Муқәддәс китаптики бәшарәтләрни үгиниң

1. Бәшарәтләрни тәтқиқ қилиштин зоқ елишни үгинишиңизгә немә ярдәм берәләйду?

БЕН исимлиқ бир яш бурадәр: «Мән Муқәддәс китаптики бәшарәтләрни тәтқиқ қилишни яхши көрүмән»— дәйду. Сизму яхши көрәмсиз? Яки бәшарәтләрни тәтқиқ қилишни қийин дәп қарамсиз? Бәшарәтләрни тәтқиқ қилиш зерикишлик иш дәп ойлишиңиз мүмкин. Бирақ Йәһва Худа уларни немә үчүн Өзиниң Сөзигә яздурғанлиғи тоғрисида көпирәк билсиңиз, көзқаришиңизни өзгәртишиңиз мүмкин.

2. Бу мақалидә немиләрни мулаһизә қилимиз?

² Бу мақалидә биз Муқәддәс китаптики бәшарәтләрни немә үчүн вә қандақ тәтқиқ қилип үгинишимиз керәклиги һәққидә мулаһизә қилимиз. Андин кейин Даниял китавидики икки бәшарәтни муһакимә қилип, уларни чүшиниш һазир бизгә қандақ ярдәм берәләйдиғанлиғини көрүмиз.

НЕМӘ ҮЧҮН БӘШАРӘТЛӘРНИ ТӘТҚИҚ ҚИЛИП ҮГИНИШИМИЗ КЕРӘК?

3. Бәшарәтләрни чүшәнмәкчи болсақ, немә қилишимиз керәк?

³ Әгәр Муқәддәс китаптики бәшарәтләрни чүшәнмәкчи болсақ, ярдәм соришимиз керәк. Мәсилән, мундақ бир вәзийәтни тәсәввур қилиң: сиз натонуш җайға сәяһәткә бардиңиз. Бирақ сәяһәткә биллә барған достуңиз бу җайни вә һәрбир йол қәйәргә елип баридиғанлиғини ениқ билиду. Сиз җәзмән шундақ дост билән биллә сәяһәткә барғиниңиздин интайин хошал болисиз. Худди мошуниңға охшаш, Йәһва бизниң қайси заманда яшаватқанлиғимизни вә алдимизда немә ишларниң йүз беридиғанлиғини ениқ билиду. Шуңа, бәшарәтләрни чүшиниш үчүн кәмтәрлик билән Йәһвадин ярдәм соришимиз керәк (Дан. 2:28; Пет. 2-х. 1:19, 20).

4. Немә үчүн Йәһва Өз Сөзидә бәшарәтләрни яздурған? (Йәрәмия 29:11) (Рәсимгиму қараң.)

⁴ Көйүмчан ата-аниға охшаш, Йәһва Худа пәрзәнтлириниң гөзәл келәчиги болушини халайду (Йәрәмия 29:11ни оқуң). Амма инсаний ата-аниға охшимайдиған йери, Йәһва келәчигимиз тоғрисида һәммә нәрсидин толуқ хәвәрдар. Муқәддәс Язмилардики бәшарәтләр арқилиқ У бизгә келәчәктә йүз беридиған муһим иш-вәқиәләрни алдин-ала билдүргән (Йәшая 46:10). Шуңа, Муқәддәс китаптики бәшарәтләр әрштики Атимиздин кәлгән соға. Амма шу алдин ейтилған сөзләрниң һәқиқәтән әмәлгә ашидиғанлиғиға қандақ җәзм қилалайсиз?

5. Яшлар Максниң мисалидин немиләрни үгинәләйду?

⁵ Мәктәптә яш қериндашлиримиз пат-пат Муқәддәс китапни анчә һөрмәтлимәйдиған яки униңға сәл қарайдиған адәмләрниң арисида болиду. Уларниң гәп-сөзлири вә иш-һәрикәтлири түпәйли, яш етиқатдашлиримизда бәзи гуманлар пәйда болуши мүмкин. Макс исимлиқ бир бурадәрниң мисалини көрүп бақайли. У мундақ дәйду: «Мән мәктәптә оқуғанда, ата-анамниң маңа һәқиқий динни үгитиватқанлиғиға вә Муқәддәс китапниң Худадин кәлгәнлигигә гуманлинишқа башлидим». Униң ата-аниси немә қилған? Макс мундақ дәйду: «Ата-анам интайин ғәм қилған, бирақ улар өзини бесивелип, тәмкин инкас қайтурған». Ата-аниси Максниң соаллириға Муқәддәс китаптин җавап бәргән вә у өзиму җавап тепишқа тиришқан. У мундақ дәйду: «Муқәддәс китаптики бәшарәтләрни өзүм тәтқиқ қилип үгәндим. Үгәнгәнлиримни башқа яшлар билән муһакимә қилдим. Нәтиҗидә, Муқәддәс китапниң Худа тәрипидин илһамландурулуп йезилғанлиғиға көз йәткүздүм».

