Зор бир топ халайиқ Худани вә Әйсани яхши көриду вә Уларға миннәтдар

1. 1935-жили өткүзүлгән конгресста ейтилған нутуқ бир яш жигиткә қандақ тәсир қилған?

БИР ҖҮП әр-аял бурун Муқәддәс китап тәтқиқатчилири, дәп аталған Йәһва гувачилири болған. Уларниң үч оғли вә икки қизи болған еди. Бу ата-ана балилирини Йәһваға хизмәт қилишқа вә Әйса Мәсиһни үлгә қилишқа үгәткән. Бир оғли 1926-жили чөмдүрүлүш мәрасимидин өткәндә 18 яшта еди. Шу вақитта, Муқәддәс китап тәтқиқатчилириниң һәммиси Хатириләш мәрасимида петир нан вә шарапқа еғиз тәккүзгәндәк, бу сәмимий яш жигитму шундақ қилған. Бирақ у «Зор бир топ халайиқ» дегән тарихий нутуқни тиңшиғанда, униң һаяти өзгәргән. Бу нутуқни Джозеф Ф. Рутерфорд 1935-жили Америкидики Вашингтон шәһиридә өткүзүлгән конгресста ейтқан. Шу конгресста немә ашкарә болған?

2. Рутерфорд бурадәр өз нутуғида қандақ һәқиқәтни ашкарә қилған?

² Рутерфорд бурадәр өз нутуғида, Вәһий 7:9-айәттики зор бир топ халайиқ кимләрни билдүридиғанлиғини чүшәндүрүп бәргән. Бу нутуқтин бурун, мошу бир топ Худаға анчә қизғин хизмәт қилмиған, амма асманда яшаш үмити бар иккинчи бир топ адәмләр, дәп қаралған еди. Рутерфорд бурадәр Язмиларниң ярдими билән зор бир топ халайиқ асманда яшаш үчүн талланмиғанлиғини чүшәндүргән. Униңдин башқа, у уларниң дәһшәтлик балаю апәттин аман қелип, йәрдики җәннәтә яшайдиған Мәсиһниң «башқа қойлири»b екәнлигини чүшәндүргән (Вәһ. 7:14). Әйса мундақ вәдә бәргән: «Бу қорадин башқа йәнә қойлирим бар. Уларниму елип келишим керәк. Уларму авазимни аңлайду вә бир пада һәм бир падичи болиду» (Йоһ. 10:16). «Башқа қойлар» — йәрдики җәннәттә яшаш пурсити бар садиқ Йәһва гувачилири (Мәт. 25:31—33, 46). Һазир бу йеңи чүшәнчә көплигән Худаниң хизмәтчилириниң вә шу 18 яшлиқ бурадәрниң һаятини қандақ өзгәрткәнлигини көрүп чиқимиз (Зәб. 97:11; Пәнд н. 4:18).

ЙЕҢИ ЧҮШӘНЧӘ МИҢЛИҒАН КИШИЛӘРНИҢ ҺАЯТИНИ ӨЗГӘРТКӘН

3, 4. 1935-жилниң конгрессида миңлиған адәмләр немини чүшәнгән?

³ Бу конгрессниң кишини һаяҗанландуридиған пәйти кәлди, натиқ тиңшиғучилардин: «Илтимас, йәрдә мәңгү яшаш үмүти барлар, һәммиңлар орниңлардин туруңлар!»— дәп сориған. Буни өз көзлири билән көргүчиләрниң ейтишичә, тәхминән 20000 адәм орунлиридин турған. Рутерфорд бурадәр: «Мана, бу зор бир топ халайиқ!»— дәп ейтқан. Буниң билән мәйданда гүлдүр-қарас алқиш садаси яңриған. Орундин турғанлар өзлириниң асманда яшаш үчүн талланмиғанлиғини етирап қилған. Улар муқәддәс роһ билән майланмиғанлиғини чүшәнгән. Конгрессниң иккинчи күни 840 йеңи Гувачи чөмдүрүлүштин өткән. Уларниң көпинчиси «башқа қойлар» топидин еди.

