Муқәддәс китапниң асасий тәлимлиридин үгинишни тохтатмаң

1. Муқәддәс китаптики һәқиқәтләрни биринчи қетим билгәндә бу сизгә қандақ тәсир қилди?

МУҚӘДДӘС КИТАП үгинишини башлиғанда үгәнгәнлиримиз һаятимизни өзгәртти. Мәсилән, Худаниң исми Йәһва екәнлигини билгәндә Униң билән дост болушқа башлидуқ (Йәшая 42:8). Йеқинлиримиз өлүп кәткәндин кейин уларниң қийналмайдиғанлиғини билгәнлигимиз бизгә тәсәлли бәрди (Вәз 9:10). Худаниң йәрдә җәннәт болиду дегән вәдисини билгәндә келәчәк тоғрилиқ әнсиримәйдиған болдуқ. Бизниң һаятимиз 70-80 жил әмәс, мәңгү давамлишидиғанлиғиға ишәнчимиз пәйда болди (Зәб. 37:29; 90:10).

2. Немә үчүн әлчи Петрус роһий җәһәттин йетилгән қериндашларға улар билгән тәлимләрни әсләткән? (Петрусниң 2-хети 1:12, 13)

² Биз Муқәддәс китаптики тәлимләрни һечқачан унтумаслиғимиз керәк. Әлчи Петрус иккинчи хетини һәқиқәттә мәһкәм турған Мәсиһ әгәшкүчилири үчүн язған (Петрусниң 2-хети 1:12, 13ни оқуң). Лекин шу вақитта рәзил адәмләр уларниң һәқиқәттин үз өрүшини халиған (Пет. 2-х. 2:1—3). Әлчи Петрус қериндашларни мошу рәзил адәмләрниң ялған тәлимлиригә қарши турушиға дәвәт қилған. Шуңа у қериндашларға улар билгән бәзи тәлимләрни әсләткән. Бу тәлимләр уларниң Йәһва Худаға ахирғичә садиқ болуп қелишиға ярдәм берәләтти.

3. Немә үчүн һәммә мәсиһийләр Муқәддәс китаптики асасий тәлимләр тоғрилиқ давамлиқ чоңқур ойлиниши керәк? Мисал кәлтүрүң.

³ ЙәҺва Худаға нурғун жиллар хизмәт қиливатқан болсақму, биз Муқәддәс китап тәлимлиридин давамлиқ йеңи нәрсиләрни үгинәләймиз. Мәсилән, тәҗрибилик ашпәзму вә йеңидин үгиниватқан ашпәзму тамақ етиш үчүн охшаш мәһсулатларни қоллиниду. Лекин вақит өтүп, тәҗрибилик ашпәз улардин һәрхил йеңи дәмлик таамларни етишни үгиниду. Шуниңға охшаш, Йәһваға узун жиллар садиқ хизмәт қиливатқан қериндашларму, Муқәддәс китапни йеңидин үгиниватқанларму охшаш айәтләрни оқуғанда, улардин охшимайдиған савақларни елиши мүмкин. Бәлким, чөмдүрүлгәндин кейин вәзийитимиз вә Йәһва Худаға қиливатқан хизмитимиз өзгәргәнду. Бурун үгәнгән тәлимләрни һазирқи вәзийитимиздә қоллансақ, йеңи әмәлий савақларни тапалаймиз. Йәһваға узун жиллар давамида хизмәт қиливатқанлар Муқәддәс китаптики асасий үч тәлимдин йәнә немиләрни үгинәләйду?

ЙӘҺВА ХУДА ЯРАТҚУЧИ

4. Йәһваниң Яратқучи екәнлигини билгинимиз бизгә қандақ тәсир қилиду?

