Яшлар, силәр бәхитлик һаят кәчүрәләйсиләр

1, 2. Тониниң мисалидин һаятни өзгәртишкә мүмкин екәнлиги қандақ көрүниду?

ТОНИ дадисиз чоң болди. Чоң синипта оқуғанда, у оқушқа қизиқматти. У һәтта оқушни ташлимақчи болған. Дәм елиш күнлири Тони киноға баратти яки достлири билән вақит өткүзәтти. У зораван болмиған вә нәшә чәкмигән. Шундақ болсиму, униң һаятида һечқандақ мәхсити болмиған. У Худаниң бар екәнлигигиму ишәнмигән. Бир күни Тони икки Йәһва гувачисини учраштуруп, уларға өзиниң гумани һәққидә ейтқан. Улар Тониға «Мәвҗудат өзидин-өзи пәйда болдиму?» вә «Мәвҗудатниң мәнбәси. Бәш муһим соал» (рус) намлиқ китапчиларни бәргән.

² Тони Гувачилар билән иккинчи қетим учрашқанда, униң ой-пикри түп йилтизи билән өзгәргән. У китапчиларни шунчилик пухта оқуғанки, һәтта уларниң бәтлири пүклинип кәткән. У Гувачиларға: «Худа бар екән!»— деди. У Муқәддәс китапни үгинишкә башлап, аста-аста һаятини өзгәртишкә башлиди. Тони мәктәптә начар оқатти, лекин кейин әң яхши оқуғучиларниң қатариға қошулди. Мәктәпниң мудири һәйран қалди. У Тониға: «Тәртивиңму өзгирип кәтти, баһалириңму яхшиланди. Буниң сәвәви Йәһва гувачилири билән арилашқанлиғиңму?» Тони «һә» дәп, мудирға яхши гувалиқ бәрди. Тони мәктәпни пүтүрүп, һазир пионер вә хизмәт ярдәмчиси болуп хизмәт қиливатиду. У сөйүмлүк Атиси Йәһвани тапқанлиғиға бәк хошал! (Зәбур 68:5).

ЙӘҺВАҒА ИТАӘТ ҚИЛИП, УТУҚЛУҚ БОЛУҢ

3. Йәһва яшларға қандақ нәсиһәт бериду?

³ Тониниң мисали Йәһва яшларға ғәмхорлуқ қилидиғанлиғини көрситиду. Худа сизниң утуқлуқ болуп, мәналиқ һаят кәчүрүшиңизни халайду, шуңа сизгә «яшлиғиңда Яратқучиңни есиңдә чиң тут» дегән нәсиһәт бериду (Вәз 12:1). Бу оңай әмәс, бирақ мүмкин. Худаниң ярдими билән сиз яш чеғиңиздиму вә чоң болғандиму мәналиқ һаят кәчүрәләйсиз. Буни яхширақ чүшиниш үчүн, исраиллиқларға Вәдә қилинған йәрни бесивелишқа вә Давутқа палван Ғолиятни йеңивелишқа немә ярдәм бәргәнлигини көрүп чиқайли.

4, 5. Исраиллиқлар қананлиқларни вә Давут Ғолиятни йеңивалғанлиғидин қандақ муһим савақ алимиз? (Мақалиниң бешидики рәсимләргә қараң.)

⁴ Исраил хәлқи Вәдә қилинған йәрниң босуғисида турғанда, Йәһва уларға қандақ йол-йоруқ бәргән? Уларға җәң қилишни үгинип, яхши җәңчи болушни ейттиму? Яқ. (Қанун шәрһи 28:1, 2). Йәһва улардин Униңға бойсунуп, тайинишнила тәләп қилған (Йәшуа 1:7—9). Бу нәсиһәт адәмләргә әқилсиз көрүнүши мүмкин еди, амма исраиллиқлар үчүн әң яхши нәсиһәт болған. Йәһва қайта-қайта Өз хәлқигә қананлиқларни йеңивелишқа ярдәм бәргән (Йәшуа 24:11—13). Худаға бойсунуш үчүн етиқат керәк, шундақ етиқат дайим утуққа ериштүриду. Бу — вақит өтсиму өзгәрмәйдиған һәқиқәт. У һазирниң өзидиму күчкә егә.

