Немишкә Йәһва гувачилири бәзи тәлимлирини өзгәрткән?

Бизниң тәлиматлиримиз Муқәддәс китапқа асасланған. Шуңа айрим айәтләрниң мәнасини чоңқурирақ чүшәнгәнсири, тәлимлиримизниму өзгәртип туримиз.a

Шундақ өзгиришләр Муқәддәс китаптики принципқа мас келиду: «Һәққанийларниң йоли гоя таң нуридур, күн чүш болғичә у барғансири йоруйду» (Пәнд-нәсиһәтләр 4:18). Қуяш чиққанда өп-чөрә аста-аста ениқ көрүнүшкә башлайду. Шуниңға охшаш, Худаму өз Сөзидики һәқиқәтләрни аста-аста, өз вақтида, чүшәндүриду (Петрусниң 1-хети 1:10—12). Муқәддәс китапта алдин-ала ейтилғандәк, Худа буни «ахирқи күндә» илдамлитиду (Даниял 12:4).

Тәлимлиримиз өзгәргәндә, йә һәйран қалмаслиғимиз, йә ғәм-әндишә қилмаслиғимиз керәк. Худаниң қедимий хизмәтчилириму бәзидә хата ойда вә натоғра үмүттә болған. Уларға көзқаришини өзгәртишкә тоғра кәлгән вақитларму болған.

• Муса пәйғәмбәр өзини Исраил хәлқиниң қутқазғучиси болушқа Худа бәлгүлигән вақиттин 40 жил илгири тәйяр дәп һесаплиған (Әлчиләр 7:23—25, 30, 35).

• Әйса Мәсиһниң шагиртлири униң өлүми билән тирилишигә тегишлик бәшарәтләрни чүшәнмигән (Йәшая 53:8—12; Мәтта 16:21—23).

• Дәсләпки мәсиһийләрниң бәзилири «Йәһваниң күни» қачан келидиғанлиғиға тегишлик хата пикирдә болған (Салоникилиқларға 2-хәт 2:1, 2).

Кейин Худа уларниң натоғра көзқаришини түзәтти, бизму Худаниң шундақ қилишиға үмүт қилип, униңдин ярдәм сорап дуа қилимиз (Яқуп 1:5).