮШИМИЗ КЕРӘК?

4. Чөмдүрүлүштин өтүшкә немә дәвәт қилиши керәк?

⁴ Сиз яхши көридиған вә қәдирләйдиған яхши нәрсиләр көп болуши мүмкин. Мәсилән, Йәһва гувачилири билән техи тонушмай туруп, сиз Худани яхши көрүп, Униң жүригини хошал қилишни халиғансиз. Кейин сиз Әйса Мәсиһниму яхши көрүшни башлиғансиз. Һазир сиз Йәһва гувачилири билән арилишишни яқтуридиғансиз. Амма уларни яхши көрүш өзүңизни Йәһваға беғишлап, чөмдүрүлүш мәрасимидин өтүшкә дәвәт қилмаслиғи мүмкин. Чөмдүрүлүшкә бизни әң муһими Йәһва Худаға болған меһир-муһәббәт дәвәт қилиши керәк. Йәһвани һәммидин артуғирақ яхши көрсиңиз, һечнемә яки һечкимниң сизни Униңға хизмәт қилиштин тосушиға йол бәрмәйсиз. Йәһва Худаға болған меһир-муһәббәт сизни чөмдүрүлүшкә дәвәт қилиду вә чөмдүрүлүштин кейинму Униңға садиқ болуп қелишиңизға ярдәм бериду.

5. Бу мақалидин немини биливалимиз?

⁵ Әйса бизни Йәһва Худани пүтүн жүригимиз, җенимиз, әқлимиз вә күчимиз билән яхши көрүшкә үндигән (Марк 12:30). Сиз Йәһваға болған чоңқур меһир-муһәббәт вә миннәтдарлиқни қандақ йетилдүрәләйсиз? Йәһва Худаниң меһир-муһәббити тоғрилиқ чоңқур ойлансақ, бизму Уни яхши көримиз (Йоһ. 1-х. 4:19). Бу мақалидин сиз Йәһвани яхши көрүп, чөмдүрүлүштин өтүш үчүн немә қилалайдиғанлиғиңизни биливалисиз.

6. Римлиқларға 1:20гә асасән, Йәһва тоғрилиқ үгинишниң бир усули немә?

⁶ Йәһва тоғрилиқ мәвҗудатларға қарап үгиниң (Римлиқларға 1:20ни оқуң; Вәһ. 4:11). Йәһваниң һайванатлар вә өсүмлүкләрни яратқан усулидин көрүнидиған даналиғи тоғрилиқ мулаһизә қилиң. Адәмниң тени қандақ әҗайип яритилғанлиғи һәққидиму ойлап көрүң (Зәб. 139:14). Миллиардлиған юлтузларниң бири, қуяшниң, қанчилик қувәтлик қилип яритилғанлиғи тоғрилиқ ойлап беқиңаb (Йәшая 40:26). Әҗайип яратмилар тоғрилиқ чоңқур ойланғанда, сиз Йәһва Худани техиму көпирәк һөрмәтләйдиған болисиз. Лекин Йәһваниң дана вә күч-қудрәтлик екәнлигини билишла йетәрлик әмәс. Йәһва Худа билән болған йеқин мунасивәт вә Униңға болған муһәббитиңизни күчәйтиш үчүн, сиз Униң тоғрилиқ буниңдинму көпирәк билишиңиз керәк.

7. Йәһвани чин жүрәктин яхши көрүш үчүн, сиз немигә ишинишиңиз керәк?

