Көп адәмләр диний учришишларда роһий йол-йоруқ яки тәсәлли тапалмиғанлиқтин, уларға қатнишишни тохтатти. Ундақта, немишкә Йәһва гувачилириниң учришишлириға беришиңиз керәк? У йәрдә сиз немигә еришәләйсиз?

Меһрибан вә көйүмчан адәмләр билән арилишисиз. Биринчи әсирдә мәсиһийләрниң җамаәтлири болған. Мәсиһийләр шу учришишларда Худаға бирликтә ибадәт қилип, Муқәддәс Язмиларни тәтқиқ қилатти вә бир-бирини илһамландуратти (Ибранийларға 10:24, 25). Улар мундақ учришишларда бир-биригә һәқиқий достлардәк, қериндашлардәк муамилә қилатти (Салоникилиқларға 2-хәт 1:3; Йоһанниң 3-хети 14). Биринчи әсирдики мәсиһийләргә тәқлит қилип, бизму әшундақ хошаллиққа чөмүмиз.

Муқәддәс китаптики принципларни қоллинишқа үгинисиз. Худаниң қедимдики садиқ хизмәтчилиригә охшаш, бизниң күнимиздиму әрләр, аяллар вә балилар биллә җәм болиду. Тәҗрибилик тәлим бәргүчиләр Муқәддәс китаптики принципларни күндилик һаятимизда қандақ қоллинишқа болидиғанлиғини чүшинишкә ярдәм бериду (Қанун шәрһи 31:12; Нәһәмия 8:8). һәрқандақ киши Муқәддәс китапни муһакимә қилишқа вә нахша ейтишқа қатнишалайду. Бу — етиқатдашлиримиз билән биллә «үмүтимиз һәққидә җакалашниң» әҗайип мүмкинчилиги (Ибранийларға 10:23).

Етиқадиңизни мустәһкәмләйсиз. Әлчи Паул җамаәтләрниң биригә мундақ дегән: «Силәр билән көрүшүшкә интайин интизармән,... бир-биримизниң етиқадидин өз ара илһам алалаймиз демәкчимән» (Римлиқларға 1:11, 12). Бурадәр-қериндашлар билән турақлиқ арилишиш етиқадимизни мустәһкәмләп, Худаниң қанунлири бойичә яшашқа җүръәт бериду.

Сизни новәттики җамаәт учришишиға келишкә вә һәммини өз көзүңиз билән көрүшкә чин жүрәктин тәклип қилимиз. У йәрдә сизни хурсәнлик билән қарши алиду. Барлиқ учришишларға кириш һәқсиз — һечкимдин пул тәләп қилинмайду.

• Җамаәт учришишлирини өткүзүштә Йәһва гувачилири кимләрдин үлгә алиду?

• Җамаәт учришишлириға қатнишиш арқилиқ немигә еришәләйсиз?

һәтта әгәр узақ йол меңишқа тоғра кәлсиму яки һава райи бузулсиму, биз учришишларға турақлиқ қатнишимиз. Немишкә Йәһва гувачилири түрлүк қийинчилиқлириға вә иштин һерип келишигә қаримастин, етиқатдашлири билән арилишишқа интилиду?

Бу қийинчилиқларни баштин өткүзүшкә ярдәм бериду. Мәсиһий учришишларға берип жүргәнләрни көздә тутуп, әлчи Паул: «Бир-биримизгә диққәтчан болайли»,— дәп язған (Ибранийларға 10:24). Бу сөз-ибарә бир-биримизни убданирақ тонуп-билиш керәклигини билдүриду. Паулниң сөзлири бизни бурадәр-қериндашлиримизға ғәмхорлуқ қилишқа дәвәт қилиду. Әгәр биз җамаәттикиләр билән йеқинирақ арилашсақ, шу чағда бәзилириниң бизниңкигә охшаш қийинчилиқларни мувәппәқийәтлик һәл қилғанлиғини көрәләймиз. Уларниң мәслиһәтлири бизгә ярдәм берәләйду.

