Садиқ пәриштиләрни тәқлит қилайли

1, 2. а) Биз пәриштиләрдин қандақ пәриқлинимиз? ә) Бизниң улар билән қандақ охшаш тәрәплиримиз бар?

ЙӘҺВА ХУДА бизни һәқиқәткә җәлип қилғанда, меһир-муһәббәткә толған аилисиниң бир әзаси болушқа тәклип қилған. Бу аилигә дунияниң җай-җайлиридин чиққан һәрхил бурадәр-қериндашлар вә миллионлиған пәриштиләрму кириду (Дан. 7:9, 10). Пәриштиләрниң биздин қанчилик пәриқлинидиғанлиғи һәққидә ойлинип бақайли. Мәсилән, пәриштиләр инсанларниң яритилишидин аллибурун яритилған еди (Аюп 38:4, 7). Улар бизгә қариғанда интайин күчлүк. Улар муқәддәс вә һәққаний шәхсләр. Биз намукәммәл болғачқа, уларға охшаш болалмаймиз (Луқа 9:26).

² Гәрчә биз улардин көп җәһәттин пәриқләнсәкму, бирақ охшаш тәрәплиримиз көп. Пәриштиләргә охшаш, бизму Йәһва Худаниң есил-пәзиләтлирини әкс әттүрәләймиз һәм таллаш әркинлигимиз бар. Уларға охшаш һәрбиримизниң шәхсий исмимиз, алаһидиликлиримиз вә Йәһва Худа тапшурған вәзипилиримиз бар. Униңдин башқа, бизму пәриштиләргә охшаш Яратқучимизға ибадәт қилишқа муһтаҗ (Пет. 1-х. 1:12).

3. Пәриштиләрдин немиләрни үгинәләймиз?

³ Бизниң пәриштиләр билән нурғун охшаш тәрәплиримиз болғачқа, уларниң көрситиватқан яхши үлгилири бизни илһамландуруп, нурғун нәрсиләргә үгитиду. Бу мақалидә пәриштиләрниң кәмтәрлиги, инсанларға болған сөйгү-муһәббити, сәвир-тақити вә җамаәтни пак һаләттә тутушқа тиришиватқанлиғидин немини үгинәләйдиғанлиғимизни муһакимә қилимиз.

КӘМТӘР ПӘРИШТИЛӘР

4. а) Пәриштиләр кәмтәрликни қандақ көрситиду? ә) Пәриштиләр немә үчүн кәмтәр? (Зәбур 89:7)

⁴ Садиқ пәриштиләр бәк кәмтәр. Улар мол тәҗрибә, күч-қудрәт вә даналиққа егә болсиму, Йәһва Худаниң көрсәтмилиригә бойсуниду (Зәб. 103:20). Пәриштиләр тапшуруқлирини орунлиғанда, һечқачан өз ишлири вә адәттин ташқири қабилийәтлири билән махтанмайду. Һәтта уларниң исимлири натонуш болуп қалсиму, улар Йәһва Худаниң ирадисини хошаллиқ билән орунлайдуa (Ярит. 32:24, 29; Пад. 2-яз. 19:35). Улар Йәһва Худаға лайиқ болған шан-шәрәпни қобул қилишни рәт қилиду. Пәриштиләр немә үчүн шунчилик кәмтәр? Чүнки улар Йәһва Худани қаттиқ сөйиду вә Униңға чоңқур һөрмәт-еһтирам көрситиду (Зәбур 89:7ни оқуң).

5. Пәриштә Йоһанни түзәткәндә кәмтәрликни қандақ көрсәткән? (Рәсимгиму қараң.)

⁵ Пәриштиләрниң кәмтәрлигини тәсвирләйдиған бир вақиәни көрүп чиқайли. Тәхминән милади 96-жили исми натонуш бир пәриштә әлчи Йоһанға һәҗәплинәрлик вәһийни көрсәткән (Вәһ. 1:1). Йоһан буниңға қандақ инкас қайтурған? У йәргә тизлинип, пәриштигә ибадәт қилмақчи болди. Бирақ һелиқи пәриштә уни тосап, мундақ дегән: «Пәхәс бол, ундақ қилма! Мән саңа вә Әйса һәққидә гувалиқ қиливатқан сениң бурадәрлириңгә қулдашмән» (Вәһ. 19:10). Немә дегән кәмтәр пәриштә! У һәм шан-шөһрәтни, һәм шан-шәрәпни қобул қилмиған. Пәриштә дәрру Йоһанни Йәһва Худаға ибадәт қилишқа тәлпүндүрди. Гәрчә бу пәриштә Йоһанға қариғанда күчлигирәк вә Йәһваға көпирәк хизмәт қилсиму, у Йоһанни камситмиған. У кәмтәрлик билән Йоһанға охшаш өзиниң қул болғанлиғини ейтқан. Гәрчә Йоһанни түзитишкә тоғра кәлсиму, пәриштә униңға қопаллиқ қилмиған вә униң йешини нәзәрдә тутуп, меһрибанлиқ билән сөзлигән. Чүнки пәриштә Йоһанниң көргән вәһийдин интайин һәйран қалғанлиғини чүшәнгән.

