Биз мәңгү яшалаймиз

1. Йәһваниң мәңгүлүк һаят тоғрисидики вәдиси һәққидә чоңқур ойлиниш бизгә қандақ тәсир қилиду?

ЙӘҺВА Униңға итаәт қилидиғанларни мәңгүлүк һаятқа ериштүридиғанлиғини вәдә қилиду (Рим. 6:23). Биз Йәһваниң вәдиси һәққидә чоңқур ойланғинимизда, Униңға болған сөйгү-муһәббитимиз техиму күчийиду. Әрштики Атимизниң бизгә болған сөйгүси шунчә чоңқурки, һечнемә бизни Униңдин айриветәлмәйду.

2. Мәңгүлүк һаят һәққидики вәдә бизгә қандақ ярдәм бериду?

² Худаниң мәңгүлүк һаят һәққидә бәргән вәдиси һазир синақларда бәрдашлиқ беришимизгә ярдәм бериду. Дүшминимиз бизни өлүм билән қорқатсиму, Йәһваға хизмәт қилишни тохтатмаймиз. Немә үчүн? Чүнки биз Йәһваға садиқ болуп өлүп кәтсәк, Яратқучимизниң бизни өлүмдин тирилдүридиғанлиғи вә һәргизму қайта өлмәйдиған үмүтимиз барлиғини билимиз (Йоһ. 5:28, 29; Кор. 1-х. 15:55—58; Ибр. 2:15). Немә үчүн мәңгүлүк һаятқа еришәләйдиғанлиғимизға қәтъий ишинәләймиз? Буниң бәзи сәвәплири һәққидә мулаһизә қилип көрәйли.

ЙӘҺВА МӘҢГҮ ҺАЯТ ХУДАДУР

3. Немә үчүн Йәһваниң бизни мәңгү һаят сақлап қалалайдиғанлиғиға ишинәләймиз? (Зәбур 102:12, 24, 27)

³ Биз билимизки, Йәһва бизни мәңгү һаят сақлап қалалайду, чүнки У һаятлиқниң булиғи вә мәңгү һаяттур (Зәб. 36:9). Йәһваниң әзәлдин барлиғини вә мәңгү мәвҗут болидиғанлиғини испатлайдиған бир қанчә айәтләрни көрүп чиқайли. Зәбур 90:2-айәт Йәһвани «әсирләр бойи Сән — Худадур» дәйду. Зәбур 102-баптиму шуниңға охшаш сөзләр йезилған (Зәбур 102, 12, 24, 27ни оқуң). Һабаккук пәйғәмбәр әрштики Атимиз һәққидә мундақ язған: «Әй Йәһва, Сән әзәлдин тартип мәвҗут әмәсму Сән? Әй мениң Муқәддәс Тәңрим, Сән өлмәйсән» (Һаб. 1:12, ЙД).

4. Йәһва әзәлдин әбәткичә мәвҗут дегән қарашни чүшиниш қийин болса, буниңдин әнсиришимиз керәкму? Чүшәндүрүп бериң.

⁴ Йәһва «Әбәдил-әбәтлик Худа» дегән қарашни чүшиниш сиз үчүн қийинму? (Йәшая 40:28, КТ) Буни чүшиниш башқиларғиму қийин. Худа һәққидә Елиху мундақ дегән: «Униң һаятиниң сани һесапсиз» (Аюп 36:26). Амма биз бир нәрсини чүшинәлмисәк, бу Униң натоғра екәнлигини билдүрмәйду. Мәсилән, электр күчиниң қандақ ишләйдиғанлиғини толуқ чүшәнмисәк, бу электр мәвҗут әмәслигини билдүрәмду? Әлвәттә яқ! Худди шуниңға охшаш, биз инсанлар, Йәһваниң әзәлдин барлиғи вә мәңгү мәвҗут болуп туридиғанлиғини толуқ чүшинәлмәслигимиз мүмкин. Амма бу һәргизму Худа мәңгү яшимайду дегәнни билдүрмәйду. Яратқучи биз чүшинәләйдиған яки чүшинәлмәйдиған ишлар билән чәклинип қалмайду (Рим. 11:33—36). У каинаттики барчә нәрсиләрдин, йәни қуяш вә юлтузлар яритилиштин бурун мәвҗут еди. Биз шуниңға ишинимизки, Йәһва күч-қудрити билән йәрни яратқан. Демәк, У асманларни кәң яйғандин бурун мәвҗут еди (Йәр. 51:15; Әлч. 17:24). Мәңгү яшайдиғанлиғимизға ишинишимизниң йәнә бир сәвәви немә?