һәқиқий достларни тапалаймиз. Мәсиһий учришишларға келип жүргәнләр тонушларла әмәс. Улар бизниң йеқин достлиримиз. Биз бир-биримиз билән җамаәттин сирт вә дәм елиш вақтида қоюқ арилишимиз. Мундақ арилишишниң қандақ пайдиси бар? Биз бир-биримизни техиму қәдирләймиз вә бу өз ара меһир-муһәббитимизни мустәһкәмләйду. Етиқатдашлиримиз бизниң йеқин достлиримиз болғанлиқтин, улар қийинчилиқларға дуч кәлгәндә, биз дайим ярдәм беришкә тәйяр (Пәнд-нәсиһәтләр 17:17). Җамаәтниң барлиқ әзалири билән арилишиш арқилиқ «бир-биримизгә ғәмхорлуқ қиливатқинимизни» көрситимиз (Коринтлиқларға 1-хәт 12:25, 26).

Биз сизни Худаниң ирадисини орунлаватқанларниң арисидин дост издәшкә дәвәт қилимиз. Мундақ достларни Йәһва гувачилириниң арисидин тапалайсиз. Биз билән қоюқ арилишишиңизға һечнәрсиниң тосалғу қилишиға йол қоймаң!

• Мәсиһийләр учришишлирида етиқатдашлар билән қоюқ арилишишниң пайдиси немидә?

• Сиз җамаитимиз билән қачан тонушмақчи?

Дәсләпки мәсиһийләр учришишлирида нахшиларни ейтатти, дуа қилатти вә Муқәддәс китапни оқуп, муһакимә қилатти (Коринтлиқларға 1-хәт 14:26). Уларда һечқандақ рәсим-қаидиләр болмиған. Бүгүнки күндики учришишлиримизму нәқ шундақ өтиду.

Муқәддәс китапқа асасланған тәлим һаятимизда ярдәм бериду. Дәм елиш күнлириниң биридә һәрбир җамаәттә 30 минутлуқ Муқәддәс китапқа асасланған нутуқ ейтилиду. Бу нутуқ Муқәддәс китапниң һаятимизда қандақ ярдәм беридиғанлиғини вә дунияда болуватқан вақиәләрни қандақ чүшәндүридиғанлиғини көрситиду. Учришишқа кәлгәнләрниң һәммиси Муқәддәс китапни ечип, муһакимә қилиниватқан айәтләрни диққәт билән оқушқа тәклип қилиниду. Нутуқтин кейин бир саат давамида «Күзитиш мунари» журналини тәтқиқ қилиш өткүзүлиду. Халиғучиларниң һәммиси «Күзитиш мунаридики» тәтқиққа арналған бир мақалини муһакимә қилишқа қатнишалайду. Мошундақ муһакимә Муқәддәс китаптики принципларни һаятимизда қоллинишқа ярдәм бериду. Йәр йүзидики 118000дин артуқ җамаәтләрниң һәрбиридә охшаш мақалә муһакимә қилиниду.

Тәлим бериш маһаритимизни ашуримиз. Шундақла биз һәр һәптиниң бир кечисидә учришимиз. «Мәсиһий һаятимиз вә хизмитимиз» дәп атилидиған учришиш үч қисимдин ибарәт. Учришиш һәр айда чиқидиған «Мәсиһий һаятимиз вә хизмитимиз. Иш дәптири» намлиқ әдәбият бойичә өткүзүлиду. Бу учришишниң биринчи қисми, «Худа Сөзидики ғәзнә», җамаәт алдин-ала оқуп кәлгән Муқәддәс китапниң үзүндисини техиму яхширақ чүшинишкә ярдәм бериду. «Вәз қилиш маһаритимизни ашуримиз» дегән келәрки қисим болса, өз ичигә башқилар билән Муқәддәс китап һәққидә сөһбәтлишиш үлгилирини алиду. Мәслиһәт беридиған бурадәр оқуш вә сөзләш маһаритимизни ашурушимизға ярдәм бериду (Тимотийға 1-хәт 4:13). Учришишниң «Мәсиһий һаятимиз» намлиқ ахирқи қисмида Муқәддәс китаптики принципларни күндилик һаятимизда қоллинишқа үгинимиз. Соал-җаваплар ярдимидә өткүзүлидиған муһакимә Муқәддәс китапни чоңқурирақ чүшинишимизгә ярдәм бериду.