6. Гуман қилишқа башлиған болсиңиз, немә қилишиңиз керәк вә немә үчүн бу муһим?

⁶ Әгәр Максқа охшаш, сизму Муқәддәс китапта һәқиқәт барлиғиға гуманлинишқа башлисиңиз, өзүңизни гунакар һис қилмаң. Амма чапсан һәрикәт қилишиңиз зөрүр. Гуман худди датқа охшайду. Униңға сәл қарисақ, у аста-аста қиммәтлик нәрсиләрни һалак қилалайду. Иман-етиқадиңизни вәйран қилидиған һәрқандақ гуманни йоқитиш үчүн, авал өзүңиздин: «Муқәддәс китаптики келәчәк һәққидә йезилғанларға ишинимәнму?»— дәп сораң. Әгәр ишәнмисиңиз, аллибурун әмәлгә ашқан бәшарәтләрни тәтқиқ қилип үгинишиңиз керәк. Уни қандақ қилалайдиғанлиғиңизни көрүп бақайли.

БӘШАРӘТЛӘРНИ ҚАНДАҚ ТӘТҚИҚ ҚИЛИШ КЕРӘК?

7. Бәшарәтләрни үгиништә Даниял бизгә қандақ үлгә қалдурған? (Даниял 12:10) (Рәсимгиму қараң.)

⁷ Бәшарәтләрни тәтқиқ қилип үгиништә Даниял интайин яхши үлгә қалдурған. У бәшарәтни тоғра нийәт-мәхсәт билән үгинишкә киришкән вә һәқиқәтни билишни халиған еди. Даниял йәнә кәмтәр киши болуп, Йәһваниң әхлақий өлчәмлири билән яшайдиған кишиләргә Униң әқил-парасәт берип, бәшарәтләрни чүшинишигә ярдәм беридиғанлиғини көрүп йәткән (Дан. 2:27, 28; Даниял 12:10ни оқуң). У Йәһва Худаниң ярдимигә тайиниш арқилиқ өзиниң кәмтәр киши екәнлигини көрсәткән (Дан. 2:18). Даниял йәнә әстаидил болған. У қолида бар Муқәддәс Язмиларни тәтқиқ қилип үгәнгән (Йәр. 25:11, 12; Дан. 9:2). Даниялни қандақ үлгә қилалайсиз?

8. Немә үчүн бәзиләр бәшарәтләрниң әмәлгә ашидиғанлиғиға ишәнмәйду вә биз немә қилишимиз керәк?

⁸ Нийәт-мәхсәтлириңизни тәкшүрүң. Муқәддәс китаптики бәшарәтләрни немә үчүн тәтқиқ қилишни халайсиз? Һәқиқәтни чүшиниш үчүнму? Әгәр шундақ болса, Йәһва Худа чоқум сизгә ярдәм бериду (Йоһ. 4:23, 24; 14:16, 17). Бәзи адәмләр Муқәддәс китаптики бәшарәтләрни башқа нийәт-мәхсәт билән тәтқиқ қилиду. Уларниң мәхсити — Муқәддәс китап Худадин кәлмигән дегән көзқарашларни испатлаш. Әгәр улар шу көзқарашни испатлиса, өзлири үчүн немә тоғра, немә хата екәнлигини қарар қилалайду. Амма биз тоғра нийәт-мәхсәттә тәтқиқ қилишимиз лазим. Униңдин башқа, бәшарәтләрни чүшиниш үчүн муһим бир пәзиләтниң болуши зөрүр.

9. Бәшарәтләрни чүшиниш үчүн қандақ пәзиләт керәк? Чүшәндүрүң.