⁷ Йәһва Худа сизни яхши көридиғанлиғиға ишәнчиңиз камил болсун. Йәр билән асманни яратқан Қудрәтлик Худа сизгә нәзәр селип, сизгә ғәмхорлуқ қилидиғанлиғиға ишиниш сиз үчүн қийинму? Шундақ болса, Яратқучимизниң һәрқайсимиздин жирақ әмәслигини әстә тутуң (Әлч. 17:26—28). У «Йәһва һәммә жүрәкләрни... синақтин өткүзиду» билиду вә сизгиму худди Давут оғли Сулайманға ейтқандәк, «Уни издисәң, чоқум Уни тапалайсән» дәп вәдә қилиду (Тар. 1-яз. 28:9). Әмәлийәттә, сизниң Муқәддәс китапни үгиниватқанлиғиңизниң сәвәви — Йәһва Худаниң сизни Өзигә җәлип қилғанлиғи (Йәр. 31:3). Йәһва сиз үчүн қилған һәммә яхшилиқлирини қанчә қәдирлисиңиз, Униңға болған меһир-муһәббитиңиз шунчә күчийиду.

8. Йәһваниң меһир-муһәббитини қәдирләйдиғанлиғимизни қандақ көрситәләймиз?

⁸ Йәһваниң меһир-муһәббитини қәдирләйдиғанлиғимизни көрситишниң бир йоли — Униңға дуа қилиш. Йәһваға ғәм-әндишилириңизни ейтип, һәммә яхшилиқлири үчүн миннәтдарлиғиңизни билдүрсиңиз, Уни техиму яхши көрисиз. Худаниң дуалириңизға қандақ җавап бәргәнлигини көргәндә, Униңға техиму йеқинлишисиз (Зәб. 116:1). Шундақла, Йәһва Худа сизни чүшинидиғанлиғиға көз йәткүзисиз. Лекин Йәһва билән зич мунасивәттә болуш үчүн сиз Униң ой-пикир қилиш усулини вә сиздин немини тәләп қилидиғанлиғини чүшинишиңиз керәк. Буни чүшинишниң бирдинбир йоли — Униң Сөзи Муқәддәс китапни үгиниш.

9. Муқәддәс китапни қәдирләйдиғанлиғиңизни қандақ көрситәләйсиз?

⁹ Худа Сөзини қәдирләң. Худа вә Униң ирадиси тоғрилиқ һәқиқәтни пәқәт Муқәддәс китаптин тапалайсиз. Муқәддәс китапни қәдирләйдиғанлиғиңизни уни һәр күни оқуш, тәтқиқ үгинишигә тәйярлиқ қилиш вә үгәнгәнлириңизни әмәлийәттә қоллиниш арқилиқ көрситәләйсиз (Зәб. 119:97, 99; Йоһ. 17:17). Муқәддәс китапни оқуш җәдвилиңиз барму? Сиз бу җәдвәл бойичә Муқәддәс китапни һәр күни оқамсиз?

10. Муқәддәс китапниң қандақ алаһидилиги бар?

¹⁰ Муқәддәс китапниң бир алаһидилиги — Әйсани өз көзи билән көргән адәмләрниң у тоғрилиқ язған баянлири. Әйса сиз үчүн немә қилғанлиғи пәқәт Муқәддәс китапта ениқ чүшәндүрүлгән. Әйсаниң сөзлири вә иш-һәрикәтлири тоғрилиқ билгәндә, униң билән дост болушни халишиңиз мүмкин.

11. Йәһваға болған меһир-муһәббитиңизни қандақ ашуралайсиз?

¹¹ Әйсани яхши көрүшни үгиниң. Әгәр Әйсани яхши көрсиңиз, Йәһваға болған меһир-муһәббитиңиз ашиду. Немә үчүн? Чүнки Әйса Атисиниң есил пәзиләтлирини мукәммәл түрдә әкс әттүргән (Йоһ. 14:9). Шуңа, Әйса тоғрилиқ көпирәк билгәнсири, Йәһва Худаниму яхширақ тонуп, Уни техиму яхши көрисиз. Адәмләр кәмбәғәл, кесәл яки аҗиз болғанларни камситсиму, Әйсаниң уларға ич ағритқанлиғи тоғрилиқ ойлап беқиң. Шундақла Әйсаниң сизгә бәргән әмәлий мәслиһәтлири вә уларни қоллиниш һаятиңизни қандақ яхшилайдиғанлиғи тоғрилиқ ойлиниң (Мәт. 5:1—11; 7:24—27).