⁴ «Һәммә нәрсини бәрпа қилған — Худадур» (Ибр. 3:4). Биз сәйяримизни вә униңдики һәммә мәвҗудатларни дана вә қудрәтлик Яратқучи яратқанлиғини билимиз. Йәһва бизни яратқанлиқтин, биз тоғрилиқ һәммә нәрсини билиду. Шундақла У бизгә ғәмхорлуқ қилиду вә биз үчүн неминиң әң яхши екәнлигини билиду. Шуңа Йәһваниң Яратқучи екәнлигини билгинимиз һаятимизни өзгәртип, уни мәналиқ қилиду.

5. Немини билгинимиз кәмтәр болушимизға ярдәм бериду? (Йәшая 45:9—12)

⁵ Йәһваниң Яратқучи екәнлигини билгинимиз бизни кәмтәр болушқа үгитиду. Мәсилән, Аюп бир мәзгил неминиң һәқиқәтән муһим екәнлигини унтуп, пәқәт өзи тоғрилиқ ойлиған вә өзиниң тоғра екәнлигини испатлимақчи болған. У һәтта Йәһва Худа тоғрилиқ натоғра нәрсиләрни ейтқан. Лекин Йәһва Өзиниң Һәммигә Қадир Яратқучи екәнлигини Аюпниң есигә салған (Аюп 38:1—4). Буни аңлиғанда Аюп Йәһва Худа қилған һәммә ишларниң дайим тоғра екәнлигини чүшәнгән. Йәшая пәйғәмбәр ейтқандәк, адәмләр өзини Яратқучисидин дана дәп чағлимаслиғи керәк (Йәшая 45:9—12ни оқуң).

6. Яратқучимизниң даналиғи вә күч-қудрити тоғрилиқ ойлиниш болупму кимләр үчүн муһим? (Рәсимләргиму қараң.)

⁶ Йәһва Худаға нурғун жиллар давамида хизмәт қилип келиватқан қериндаш Худа вә Униң Сөзидин йол-йоруқ издәшниң орниға, өзиниң ой-пикри вә тәҗрибисигә тайинип кетиши мүмкин (Аюп 37:23, 24). Шундақ кишигә Яратқучи вә Униң даналиғи билән күч-қудрити тоғрилиқ чоңқур ойлиниш қандақ ярдәм берәләйду? (Йәшая 40:22; 55:8, 9) Йәһва Худаниң ой-пикирлири бизниңкидин жуқури екәнлигини чүшәнгинимиз кәмтәр болушимизға ярдәм бериду.

7. Рахелаға тәшкилаттики өзгиришни қобул қилишқа немә ярдәм бәрди?

⁷ Йәһваниң Яратқучи екәнлиги тоғрилиқ ойлиниш Словениядә яшайдиған Рахелаға тәшкилаттики өзгиришләрни қобул қилишқа ярдәм бәрди. У мундақ дәйду: «Бәзидә маңа бурадәрләр бәргән йеңи көрсәтмиләрни қобул қилиш оңай болмиған. Мәсилән, мән сақал қоюш тоғрилиқ «Рәһбәрлик кеңәшниң 2023-жилниң 8-мураҗиитини» көрдүм. Шундақ болсиму сақаллиқ бурадәрләрниң нутуқ ейтиватқанлиғини биринчи қетим көргәндә бу маңа бирқисма көрүнди. Шуңа бу өзгиришни қобул қилиш үчүн Йәһва Худаға дуа қилдим». Рахела Йәһва Яратқучи болғанлиқтин, Өз тәшкилатиға дайим әң яхши йол-йоруқ беридиғанлиғини чүшәнди. Шуңа сизгә йеңи чүшәнчини яки көрсәтмини қобул қилиш қийин болса, Яратқучимизниң қанчилик дана вә күч-қудрәтлик екәнлиги тоғрилиқ чоңқур ойлинишқа вақит чиқириң (Рим. 11:33—36).

ХУДАНИҢ АЗАПЛАРҒА ЙОЛ БӘРГӘНЛИГИНИҢ СӘВӘВИ

8. Худаниң азапларға йол қойғанлиғиниң сәвәвини билиш бизгә қандақ пайда әкәлди?