⁹ Кәмтәр болуң. Йәһва кәмтәр кишиләргә ярдәм беридиғанлиғини вәдә қилиду (Яқуп 4:6). Шуңа, Муқәддәс китаптики бәшарәтләрни чүшиниш үчүн Йәһваға дуа қилип, Униңдин ярдәм соришимиз керәк. Йәнә Йәһва қоллиниватқан садиқ қулниң ярдимигә муһтаҗ екәнлигимизниму етирап қилишимиз лазим (Луқа 12:42). Йәһва — тәртиплик Худадур. Шуңа, У Өз Сөзидики һәқиқәтләрни чүшинишимизгә ярдәм бериш үчүн пәқәт садиқ қулни қоллинидиғанлиғи әқилгә мувапиқ (Кор. 1-х. 14:33; Әфәс. 4:4—6).

10. Эстерниң мисалидин немиләрни үгинисиз?

¹⁰ Әстаидил болуң. Өзүңизни қизиқтурған бир бәшарәтни таллап, шуни тәтқиқ қилишни башлаң. Эстер исимлиқ қериндаш Мәсиһниң келиши һәққидики бәшарәтләргә қизиққан еди. У мундақ дәйду: «Мән 15 яшқа киргәндә, әшу бәшарәтләрниң Әйса туғулуштин илгири йезилғанлиғини испатлаш үчүн чоңқур тәтқиқ қилишни башлидим». Эстер Өлүк деңиз орам язмилири һәққидә тәкшүрүп тәтқиқ қилип, үгәнгәнлиригә қайил болғандин кейин, мундақ дегән: «Өлүк деңиз орам язмилириниң бәзилири Мәсиһ туғулуштин илгирики дәвирләрдә йезилған. Шуңа, улардики бәшарәтләр чоқум Худадин кәлгән. Бәзи мәзмунларни чүшиниш үчүн бирқанчә қетим қайта-қайта оқушумға тоғра кәлди». Амма у өзиниң көрсәткән тиришчанлиғидин хошал болған. Муқәддәс китаптики бир қатар бәшарәтләрни әстаидил тәтқиқ қилғандин кейин у мундақ дегән: «Мән Муқәддәс китапниң һәқиқәтән тоғра екәнлигигә өзүм ениқ көз йәткүздүм».

11. Муқәддәс китапниң тоғрилиғиға өзүмизни қайил қилишниң биз үчүн қандақ пайдиси бар?

¹¹ Худа Сөзидики бәзи бәшарәтләрниң аллиқачан әмәлгә ашқанлиғини көргинимиздә, Йәһва вә Униң көрсәтмилиригә болған ишәнчимиз техиму күчийиду. Униңдин башқа, һазир қандақ синақларға дуч келишимиздин қәтъийнәзәр, бәшарәтләр келәчәккә болған үмүтимизни сақлишимизға ярдәм бериду. Даниял пәйғәмбәр язған бәшарәтләрдин һазир әмәлгә ешиватқан иккисини қисқичә муһакимә қилайли. Уларни чүшиниш дана қарар чиқиришимизға ярдәм берәләйду.

ТӨМҮР БИЛӘН СЕҒИЗ ЛАЙ АРИЛАШҚАН ПУТ ТОҒРИЛИҚ ТӘТҚИҚ ҚИЛИҢ

12. Төмүр билән лайниң арилашмисидин шәкилләнгән пут кимгә вәкиллик қилиду? (Даниял 2:41—43)

¹² Даниял 2:41—43ни оқуң. Даниял пәйғәмбәр Небуқаднисар падишаға өрүп бәргән чүштә һәйкәлниң пути төмүр билән сеғиз лайниң арилашмисидин шәкилләнгән еди. Вәһий вә Даниял китавидики башқа бәшарәтләр билән бу бәшарәтни селиштуруш арқилиқ шу пут бүгүнки күндә һөкүмранлиқ қиливатқан Англо-Америка дуния күчлиригә вәкиллик қилидиғанлиғини көрәләймиз. Даниял пәйғәмбәр бу дуния күчиниң бир қисми күчлүк, бир қисми аҗиз болидиғанлиғини ейтқан. Немә үчүн бир қисми аҗиз болиду? Сәвәви лайға вәкиллик қилидиған аддий хәлиқ бу дуния күчиниң күч-қудритини аҗизлаштуриду. Шуңа, бу дуния күчи төмүргә охшаш пүтүнләй күчлүк болалмайдуb.

13. Бу бәшарәтни чүшиниш қайси муһим һәқиқәтләрни чүшинишимизгә ярдәм берәләйду?