Учришишлиримизға қатнашсиңиз, Муқәддәс китапқа асасланған тәлим-тәрбийә сиздә чоңқур тәсир қалдуридиғанлиғи шәк-шубһисиздур (Йәшая 54:13).

• Йәһва гувачилириниң учришишлири қандақ өтиду?

• һәр һәптидә өткүзүлидиған қайси учришишимизға кәлгүңиз бар?

Сиз бу китапчидики рәсимләрдә Йәһва гувачилириниң өз учришишлириға сәрәмҗан кийинип келидиғанлиғини байқидиңизму? Немишкә биз ташқи көрүнүшимизгә алаһидә көңүл бөлимиз?

Худайимизға иззәт-һөрмәт көрситиш үчүн. Худа үчүн адәмниң ташқи көрүнүши әмәс, бәлки униң ички дунияси муһимирақтур (Самуилниң 1-язмиси 16:7). Шундақ болсиму, биз Йәһва Худаға ибадәт қилиш үчүн җәм болғанда, униңға вә етиқатдашлиримизға ташқи көрүнүшимиз билән иззәт-һөрмәт көрситишни халаймиз. Биз президентниң һузуриға тәклип қилинған болсақ, уни һөрмәт қилғанлиқтин яхши кийинип бараттуқ, шундақ әмәсму? Худди шуниңға охшаш, мәсиһий учришишлардики ташқи көрүнүшимиз «мәңгүлүкниң Падишаси» Йәһва Худаға вә биз униңға ибадәт қилидиған җайға болған һөрмитимизни көрситиду (Тимотийға 1-хәт 1:17).

Худаниң өлчәмлири бойичә яшайдиғанлиғимизни көрситиш үчүн. Муқәддәс китап мәсиһийләрни кийимни «кичик пеиллиқ» билән һәм «әқилгә мувапиқ» таллашқа дәвәт қилиду (Тимотийға 1-хәт 2:9, 10). «Кичик пеиллиқ» билән кийиниш — орунсиз һис-туйғуларни пәйда қилидиған очуқ вә тәнгә чаплишип туридиған кийимни кийиштин нери болушни билдүриду. «Әқилгә мувапиқ» кийиниш чәктин чиқип кәтмәй, чирайлиқ вә яришимлиқ кийинишкә ярдәм бериду. Мошу принципларниң даирисидә биздә кәң таллаш бар. Көркәм вә яришимлиқ кийиниш арқилиқ биз «Қутқазғучимиз Худаниң тәлиматини» зенәтләп, уни мәдһийиләләймиз (Титқа 2:10; Петрусниң 1-хети 2:12). Учришишларға чирайлиқ кийингәнлигимиз башқиларниң Йәһва Худаға ибадәт қилишқа болған көзқаришиға тәсир қилиду.

Әгәр сизниң чирайлиқ кийим-кечәклириңиз болмиса, әндишә қилмаң! Сизни Ибадәт өйидә көрүшкә һәммиси хурсән. Кийимлиримиз мунасип, пакиз вә чирайлиқ болуши үчүн уларниң қиммәтбаһалиқ болуши шәрт әмәс.

• Худаға ибадәт қилғанда кийиниш тәрзимиз қанчилик муһим?

• Кийим-кечәк таллашта вә ясиништа биз қайси принципларни қоллинимиз?

Әгәр сиз Йәһва гувачилири билән Муқәддәс китапни тәтқиқ қиливатқан болсиңиз, алдин-ала тәйярлиқ қилидиғансиз. Җамаәт учришишлириғиму тәйярлансиңиз, зор пайда алисиз. Тәйярлиқ қилишни адәткә айландурсиңиз, буниң мевисини көрисиз.

Қачан вә қәйәрдә тәйярлиқ қилидиғанлиғиңизни қарар қилиң. Сизгә қайси вақитта тәтқиқ қилиш йенигирәк болиду? Ишни башлаштин авал, таң сәһәрдә яки кәчқурун, балилириңиз йетип қалған вақиттиму? һәтта узақ тәйярлинишқа мүмкинчилик болмисиму, қанчилик вақит бөләләйдиғанлиғиңизни ениқлавелиң вә сизгә һечнәрсә кашила болмисун. Теч вә хатирҗәм җай тепип, радио, телевизор вә телефонни өчүрүветиң. Тәтқиқ қилишниң алдида дуа қилиш барлиқ ғәм-әндишиләрни бир чәткә қоюп, Худаниң Сөзигә көңүл қоюшқа ярдәм бериду (Филипиликләргә 4:6, 7).

