Әйсаниң тағда тәлим бериши

ҚАРАҢ, Әйса Мәсиһ бу йәрдә олтириду. У Җәлилийәдики бир тағ үстидә кишиләргә тәлим бериватиду. Униңға йеқин олтарғанлар, униң шагиртлири. Әйса пәйғәмбәр уларниң арисидин 12 кишини өзигә әлчи болушқа таллиған еди. Әлчиләр Әйсаниң алаһидә әгәшкүчилиридур. Уларниң исимлирини биләмсиз?

Улар Симун Петрус вә қериндиши Әндәр. Һәм, Яқуп вә қериндиши Юһанна. Башқа йәнә бир әлчиниң исмиму Яқуп, йәнә бириниңму Симун еди. Икки Йәһуда исимлиқ әлчи болуп, бири Йәһуда Ишқарийот еди, йәни бири Тадай, дәпму чақирилатти. Униңдин башқа Филип вә Натанйәл (Бартоломай, дәпму аталған), Мәтта вә Томас бар еди.

Самарийәдин қайтип кәлгәндин кейин, Әйса Мәсиһ тунҗа қетим вәз ейтип: “Әршниң Падишалиғи йеқинлашти”, дәп тәлим бәрди. У қандақ Падишалиқ биләмсиз? У Худаниң һәқиқий бир һөкүмитидур. Әйса Мәсиһ бу һөкүмәтниң Падишаси болиду. У асманда һөкүмранлиқ жүргүзүп, йәр шариға тиничлиқ елип келиду. Худаниң Падишалиғи пүткүл йәр шарини гөзәл бир җәннәткә айландуриду.

Әйса пәйғәмбәр бу йәрдә кишиләргә Худа Падишалиғи һәққидә тәлим бериватиду. У чүшәндүрүп: “Силәр мундақ дуга қилиңлар: Әй әрштики Атимиз, Сениң исмиң улуқланғай. Падишалиғиң кәлгәй, Сениң ирадәң асмандикигә охшаш, йәр йүзидиму әмәлгә ашурулғай”, дегән еди. Нурғун кишиләр бу дугани ядқа билиду. Сизму дуганиң барлиқ мәзмунини ейтип берәләмсиз?

Һәзрити Әйса йәнә кишиләргә бир-биригә қандақ муамилә қилиши керәклиги һәққидә тәлим бәрди. У: “Силәр башқиларниң силәргә қандақ муамилә қилишини ойлисаңлар, силәрму башқиларға шундақ қилиңлар”, деди. Башқиларниң сизгә мулайимлиқ билән муамилә қилишини халамсиз? Әйса Мәсиһ бизни башқиларға мулайимлиқ билән муамилә қилишқа үндәйду. Кәлгүсидики йәр йүзи җәннәттә, һәммә киши шундақ қилса, немә дегән яхши, һә!