¹³ Даниял тәсвирлигән ғайәт зор һәйкәлдин көп нәрсиләрни үгинәләймиз. Биринчи, Англо-Америка дуния күчи Биринчи вә Иккинчи дуния урушлирида бәзи җәһәтләрдин өзиниң күчлүк екәнлигини нәмаян қилған еди. Мәсилән, у ғәлибә қилишта муһим роль ойниған. Бирақ бу дуния күчиниң қудрити аҗизлишип кетиватиду. Чүнки хәлиқ үзлүксиз бир-бири билән зиддийәтлишип, һәтта дайим һөкүмәтләргә қарши чиқиду. Шуңа, бу дуния күчи аҗизлашқан вә бу вәзийәт йәнила давамлашмақта. Иккинчи, Худа Падишалиғи барлиқ инсаний һөкүмәтләрни йоқ қилиштин бурун, бу иттипақ әң ахирқи дуния күчи болуп туриду. Гәрчә башқа дөләтләр бәзидә Англо-Америка дуния күчигә қарши җәң елан қилсиму, амма униң орнини алалмайду. Чүнки Худа Падишалиғиға вәкиллик қилидиған таш һәйкәлниң путини вәйран қилидиғанлиғини билимиз (Дан. 2:34, 35, 44, 45).

14. Төмүр вә лайниң арилашмисидин шәкилләнгән пут тоғрисидики бәшарәтни чүшиниш дана қарарларни чиқиришимизға қандақ ярдәм берәләйду?

¹⁴ Даниял китавидики төмүр вә лайниң арилашмисидин шәкилләнгән пут тоғрисидики бәшарәтниң тоғрилиғиға ишинәмсиз? Әгәр шундақ болса, бу һаят кәчүрүш тәрзиңизгә тәсир көрситиду. Пат арида бу рәзил дунияниң йоқ қилинидиғанлиғини билгәчкә, диққитиңизни көп пул тепиш яки маддий нәрсиләрни топлашқа қаратмайсиз (Луқа 12:16—21; Йоһ. 1-х. 2:15—17). Бу бәшарәтни чүшиниш вәз ейтиш вә тәлим бериш хизмитиниң муһимлиғини көрүп йетишиңизгә ярдәм бериду (Мәт. 6:33; 28:18—20). Бу бәшарәтни тәтқиқ қилғандин кейин, өзүңиздин шундақ сорап көрүң: «Чиқарған қарарлирим пат йеқинда Худа Падишалиғи барлиқ инсаний һакимийәтләрни пүтүнләй йоқ қилидиғанлиғиға ишинидиғанлиғимни көрситәмду?»

ШИМАЛИЙ ПАДИША ВӘ ҖӘНУБИЙ ПАДИША СИЗГӘ ҚАНДАҚ ТӘСИР ҚИЛИДУ?

15. Бүгүнки күндә шималий вә җәнубий падишалар кимләр?

¹⁵ Даниял 11:40ни оқуң. Даниял китавиниң 11-бабида икки падишалиқ тилға елинған. Улар әң қудрәтлик дуния күчи орниға өтүш үчүн күрәш қиливатқан сәясий күчләр. Муқәддәс китаптики бу бәшарәт билән башқа бәшарәтләр билән селиштуруш арқилиқ шималий падишаси Россия вә униң иттипақдашлири, җәнубий падишасини Англо-Америка дуния күчи дәп биливалимизc.

16. Шималий падиша һөкүмранлиқ қиливатқан җайда қериндашлиримиз қандақ синақларға дуч келиватиду?

¹⁶ Шималий падиша һөкүмранлиқ қилидиған җайларда Худа хизмәтчилири бу падишаниң беваситә зиянкәшлигигә учраватиду. Бәзи етиқатдашлар етиқади сәвәплик уруп-соқуливатиду яки түрмигә ташлиниватиду. Бирақ бу қериндашлиримизни қорқутушниң орниға, иман-етиқадини техиму күчәйтмәктә. Немә үчүн? Чүнки қериндашлиримиз Худа хәлқиниң зиянкәшликкә учриши Даниялниң пәйғәмбәрлик сөзлириниң әмәлгә ашуруватқанлиғини чүшинидуd (Дан. 11:41). Буни билиш Йәһва Худаға болған садақәтмәнлигимизни вә У үмүтимизни чоқум әмәлгә ашуридиғанлиғиға болған ишәнчимизни күчәйтиду.