⁵ Ғолият күчлүк җәңчи болған. Униң бойи тәхминән үч метр еди вә у интайин яхши қуралланған (Самуилниң 1-язмиси 17:4—7). Давутта болса, пәқәт икки нәрсә — салға вә Йәһваға болған етиқат бар еди. Етиқади йоқ адәм Давут әқилсиз дәп ойлиши мүмкин. Бирақ әслидә әқилсиз болған Ғолият еди (Самуилниң 1-язмиси 17:48—51).

6. Бу мақалидә биз немини муһакимә қилимиз?

⁶ Илгирики мақалидә бизни бәхитлик қилидиған вә һаятимизни мәналиқ қилидиған төрт нәрсини муһакимә қилдуқ. Улар: роһий еһтияҗимизни қанаәтләндүрүш, Худани яхши көридиған кишиләр билән дост болуш, мәналиқ мәхсәтләрни қоюш вә Худа бәргән әркинликни қәдирләш. Бу мақалидә буларниң пайдисини көрүш үчүн йәнә немә қилалайдиғанлиғимизни көрүп чиқимиз. Келиңлар, буниң үчүн Зәбурниң 16-бабидики принципларға диққәт қилайли.

РОҺИЙ ЕҺТИЯҖИҢИЗНИ ҚАНАӘТЛӘНДҮРҮҢ

7. а) Роһий адәмни қандақ тәсвирләттиңиз? ә) Давутниң несивиси немә болған вә у униңға қандақ тәсир қилған?

⁷ Роһий адәм Худаға ишиниду вә һәммигә Худаниң көзқариши билән қарашқа тиришиду. У Йәһвадин йол-йоруқ издәп, Униңға бойсунуп яшашқа бәл бағлиған (Коринтлиқларға 1-хәт 2:12, 13). Бу тәрәптин Давут яхши үлгә көрсәткән. У: «Йәһва — мениң мирасим»,— дегән (Зәбур 16:5). Давут Худа билән болған йеқин мунасивитини «несивәм» дәп атап, униң үчүн миннәтдар болған вә Худани башпана қилған (Зәбур 16:1). Шу сәвәптин у: «Шуниңдин кәлбим шатлиниду»,— дәп ейталиған. Давутни әң бәхитлик қилған нәрсә — Йәһва билән болған достлуғи еди (Зәбур 16:9, 11ни оқуң).

8. Қандақ нәрсиләр һаятиңизни һәқиқәтән мәналиқ қилиду?

⁸ Бай болушни нийәт қилған яки ләззәт қоғлиған адәмләр Давутқа охшаш бәхитлик болалмайду (Тимотийға 1-хәт 6:9, 10). Канадида яшайдиған бир қериндаш мундақ дегән: «Һәқиқий қанаәт еришкән нәрсиләргә әмәс, һәммә “яхши һәдийәләрни” әта қилидиған Худайимиз Йәһваға бәргән нәрсилиримизгә бағлиқ» (Яқуп 1:17). Әгәр сиз Йәһваға болған етиқадиңизни риваҗландурсиңиз вә Униңға хизмәт қилсиңиз, һаятиңиз һәқиқәтән мәналиқ болиду. Етиқадиңизни қандақ мустәһкәмләләйсиз? Йәһва билән вақит өткүзүш арқилиқ. Буниң үчүн Униң Сөзини оқушиңиз, Худа яратқан нәрсиләргә диққәт бөлүшиңиз, Униң пәзиләтлири вә сизгә көрсәткән меһир-муһәббити һәққидә ойлинишиңиз керәк (Римлиқларға 1:20; 5:8).

9. Худа Сөзиниң бизгә тәсир қилишиға қандақ йол берәләймиз?

⁹ Бәзидә Худа меһир-муһәббитини көйүмчан атиға охшаш бизни түзитиш арқилиқ көрситиду. Давут түзитиш үчүн миннәтдарлиғини билдүрүп: «Мени үгәткән Йәһвани махтаймән! Һәтта кечилириму аң-сезимлирим маңа тәлим тохтимай бериду»,— дегән (Зәбур 16:7). Давут Худаниң ой-пикри һәққидә мулаһизә қилған вә Униң көзқаришини қобул қилған. У Худаниң ойлири униңға тәсир қилишиға, йәни яхши адәм болушиға вә өзгиришигә йол бәргән. Шундақ қилсиңиз, Худаға болған меһир-муһәббитиңиз вә Уни хошал қилиш арзуйиңиз техиму күчийип, роһий җәһәттин йетилгән адәм болалайсиз. Кристин исимлиқ қериндишимиз мундақ дегән: «Шәхсий үгиништә оқуғанлирим һәққидә ойлиғинимда, Йәһва буни мән үчүн йезип қойғандәк һис қилимән!»