⁸ Немә үчүн Худа азапларға йол қоюду? Бәзи адәмләр бу соалға җавап тапалмай Худаға аччиқлинип, һәтта Униң бар екәнлигигә ишәнмәйду (Пәнд н. 19:3). Йәһва Худа адәмләрниң азап-оқубәт чәккәнлигигә вә уларниң өлүватқанлиғиға әйиплик әмәслигини биливалдиңиз. Әксинчә, адәмләр гунакар вә намукәммәл болғанлиқтин азап чекиду. Шундақла сиз Йәһва Худа сәвирчан болғанлиқтин, миллионлиған адәмләр Уни тонуп билип, азап-оқубәтләрниң мәңгүгә йоқ қилинидиғанлиғини өз көзи билән көрүш пурсити пайда болғанлиғиниму биливалдиңиз (Пет. 2-х. 3:9, 15). Бу һәқиқәтләр сизгә тәсәлли берип, сизни Яратқучиңизға йеқинлаштурди.

9. Қайси вәзийәтләрдә Худаниң азап-оқубәтләргә йол бериш сәвәви тоғрилиқ ойлинишимиз мүмкин?

⁹ Худа азап-оқубәтләрни йоқ қилишни күтүватқанда, сиз сәвирчан болушиңиз керәк. Лекин йеқинимиз қайтиш болғанда, өзүмиз яки өйдикиләрниң бири қийинчилиққа яки адаләтсизликкә дуч кәлгәндә, көңлүмиз йерим болуп, Йәһва Худа немишкә азап-оқубәтләрни тезирақ йоқ қилмайду дәп ойлишимиз мүмкин (Һаб. 1:2, 3). Шундақ вақитларда Йәһваниң немә сәвәптин адилларниң азап чекишигә йол қойғанлиғи тоғрилиқ ойлансақ, яхшиa (Зәб. 34:19). Шундақла Худаниң азап-оқубәтләрни түп йилтизи билән йоқ қилиш нийити тоғрилиқ чоңқур ойлансақ болиду.

10. Аписидин айрилғанда Аннаға немә тәсәлли бәрди?

¹⁰ Худаниң азап-оқубәтләргә немә үчүн йол қойидиғанлиғини билиш еғир синақларға чидашқа ярдәм бериду. Майотта аралида яшайдиған Анна мундақ дәйду: «Апамниң бирнәччә жил бурун өлүп кәткәнлиги көңлүмгә азар бәргән. Лекин буниңға Йәһва Худаниң әйиплик әмәслигини пат-пат есимгә чүширип туримән. У һәммә азап-оқубәтләрни тохтитишқа вә өлүп кәткән йеқинлиримизни тирилдүрүшкә тәшна. Булар тоғрилиқ ойланғанда, җан арамлиғиға еришимән».

11. Йәһваниң азап-оқубәтләргә йол қоюшиниң сәвәвини билгәнлигимиз хуш хәвәрни давамлиқ ейтишимизға қандақ ярдәм бериду?

¹¹ Буниңдин башқа, бу һәқиқәтни билиш бизни вәз қилишқа дәвәт қилиду. Әлчи Петрус чүшәндүргәндәк, Йәһва Худа сәвир-тақәт көрситип, товва қилған гунакарларға қутқузулуш пурситини бәргән. Кейин у мундақ язған: «У чағда силәрниң муқәддәс жүрүш-турушуңлар вә Рәббимизгә вападарлиғиңлар нәқәдәр болуши лазимдур!» (Пет. 2-х. 3:11) Худаға вападар екәнлигимизни көрситидиған ишларниң бири — хуш хәвәрни ейтиш. Асмандики Атимизға охшаш биз адәмләрни яхши көримиз. Уларниң Худа вәдә қилған йеңи дунияда яшишини халаймиз. Йәһва Худа сәвирчанлиқ билән әтрапимиздики адәмләргә Униңға ибадәт қилиш үчүн имканийәт бериватиду. Бу дунияниң ахири келиштин авал Худа билән биллә һәмкарлишип, қолумиздин келишичә нурғун адәмләргә У тоғрилиқ ейтип бериш биз үчүн чоң шан-шәрәп (Кор. 1-х. 3:9).

