Өлүп қайта тирилгән икки бала

ӘГӘР бир кичик бала өлүп кәтти, дәйли. У қайта тирилсә, у балиниң аниси қандақ һиссиятта болиду? У чоқум бәкму хошал болиду! Бирақ, өлүп кәткән киши қайта тириләмду? Илгири шундақ иш йүз бәргәнму?

У йәрдә турған кишигә, бу аял билән кичик балиға қараңа! У киши Илияс пәйғәмбәр. У аял Сәрәпәт шәһиридики бир тул аял болуп, у кичик бала униң оғли. Бир күни у бала ағрип қалған. Униң кесили барғансири яманлишип, ахирида өлүп кәткән еди. Илияс пәйғәмбәр у аялға: “Оғлуңни маңа бәргин”, деди.

Илияс өлгән балини үстинки қәвәткә елип чиқип, каривәткә ятқузди. Андин кейин, у: “Әй Йәһва, бу балини тирилдүрүп, униңға қайта һаятлиқ бәргәйсән”, дәп дуга қилди. Бала нәпәс елишқа башлиди! Шуниң билән, Илияс пәйғәмбәр балини пәскә елип чүшүп, у аялға: “Қара, сениң оғлуң һаят!”, деди. Бу дәл у аялниң немә үчүн шунчә бәк хошал болуп кәткәнлигиниң сәвәвидур.

Йәһваниң Елиша исимлиқ башқа бир муһим пәйғәмбири бар еди. У Илияс пәйғәмбәрниң ярдәмчиси болуп хизмәт қилатти. Кейин, Йәһва Елиша пәйғәмбәрниму ишлитип мөҗүзилик иш қилған еди. Бир күни, Елиша Шунәм шәһиригә барди. Шәһәрдә бир аял униңға көп яхшилиқ қилди. Кейин, бу аял бир оғул туққан еди.

У бала сәл чоңирақ болғанда, бир күни сәһәрдә, дадиси ишләватқан етизлиққа барди. Тосаттин бала: “Бешим бәк ағрип кәтти!”, дәп товлиди. Балини өйгә елип кәлгәндин кейин, бала өлүп кәтти. Балиниң аниси қанчилик азапланғанду, һә! Шуниң билән, у аял дәрһал Елиша пәйғәмбәрни издәп барди.

Елиша келип, өлгән бала ятқан өйгә кирди. У Йәһваға дуга қилди вә балиниң үстигә дүм болуп чүшүп, бәдини билән балини япти. Узун өтмәй, балиниң бәдини иссип, бала йәттә қетим чүшкәрди. Балиниң аниси өйгә кирип, оғлиниң һаят екәнлигини көргәндә, бәкму хошал болди!

Бүгүнки күндә, аллиқачан сан-санақсиз адәмләр өлүп кәтти. Бу уларниң аилисидикиләр вә дост-бурадәрлирини көп азаплиди. Бизниң өлүкләрни тирилдүридиған күч-қудритимиз йоқ. Амма, Пәрвәрдигар Йәһваниң бар. Кейинирәк, Йәһваниң қандақ қилип миллионлиған кишиләрни өлүмдин тирилдүрүп, қайта һаятлиққа ериштүридиғанлиғи һәққидә үгинимиз.