10. Йәшая 26:3тин билгинимиздәк, роһий адәм болушниң қандақ пайдиси бар?

¹⁰ Роһий адәм болсиңиз, сиз бу дуния вә униң келәчигигә Худаниң көзқариши билән қарайсиз. Йәһва сизгә алаһидә билим вә даналиқ бериду. Немә үчүн? У сизниң муһим нәрсиләрни һаятиңизда биринчи орунға қоюшиңизни, дана қарарлар чиқиришиңизни вә келәчәккә ишәнч билән қаришиңизни халайду (Йәшая 26:3ни оқуң). Америкида яшайдиған Джошуа исимлиқ яш қериндаш мундақ хуласигә кәлди: адәм Йәһва билән йеқин мунасивәттә болса, неминиң муһим, неминиң муһим әмәс екәнлигини ениқ чүшиниду.

ЯХШИ ДОСТЛАРНИ ТАЛЛАҢ

11. Давут достларни таллиғанда немигә диққәт бөлгән?

¹¹ Зәбур 16:3ни оқуң. Давут яхши достларни қандақ тепишни билгән. У Йәһвани яхши көридиған адәмләр билән дост болған вә бу униңға көп хошаллиқ әта қилди. Давут уларни «муқәддәс бәндиләр» дәп атиған, чүнки улар Йәһваниң әхлақий өлчәмлиригә мас һаят кәчүргән. Йәнә бир зәбур язғучиси достларни таллаш һәққидә Давутқа охшаш ойда болған. У мундақ дәп язған: «Мән Сениңдин әйминидиғанларниң вә Сениң әмирлириңни күзитидиғанларниң барлиғиға һәм дост, һәм сәпдашмән» (Зәбур 119:63). Авалқи мақалидә оқуғинимиздәк, сизму Йәһвани яхши көридиған вә Униңға итаәт қилидиған достларни тапалайсиз. Уларниң йеши һәрхил болуши мүмкин.

12. Давут билән Йонатан немә үчүн яхши достлар болған?

¹² Давут пәқәт тәңдашлири билән дост болмиған. Униң йеқин достлириниң арисида ким болғанлиғини биләмсиз? Бәлким, Йонатан есиңизға келидиғанду. Муқәддәс китапта йезилған әң әҗайип достлуқниң бири Давут билән Йонатанниң достлуғи. Лекин сиз Йонатан Давуттин тәхминән 30 жил чоң болғанлиғини билгәнму? Улар немә үчүн шундақ яхши дост болған? Уларниң достлуғи Худаға болған етиқат вә бир-биригә болған һөрмәткә асасланған. Шундақла улар Худаниң дүшмәнлири билән күрәшкәндә көрсәткән җасурлуғини вә бир-бириниң башқиму яхши сүпәтлирини қәдирлигән (Самуилниң 1-язмиси 13:3; 14:13; 17:48—50; 18:1).

13. Көпирәк достларни қандақ қилип тапалайсиз? Мисал кәлтүрүң.

¹³ Йәһваға ишинидиған вә Уни яхши көридиған адәмләр билән дост болуп, бизму Давут билән Йонатанға охшаш хошал болалаймиз. Худаға көп жиллардин бери хизмәт қилидиған Киера: «Мән дунияниң җай-җайлирида туридиған, келип чиқиши вә мәдәнийити һәрхил адәмләр билән дост»,— дәп ейтти. Сизму һәрқандақ адәмләр билән дост болсиңиз, Муқәддәс китап билән муқәддәс роһ бизни қандақларчә бир аилә қилидиғанлиғини көрисиз.

МӘНАЛИҚ МӘХСӘТЛӘРНИ ҚОЮҢ

14. а) Мәналиқ мәхсәтләрни қоюшқа немә ярдәм бериду? ә) Бәзи яшлар мәхсәтлири һәққидә немә дәйду?

