Йерусалимниң вәйран қилиниши

ПАДИША Нәбуқәднәсәр әң яхши тәрбийә алған барлиқ исраилларни Бабилонға елип кәткинигә, он жилдин көпирәк болған еди. Мана әнди немә иш йүз бериватқанлиғиға қараң! Йерусалим шәһири көйдүрүлүп вәйран қилиниватиду. Һәм бабилонлиқлар өлтүрүлмәй һаят қалған исраилларни әсир қилип, уларни Бабилонға елип кетиватиду.

Есиңиздә барму? Йәһваниң пәйғәмбәрлири алдин агаһландуруп, әгәр хәлиқ яман йолидин қайтмиса, уларниң шундақ ақивәткә қалидиғанлиғини ейтқан еди. Амма, исраиллар пәйғәмбәрләрниң сөзлиригә қулақ салмиди. Улар Йәһваға ибадәт қилмай, әксичә давамлиқ ялған илаһларға ибадәт қиливәрди. Шуңа, исраил хәлқи гунаси үчүн җазаға лайиқ еди. Буни қандақ билимиз? Йәһва Худаниң пәйғәмбири Һәзқиял исраилларниң қилған яман ишлири һәққидә бизгә ейтип бериду.

Биләмсиз Һәзқиял ким? Йерусалим вәйран қилиништин он жил илгири, Нәбуқәднәсәр Бабилонға бир түркүм яш исраилларни әсирликкә елип кәткән болуп, Һәзқиял шуларниң арисидики бири еди. Даниял вә униң үч дости, Шадрак, Мишак вә Әбәднеголарму шу вақитта Бабилонға елип кетилгән еди.

Йәһва мөҗүзә көрситип, Йерусалимдики ибадәтханида қандақ яман ишларниң йүз бериватқанлиғини Һәзқиялға ашкарә қилди. Гәрчә Һәзқиял пәйғәмбәр Бабилонда туруватқан болсиму, шу вақитта Йерусалимдики Йәһваниң ибадәтханисида йүз бериватқан ишларни ениқ көрди. Һәзқиял шуни көрүп қаттиқ чөчүп кәтти!

Йәһва Һәзқиял пәйғәмбәргә: “Қарап бақ, хәлиқ ибадәтханида немә иш қиливатиду. Тамдики һәр хил илан вә башқа җан-җаниварларниң сүрәтлиригә қара, исраилларниң шу нәрсиләргә ибадәт қиливатқанлиғиға қара!”, деди. Һәзқиял шуларниң һәммисини көрүп, немә ишларниң йүз бериватқанлиғини йезип хатирилиди.

Йәһва Һәзқиялдин: “Исраилларниң ақсақаллириниң йошурунчә немә иш қиливатқанлиғини көрдиңму?”, дәп сориди. Шундақ, Һәзқиял бу ишниму көргән еди. Йәни 70 киши ялған илаһларға ибадәт қиливататти. Улар: “Йәһва бизни көрәлмәйду. У бу зиминдин кәтти”, дейишмәктә еди.

Андин кейин, Йәһва Һәзқиялға ибадәтханиниң шималий дәрвазисидики бәзи аялларни көрсәтти. Улар у йәрдә олтуруп, ялған илаһ Таммузға чоқунушувататти. Йәһваниң ибадәтханисиниң ишик алдидики кишиләргә қараң! У йәрдә 25 чә киши бар еди. Һәзқиял уларни көрди. Улар шәриқ тәрәпкә қарап сәҗдә қилип, қуяшқа чоқунувататти!

Йәһва: “Бу хәлиқ мени һөрмәт қилмайду, улар пәқәт яман ишларни қилип қалмастин, шу яман ишлирини мениң ибадәтханамға келип қилишиватиду!”, деди. Шуниң билән, Йәһва: “Улар мениң ғәзивимниң күчини һис қилишиду. Улар вәйран қилинғанда, уларға ич ағритмаймән”, дәп вәдә қилди.

Йәһва Һәзқиял пәйғәмбәргә мошу ишларни ашкарә қилип үч жилчә вақит өткәндин кейин, исраиллар падиша Нәбуқәднәсәргә қарши чиқти. Шуңа, падиша уларға қарши уруш қилди. Бир йерим жилдин кейин, бабилонлиқлар Йерусалим шәһириниң сепил тамлирини чеқип, шәһәрни көйдүрүп түп–түз қиливәтти. Өлтүрүлмәй қалған көпинчә кишиләрни Бабилонға әсирликкә елип кәтти.

Пәрвәрдигар Йәһва немә үчүн исраилларниң мошундақ вәйран болушиға йол қойған? Сәвәви, исраиллар Йәһваниң сөзигә қулақ салмиған вә униң қанунлириға бойсунмиған еди. Буниңдин шуни көрүвелишқа болидуки, һемишәм Пәрвәрдигарниң сөзлиригә қулақ селип, униң буйруғанлирини қилип яшаш бәкму муһим!

Дәсләптә, наһайити аз кишиләрниң Йерусалимда турушиға рухсәт қилинди. Падиша Нәбуқәднәсәр Гәдаля исимлиқ бир йәһудий кишини шу қалған хәлиққә һөкүмранлиқ қилишқа бәлгүләп қойди. Амма, кейин бәзи исраиллар Гәдаляни өлтүрүвәтти. Хәлиқләр әнди мошу яман иши сәвәплик, бабилонлиқларниң келип уларни вәйран қилишидин қорқти. Шуңа, хәлиқ Йәрәмия пәйғәмбәрни өзлири билән Мисирға қечип кетишкә мәҗбурлиди.

Нәтиҗидә, Исраил зиминида бирму киши қалмиди. 70 жил бу зиминда адәм олтармай, чөл-қақаслиққа айланди. Бирақ, Йәһва 70 жилдин кейин, өз хәлқини бу зиминға қайтуруп келидиғанлиғини вәдә бәргән еди. Шу 70 жил җәриянида, Бабилонға елип кетилгән Йәһваниң хәлқи қандақ ишларға дучар болғанду? Төвәндә бирликтә көрүп бақайли.