Қудуқ қешида бир аял билән параңлишиш

ӘЙСА пәйғәмбәр дәм елиш үчүн, Самарийәдә бир қудуқниң йениға келип тохтиған еди. Униң шагиртлири йемәклик сетивелиш үчүн шәһәргә кирип кәтти. Әйса қудуққа су алғили кәлгән аял билән параңлашти. У аялға: “Маңа бир аз уссилиқ бәргән болсиңиз”, деди.

Бу аял бәкму һәйран қалди. Немә үчүнлигини биләмсиз? Чүнки, Әйса бир йәһудий, у болса самарийәлик аял. Көплигән йәһудийлар самарийәликләрни яхши көрмәтти. Һәтта, улар самарийәликләргә гәпму қилматти! Бирақ, Әйса пәйғәмбәр һәр қандақ кишини яхши көрәтти. Шуңа, у: “Уссилиқ сориған кишиниң ким екәнлигини билсиңиз еди, ундақта сиз униңдин шуни тиләттиңиздә, уму сизгә һаятлиқ сүйини берәтти”, деди.

Аял: “Тәхсир, қудуқ чоңқур, униң үстигә сиздә һәтта су тартидиған челәк йоқ турса, һаятлиқ беридиған суни нәдин тапалайсиз?”, деди.

Әйса чүшәндүрүп: “Бу суни ичкәнләр йәнә уссайду. Амма мән беридиған су кишиләрни мәңгүлүк һаятлиққа ериштүриду”, деди.

Аял: “Тәхсир, маңа у судин бәргәйсиз! Шуни ичип уссимайдиған болай вә бу йәргә қайта су алғили кәлмәйдиған болай”, деди.

У аял, һәзрити Әйса раст су тоғрисида сөзләватиду, дәп ойлиған еди. Бирақ, Әйса пәйғәмбәр болса Худа вә униң Падишалиғи һәққидики һәқиқәт тоғрисида гәп қиливататти. Мошу һәқиқәт, һаятлиқ бәргүчи суға охшайду. У кишигә мәңгүлүк һаятлиқ берәләйду.

Әнди Әйса аялға: “Берип ериңизни башлап келиң”, деди.

“Ерим йоқ”, дәп җавап бәрди аял.

Һәзрити Әйса: “Ерим йоқ дәп растини ейтиңиз. Бәш әргә тәккән едиңиз, һазир сиз билән биллә яшаватқан адәм ериңиз болмайду”, деди.

Аял наһайити һәйран болди. Чүнки, Әйсаниң ейтқанлириниң һәммиси раст еди. Ундақта бу ишларни у қандақ билгән? Чүнки, у Худа әвәтишни вәдә қилған киши йәни Мәсиһ еди. Худа бу ишларни униңға билдүргән. Дәл шу чағда, Әйса Мәсиһниң шагиртлири қайтип кәлди. Улар униң бир самарийәлик аял билән сөзлишиватқанлиғини көрүп һаң-таң қелишти.

Мошу ишлардин немини үгинәләймиз? Бу Әйса пәйғәмбәрниң кишиләрниң ирқ вә милләт айримисиға қаримай, һәммә кишигә охшашла яхши муамилә қилидиғанлиғини көрситиду. Бизму чоқум шундақ қилишимиз керәк. Бәзи адәмләр башқа ирқ яки милләт кишилири болғини үчүн, яман адәмләр дәп ойлимаслиғимиз лазим. Әйса Мәсиһ мәңгүлүк һаятлиққа йетәкләйдиған һәқиқәтни барлиқ инсанларниң билишини бәкму халайду. Бизму кишиләрниң һәқиқәтни тонуши үчүн ярдәм беришкә интилишимиз керәк.