Ялғуз қелип, қорққан вақтиңиз болдиму?

Бу рәсимдики кичик балиға қарап көрүң. У ялғуз қелип, қорқуватқан охшайду. Сизниңму қорққан вақтиңиз болдиму? ~ Бәзидә шундақ вәзийәт һәрбиримиздә болиду. Муқәддәс китапта ялғуз қелип, қорққан бәзи адәмләр тоғрилиқ йезилған. Улар Йәһваниң достлири болған. Шуларниң бири Елия. Келиң, Елия тоғрилиқ биливалайли.

Елия Әйса туғулуштин узақ вақит бурун Исраилда яшиған. Исраил падишаси Ахаб һәқиқий Худа, Йәһваға, хизмәт қилмиған. Ахаб вә униң аяли, Изабәл, ялған худа Баалға ибадәт қилған. Шуниң үчүн исраиллиқларниң көпчилиги Баалға ибадәт қилишқа башлиған. Изабәл мәликә наһайити яман аял еди. У Йәһваға хизмәт қилған һәммә адәмләрни вә Елияниму өлтүрмәкчи болған. Шу чағда Елияниң немә қилғанлиғини биләмсиз? ~

Елия жирақ йәргә қечип кәтти! У чөл-баяванға берип, бир өңкүргә йошурунди. Қандақ ойлайсиз, у немишкә шундақ қилди? ~ Һә, у наһайити қорқуп кәтти. Бирақ Елия қорқмаслиғи керәк еди. Биләмсиз немишкә? Чүнки у Йәһваниң ярдәм берәләйдиғанлиғини биләтти. Йәһва бурунму униңға өз күчини көрсәткән. Бир қетим, Йәһва Елияниң дуасиға җавап берип, асмандин от яғдурған. Демәк, бу қетимму Йәһва Елияға ярдәм берәләтти!

Йәһва өңкүрдә олтарған Елиядин: «Бу йәрдә немә қиливатисән?»— дәп сориди. Шу чағда Елия: «Саңа хизмәт қилидиғанлардин ялғуз мәнла қалдим. Мениму өлтүрүп кетәрму дәп қорқуватимән»,— дәп җавап бәрди. Елия Йәһваниң барлиқ хизмәтчилири өлүп кәтти дәп ойлиған еди. Бирақ Йәһва униңға: «Ундақ әмәс. Маңа хизмәт қилидиған 7 000 адәм бар. Батур бол. Саңа көп иш тапшуримән!»— деди. Қандақ ойлайсиз, Елия бу сөзләрни аңлашқа хурсән болдиму? ~

Елияниң мисалидин қандақ савақ алалайсиз? ~ Һечқачан өзүңизни ялғуз қалдим дәп қорқмаң. Сәвәви Йәһваниму, сизниму яхши көридиған достлириңиз бар. Йәһваниң күчи көп. У һәрқачан сизгә ярдәм бериду! Ялғуз әмәслигиңизни билгиниңизгә хошалму? ~