⁴ Бу нутуқтин кейин, әнди әшу яш бурадәр вә башқа миңлиған адәмләр Хатириләш мәрасимида петир нан вә шарапқа еғиз тәгмәйдиған болған. Бир бурадәр көпчиликниң һис-туйғусини кичик пейиллиқ билән билдүргән. У мундақ дегән: «Мән 1935-жилниң Хатириләш мәрасимида ахирқи қетим петир нан вә шарапқа еғиз тәгкән едим, чүнки Йәһва муқәддәс роһи арқилиқ мени асманда яшаш үмүтигә ериштүрмигән, әксинчә мениңдә йәрдә яшаш вә уни җәннәткә айландурушқа ярдәм бериш үмүтүм бар еди» (Рим. 8:16, 17; Кор. 2-х. 1:21, 22). Шу вақтидин башлап, зор бир топ халайиқниң сани көпийип, майланғанлар етиқатчилар йәрдики қалдуқ әзалири билән мүрини мүригә тирәп һәмкарлишиватидуc.

5. Йәһва петир нан вә шарапқа әнди еғиз тәгмәйдиғанларға қандақ қариған?

⁵ Йәһва Худа 1935-жилдин тартип, петир нан вә шарапқа еғиз тәгмигәнләргә қандақ қариған? Чөмдүрүлүш мәрасимидин өткән Гувачи Хатириләш мәрасимида петир нан вә шарапқа еғиз тегип, кейин өзиниң майланмиғанлиғини чүшәнгән болсичу? (Кор. 1-х. 11:28) Бәзиләр өзлириниң қәйәрдә яшаш үмүтини чүшәнмәй, бу символларға еғиз тегиду. Бирақ әгәр улар өзиниң хаталиғини тонуп йетип, петир нан вә шарапқа еғиз тәгмәйдиған болса вә Йәһваға садиқ хизмәт қилишни давамлаштурса, Йәһва уларни башқа қойлар топиниң әзалири, дәп қарайду. Гәрчә улар петир нан вә шарапқа еғиз тәгмисиму, Йәһва вә Әйсаниң улар үчүн қилған ишлириға чоңқур миннәтдарлиғини көрситип, йәнила Хатириләш мәрасимиға һөрмәт-еһтирам билән қатнишиду.

ӘҖАЙИП ҮМҮТ

6. Әйса пәриштиләргә немә қилишни буйриған?

⁶ Дәһшәтлик балаю апәт босуғимиз алдиға келип қалғачқа, Вәһий китавиниң 7-бабидики майланғанлар вә башқа қойлар, йәни зор бир топ халайиқ һәққидә йезилғанларни қайтидин көрүп чиқиш бизни илһамландуриду. Әйса пәриштиләргә төрт тәрәптин кәлгән шамални давамлиқ мәһкәм тутуп турушни буйриватиду. Худаниң майланған хизмәтчилириниң пешанисигә тамға бесилип болғичә, йәни улар Худаниң ахирқи мақуллишини алғичә, әшу төрт тәрәптин кәлгән шамални йәр йүзигә зиян кәлтүрмәслиги үчүн пәриштиләр уларни тизгинләп туруши керәк (Вәһ. 7:1—4). Майланғанлар садиқлиғи үчүн мукапат сүпитидә, асманда Әйса билән биргә һөкүмран вә роһанийлар болиду (Вәһ. 20:6). Йәһва Худа, Әйса вә пәриштиләр 144000 майланған кишиниң асмандики мукапатиға еришкәнлигини көрүп интайин хошал болиду.

7. Вәһий 7:9, 10-айәтләрдә йезилғандәк, Йоһан бу вәһийдә кимләрни көргән вә улар немә қилған? (Муқавидики рәсимгә қараң.)

⁷ Әлчи Йоһан мошу 144000 падиша һәм роһанийни көргәндин кейин, һаяҗанландуридиған бир ишни, йәни Армагедондин өтүп, аман қалған зор бир топ халайиқ һәққидә ейтқан. 144000 кишидин ибарәт бу кичик топқа охшимайдиған йери, зор бир топ халайиқниң қанчилик чоң вә сани қанчилик көп екәнлиги ениқ әмәс (Вәһий 7:9, 10ни оқуң). Уларниң ақ кийим кийингәнлиги Йәһва вә Әйсаға болған садақәтмәнлигини сақлап, Шәйтанниң дуниясидин өзини пак сақлап қалғанлиғини билдүриду (Яқуп 1:27). «Улар үнлүк аваз билән: “Ниҗатлиғимиз үчүн биз тәхттә олтарған [Йәһва] Худайимизға һәм [Әйса] Қозиға қәриздармиз”,— дәп вақиришатти». Уларниң қолидики хорма шахлири Йәһва тәйинлигән Әйса Мәсиһ өзлириниң падишаси екәнлигини хошаллиқ билән етирап қилғанлиғини билдүриду (Йоһан 12:12, 13ни селиштуруң).