Җавапларни тепип, муһакимигә тәйярлиниң. Тәйярлиқни мақалини қараштуруштин башлаң. Мақалиниң яки бапниң мавзуси һәққидә мулаһизә қилип, һәрбир кичик мавзуниң баш мавзу билән қандақ бағланғанлиғи һәққидә ойлинип көрүң. Рәсимләргә вә асасий ой-пикирләрни тәкитләйдиған тәкрарлаш соаллириға диққәт қилиң. Андин һәрбир абзацни оқуп чиқип, кәлтүрүлгән соалға җавап тепиң. Кәлтүрүлгән айәтләрни оқуп, уларниң мақалидики ойлар билән қандақ бағлиниши бар екәнлиги һәққидә ойлинип көрүң (Әлчиләр 17:11). Җавапни тәйярлиғанда абзацта ой-пикриңизни чапсан әскә елишқа ярдәм беридиған бирнәччә асасий сөзләрниң яки ибариләрниң астини сизип қоюң. Шу чағда җамаәт учришишида қолуңизни көтирип, өз сөзүңиз билән қисқичә җавап берәләйсиз.

һәр һәптидә учришишларда муһакимә қилинидиған һәрхил мавзуларни тәтқиқ қилиш арқилиқ, сиз Муқәддәс китаптин еливатқан билимиңизниң ғәзнисини йеңи ой-пикирләр билән толдурисиз (Мәтта 13:51, 52).

• Сиз учришишларға қачан вә қәйәрдә тәйярлиқ көрәләйсиз?

• Җамаәт учришишида җавап бериш үчүн қандақ тәйярлиқ қилсиңиз яхши?

Йәһва Худа қедимдин бери бүгүнки күнгичә аилә әзалириниң биллә вақит өткүзүп, униңға йеқинлишишини вә аиләвий риштилирини мустәһкәмлишини халиған (Қанун шәрһи 6:6, 7). Мошу сәвәп билән Йәһва гувачилири аилиси билән биллә ибадәт қилиш үчүн һәр һәптә вақит бөлиду. Аиләвий ибадәт вақтида улар әркин-азадә шараитта аилисиниң еһтияҗлириға маслаштурулған роһий мавзуларни муһакимә қилиду. Сиз ялғуз турсиңизму, өзүңиз халиған мавзуни таллап, ибадәт қилишқа вақит бөлсиңиз болиду. Бу сизгә Худаға техиму йеқинлишишқа ярдәм бериду.

У сизни Йәһва Худаға йеқинлаштуриду. Муқәддәс китапта: «Худаға йеқинлишиңлар һәм уму силәргә йеқинлишиду»,— дәп йезилған (Яқуп 4:8). Худаниң Сөзини оқуш арқилиқ униң пәзиләтлири вә қилған ишлири һәққидә үгинип, Йәһвани яхширақ биливалалаймиз. Аиләвий ибадәтни башлашниң бир йоли — Муқәддәс китапни бирликтә үнлүк оқуш. Униң үчүн «һаятимиз вә хизмитимиз» учришишиниң һәптилик җәдвилини коллансақ болиду. Аилә әзалири Муқәддәс китапниң үзүндилирини новәт билән оқуп, кейин Язмилардин немигә үгәнгәнлирини биллә муһакимә қилса болиду.