ЙӘҺВА БИЗНИ МӘҢГҮ ЯШАШ ҮЧҮН ЯРАТҚАН

5. Тунҗа бир җүп инсанниң қандақ һаят кәчүрүш үмүти бар еди?

⁵ Йәһва инсанлардин башқа йәр йүзидики барчә җанлиқларни чәклик һаят кәчүрүш үчүн яратқан. У уларға һәргиз өлмәйдиған өзгичә һаят үмүтини бәргән еди. Бирақ Йәһва Адәм атини агаһландуруп мундақ дегән: «Амма яхши билән яманни тонутидиған дәрәқтин йемә, чүнки униңдин йегән күнила чоқум өлисән» (Ярит. 2:17). Әгәр Адәм ата билән Һава ана Йәһваға бойсунған болса, улар өлмигән болатти. Шуниңға ишинишкә болидики, мәлум вақит өткәндин кейин ахирида Йәһва уларниң «һаятлиқ дәриғидин» йейишигә йол қоятти. Бу Яратқучиниң уларниң мәңгү яшалишиғаb капаләтлик қилидиғанлиғини билдүриду (Ярит. 3:22).

6, 7. а) Инсанлар өлүш үчүн яритилмиғанлиғини йәнә немә көрситиду? ә) Сиз немә иш қилишни тәқәзалиқ билән күтиватисиз? (Рәсимләргә қараң).

⁶ Қизиқарлиқ йери шуки, бәзи тәтқиқатчи алимлар мейимизниң өмримиздә топлалайдиған барлиқ учурларға қариғанда, техиму көпирәк учурларни сақлаш ихтидариға егә екәнлигини испатлайду. 2010-жили илим-пән тоғрилиқ бир журналда мундақ дейилгән: «Мейимизниң сиғимчанлиғи тәхминән 2,5 миллион гигабайт болуп, 3 миллион саат (300 жилдин көпирәк) телевизор программа учуриға баравәр» (Scientific American Mind). Бу сан төвән мөлчәр болуши мүмкин, һәтта бәлким униңдинму көпирәк учурни сақлалайду. Мәйли қандақ болсун, бу Йәһваниң мейимизни 70 яки 80 жилда қобул қилған учурларға қариғанда, техиму көп учурларни сақлаш ихтидариға егә қилип лайиһиләнгәнлигини чүшәндүрүп бериду (Зәб. 90:10).

⁷ Йәһва йәнә бизни күчлүк яшаш арзу истиги билән яратқан. Муқәддәс китапта инсанлар һәққидә Худа «уларниң жүригигә мәңгүлүкни салған еди»,— дәп йезилған (Вәз 3:11). Бу бизниң өлүмни дүшмән дәп қаришимизниң бир сәвәви (Кор. 1-х. 15:26). Әгәр еғир кесәл болуп қалсақ, һечнемә қилмай өлүмни сақлап ятимизму? Әлвәттә яқ. Адәттә биз дохтурға берип кесәлгә қарши күрәш қилиш үчүн дора ичишимиз мүмкин. Әмәлийәттә биз өлүмдин сақлиниш үчүн қолумиздин кәлгиничә амал қилимиз. Әгәр биз яхши көрүдиған бири өлүп кәтсә, у киши яш яки қери болсун, азаплинип узунғичә қайғу-һәсрәт чекимиз (Йоһ. 11:32, 33). Биз мәңгү үгинишни давамлаштуралаймиз вә бизниң мәңгү яшаш арзу-истигимиз күчлүк. Сәвәви меһир-шәпқәтлик Яратқучимиз бизни шундақ яратқан. Наһайити ениқки, У бизгә мәңгү яшалайдиған имканийәтни бериду. Амма бизниң мәңгүлүк яшалайдиғанлиғимизға ишинишимизгә техиму көп сәвәпләр бар. Йәһваниң өтмүштә қилған вә һазир қиливатқан бәзи ишлири Яратқучиниң әсли мәхситиниң өзгәрмигәнлигини испатлайду. Дәлилләрдин бир қанчисини көрүп бақайли.

ЙӘҺВАНИҢ МӘХСИТИ ӨЗГӘРМИДИ

8. Йәһваниң биз үчүн қилған мәхсити һәққидә Йәшая 55:11-айәт бизни немигә ишәндүриду?

⁸ Гәрчә Адәм ата билән Һава ана гуна қилип өз пәрзәнтлириниму өлүмгә дучар қилған болсиму, Йәһваниң әсли мәхсити өзгәргини йоқ (Йәшая 55:11ни оқуң). Униң мәхсити йәнила садақәтмән инсанларни мәңгүлүк һаятқа ериштүрүш. Уни биз қандақ биләләймиз? Чүнки биз Йәһва Өз мәхсәтлирини әмәлгә ашуруш үчүн қилған сөзлири вә ишлирини мулаһизә қилиш арқилиқ шундақ хуласигә келәләймиз.

