Павлус Рим шәһиридә

ҚАРАҢ, Павлусниң қоли зәнҗир билән бағланған. У яққа қарисиңиз, римлиқ әскәр уни назарәт қилип турмақта. Һазир, Павлус Римда мәһбус болуп, Рим һөкүмрани қәйсәрниң уни қандақ бир тәрәп қилишини күтүп туруватиду. У гәрчә мәһбус болуп турсиму, башқиларниң уни көргили келишигә рухсәт қилинған еди.

Римға келип үч күндин кейин, Павлус у йәрдики йәһудийларниң йетәкчилирини, өзи билән көрүшүшкә тәклип қилди. Шуниң билән, нурғун йәһудийлар Павлус билән көрүшкили кәлди. Павлус уларға Әйса Мәсиһ вә Худа Падишалиғи һәққидә хуш хәвәр йәткүзди. Нәтиҗидә, бәзилири ишинип Әйсаниң әгәшкүчилири болди, амма бәзилири ишәнмиди.

Павлус йәнә уни назарәт қилидиған әскәрләргә хуш хәвәр ейтти. Павлус Римда икки жил мәһбус болуп турғинида, имканийәтла болса һәр қандақ кишигә хуш хәвәр йәткүзди. Нәтиҗидә, һәтта Рим императори қәйсәрниң ордисидикиләрму хуш хәвәрни аңлап, уларниң бәзилири Әйсаниң әгәшкүчилири болушти.

Ундақта, үстәлдә хәт йезип олтарған бу меһман ким? Пәрәз қилип беқиңа? Шундақ, у Тимотий. Тимотийму Падишалиқ һәққидә хуш хәвәр ейтип, зинданға чүшкән. Бирақ, у һазир қайта азат болған еди. У бу йәргә Павлусқа ярдәм бәргили кәлди. Тимотийниң немә йезиватқанлиғини биләмсиз? Биз бирликтә көрүп бақайли.

110-һекайидә тилға елинған Филипи вә Әфәс шәһәрлири ядиңизда барму? Павлус шу шәһәрләрдә Әйсаниң әгәшкүчилири җамаитиниң қурулушиға ярдәм бәргән еди. Мана Павлус һазир зинданға қамилип турғанда, шу шәһәрләрдики Әйсаниң әгәшкүчилиригә хәт салди. У хәтләр Муқәддәс Китапта бар, улар болса Әфәсликләргә йезилған хәт вә Филипиликләргә йезилған хәт, дәп аталған. Павлус һазир Филипи шәһиридики етиқатчи достлириға әвәтмәкчи болған хәтниң мәзмунини, Тимотийға ейтип бериватиду.

Филипиликләр Павлусқа көп ғәмхорлуқ қилған. Һазир у бу йәрдә зинданда болғанда, улар униңға соғат әвәткән еди. Шуңа, Павлус уларға рәхмәт ейтиватиду. Соғатни елип кәлгән киши Епафродит. Бирақ, у наһайити еғир кесәл болуп, өлүп қалайла дегән еди. Һазир униң саламәтлиги әслигә келип, өйигә қайтишқа тәйяр болди. У Филипи шәһиригә қайтқинида, Павлус билән Тимотий язған хәтни биргә елип маңди.

Павлус зинданда туруватқанда, йәнә икки хәтни язди. Уларму Муқәддәс Китапта бар. Бири Колоси шәһиридики Әйсаниң әгәшкүчилиригә йезилған. Бу хәтниң немә дәп аталғанлиғини биләмсиз? Колосилиқларға йезилған хәт. Йәнә бир парчиси шәхсий хәт болуп, Колоси шәһиридә туридиған Филимун исимлиқ йеқин достиға селинған еди. Бу хәт Филимунниң хизмәткари Онесимус һәққидә еди.

Онесимус Филимунниң өйидин қечип, Римға кәлгән еди. У Павлусниң бу йәрдә зинданда екәнлигини билип, уни көргили кәлди. Павлус Онесимусқа хуш хәвәр йәткүзди. Узун өтмәй, уму Әйсаниң әгәшкүчиси болди. Һазир Онесимус Филимунниң өйидин қачқиниға пушайман қилди. Шуңа, Павлус Филимунға немә дәп хәт язғанлиғини биләмсиз?

Павлус Филимундин Онесимусни кәчүрүветишни өтүнди. Павлус: “Мән уни сениң йениңға қайтуруп әвәттим, у һазир пәқәт сениң хизмәткариңла әмәс, һәм сениң етиқатчи қериндишиң”, дәп язди. Онесимус Колоси шәһиригә қайтип маңғанда, у икки парчә хәтни биллә елип кәтти. Шуларниң бири Колосилиқларға йезилған хәт вә йәнә бири Филимунға йезилған хәт. Филимунниң өз хизмәтчисиниң Әйсаниң әгәшкүчиси болғанлиғини билгәндә, қанчилик хошал болғанлиғини тәсәввур қилалаймиз.

Павлус Филипиликләр билән Филимунға хәт язғанда, кишини хошал қилидиған хәвәрниму тилға алған. Павлус хетидә, Филипиликләргә: “Тимотийни йениңларға әвәтимән. Бирақ, пат арида өзәмму йениңларға баримән”, дегән еди. Һәм, Филимунға: “Маңа туралғу җай тәйярлап қойғин”, дәп язған еди.

Павлус зиндандин азат болғанда, у етиқатчи ака-ука вә һәдә-сиңиллирини йоқлап, нурғун җайларға барди. Бирақ, кейин Павлус йәнә Римда мәһбус болуп қалди. Бу қетим у өзиниң өлтүрүлидиғанлиғини билгән еди. Шуңа, Тимотийға хәт йезип, тез қешиға келишни ейтти. Павлус: “Худаға садақәтмәнлигимни сақлап кәлдим, у мени чоқум мукапатлайду”, дәп язди. Павлус өлүмгә һөкүм қилинғандин кейин, бир нәччә жил өтүп, Йерусалим йәнә хану-вәйран қилинди. Бу қетим римлиқлар вәйран қилди.

Муқәддәс Китапта йәнә нурғун ишлар тилға елинған. Әлчи Юһанна, Йәһва Худаниң илһамландуруши билән Муқәддәс Китаптики ахирқи бир қанчә парчә язмиларни язған еди. Буниң арисида Вәһийләр китавиму бар. Бу язма кәлгүсидики ишлар һәққидә сөзләйду. Ундақта, кәлгүсидә зади немә иш йүз беридиғанду?! Һазир биз бирликтә көрүп бақайли.