У аиләвий риштиләрни мустәһкәмләйду. Муқәддәс китапни биллә тәтқиқ қилиш әр-аялларни, ата-анилар билән пәрзәнтләрни бир-биригә йеқинлаштуриду. Тәтқиқ қилиш — барлиқ аилә әзалири тақәтсизлик билән күтидиған хошал вақиә болуши лазим. Ата-анилар материални балилириниң йешиға қарап таллиши керәк. Мәсилән, улар балилириниң мәктәптә учришидиған қийинчилиқлирини һәм уларни һәл қилиш йоллирини қараштуруп чиқиш үчүн, «Күзитиш мунари» вә «Ойғиниңлар!» журналлиридики яки jw.org торбетидики мақалиләрни қолланса болиду. Йәнә бир яхши усул — JW Broadcasting-тики (tv.jw.org) видеоматериалларни биллә көрүп, муһакимә қилиш. Йеқин арида җамаәт учришишида ейтилидиған нахшиларни мәшиқ қилиңлар. Аиләвий ибадәттин кейин дәмлик тамаққа җәм болуп, оюнларни ойнисаңлар болиду.

һәр һәптә Йәһва Худаға биллә ибадәт қилиш үчүн вақит бөлсиңиз, аилә әзалириңизниң һәммиси Худаниң Сөзини яхши көридиған болиду. Аиләвий ибадәтни өткүзүшкә күч салғанлиғиңлар үчүн Йәһва Худа силәрни мол бәрикәтләйду (Зәбур 1:1—3).

• Немишкә биз аиләвий ибадәткә вақит бөлимиз?

• Аиләвий ибадәтниң һәммисигә қизиқарлиқ болуши үчүн, ата-анилар немә қилалайду?

Немишкә бу адәмләрниң чирайлири хошаллиқтин җилвилинип туриду? Сәвәви улар конгрессқа қатнишиватиду. Өтмүштә яшап өткән Худаниң хизмәтчилири жилиға үч қетим җәм болуши керәк еди. Бүгүнки күндә бизму жилиға үч қетим өткүзүлидиған муһим учришишлиримизни тақәтсизлик билән күтимиз (Қанун шәрһи 16:16). Бу учришишларға икки қетим болидиған бир күнлүк наһийилик конгресс вә үч күнлүк регионлуқ конгресс кириду. Биз бу учришишлардин қандақ пайда-мәнпәәт алимиз?

Конгресслар қериндашлиғимизни мустәһкәмләйду. Қедимдики исраиллиқлар «җамаәтләр арисида туруп», Йәһва Худани хошал-хорам мәдһийилигән. Бизму бүгүнки күндә Худаға бирликтә ибадәт қилиш үчүн, алаһидә муюмларда җәм болимиз (Зәбур 26:12; 111:1). Мошундақ учришишларда бизниң башқа җамаәтләрдики вә һәтта башқа мәмликәтләрдики гувачилар билән тонушуп, арилишишқа мүмкинчилигимиз пәйда болиду. Чүшлүк үзүлүш вақтида биз конгресс өтүватқан җайда һәмдәстихан болимиз. Шуниң үчүн роһий мәйрәмлиримиздә достанә мунасивәт һөкүм сүриду (Әлчиләр 2:42). Конгрессларда биз хәлиқара қериндашлиғимизни бирләштүридиған меһир-муһәббәтни өз көзүмиз билән көрәләймиз (Петрусниң 1-хети 2:17)

Конгресслар роһий өсүшимизгә ярдәм бериду. Учришишларда исраиллиқларға Язмилардин тәлим бериләтти. Улар болса, өзлиригә ейтилған сөзләрниң мәнасини чүшинип, буниң көп пайдисини көргән еди (Нәһәмия 8:8, 12). Бизму конгрессларда берилидиған мәслиһәтләрни қәдирләймиз. У йәрдә ейтилидиғанларниң һәммиси Муқәддәс китапқа асасланған. Қизиқарлиқ нутуқлар вә сәһниләштүрүлгән вақиәләр бизни Муқәддәс китаптики принципларни күндилик һаятта қоллинишқа үгитиду. Қериндашларниң мошу еғир заманда Худаниң тәләплиригә мас яшашқа тиришқанлири үчүн қийинчилиқларға дуч кәлгәнлиги вә улар үстидин ғалибийәт қазанғанлиғи бизни илһамландуриду. Регионлуқ конгресслардики драмилар Муқәддәс китапта тәсвирләнгән вақиәләрни җанландуруп, улардин пайдилиқ савақларни елишқа ярдәм бериду. Конгресслиримизда өзлирини Худаға беғишлиғанлиғини көрситишни халайдиғанлар чөмдүрүлүш мәрасимидин өтиду.

