7-СОАЛ
Җинсий мунасивәткә көндүрүлгәндә немә қилалаймән?
СИЗ НЕМӘ ҚИЛАТТИҢИЗ?
Мону вәзийәтни тәсәввур қилиң: Һәҗәр билән Муһитниң учришип жүргинигә икки ай болди, бирақ Һәҗәр уни бурундин тонуйдиғандәк һис қилиду. Улар бир-биригә пат-пат учурларни йезип, телефон билән саатлап сөзлишиду, һәтта бир-бириниң ойини оқалайдиғандәк.
Улар ахирқи икки ай ичидә қол тутушуп, сөйүшкән. Лекин Муһит буниң билән тохтиғуси кәлмигән. Һәҗәр болса буниңдин ташқири һеч нәрсә қилғуси кәлмәйду һәм Муһиттинму айрилғуси кәлмәйду. Униң қешида Һәҗәр өзини чирайлиқ, бәхитлик һис қилиду. У: «Биз бир-биримизни яхши көримизғу»,— дәп өзини ақлап қоюду.
Бәлким сиз бирси билән учришалайдиған яшқа киргән. Әгәр Һәҗәрниң орнида болсиңиз, немә қилаттиңиз?
ТОХТАП, ОЙЛИНИП КӨРҮҢ!
Җинсий мунасивәт — Худаниң пәқәт турмуш қурғанларға бәргән соғиси. Некадин бурун җинсий мунасивәттә болуш бу соғиға һөрмәтсизлик көрситиш болиду. Буни сизгә соға қилинған чирайлиқ кийимни дәсмал сүпитидә қоллиниш билән селиштурушқа болиду
Дәрәқкә чиқип, учимән дәп сәкрисиңиз, немә болиду? Бир йериңиз сунатти. Шуниңға охшаш, Худаниң қанунлирини, мәсилән «җинсий әхлақсизлиқтин қечиңлар» дегән қанунини бузсақ, униң ақиветини сөзсиз көримиз (Салоникилиқларға 1-хәт 4:3).
Буниң ақивәтлири қандақ болуши мүмкин? Муқәддәс китапта мундақ йезилған: «Зина қилған өз тениға қарши гуна қилиду» (Коринтлиқларға 1-хәт 6:18). Қандақларчә?
Тәтқиқатчиларниң ейтишичә некадин бурун җинсий мунасивәттә болған яшлар төвәндики қийинчилиқларниң биригә яки бирнәччисигә дуч келиду:
ӘПСУСЛИНИШ. Җинсий мунасивәттә болған яшларниң көпинчиси кейин униңға пушайман қилғанлиғини ейтиду.
ГУМАНЛИНИШ. Җинсий мунасивәттә болғандин кейин яшларниң иккилисигиму «У йәнә ким билән биллә болдики?» дегән ойлар келиду.
ҮМҮТСИЗЛИНИШ. Көңлидә қизларниң көпинчиси жигитләрниң уларни нәрсидәк пайдилинишини әмәс, бәлки һимайә қилишини халайду. Көплигән жигитләр болса, оңайла һәммисигә келишидиған қизларни яқтурмайдиғанлиғини байқиди.
Хуласә: Әгәр сиз некадин бурун җинсий мунасивәттә болсиңиз, бебаһа бир нәрсини йоқитип, аброюңизни төкүсиз (Римлиқларға 1:24). Сизниң тениңиз — бирсигә асанла беридиған һеч әрзимәс нәрсә әмәс!
«Җинсий әхлақсизлиқтин» қечиш арқилиқ сиздә күч вә ирадиниң барлиғини көрситиң (Салоникилиқларға 1-хәт 4:3). Күнләрниң күнидә сиз той қилсиңиз, һоқуқий һалда җинсий мунасивәттә болалайсиз. Шу чағда тәшвиш, әпсуслиниш вә некадин бурун җинсий мунасивәттә болушниң ечинишлиқ ақивәтлиридин хали болуп, җинсий мунасивәттин толуқ рәвиштә һузурлиналайсиз (Пәнд-нәсиһәтләр 7:22, 23; Коринтлиқларға 1-хәт 7:3).
СИЗ ҚАНДАҚ ОЙЛАЙСИЗ?
Әгәр бирәр киши сизни һәқиқәтән яхши көрсә, у сизни җисманий вә һиссий саламәтлигиңизни бузушқа үндәмду?
Сизгә һәқиқәтән ғәмхорлуқ қилидиған адәм сизни Худа билән болған мунасивитиңизни бузушқа дәвәт қиламду? (Ибранийларға 13:4).