8. Вәһий 7:11, 12-айәтләрдә Худаниң асмандики аилиси тоғрисида немә йезилған?

⁸ Вәһий 7:11, 12ни оқуң. Асмандикиләр зор бир топ халайиқни көргәндә, немә иш йүз бәргән? Әлчи Йоһан шуни көргәнки, Худаниң асмандики аилиси зор бир топ халайиқни көргәндә, Худани мәдһийиләп хошал болиду. Йәһваниң асмандики аилиси зор бир топ халайиқ дәһшәтлик балаю апәттин аман қалғанда, бу вәһийниң орунланғанлиғини көрүп, зор шат-хорамлиққа чөмиду.

9. Вәһий 7:13—15 айәтләргә асасән, зор бир топ халайиқ һазирниң өзидә немә қилиду?

⁹ Вәһий 7:13—15ни оқуң. Әлчи Йоһан зор бир топ халайиқ «кийимлирини жуюп, Қозиниң қенида ақартқан», дәп ейтиду. Бу уларниң пак вижданға егә екәнлигини вә Йәһва улардин хурсән болғанлиғини билдүриду (Йәшая 1:18). Улар Әйсаниң төләм қурбанлиғиға ишәнч қилип, Йәһва билән йеқин мунасивәттә болуп, Униңға өз һаятини беғишлап, чөмдүрүлүштин өткән мәсиһий әгәшкүчилиридур (Йоһ. 3:36; Пет. 1-х. 3:21). Шуңа улар роһий ибадәтханиниң йәрдики һойлисида кечә-күндүз муқәддәс хизмәт қилиш үчүн «Худа тәхтиниң алдида» туруш шан-шәрипигә егә. Һазирниң өзидиму улар Худа Падишалиғини биринчи орунға қоюп, қизғинлиқ билән вәз қилиш вә шагирт тәйярлаш ишиниң көп қисмини қиливатиду (Мәт. 6:33; 24:14; 28:19, 20).

10. Зор бир топ халайиқ немигә ишәнч қилиду вә Худаниң вәдисиниң қандақ әмәлгә ашидиғанлиғини көриду?

¹⁰ Зор бир топ халайиқ дәһшәтлик балаю апәттин аман қелип, Йәһва Худаниң уларға ғәмхорлуқ қилидиғанлиғиға ишәнч қилиду. Чүнки «тәхттә Олтарғучи [Йәһва] өз чедирини уларниң үстидин яйиду». Әнди, башқа қойлар шунчә арзу қилған Худаниң вәдисиниң толуқ әмәлгә ашидиғанлиғини көриду: «Худа уларниң көзидики һәрқандақ яшни сүртиду вә өлүм әнди болмайду йә қайғу, йә жиға-зар, йә ағриқ башқа болмайду» (Вәһ. 21:3, 4).

11, 12. а) Вәһий 7:16, 17-айәтләрдә көрситилгәндәк, зор бир топ халайиқ қандақ бәрикәтләрни күтмәктә? ә) Башқа қойлар немә қилиши керәк вә немә уларни шундақ қилишқа дәвәт қилиду?

¹¹ Вәһий 7:16, 17ни оқуң. Һазир Худаниң бәзи хизмәтчилири еғир ихтисадий әһвал вә ички уруш түпәйли ачарчилиқ азавини чекиду. Башқилар болса, иман-етиқади сәвәплик түрмиләргә ташлиниду. Буниңға қаримастин, зор бир топ халайиқниң әзалири бу рәзил дуния түзүлмиси вәйран қилинғанда қутулуп аман қалиду. Шу чағда уларда җисманий вә роһий озуқ-түлүк мол болиду вә улар Йәһвадин йол-йоруқ алиду. Шәйтанниң дунияси вәйран қилинғанда, зор бир топ халайиқ Худаниң әлләр үстигә төкидиған қаттиқ иссиққа охшаш ғәзивидин қутулуп қалиду. Дәһшәтлик балаю апәт аяқлашқандин кейин Әйса йәрдә аман қалған кишиләрни «һаятлиқ сүйиниң булақлириға» йетәкләйду. Тәсәввур қилип көрүң: зор бир топ халайиқ өзгичә пурсәткә егә. Йәр йүзидә бурун яшиған миллиардлиған адәмләргә охшимайдиған йери, улар һәргизму өлмәслиги мүмкин (Йоһ. 11:26).