• Немишкә конгресслар бизгә зор шат-хорамлиқ елип келиду?

• Конгрессқа беришниң сиз үчүн қандақ пайдиси бар?

Өлүмидин бираз вақит илгири Әйса Мәсиһ: «Падишалиқ һәққидики мошу хуш хәвәр пүткүл йәр йүзи бойичә барлиқ хәлиқләргә гувалиқ үчүн вәз қилиниду, мана шу чағда ахир келиду»,— дәп ейтқан (Мәт. 24:14). Бирақ хуш хәвәр пүткүл йәр йүзигә қандақ тарқилиши керәк? Әйса пәйғәмбәр йәрдә яшиғанда бу ишни қандақ әмәлгә ашуруш керәклигини көрситип, үлгә қалдурған (Луқа 8:1).

Биз өйму өй жүрүп, адәмләр билән сөһбәтлишишкә һәрикәт қилимиз. Әйса Мәсиһ шагиртлириға хуш хәвәрни өйму өй вәз қилишқа үгәткән (Мәтта 10:11—13; Әлчиләр 5:42; 20:20). Биринчи әсирдики вәзчиләрдә вәз қилиш үчүн мәхсус тайинланған территория болған (Мәтта 10:5, 6; Коринтлиқларға 2-хәт 10:13). Бүгүнки күндиму бизниң паалийитимиз яхши уюштурулған. һәрбир җамаәтниң тайинланған территорияси бар. Бу бизгә Әйса Мәсиһ бәргән «вәз ейтиш вә асаслиқ гувалиқ бериш» тапшуруғини орунлашқа мүмкинчилик бериду (Әлчиләр 10:42).

Биз адәмләр бар һәммә йәрдә вәз қилимиз. Әйса адәмләр көп болидиған йәрләрдә, мәсилән, деңизниң бойида вә қудуқниң қешида вәз қилған (Марк 4:1; Йоһан 4:5—15). Униң үлгисигә тәқлит қилип, бизму адәмләр билән барлиқ йәрләрдә Муқәддәс китап тоғрилиқ сөһбәтлишишкә тиришимиз: кочиларда, иш мәркәзлиридә, бағларда вә һәтта телефон арқилиқ. Шундақла, биз һәрқандақ қолайлиқ пурсәттин пайдилинип, хошнилиримизға, хизмәтдашлиримизға, синипдашлиримизға вә уруқ-туққанлиримизға гувалиқ беримиз. Мошу түпәйлидин йәр йүзидики миллионлиған адәмләр Худаниң «ниҗати» һәққидики хуш хәвәрни аңлаватиду (Зәбур 96:2).

Худа Падишалиғи тоғрилиқ хуш хәвәрни вә бу хәвәрниң келәчигимизгә қандақ тәсир қилидиғанлиғи һәққидә кимгә ейтип беришни халайсиз? Мошу хәвәрни һәргизму ичиңиздә сақлимаң. Пурсәт яр бәрсила, уни башқиларға ейтип беришкә тиришиң!

• Қандақ «хуш хәвәр» җакалиниши керәк?

• Йәһва гувачилири Әйса Мәсиһниң вәз ейтиш үлгисигә қандақ тәқлит қилиду?

«Пешқәдәм» дәп көпинчә йеңи территорияләрни вә йеңи йолларни ачидиған адәмләрни атайду. Мошу мәнада Әйса Мәсиһму пешқәдәм болған. У йәр йүзигә адәмләргә хизмәт қилиш үчүн вә ниҗатлиққа йол ечиш үчүн кәлгән (Мәтта 20:28). Йәһва гувачилири униң үлгисигә тәқлит қилип, нурғун вақтини шагирт тәйярлашқа сәрип қилиду (Мәтта 28:19, 20). Уларниң бәзилири пешқәдәм болуп хизмәт атқуриду.