12. Әйса тоғрилиқ көпирәк үгиниш сизни немигә дәвәт қилиши мүмкин?

¹² Әйсаниң гуналиримизниң кәчүрүлүши үчүн бәргән қурбанлиғи тоғрилиқ чоңқур ойлансиңиз, униңға болған меһир-муһәббитиңиз күчийиду (Мәт. 20:28). Әйса сиз үчүн өлүшкә тәйяр болғанлиғини чүшиниш сизни товва қилишқа вә Йәһва Худадин гуналириңиз үчүн кәчүрүм сорашқа дәвәт қилиши мүмкин (Әлч. 3:19, 20; Йоһ. 1-х. 1:9). Йәһваға вә Әйсаға болған муһәббитиңиз ашқансири, сиз уларни яхши көридиған башқа адәмләр билән арилишишни тәбиийла халайдиған болисиз.

13. Йәһва Худа сизгә қандақ ярдәм берәләйду?

¹³ Йәһваниң аилисини яхши көрүң. Худаға ишәнмәйдиған уруқ-туққанлириңиз вә бурунқи дост-бурадәрлириңиз немә үчүн Йәһва Худаға өзүңизни беғишлимақчи болғанлиғиңизни чүшәнмәслиги мүмкин. Һәтта улар сизгә қарши чиқиду. Лекин Йәһва Худа җамаәттики қериндашлар билән бир аилә кишилиридәк болушиңизға ярдәм берәләйду. Қериндашларға йеқин болсиңиз, улар сизни чоқум яхши көриду вә қоллап-қувәтләйду (Марк 10:29, 30; Ибр. 10:24, 25). Вақит-саати кәлгәндә, аилә әзалириңизму Йәһваниң өлчәмлири бойичә яшап, Униңға хизмәт қилиши мүмкин (Пет. 1-х. 2:12).

14. Йоһанниң 1-хети 5:3тин Йәһваниң өлчәмлири тоғрилиқ немини биливалдиңиз?

¹⁴ Йәһваниң өлчәмлирини яхши көрүң вә әмәлийәттә қоллинишни үгиниң. Йәһвани тонуштин авал сиз неминиң яхши вә неминиң яман екәнлигини өз алдиңизға қарар қилаттиңиз. Бирақ һазир сиз Йәһваниң өлчәмлири әң яхши екәнлигини чүшинип йәттиңиз (Зәб. 1:1—3; Йоһанниң 1-хети 5:3ни оқуң). Муқәддәс китапта әрләр, аяллар, ата-анилар вә балиларға берилгән нәсиһәтләрни алайли (Әфәс. 5:22—6:4). Сиз бу нәсиһәтләргә қулақ салғачқа, аилиңиз бәхитлигирәк болуп қалдиму? Достларни даналиқ билән таллаш тоғрилиқ Худаниң көрсәтмилиригә әмәл қилғачқа, сизниң шәхсий адәтлириңиздә яхшилиниш болдиму? Сиз өзүңизни бәхитлигирәк һис қиламсиз? (Пәнд н. 13:20; Кор. 1-х. 15:33).

15. Муқәддәс китап қаидә-принциплирини әмәлийәттә қоллинишиңизға немә ярдәм бериши мүмкин?

¹⁵ Бәзидә Муқәддәс китаптин үгәнгән қаидә-принципларни һаятиңизда қандақ қоллинишни билмәслигиңиз мүмкин. Шуңа Йәһва Өз тәшкилати арқилиқ яхши-яманни пәриқ қилишиңизға ярдәм беридиған Муқәддәс китапқа асасланған әдәбиятлар билән тәминләйду (Ибр. 5:13, 14). Сиз бу әдәбиятларни оқуп-үгәнгәндә, уларниң пайдилиқ екәнлигини көрүп, бәлким Йәһваниң тәшкилатиға қошулушни халишиңиз мүмкин.