9. Худа немә һәққидә вәдә бәргән? (Даниял 12:2, 13)

⁹ Йәһва Өзиниң өлүкләрни тирилдүридиғанлиғи вә уларни мәңгүлүк һаятқа ериштүридиғанлиғи тоғрисида вәдә бәргән (Әлч. 24:15; Тит. 1:1, 2). Садақәтмән киши Аюп Йәһваниң өлгәнләрни тирилдүрүшкә тәшна екәнлигигә ишәнгән (Аюп 14:14, 15). Даниял пәйғәмбәр келәчәктә тирилидиған инсанларниң мәңгү яшаш пурсити болидиғанлиғини билгән (Зәб. 37:29; Даниял 12:2, 13ни оқуң). Әйсаниң заманидики йәһудийларму Йәһваниң садиқ бәндилирини «мәңгүлүк һаятқа» ериштүридиғанлиғини билгән (Луқа 10:25; 18:18). Әйсаму бу вәдини қайта-қайта тәкрарлиған вә өзиму Атиси тәрипидин тирилдүрүлгән (Мәт. 19:29; 22:31, 32; Луқа 18:30; Йоһ. 11:25).

10. Өтмүштики тирилдүрүшләр немини испатлайду? (Рәсимгә қараң).

¹⁰ Яратқучи Йәһва һаятлиқ бәргүчи вә Униң кишиләрни һаятлиққа ериштүрүш күч-қудрити бар. У Илияс пәйғәмбәргә сәрәпәтлик тул аялниң оғлини тирилдүрүш күчини бәргән (Пад. 1-яз. 17:21—23). Кейин Худаниң ярдими билән Елиша пәйғәмбәр шунәмлик аялниң оғлини тирилдүргән (Пад. 2-яз. 4:18—20, 34—37). Булар вә башқа тирилдүрүш һәққидики үзүндиләр Йәһваниң кишиләрни тирилдүрүш күч-қудрити барлиғини испатлайду. Һәзрити Әйса йәрдә болғанда, Униңға тирилдүрүш қудритини Атиси бәргәнлигини испатлиған (Йоһ. 11:23—25, 43, 44). Әйса һазир асманда вә униңға һоқуқ берилгән. Шуңа у қәбирләрдә болғанларниң һәммиси келәчәктә мәңгүлүк һаятқа еришиш үчүн тирилдүрилиду дегән вәдини әмәлгә ашуралайду (Мәт. 28:18; Йоһ. 5:25—29).

11. Төләм қандақ қилип мәңгү яшишимиз үчүн йол ачқан?

¹¹ Немә үчүн Йәһва Худа сөйүмлүк Оғлиниң азап-оқубәт чекип, өлүп кетишигә йол қойған? Әйса Униң сәвәвини ашкарилап мундақ дегән: «Худа дунияни шу қәдәр сөйдики, Өзи яратқан йеганә Оғлиға етиқат билдүрүватқан һәрбир киши һалак болмай, мәңгүлүк һаятқа еришиши үчүн, Оғлини қурванлиққа бәрди» (Йоһ. 3:16). Худа Өз Оғлини гунайимиз үчүн төләм қурбанлиғини бериш арқилиқ бизниң мәңгүлүк һаятлиққа еришишимизгә йол ачқан (Мәт. 20:28). Әлчи Паул Худаниң мәхситиниң бу муһим қисмини хуласиләп мундақ язған: «Адәм атида һәммиси өлгинидәк, Мәсиһтә һәммиси һаят болиду» (Кор. 1-х. 15:21, 22).

12. Йәһваниң биз үчүн қилған мәхситини әмәлгә ашурушиға Падишалиқ қандақ ярдәм бериду?

¹² Әйса өз әгәшкүчилиригә Худа Падишалиғиниң келиши вә Худаниң ирадисиниң йәр йүзидә әмәлгә ешишини тиләп дуа қилишни үгәткән еди (Мәт. 6:9, 10). Инсанларниң йәр йүзидә мәңгү яшиши Худаниң мәхситиниң бир қисми. Бу мәхситини әмәлгә ашуруш үчүн Йәһва Өз Оғлини Мәсиһ Падишалиғиниң Падишаси қилип тәйинлигән. Худа йәр йүзидин 144000 адәмни жиғиватиду, улар Әйса билән биллә Худаниң ирадисини әмәлгә ашуруш үчүн талланғанлардур (Вәһ. 5:9, 10).

13. Йәһва һазир немә қиливатиду вә биз чоқум немә қилишимиз керәк?