БИЗ АХИР ЗАМАНДА ЯШАВАТИМИЗ

12. Ахир заманда яшаватқанлиғимизни билиш бизни немигә ишәндүриду?

¹² Муқәддәс китапта «ахирқи күнләрдә» адәмләрниң қандақ болидиғанлиғи тәпсилий йезилған (Тим. 2-х. 3:1—5). Һәқиқәтән, әтрапимизға қариғанда бу пәйғәмбәрлик сөзләрниң орунлиниватқанлиғини көрүватимиз. Адәмләрниң миҗәз-хулқи вә иш-һәрикәтлири күндин-күнгә начарлишиватқанлиғини көргәндә, Худаниң Сөзи һәқиқәт екәнлигигә көзүмиз йетиватиду (Тим. 2-х. 3:13—15).

13. Әйсаниң Луқа 12:15—21 айәтләрдики мисали бизгә қандақ ярдәм берәләйду?

¹³ Ахирқи күнләрдә яшаватқанлиғимизни билиш бизгә вақитни әң яхши усулда пайдилинишқа ярдәм бериду. Буниң немә үчүн муһим екәнлигини Әйсаниң Луқа 12:15—21 айәтләрдики (оқуң) мисалдин көрүмиз. Немә үчүн бай киши «әқилсиз» дәп аталған? У бай болғанлиқтин әмәс, неминиң муһим екәнлигини билмигәнликтин уни шундақ атиған. У өзи үчүн байлиқ топлиған амма Худаниң көз алдида бай болмиған. Худа бай кишигә: «Бүгүн кечиси җениңни тәләп қилиду»,— дегән. Бу мисал бизгә қандақ ярдәм бериду? Бу дунияниң ахири йеқинлишип қалди. Шуниң үчүн өзүмиздин мундақ сорап көрсәк болиду: «Мәхсәтлиримдин неминиң әң муһим екәнлигини чүшинидиғанлиғим көрүнәмду? Балилиримға қандақ мәхсәтләрни қоюшқа ярдәм беримән? Күчүм, вақтим вә пулумни байлиқ топлашқа ишлитимәнму яки мәхситим асманда байлиқ топлашму?»

14. Микиниң мисали ахир заманда яшаватқанлиғимизни әстә тутушниң муһимлиғини қандақ көрситиду?

¹⁴ Ахир заманда яшаватқанлиғимиз тоғрилиқ чоңқур ойлиниш тоғра қарарларни чиқиришимизға ярдәм бериду. Мики исимлиқ қериндишимиз мундақ дәйду: «Мән мәктәпни пүтүргәндин кейин зоология кәспигә чүшүп, һайванатларни тәтқиқ қилишни арман қилған едим. Шундақла пионер болуп хизмәт қилиш вә вәз ейтқучилар аз болған йәргә көчүп бериш мәхситим болған. Җамаәттики етиқатдашлар мени бу тоғрилиқ чоңқур ойлинишқа дәвәт қилди. Өзүм халиған кәсип бойичә ишлисәм, қойған роһий мәхсәтлиримгә йетәләймәнму? Улар бу дунияниң ахириға аз вақит қалғанлиғини есимгә салди. Шундақла улар мени йеңи дунияда һайванатларни мәңгү тәтқиқ қилалайдиғанлиғимни унтумаслиққа үндиди. Шуңа мән қисқа лекин пайдилиқ курста оқуп, пионер болуп хизмәт қилишимға ярдәм беридиған иш таптим. Кейинирәк мән көпирәк вәз қилиш үчүн Эквадорға көчүп кәттим». Һазир Мики йолдиши билән шу дөләттә районлуқ хизмәт қиливатиду.

15. Яқупниң мисали адәмләрдин үмүт үзмәслигимиз керәклигини қандақ көрситиду? (Рәсимләргиму қараң.)