6. Пәриштиләрниң кәмтәрлигини қандақ тәқлит қилалаймиз?

⁶ Пәриштиләрниң кәмтәрлигини қандақ тәқлит қилалаймиз? Биз пәриштиләргә охшаш, Йәһва Худаға тиришчанлиқ билән хизмәт қилип, қилған ишлиримиз яки қабилийәтлиримиз билән махтанмаймиз (Кор. 1-х. 4:7). Униңдин башқа, Йәһва Худаға узағирақ вақит хизмәт қилғанлиқтин яки қандақту бир шән-шәрәплик вәзипилиримиз сәвәвидин башқиларни өзүмиздин төвән көрмәслигимиз керәк. Әксинчә, қанчилик көп вәзипиләргә егә болсақ, өзүмизни шунчилик төвән тутушимиз керәк (Луқа 9:48). Пәриштиләргә охшаш бизму башқиларға хизмәт қилишни халаймиз. Шуниң үчүн башқиларни өзүмиздин үстүн һесаплаймиз.

7. Әгәр бирсини түзитишкә яки беваситә нәсиһәт беришкә тоғра кәлсә, кәмтәрликни қандақ көрситәләймиз?

⁷ Бирсигә нәсиһәт бәргәндә, кәмтәр болушимиз интайин муһим. Бәзидә етиқатдашқа яки балимизға беваситә мәслиһәт беришкә тоғра келиши мүмкин. Шу чағда биз әлчи Йоһанни меһрибанлиқ билән түзәткән пәриштини тәқлит қилсақ, бәргән нәсиһитимиз адәмниң көңлини ағритмайду. Әгәр биз башқиларни өзүмиздин үстүн көрсәк, Муқәддәс китапқа асасланған мәслиһәтләрни һөрмәт вә меһир-муһәббәт билән берәләймиз (Кол. 4:6).

ПӘРИШТИЛӘР ИНСАНЛАРНИ СӨЙИДУ

8. а) Луқа 15:10дики айәткә асасланғанда, пәриштиләр инсанларни сөйидиғанлиғини қандақ нәмаян қилиду? ә) Пәриштиләр бизниң вәз ишимизға қандақ қатнишиду? (рәсимгә қараң.)

⁸ Пәриштиләр инсанларни қаттиқ сөйиду. Улар бизниң һаятимизда йүз беридиған ишларға көңүл бөлүп, бизни қәдирләйду. Улар еғир гуна садир қилған етиқатдишимиз товва қилип, Йәһваға қайтқанда яки бирси һәқиқәтни тонуп, һаятини яхши тәрәпкә өзгәрткәндә, интайин хошал болиду (Луқа 15:10ни оқуң). Йәнә пәриштиләр бизниң вәз қилиш ишимизға ярдәм бериду (Вәһ. 14:6). Пәриштиләр инсанларға удул вәз қилмисиму, Йәһва Худани тонушни халайдиған кишиләрни тепишқа ярдәм бериду. Әлвәттә, улар хизмәттә болидиған һәрбир вәзийәткә арилашмайду, чүнки Йәһва Худа башқа йоллар биләнму бизгә ярдәм бериши мүмкин. Мәсилән, У сәмимий кишиләргә ярдәм беришкә вә хизмәтчилиригә шундақ адәмләрни тепишқа Өз муқәддәс роһини ишлитиду (Әлч. 16:6, 7). Қандақла болмисун, биз вәз қилғанда, пәриштиләр бизгә ярдәм беридиғанлиғиға ишәнчимиз камил («Йәһва уларниң дуалириға җавап бәргән» намлиқ рамкиға қараң).

9. Пәриштиләрниң инсанларға болған сөйгү-муһәббитини қандақ тәқлит қилалаймиз?

⁹ Пәриштиләрниң инсанларға болған сөйгү-муһәббитини қандақ тәқлит қилалаймиз? Җамаәттә бирсиниң қайтидин Йәһва гувачиси болғанлиғи һәққидә уқтурушни аңлиғанда, пәриштиләргә охшаш бизниңму қәлбимиз шат-хорамға толиду. Биз шу етиқатдашни яхши көридиғанлиғимизни вә Йәһваға қайтип кәлгәнлигигә хошал екәнлигимизни ейталаймиз (Луқа 15:4—7; Кор. 2-х. 2:6—8). Йәнә бар күчимизни чиқирип вәз қилсақ, пәриштиләрни тәқлит қилған болумиз (Вәз 11:6). Пәриштиләр бизниң вәз қилиш ишимизға ярдәм бәргинигә охшаш, бизму етиқатдашларниң вәз қилиш ишиға ярдәм берәйли. Мәсилән, йеңидин вәз ейтқучи болған етиқатдаш билән биллә вәз хизмитигә чиқаламсиз? Йә болмиса, яшанған яки хизмәт қилишқа саламәтлиги яр бәрмәйдиған етиқатдашлар билән биллә вәз қилаламсиз?

