Бир өйниң үстинки қәвитидә

ИККИ күн өтүп, пәйшәнбә күни кәч киргәндә, һәзрити Әйса вә униң 12 әлчилири Өтүп кетиш һейтиниң тамиғини йейиш үчүн бир өйниң үстинки қәвитидики кәң-таша ханидә җәм болған еди. Сиз көргән әву чиқип кетиватқан киши Ишқарийотлуқ Йәһуда. У Әйса пәйғәмбәрни қандақ тутуш тоғрисида роһанийларға хәвәр бериш үчүн маңди.

Йәһуда бир күн илгири, улар билән көрүшүп, улардин: “Әйсани тутуп бәрсәм, маңа немә берисиләр?”, дәп сориған еди. Улар: “Оттуз күмүч тәңгә”, дегән. Шуңа, һазир Йәһуда шу кишиләр билән көрүшүп, уларниң Әйса Мәсиһни тутуши үчүн, уларни башлап кәлмәкчи болди. Бу бәкму қорқунучлуқ иш, шундақ әмәсму?

Өтүп кетиш һейтиниң тамиғи йейилип болди. Бирақ, Әйса һазир башқа бир алаһидә дәстихан тәйярлиди. У әлчилиригә бир парчә нанни бәрди вә: “Қени йәңлар, бу мениң силәр үчүн берилидиған тенимни көрситиду”, деди. Арқидин қолиға бир стакан үзүм шаривини елип, уларға сунуп: “Ичиңлар, бу мениң силәр үчүн төкүлидиған қенимни көрситиду”, деди. Муқәддәс Китап буни, “Әйсани хатириләш кәчлик дәстихини”, дәп атайду.

Исраилларниң Өтүп кетиш һейтиниң тамиғини йейиши, Йәһва Худаниң периштәси Мисирда уларниң өйлиридин “өтүп кетип”, мисирлиқларниң өйлиридики тунҗа туғулған оғулни өлтәргәнлигини әсләп туруш үчүндур. Бирақ, һазир Мәсиһ Әйса өз әгәшкүчилириниң уни вә униң қандақ қилип улар үчүн өз һаятини қурван қилғанлиғини әсләп турушини халиған еди. Шу сәвәп, у шагиртлириға һәр жили бу алаһидә кәчлик дәстиханни хатириләшни буйриди.

Шу алаһидә кәчлик дәстихан тамиғи йейилип болғандин кейин, Әйса Мәсиһ әлчиләргә иман-етиқатта күчлүк вә қәйсәр болушни ейтти. Ахирида, улар Худани мәдһийиләп нахша ейтқандин кейин, талаға чиқип кәтти. Һазир бәкму кәч болуп кәткән, еһтимал йерим кечидин өткән еди. Ундақта, уларниң қәйәргә баридиғанлиғини көрүп бақайли.