16. Йәһва Худа Өз хәлқини қандақ тәшкиллигән?

¹⁶ Йәһваниң тәшкилатини яхши көрүң вә қоллаң. Йәһва Худа Өз хәлқи үчүн җамаәтләрни тәшкиллигән. Униң Оғли Әйса барлиқ җамаәтләрниң Беши (Әфәс. 1:22; 5:23). Әйса кичик бир топ майланған әгәшкүчилирини бүгүнки күндә Йәһваниң ирадисини орунлаш хизмитини тәшкилләшкә йетәкчилик қилишқа тәйинлигән. У бу бир топ кишиләрни «садиқ һәм әқил-парасәтлик қул» дәп атиған вә улар өзигә тапшурулған вәзипини әстаидил орунлап, сизниң Йәһваға йеқинлишишиңиз вә униң билән болған мунасивитиңизни сақлишиңизға ярдәм бериду (Мәт. 24:45—47). Садиқ қул сизгә ғәмхорлуқ қилип, сизгә йетәкчилик қилидиған ақсақалларни тәйинлигән (Йәшая 32:1, 2; Ибр. 13:17; Пет. 1-х. 5:2, 3). Ақсақаллар сизни илһамландуруш вә Йәһва Худаға йеқинлишишиңизға ярдәм бериш үчүн бар күчини чиқиришқа тәйяр. Амма уларниң сизгә ярдәм берәләйдиған әң муһим усулларниң бири — сизниң башқиларға Йәһва тоғрилиқ үгитишиңизгә ярдәм бериш (Әфәс. 4:11—13).

17. Римлиқларға 10:10, 13, 14кә асасән, биз башқиларға немә үчүн Йәһва тоғрилиқ ейтишимиз муһим?

¹⁷ Башқиларниң Йәһвани яхши көрүшигә ярдәм бериң. Әйса шагиртлириға башқиларға Йәһва тоғрилиқ тәлим беришни буйриған (Мәт. 28:19, 20). Биз бу буйруқни пәқәт мәҗбурийәтни ада қилиш үчүн орунлисақ болатти. Лекин Йәһваға болған меһир-муһәббитимиз күчәйгәнсири, сиз Петрус вә Йоһандәк: «Биз болсақ, көргинимизни вә аңлиғинимизни ейтмай туралмаймиз»,— дәп ейтишиңиз мүмкин (Әлч. 4:20). Башқиларға Йәһва Худани яхши көрүшкә ярдәм бериш бизни бәк хошал қилиду. Филип Эфиопиялик әмәлдарға Язмилардики һәқиқәтни көрүп йетиши вә чөмдүрүлүштин өтүшигә ярдәм бәргәндә, өзини қанчилик хошал һис қилғанлиғини тәсәввур қилип көрүңа! Филиптин үлгә елип, Әйсаниң буйриғиға қулақ салсиңиз, сизму Йәһва гувачилириниң бири болушни халайдиғанлиғиңизни көрситисиз (Римлиқларға 10:10, 13, 14ни оқуң). Шу чағда сизму әшу әмәлдарға охшаш: «Чөмдүрүлүшимгә немә тосқунлуқ қилалайду?»— дәп соришиңиз мүмкин (Әлч. 8:36).

18. Кейинки мақалидә биз немиләрни көрүп чиқимиз?

¹⁸ Чөмдүрүлүштин өтүш — һаяттики әң муһим қарарларниң бири болғанлиқтин, сиз бу қарарға немә киридиғанлиғи тоғрилиқ чоңқур ойлинишиңиз зөрүр. Чөмдүрүлүш мәрасими тоғрилиқ немини билишиңиз керәк? Чөмдүрүлүштин өтүштин бурун вә униңдин кейин немә қилишиңиз лазим? Бу соалларниң җававини кейинки мақалидин тапимиз.