¹² Башқа қойлар әҗайип үмүти үчүн Йәһва вә Әйсаға бәкму миннәтдар. Гәрчә улар асманда яшаш үчүн талланмиған болсиму, Йәһва Худа уларни бәк қәдирләйду. Мошу икки топниң әзалири Йәһва Худани мәдһийиләйду вә Әйсаға миннәтдар болиду. Буни қилишниң бир усули — Хатириләш мәрасимиға қатнишиш.

ЙӘҺВА ХУДАҒА ВӘ МӘСИҺКӘ ЧИН ЖҮРӘКТИН МИННӘТДАР БОЛУҢ

13, 14. Немә үчүн һәрбир майланғанлар вә башқа қойлар Хатириләш мәрасимиға қатнишиши керәк?

¹³ Йеқинки жилларда Хатириләш мәрасимиға қатнашқанларниң тәхминән 1000дин бири петир нан вә шарапқа еғиз тегиду. Бу пүтүн дуниядики җамаәтләрниң көпинчисидә Хатириләш мәрасимида петир нан вә шарапқа еғиз тегидиған кишиниң йоқлиғини билдүриду. Демәк бу Хатириләш мәрасимиға қатнишидиғанларниң көпинчиси шу йәрдә яшаш үмитигә егә болғанлар. Ундақта, улар немә үчүн Хатириләш мәрасимиға қатнишиду? Хатириләш мәрасимиға қатнишидиғанлар той қилмақчи болған жигитниң достлириға охшаш. Улар той қилмақчи болған қиз-жигиткә өз меһир-муһәббитини билдүрүш вә уларни қоллап-қувәтләш арзу-истигини көрситиш үчүн шу тойға бариду. Худди шуниңдәк, «башқа қойлар» қатарида болғанлар Мәсиһ Әйса вә майланған етиқатчиларға болған сөйгүси вә һөрмәт-еһтирам билдүрүш үчүн Хатириләш мәрасимиға қатнишиду. Шундақла улар шу мәрасимиға қатнишип, йәрдә мәңгү яшаш пурситини яритидиған төләм қурбанлиғиға миннәтдарлиғини көрситиду.

¹⁴ Башқа қойларниң Хатириләш мәрасимиға қатнишишниң сәвәви — Әйсаниң әмригә бойсунуш. Әйса садақәтмән әлчилири билән мошу Хатириләшни уюштуруп, мундақ дегән: «Мени әслигәч... буни һәр қетим қилиңлар» (Кор. 1-х. 11:23—26). Майланғанларниң бири йәр йүзидә һаятла болса, башқа қойлар Хатириләш мәрасимини өткүзүшни давамлаштуриду. Башқа қойлар һәрқандақ адәмни улар билән биллә Хатириләш мәрасимиға қатнишишқа тәклип қилиду.

15. Хатириләш мәрасимда шәхсән өзүмиз Худани қандақ мәдһийиләймиз вә Мәсиһкә қандақ миннәтдар болимиз?

¹⁵ Хатириләш мәрасимида бизниң Худани мәдһийиләш пурситимиз бар. Униңдин башқа, шу мәрасимида Йәһваға вә Әйсаға болған өз меһир-муһәббитимиз билән миннәтдарлиғимизни дуада вә нахшида ипадиләш мүмкинчилигимиз бар. «Худа вә Мәсиһ сиз үчүн немә қилғанлиғини қәдирләң!» намлиқ нутуқни бу жили аңлаймиз. Бу Йәһва Худаға вә Әйса Мәсиһкә болған миннәтдарлиғимизни чоңқурлаштуриду. Петир нан вә шарапни қолдин-қолға сунуп, бир-биримизгә бәргәндә, булар Әйсаниң тенини вә қенини билдүридиғанлиғини натиқ һәммә қатнашқучиларниң есигә салиду. Натиқ Йәһва Өз Оғлиниң өлүшигә йол қойғанлиғи сәвәвидин, бизниң мәңгү яшалайдиғанлиғимизни есимизгә салиду (Мәт. 20:28). Асмандики Атимизни вә Униң Оғлини яхши көридиғанларниң һәммиси Хатириләш мәрасимиға қатнишишни халайду.