10. Сара қериндишимизниң мисалидин немиләрни үгинәләймиз?

¹⁰ Әгәр вәзийитимиз сәвәвидин Йәһва Худаға бурунқидәк хизмәт қилалмисақ, немә қилсақ болиду? Пәриштиләр билән һәмкарлишишниң башқа йоллирини издәйли. Һиндистанда яшайдиған Сараb исимлиқ қериндашниң мисалини көрүп бақайли. У 20 жил пионер болуп хизмәт қилған. Кейин кесәл болуп, орун тутуп йетип қалған. Бу униңға наһайити еғир келип, чүшкүнлүккә чүшүп кәткән. Лекин җамаәттики етиқатдашларниң ярдими билән вә Муқәддәс китап оқуш адитиниң арқисида у аста-аста қайтидин хошаллиққа еришкән. Униңға вәз қилишниң башқа усуллирини издәшкә тоғра кәлди. Униң һәтта олтирип хәт йезишниң имканийити болмиғанлиқтин, у пәқәт телефон арқилиқ вәз қилалиған. Шундақ қилип, Сара қизиққучилириға қайта телефон қилғанда, улар Муқәддәс китапни үгинишни халайдиған тонуш адәмләрниң телефон номерлирини берәтти. Буниң нәтиҗиси қандақ болған? Сара бирнәччә айниң ичидә 70 киши билән үгинишни башлиди. Әлвәттә, уларниң һәммиси билән үгиниш өткүзүшни үлгирәлмигәчкә, бәзилирини җамаәттики башқа етиқатдашларға тапшуруп бәрди. Үгәнгүчиләрниң көпинчиси җамаәт учришишлириға беришқа башлиди. Пәриштиләр вәз қилишта бар күчини селиватқан Сараға охшаш етиқатдашлар билән бирликтә хизмәт қилиштин нәқәдәр хошал!

ТӘҚАБИЛ ПӘРИШТИЛӘР

11. Садиқ пәриштиләр тәқабил турушниң қандақ әҗайип үлгисини қалдурған?

¹¹ Пәриштиләр тәқабил турушниң әҗайип үлгисини қалдурған. Улар миңлиған жиллар бойи адаләтсизлик вә яманлиқни көрүп кәлмәктә. Пәриштиләр бурун өзлири билән бирликтә Йәһва Худаға хизмәт қилған Шәйтан вә башқа роһий мәвҗудатларниң Йәһва Худаға қарши исиян көтәргәнлигини өз көзи билән көргән (Ярит. 3:1; 6:1, 2; Йәһ. 6). Мәсилән, Муқәддәс китапта бир садиқ пәриштиниң күчлүк вә зулум бир җин билән күрәшкәнлиги һәққидә баян қилиниду (Дан. 10:13). Пәриштиләр қедимдин тартип та һазирғичә интайин аз адәмләрниң пак ибадәтни қоллап-қувәтләватқанлиғини көрүватиду. Шуниңға қаримастин улар Йәһва Худаға хошаллиқ вә қизғинлиқ билән давамлиқ хизмәт қиливатиду. Улар Йәһва Худаниң һаман бир күни барлиқ адаләтсизликни йоқ қилидиғанлиғини билиду.

12. Бәрдашлиқ беришимизгә немә ярдәм берәләйду?

¹² Пәриштиләрниң тәқабил турушини қандақ тәқлит қилалаймиз? Пәриштиләргә охшаш бизму нурғун адаләтсизликләрни көрүшимиз мүмкин. Бирақ Худаниң һаман бир күни барлиқ яманлиқларни йоқ қилидиғанлиғиға ишәнчимиз камил. Шуңа, биз пәриштиләргә охшаш «яхшилиқ қилип һармайли» (Гал. 6:9). Худа бизниң бәрдашлиқ беришимизгә ярдәм бериду (Кор. 1-х. 10:13). Биз дуада Йәһвадин сәвирлик билән хошаллиқни йетилдүрүшимизгә ярдәм беридиған муқәддәс роһни соралаймиз (Гал. 5:22; Кол. 1:11). Әгәр қаршилиққа дуч кәлгән болсиңиз, немә қилсиңиз болиду? Йәһва Худаға пүтүнләй ишинип, қаттиқ ғәм-тәшвиш қилмаң. Йәһва Худа сизгә чоқум ярдәм берип, мустәһкәмләйду (Ибр. 13:6).