¹⁴ Зәбур 16:8ни оқуң. Давут Худаға хизмәт қилишни һаятида әң биринчи орунға қойған. Әгәр сизму мәхсәт қоюшта Давуттин үлгә елип, Йәһваниң көзқаришини ядиңизда тутсиңиз, һаятиңиз мәналиқ болиду. Стивен исимлиқ әр қериндаш мундақ дегән: «Мәхситимгә йетиш үчүн тиришип, униңға қол йәткүзгәндә вә яхши тәрәпкә өзгәргәнлигимни көргәндә, бәк хошал болумән». Һазир башқа дөләттә хизмәт қиливатқан германиялик яш қериндаш болса: «Қериғинимда мән һаятимға қарап, пәқәт өзүм үчүн яшиғанлиғимни көрүшни халимаймән»,— дәп ейтқан. Сиз униң сөзлиригә қошуламсиз? Ундақта қабилийәтлириңиз билән талантлириңизни Худаға шан-шәрәп кәлтүрүш вә башқиларға ярдәм бериш үчүн қоллиниң (Галатилиқларға 6:10). Роһий мәхсәтләрни қоюп, уларға қол йәткүзүш үчүн, Йәһвадин ярдәм сораң. У дуайиңизға җавап беридиғанлиғи сөзсиз (Йоһанниң 1-хети 3:22; 5:14, 15).

15. Қандақ мәхсәтләрни қойсиңиз болиду? («Қандақ яхши мәхсәтләрни қоюшқа болиду?» намлиқ рамкиға қараң.)

¹⁵ Қандақ мәхсәтләрни қойсиңиз болиду? Мәсилән, учришишларда өз сөзиңиз билән җавап бериш, пионер болуш яки Бәйтәлдә хизмәт қилишни мәхсәт қилсиңиз болиду. Көпирәк адәмләргә хуш хәвәрни ейтиш үчүн башқа тилни үгәнсиңиз болиду. Толуқ вақитлиқ хизмәт қилидиған Барак исимлиқ жигит мундақ дәйду: «Һәр күни әтигәндә туруп, бар күчүмни Йәһваға бериватқанлиғимни чүшәнгәндә жүригимдә алаһидә хошаллиқ пәйда болиду. Башқа һечқандақ иштин шундақ хошаллиқ тапалмаймән».

ХУДА БӘРГӘН ӘРКИНЛИКНИ ҚӘДИРЛӘҢ

16. Давут Йәһваниң қанун-принциплири һәққидә немә ойлиған вә немә үчүн?

¹⁶ Зәбур 16:2, 4ни оқуң. Өткән мақалидин билгинимиздәк, Худаниң қанун-принциплириға мас яшисақ, һәқиқий әркинликкә еришимиз. Биз яхшилиқни сөйүшни вә яманлиқтин нәпрәтлинишни үгәндуқ (Амос 5:15). Давут униңда бар яхши нәрсиләрниң һәммиси Йәһвадин кәлгәнлигини чүшәнгән. Йәһва һәрқачан яхшилиқ қилиду. Давут Худадин үлгә елиш үчүн көп күч чиқарған вә Йәһва яхши көргән нәрсиләрни яхши көргән. Худа өч көргән нәрсиләрни уму өч көргән. Уларниң бири — бутларға сәҗдә қилиш. Бутларға ибадәт қилиш адәмләрни һалакәткә йетәкләйду вә Йәһваға тәәллуқ шан-шәрәпни башқа бирсигә яки бирәр нәрсигә бериду (Йәшая 2:8, 9; Вәһий 4:11).

17, 18. а) Давут сахта ибадәтниң ақивети һәққидә немә дегән? ә) Бүгүнки күндә немә сәвәп билән адәмләрниң «дәртлири көпийип кетиду»?