17. Җәнубий падиша һөкүмранлиқ қиливатқан җайларда яшаватқан қериндашлиримиз қандақ синақларға дуч келиватиду?

¹⁷ Өтмүштә җәнубий падиша һәм Йәһваниң хәлқигә беваситә һуҗум қилған. Мәсилән, 20-әсирниң алдинқи йеримида нурғун қериндашлар бетәрәпликни сақлиғини үчүн түрмигә ташланған вә бәзи Гувачиларниң балилири шу сәвәптин мәктәптин қоғланған. Бирақ йеқинки нәччә он жилда җәнубий падишаниң һөкүмранлиғи астидики Йәһва гувачилири башқичә синақларға дуч келиватиду. Мәсилән, сайлам тәшвиқати елип бериливатқан мәзгилдә Мәсиһ әгәшкүчиси бир партияни яки бир намзатни башқиларға қариғанда яхширақ дегән ой-пикир яки һис-туйғуда болуши мүмкин. Бирақ шуни унтумаслиғимиз керәкки, пәқәт иш-һәрикәтлиримиздила әмәс, бәлки ой-пикирлиримиз вә һис-туйғулиримизда бетәрәпликни сақлишимиз муһим (Йоһ. 15:18, 19; 18:36).

18. Шималий падиша билән униң дүшмини оттурисидики тоқунушқа қандақ инкас қайтуримиз? (Рәсимгиму қараң.)

¹⁸ Муқәддәс китаптики бәшарәтләргә ишәнмәйдиған кишиләр җәнубий падиша билән шималий падишаниң тоқунушқанлиғини көргәндә, улар интайин әнсирәп кетиши мүмкин (Дан. 11:40). Һәр икки падишалиғиниң йәр йүзидики барлиқ мәвҗудатларни йоқ қилалайдиған ядро қураллири бар. Амма Йәһва уларниң бундақ қилишиға йол қоймайдиғанлиғини билимиз (Йәшая 45:18). Шуңа, шималий падиша билән җәнубий падишаниң оттурисидики дүшмәнлишиш бизни ғәм-әндишигә селишниң орниға, иман-етиқадимизни күчәйтиду. Бу мошу рәзил дунияниң пат арида йоқ қилидиғанлиғини ениқ испатлайду.

БӘШАРӘТЛӘРГӘ ДАВАМЛИҚ ДИҚҚӘТ ҚИЛИҢ

19. Муқәддәс китаптики бәшарәтләр һәққидә чоқум немини етирап қилишимиз керәк?

¹⁹ Биз Муқәддәс китаптики бәзи бәшарәтләрниң қандақ әмәлгә ашидиғанлиғини билмәймиз. Һәтта Даниял пәйғәмбәрму өзиниң язғанлириниң һәммисиниң мәнасини чүшәнмигән (Дан. 12:8, 9). Амма бир бәшарәтниң қандақ әмәлгә ашқанлиғини толуқ чүшәнмисәк, бу униң әмәлгә ашмайдиғанлиғини билдүрмәйду. Йәһва Худаниң худди илгирикигә охшаш мувапиқ вақит-саатта бәшарәтләрни чүшинишимизгә ярдәм беридиғанлиғиға ишинәләймиз (Амос 3:7).

20. Һаяҗанға салидиған қайси бәшарәтләр пат арида әмәлгә ашиду вә немә қилишимиз керәк?

²⁰ Пат арида течлиқ вә бехәтәрлик елан қилиниду (Сал. 1-х. 5:3). Андин дуниядики сәясий күчләр ялған динға һуҗум қилип, уларни пүтүнләй йоқ қилиду (Вәһ. 17:16, 17). Андин кейин улар Худаниң хәлқигә һуҗум қилиду (Әзәк. 38:18, 19). Мошу ишлар әң ахирқи җәң Һармагедон урушиға йол ачиду (Вәһ. 16:14, 16). Шуниңға ишинимизки, бу ишлар пат арида йүз бериду. Амма шулар йүз бериштин авал, Муқәддәс китаптики бәшарәтләргә давамлиқ диққәт қилип, башқиларниңму шундақ диққәтчан болушиға ярдәм берәйли. Шундақ қилиш арқилиқ асмандики меһир-шәпқәтлик Атимизға болған миннәтдарлиғимизни давамлиқ билдүрәләймиз.