ЙӘҺВА ХУДА СИЗГӘ БӘРГӘН ҮМҮТ ҮЧҮН МИННӘТДАР БОЛУҢ

16. Майланғанлар билән башқа қойларниң қандақ охшашлиғи бар?

¹⁶ Йәһва майланғанлар вә башқа қойларниң арисидики пәриққә қаримай, һәр иккилисини қәдирләйду. Һәр икки топ Униң үчүн охшашла қәдир-қиммәтлик. Һәқиқәтән, Йәһва Өз сөйүмлүк Оғлиниң һаяти арқилиқ майланғанлар вә башқа қойлар үчүн охшашла төләм төлигән. Икки топиниң пәрқи — уларниң үмүтлири һәртүрлүк. Һәр икки топ Худаға вә Мәсиһкә садақәтмән болуп қелиши керәк (Зәб. 31:23). Унтумаңлар, Худаниң муқәддәс роһи һәммимизгә тәң тәсир қилиду. Демәк, Йәһва Атимиз керәк вақтида муқәддәс роһни һәрбириниң еһтияҗлириға қарап бериду.

17. Йәрдики майланғанларниң қалдуқ әзалири немини күтиду?

¹⁷ Майланған мәсиһийләр асманда яшаш үмүти билән туғулмайду. Бу үмүтни Йәһва Худа уларға бәргән. Улар өз үмүти һәққидә ойлайду, дуа қилиду вә асмандики мукапатқа еришишни төрт көзи билән күтиду. Уларниң роһий тени қандақ болидиғанлиғини һәтта көз алдиға кәлтүрәлмәйду (Флп. 3:20, 21; Йоһ. 1-х. 3:2). Лекин улар Йәһва Худа, Мәсиһ Әйса, пәриштиләр вә тирилдүрүлгән майланғанлар билән көрүшүшни интизарлиқ билән күтмәктә. Улар асмандики Падишалиқта улар билән биллә болушни халайду.

18. Башқа қойлар немини күтиду?

¹⁸ Башқа қойларниң йәрдә мәңгү яшаш үмүти бар. Бу һәммә адәмләр үчүн тәбиий нәрсә (Вәз 3:11). Улар йәр йүзини җәннәткә айландуралайдиған күнни тақәтсизлик билән күтмәктә. Улар өйләрни салидиған, бағларни бәрпа қилидиған вә мукәммәл сағлам балилирини өстүридиған күнни интизарлиқ билән күтиду (Йәшая 65:21—23). Улар Йәһваниң сан-санақсиз яратмилирини, йәни йәр зиминни, тағларни, орманларни вә деңизларни тәтқиқ қилишни тақәтсизлик билән күтиду. Һәммидин муһими, улар Яратқучи Йәһва билән болған мунасивитиниң күндин-күнгә күчийип, техиму йеқин болушини хошаллиқ билән күтмәктә.

19. Хатириләш мәрасими һәрбиримизгә қандақ мүмкинчилик яритип бериватиду вә бу жил бу мәрасим қачан өткүзилиду?

¹⁹ Йәһва Худа Униңға өзини беғишлиған һәрбир хизмәтчисигә келәчәк үчүн әҗайип үмүт бәргән (Йәр. 29:11). Хатириләш мәрасими һәрқайсимизға Йәһва Худа вә Әйсаниң бизниң мәңгү һаяттин һузурлинишимиз үчүн қилған нурғун ишлириға миннәтдар болушимизға мүмкинчилик яритип бериватиду. Бу Хатириләш мәрасими һәқиқий мәсиһийләрниң һәр жили өткүзүлидиған учришиши. Бу учришиш 2021-жили, 27-март, шәнбә күни күн патқандин кейин өткүзүлиду. Бу жили нурғунлири мошу вақиәни әркин-азадә өткүзүши мүмкин. Башқилар болса, қаршилиқларға қаримастин униңға қатнишиду. Бәзиләр бу Хатириләшни түрмидә өткүзиду. Һәрбиримиз әстин шуни чиқармайли, Йәһва Худа, Мәсиһ Әйса, пәриштиләр вә тирилдүрүлгән майланған етиқатчилар бизгә қарап туриду. Шуңа һәрқандақ җамаәт, топ яки адәм болсун, Хатириләш мәрасимини яхши өткүзгәй!