Порнография некайиңизниң дүшмини

Аяли ериниң сирини билип қойди. Ери ялвуруп кәчүрүм сорайду. Шу адитини ташлаймән дәп вәдә бериду вә у бираз вақит өз сөзидә туриду. Амма кейинирәк у шу яман адитини йәнә қайтидин башлайду.

Әгәр сиздә шундақ яман адитиңиз болса, бу һәмрайиңизға қандақ тәсир қилиду вә бу адәтни пүтүнләй қандақ ташлиса болиду?a

Бу мақалидә келәрки ойларни қараштуримиз:

• Немини билишиңиз керәк?

• Сиз немә қилалайсиз?

• Әгәр ериңиз порнография көрсә

Немини билишиңиз керәк?

Порнография аилиңизни бузуши мүмкин. Порнография көридиған киши һәмрайиниң көңлини ағритип, униң ишәнчисидин айрилидуb.

Порнография көридиған әр кишиниң аяли һәртүрлүк сәлбий һис-туйғуларни һис қилиши мүмкин. Мәсилән:

• Сатқунлуқ. Сара исимлиқ бир аял мундақ дәйду: «Йолдишим порнография көргәнликтин у маңа қайта-қайта зина қилғандәк болатти».

• Өзүңизни әрзимәстәк һис қилиш. Бир аялниң ейтишичә, йолдишиниң порнография көрүш адити түпәйли у өзини «чирайлиқ әмәс вә хорланғандәк һис қилиду екән».

• Ишәнчни йоқутуш. Хелен исимлиқ бир аял мундақ дәйду: «Еримниң һәрбир қәдимигә гуман билән қарайдиған болдум».

• Ғәм-әндишә қилиш. «Турсамму, ятсамму еримниң шу яман адити тоғрилиқ ойлаттим»,— дәйду Катрина исимлиқ бир аял.

Ойлинип көрүң: Муқәддәс китапқа асасән, әрләр аяллирини сөйүши керәк (Әфәсликләргә 5:25). Әгәр аяли ериниң яман адити түпәйлидин жуқурида кәлтүрүлгән яман һис-туйғуларни һис қилса, ери аялини яхши көриду дәп ейтишқа боламду?

Сиз немә қилалайсиз?

Порнография көрүш адитини ташлаш оңай әмәс. Стейси исимлиқ аял шундақ дегән: «Ерим тамака, марихуана вә һарақ ичишни ташлиди. Амма порнография көрүш адити билән техичә күрәшмәктә».

Әгәр сиздә порнография көрүш адити болса төвәндики мәслиһәтләр бу яман адәттин пүтүнләй айрилишқа ярдәм бериду.

• Порнография көрүш интайин яман нәрсә екәнлигини чүшиниң. Порнография көридиған киши өз шәһваний истәклирини қандуруп, бәхитлик нека үчүн муһим болған меһир-муһәббәт, ишәнч вә садақәтмәнликни бузиду. Шундақла, у неканиң Яратқучиси Йәһва Худаға болған һөрмәтсизлигини көрситиду.

  Муқәддәс китап принципи: «Һәммиңларниң некаси һөрмәт қилинсун» (Ибранийларға 13:4).

• Өз қилмишлириңизға җавап бериң. «Аялим маңа көпирәк меһир-муһәббәт көрсәткәндә, мән порнография көрмәттим»— дәп ейтмаң. Әйивиңизни аялиңизниң бойниға есип қоюш тоғра әмәс. Чүнки аялиңиз йәнә көңлүңизни қалдурса, бу порнография көрүш үчүн йәнә бир сәвәп болуши мүмкин.

  Муқәддәс китап принципи: «Бирақ һәрким өз һәвәси билән аздурулуп һәм униңға берилип, синилиду» (Яқуп 1:14).

• Һәмрайиңиз билән растчил болуң. Кевин исимлиқ бир әр киши мундақ дәйду: «Аялим иккимиз мени порнография көрүшкә аздуридиған қандақту бир нәрсини қөргән-көрмигәнлигимни һәр күни муһакимә қилимиз. Шуниң ярдимидә, аялим униңдин һеч нәрсини йошурмайдиғанлиғимни чүшиниду».

  Муқәддәс китап принципи: «Һәммә нәрсидә өзүмизни диянәт тутимиз» (Ибранийларға 13:18).

• Һәрқачан сәгәк жүрүң. Һәтта бир нәччә жилдин кейинму қайтидин порнография көрүп қоюшиңиз мүмкин. Жуқурида тилға елинған Кевин мундақ дәйду: «Мән порнографияни он жилдәк көрмидим, шуңа бу яман адәттин пүтүнләй айрилдим дәп ойлидим. Әслидә бу адәт қолайлиқ вақитни күтүп, ухлап ятқан һайванға охшаш екән».

  Муқәддәс китап принципи: «Шуңлашқа, ким туримән дәп ойлиса, жиқилип кетиштин байқисун» (Коринтлиқларға 1-хәт 10:12).

• Аздурулған чағда, тохтаң. Аздурулушларниң пәйда болушиға тәсир қилалмаслиғиңиз мүмкин, амма уларға қарши туруш-турмаслиқ — өз қолуңизда. Әгәр оюңизни бирдин башқа яққа бурсиңиз, һәвәслириңиз бирдин бесилиши мүмкин.

  Муқәддәс китап принципи: «Һәрқайсиңлар өз бәдиниңларни муқәддәсликтә һәм иззәт-һөрмәттә тутушни билиңлар. Худани тонумайдиған хәлиқләргә хас шәһваний һәвәсликкә йол қоймаңлар» (Салоникилиқларға 1-хәт 4:4, 5).

• Порнография көрүшкә дәвәт қилидиған вәзийәтләрдин қечиң. Бир китапта мундақ дәп йезилған: «Шундақ вәзийәткә дуч кәлсиңиз, худди сәрәңгини яндурғанға охшайсиз. Чоң от пәйда болуши үчүн, кичиккинә бензин болса йетәрлик».

  Муқәддәс китап принципи: «һечбир қанунсизлиқ үстүмдин Күчкә егә болалмисун» (Зәбур 119:133).

• Үмүтиңизни үзмәң. Һәмрайиңизниң ишәнчисини әслигә кәлтүрүш үчүн узун вақит, һәтта нәччә жил кетиши мүмкин. Амма көп аилиләрниң мисали буниң мүмкин екәнлигини көрситиду.

  Муқәддәс китап принципи: «Меһир-муһәббәт узақ сәвирлик» (Коринтлиқларға 1-хәт 13:4).