¹³ Йәһва һазир «зор бир топ» халайиқни жиғиватиду, У уларға Өз Падишалиғиниң қанун-қаидилиригә бойсунуп яшашни үгитиватиду (Вәһ. 7:9, 10; Яқуп 2:8). Бүгүн вәһимә вә уруш түпәйли бөлүнгән дунияда яшаватқиниға қаримай, пәриқлиқ милләт қәбилидин келип чиққан бу бир топ кишиләр, қәлбидики барчә өчмәнликләрни йилтизидин қомуруп ташлашқа тиришиду. Улар аллиқачан көчмә мәнада қиличларни сапан чишлири соққанлиғини өз иш-һәрикәтлири билән көрситиватиду (Мика 4:3). Улар шунчә көп қан төкүлүшләрни кәлтүрүп чиқиридиған урушларға қатнишишниң орниға, кишиләргә һәқ Худа вә Униң мәхсити һәққидә үгитиш арқилиқ уларниң «һәқиқий һаятни» тепишиға ярдәм бериватиду (Тим. 1-х. 6:19). Улар Худаниң Падишалиғини қоллап-қувәтлигәнлиги үчүн аилә әзалириниң қаршилиқлириға учриши яки ихтисадий қийинчилиқларға дуч келиши мүмкин, амма Йәһва уларға муһтаҗлиқларни тәминләп беридиғанлиғини вәдә қилиду (Мәт. 6:25, 30—33; Луқа 18:29, 30). Әшу дәлил-испатлар Худа Падишалиғиниң һәқиқәтән бизгә ғәмхорлуқ қилидиғанлиғиға вә у давамлиқ Худаниң мәхситини әмәлгә ашуридиғанлиғиға болған ишәнчимизни күчәйтиду.

ГӨЗӘЛ КЕЛӘЧӘК АЛДИМИЗДА

14, 15. Йәһваниң өлүмни мәңгү йоқ қилиш вәдиси ахирида қандақ әмәлгә ашурулиду?

¹⁴ Әйса Мәсиһ һазир асманда Худа Падишалиғиниң Падишаси болди вә Яратқучи Йәһваниң барчә вәдилирини әмәлгә ашуриду (Кор. 2-х. 1:20). 1914-жилдин буян Әйса дүшмәнлирини бойсундуруп келиватиду (Зәб. 110:1, 2). У вә униң билән биллә һөкүмранлиқ қилидиғанлар пат йеқинда һәммисини пүтүнләй бойсундуруп рәзил кишиләрни тамамән йоқ қилиду (Вәһ. 6:2).

¹⁵ Әйса миңжиллиқ һөкүмранлиқ мәзгилидә өлүкләрни тирилдүриду вә итаәтчан инсанларниң мукәммәл болушиға ярдәм бериду. Ахирқи синақтин кейин Йәһва Худайимиз һәққаний адәм дәп һөкүм қилғанлар «йәрни мирасқа елип, униңда әбәдил-әбәт яшайду» (Зәб. 37:10, 11, 29). Хошаллинарлиқ йери шуки, әң ахирқи дүшмән, өлүм йоқ қилиниду (Кор. 1-х. 15:26).

16. Йәһваға хизмәт қилиштики асасий мәхситимиз немә болуши керәк?

¹⁶ Көргинимиздәк, мәңгү яшаш үмүтимиз Худаниң Сөзигә асасланған. Бу үмүт бизниң ахирқи қийин күнләрдә Йәһваға садиқ қелишимизға ярдәм берәләйду. Амма биз пәқәт һаят қелиш үчүнла Йәһваға садиқ қелишқа тиришсақ, Яратқучимизни хурсән қилалмаймиз (Кор. 2-х. 5:14, 15). Йәһва Худаға вә Мәсиһ Әйсаға садиқ қелишимизниң әң муһим сәвәви — биз уларни чин қәлбимиздин сөйүмиз. Шу сөйгү-муһәббитимиз уларни үлгә қилишқа вә башқиларға үмүтимиз һәққидә ейтишқа үндәйду (Рим. 10:13—15). Биз өзүмизни пида қилсақ вә мәртликни йетилдүрсәк, Йәһва биз билән мәңгү дост болушни халайду (Ибр. 13:16).

17. Һәрбиримиз немә қилишни таллишимизни лазим? (Мәтта 7:13, 14)

¹⁷ Биз мәңгүлүк һаятқа еришидиғанларниң арисида болимизму? Йәһва бизгә әшу пурсәтни бериду. Һазир чоқум бизни һаятлиққа йетәкләйдиған йолда меңишни таллишимиз лазим (Мәтта 7:13, 14ни оқуң). Ундақта келәчәктики мәңгүлүк һаят қандақ болиду? Кейинки мақалидә бу соалға җавап тапимиз.