¹⁵ Адәмләр хуш хәвәрни бирдин қобул қилмисиму, үмүтимизни үзмәслигимиз керәк. Улар өзгириши мүмкин. Әйсаниң иниси Яқупниң мисалини көрүп чиқайли. Яқуп акиси Әйсаниң қандақ өскәнлигини, Мәсиһ болғанлиғини вә тәлим бәргәнлигини көргән. Шундақ болсиму, Яқуп көп жиллар бойи Әйсаға ишәнмигән. У пәқәт Әйса тирилгәндин кейинла униң шагирти болған. Әмәлийәттә, Яқуп интайин қизғин шагирт болғанb (Йоһ. 7:5; Гал. 2:9). Шуңа уруқ-туққанлиримиз яки башқа адәмләр хуш хәвәрни техи қобул қилмисиму, үмүтимизни үзмәй уларға қайта-қайта вәз қилиш наһайити муһим. Ахир заманда яшаватқанлиқтин, биз қизғин вәз қилишимиз керәк. Биз адәмләргә һазир ейтиватқан хуш хәвәр уларға кейинирәк, һәтта зор балаю апәт башлинип кәткәндин кейинму, тәсир қилиши мүмкинc.

ЙӘҺВАНИҢ ӘСКӘРТМИЛИРИ ҮЧҮН МИННӘТДАРЛИҚ БИЛДҮРҮҢ

16. Йәһваниң әскәртмилири сизгә қандақ пайда елип келиду? («Уларни башқиларға ярдәм бериш үчүн пайдилиниң» намлиқ рамкиғиму қараң.)

¹⁶ Муқәддәс китапқа асасланған бәзи әдәбиятлиримиз Худа Сөзидики асасий һәқиқәтләрни билмәйдиған адәмләр үчүн йезилған. Мәсилән, һәптилик аммивий нутуқлар, jw.org торбетимиздики бәзи мақалиләр билән видеолар вә журналлиримизниң аммивий нәшри Гувачи әмәсләргә тәйярланған. Шундақ болсиму, у йәрдики әскәртмиләр өзүмизгиму көп пайда елип келиду. Улар Йәһва Худаға техиму йеқин болушимизға ярдәм бериду. Униң Сөзигә болған ишәнчимизни күчәйтиду вә башқиларға Муқәддәс китаптики асасий тәлимләрни үнүмлүк үгитишимизгә ярдәм бериду (Зәб. 19:7).

17. Муқәддәс китаптики асасий тәлимләр тоғрилиқ ойлиниш бизгә қайси вәзийәтләрдә ярдәм берәләйду?

¹⁷ Йәһва Худаға нурғун жиллар хизмәт қилип келиватсақму, йеңи чүшәнчиләрни аңлиғанда хошал болимиз. Лекин бизни асмандики Атимизға җәлип қилған Муқәддәс китаптики асасий тәлимләрниму интайин қәдирләймиз. Көргинимиздәк, бу тәлимләр һазирму бизгә ярдәм берәләйду. Тәшкилатимиздин бәзи көрсәтмиләрни аңлиғанда, мениң ой-пикрим яхширақ дәп ойлишимиз мүмкин. Лекин тәшкилатимизни Дана вә Һәммигә Қадир Яратқучимиз Йәһваниң йетәкливатқанлиғини унтумайли. Өзүмиз яки йеқинлиримиз қийинчилиқларға дуч кәлгәндә, сәвирчан болуп, Йәһва Худаниң немә үчүн азапларға йол қойидиғанлиғи тоғрилиқ ойлинайли. Вақит, күч вә пулимизни қандақ ишлитиш тоғрилиқ ойлиғанда, бу дунияниң ахириғичә бәк аз вақит қалғанлиғини унтумайли. Йәһваниң әскәртмилири бизни давамлиқ дана қилип, Униңға садиқ хизмәт қилишқа дәвәт қилсун.