ПӘРИШТИЛӘР ҖАМАӘТНИҢ ПАКЛИҒИНИ САҚЛАШҚА ЯРДӘМ БЕРИДУ

13. Ахирқи күнләрдә Йәһва Худа пәриштиләргә қандақ алаһидә бир иш тапшурған? (Мәтта 13:47—49)

¹³ Мошу ахирқи күнләрдә Йәһва Худа пәриштиләргә алаһидә бир иш тапшурған (Мәтта 13:47—49ни оқуң). Дунияниң җай-җайлиридики миллионлиған һәрхил кишиләр хуш-хәвәргә қизиқиш көрситиду. Уларниң бәзилири Йәһваниң тәләплиригә мас яшаш үчүн һаятида өзгиришләрни қилиду, башқилири болса, буни қилмаслиғи мүмкин. Шуңа, пәриштиләргә «яман кишиләрни адил кишиләрдин айриш» вәзиписи тапшурулған. Демәк, уларға җамаәтниң паклиғини сақлаш вәзиписи тапшурулған. Әлвәттә, бу һәрқандақ сәвәп билән Худаниң хәлқи билән арилишишни тохтатқан киши қайтидин Йәһваға қайтип келәлмәйду дегәнни билдүрмәйду. Йәнә җамаәттә һечқандақ қийинчилиқ болмайду дәп ейталмаймиз. Шундақ болсиму, җамаәтләрниң паклиғини сақлаш үчүн пәриштиләр пүтүн күчи билән әҗир-меһнәт қиливатиду.

14, 15. Җамаәтниң паклиғини сақлаш үчүн пәриштиләрниң көрситиватқан тиришчанлиғини қандақ тәқлит қилалаймиз? (Рәсимгиму қараң.)

¹⁴ Җамаәтниң паклиғини сақлаш үчүн пәриштиләрниң көрситиватқан тиришчанлиғини қандақ тәқлит қилалаймиз? Биз җамаәтниң әхлақий вә роһий җәһәттин пак болуп қелишиға өз һәссимизни қошуш арқилиқ уларни тәқлит қилалаймиз. Биз өзүмизниң Йәһва Худа билән болған мунасивитимизни сақлаш үчүн Йәһвани яхши көридиған достларни таллаймиз вә роһий җәһәттин зиян йәткүзидиған һәрқандақ яман нәрсидин нери болушимиз зөрүр (Зәб. 101:3). Шундақла, етиқатдашлиримизниң Йәһваға болған садақәтмәнлигини сақлап қелишиға ярдәм берәләймиз. Мәсилән, бир етиқатдишимизниң еғир гуна садир қилғанлиғи бизгә мәлум болса, немә қилсақ болиду? Биз уни яхши көргәнликтин, уни ақсақаллар билән сөзлишишкә дәвәт қилалаймиз. Әгәр у ақсақаллар билән сөзләшмисә, шу чағда биз өзүмиз ақсақалларға ейтип беришимиз керәк. Биз аҗизлишип қалған бурадәр яки қериндашниң тез арида ярдәм елишини халаймиз (Яқуп 5:14, 15).

¹⁵ Бәк әпсуски, еғир гуна садир қилған бәзи етиқатдашларни җамаәттин чиқиришқа тоғра келиду. Шундақ вәзийәтләрдә биз улар билән арилашмаймизc (Кор. 1-х. 5:9—13). Бундақ орунлаштуруш җамаәтниң паклиғини сақлашқа ярдәм бериду. Җамаәттин чиқирилған киши билән арилашмисақ, биз униңға меһрибанлиқ көрсәткән болумиз. Чүнки бизниң Йәһва Худаға бойсунғанлиғимиз уни җамаәткә қайтип келишигә дәвәт қилиши мүмкин. Әгәр улар җамаәткә қайтип кәлсә, биз Йәһва Худа вә униң пәриштилири билән биллә шат-хорамға чөмүмиз (Луқа 15:7).

16. Биз қайси җәһәттин пәриштиләрни тәқлит қилалаймиз?

¹⁶ Йәһва Худаниң бизгә пәриштиләр һәққидә ейтип бәргәнлиги вә улар билән биллә һәмкарлишишқа пурсәт бәргәнлиги биз үчүн чоң шан-шәрәптур! Уларниң кәмтәрлиги, инсанларға болған сөйгү-муһәббити, тәқабил турғанлиғи вә җамаәтниң әхлақий вә роһий паклиғини сақлаш үчүн көрсәткән тиришчанлиғи қатарлиқ пәзиләтләрни тәқлит қилайли. Әгәр биз садиқ пәриштиләрни тәқлит қилсақ, бизму Йәһва Худаниң аилисиниң мәңгү бир әзаси болалаймиз.