¹⁷ Қедимий заманда җинсий әхлақсизлиқ сахта динниң бир бөлиги болған (Һошия 4:13, 14). Көплигән адәмләргә сахта динлар яқатти, чүнки улар әхлақсизлиқтин һузурлинатти. Бирақ улар бәхитлик болғанму? Әлвәттә, яқ! Давут сахта илаһларға сәҗда қилғанлар тоғрисида «ашар униң дәртлири» дәп ейтқан. Улар шу илаһларға һәтта балилирини қурбанлиқ қилған! (Йәшая 57:5) Йәһва уларниң зораванлиғидин нәпрәтләнгән (Йәрәмия 7:31). Сиз шу вақитта яшиған болсиңиз, Йәһваға ибадәт қилған ата-аниңизға қанчилик миннәтдар болаттиңиз!

¹⁸ Бүгүнки күндә көп динлар җинсий әхлақсизлиқни, шу җүмлидин охшаш җинислиқ адәмләрниң муһәббәтлишишини, адәттикидәк нәрсә дәп қобул қилиду. Әхлақсиз һаят кәчүридиған кишиләр өзини әркин һис қилиши мүмкин, амма әслидә уларниң «дәртлири көпийип кетиду» (Коринтлиқларға 1-хәт 6:18, 19). Сиз буниң билән келишәмсиз? Әзиз яшлар, асмандики Атимизға қулақ селиңлар. Худаға итаәт қилиш өзүңлар үчүн пайдилиқ екәнлигигә көз йәткүзүңлар. Җинсий әхлақсизлиқниң ақивети бәк еғир екәнлигини вә бир дәқиқилиқ ләззаәтниң көп азап әкелидиғанлиғини унтумаңлар (Галатилиқларға 6:8). Мақалиниң бешида тилға елинған Джошуа: «Бизниң таллаш әркинлигимиз бар. Бирақ әркинлигимизни натоғра қоллиниш һеч қанаәт әкәлмәйду»,— дәп ейтқан.

19, 20. Йәһваға ишинидиған вә Униңға итаәт қилидиған яшлар қандақ бәрикәтләргә еришиду?

¹⁹ Әйса мундақ дегән: «Мениң сөзүмгә риайә қилсаңлар, шунда һәқиқәтән мениң шагиртлирим болисиләр. Силәр һәқиқәтни тонуп-билисиләр вә һәқиқәт силәрни азатлиққа чиқириду» (Йоһан 8:31, 32). Йәһва Худаға миң бир шүкүр, У бизни ялған диндин, роһий қараңғулуқтин вә хурапатлардин азат қилған. Келәчәктә болса, биз «Худаниң пәрзәнтлириниң шәрәплик әркинлигигә чиқимиз» (Римлиқларға 8:21). Мәсиһниң сөзлиригә риайә қилсиңиз, сиз һазирниң өзидә әркинликтин қанаәт тапалайсиз. Шундақ қилип сиз «һәқиқәтни тонуп-билисиз»! Бу дегинимиз пәқәт һәқиқәтни билип қоюшнила әмәс, бәлки униңға мас яшашни билдүриду.

²⁰ Яшлар, Худа бәргән әркинликни қәдирләп, уни даналиқ билән қоллиниңлар. Шу чағда гөзәл келәчәккә йетәкләйдиған қарарларни чиқиралайсиләр. Бир яш қериндаш мундақ дегән: «Яш чеғиңизда әркинлигиңизни даналиқ билән қоллиниш муһим қарарларни чиқарғанда, мәсилән, лайиқ ишни тепишқа вә аилә қуруш-қурмаслиқни ойлиғанда ярдәм бериду».

21. «Һәқиқий һаятқа» қандақ еришәләйсиз?

²¹ Һазирқи дуниядики һаят бәк яхши болуп көрүнсиму, у узаққа созулмайду. Әтә немә болидиғанлиғини һечбир инсан билмәйду (Яқуп 4:13, 14). Шуңа «һәқиқий һаятқа», йәни мәңгү һаятқа, еришиш үчүн тоғра қарарларни қобул қилиң (Тимотийға 1-хәт 6:19). Йәһва һечкимни Униңға хизмәт қилишқа мәҗбурлимайду. Бу һәрбир адәмниң қарари. Йәһвани «несивиңиз» қилишни халисиңиз, Униңға күндин-күнгә йеқинлишиш үчүн күч чиқириң вә У бериватқан бәрикәтләрни қәдирләң (Зәбур 103:5). Йәһва сизгә зор хошаллиқ вә мәңгү бәхит соға қилидиғанлиғиға ишәнчиңиз камил болсун! (Зәбур 16:11).