Пешқәдәм — толуқ вақитлиқ хизмәтчи. Йәһва гувачилириниң һәммиси хуш хәвәрни вәз қилиду. Амма уларниң бәзилири өз ишлирини уюштуруп, ейиға 70 саат вәз қилиду. Мундақ хизмәтчиләр пешқәдәмләр дәп атилиду. Бу хизмәтниң һөддисидин чиқиш үчүн, нурғунлиған пешқәдәмләр толуқ әмәс иш күнигә йөткилиду. Башқилири алаһидә еһтияҗи бар территорияләрдә мәхсус пешқәдәм болуп хизмәт қилишқа тайинлиниду. Улар һәр айда 130 саат вә униңдинму көп вәз қилиду. Пешқәдәмләр аддий һаят кәчүриду. Уларниң шуниңда ишәнчиси камилки, Йәһва Худа уларға ғәмхорлуқ қилип, һаят үчүн һаҗәтлик болған барлиқ нәрсиләрни бериду (Мәтта 6:31—33; Тимотийға 1-хәт 6:6—8). Толуқ вақитлиқ вәз қилишқа мүмкинчилиги йоқлар ейиға 30 яки 50 саат вәз қилип, ярдәмчи пешқәдәм болуп хизмәт қилалайду.

Пешқәдәм болушқа Худаға вә адәмләргә болған меһир-муһәббәт дәвәт қилиду. Әйса Мәсиһкә охшаш бизму бүгүнки күндә нурғун адәмләрниң роһий җәһәттин езилгәнлигини байқаймиз (Марк 6:34). Биз уларға һазирниң өзидә ярдәм берәләйдиған һәм келәчәккә мәһкәм үмүт берәләйдиған билим билән бөлүшәләймиз. Йенидики кишигә болған меһир-муһәббәт пешқәдәмни вақти вә күчини айимай, башқиларға роһий җәһәттин ярдәм беришкә дәвәт қилиду (Мәтта 22:39; Салоникилиқларға 1-хәт 2:8). Буниң нәтиҗисидә пешқәдәм өзиниң етиқадини мустәһкәмләйду, Йәһва Худаға техиму йеқинлишиду вә зор шат-хорамлиққа еришиду (Әлчиләр 20:35).

• Пешқәдәмләр дегән кимләр?

• Бәзи вәзчиләрни толуқ вақитлиқ хизмәт қилишқа немә дәвәт қилиду?

Йәһва гувачилириниң тәшкилатида теократиялик билимгә дайим алаһидә диққәт бөлүниду. Падишалиқ һәққидики хәвәрни җакалашқа көп вақтини беғишлайдиған хизмәтчиләр үчүн «хизмитини толуқ мөлчәрдә атқурушқа» ярдәм беридиған мәхсус мәктәпләр уюштурулған (Тимотийға 2-хәт 4:5).

Пешқәдәмләр мәктиви. Толуқ вақитлиқ хизмәтни бир жил атқурған пешқәдәм адәттә йеқин арида җайлашқан Ибадәт өйидә өткүзүлидиған 6 күнлүк мәктәпкә тәклип қилиниду. Бу мәктәпниң мәхсити — пешқәдәмгә Йәһва Худаға техиму йеқинлишишқа вә хизмәтниң барлиқ саһасида маһир болуп, Тәңримизгә садиқ хизмәт қилишни давамлаштурушқа ярдәм бериш.

Падишалиқ җакалиғучилириға арналған мәктәп. Бу 2-айлиқ мәктәпниң мәхсити — алаһидә еһтияҗ бар территорияләрдә хизмәт қилишқа тәйяр болған тәҗрибилик пешқәдәмләргә тәлим бериш. Улар йәрдә яшиған әң улуқ Җакалиғучи Әйса Мәсиһниң үлгисигә әгишип: «Мана мән! Әвәткәйсән мени!» — дәватиду. (Йәшая 6:8; Йоһан 7:29). Өйдин жирақ йәргә көчүшни халайдиғанлар аддий һаят кәчүрүшкә тәйяр болуши керәк. У йәрниң мәдәнийити, климити вә тамиғи тамамән башқичә болуши мүмкин. Бәлким, уларға йеңи тилни үгинишкә тоғра келиду. Бу мәктәпкә 23—65 яш арилиғидики той қилмиған қериндаш вә бурадәрләр һәм әр-аяллар тәклип қилиниду. Мошу мәктәп уларға хизмәттә керәк болидиған роһий хисләтләрни риваҗландурушқа һәм Йәһва Худаға вә униң тәшкилатиға көпирәк пайда беридиған қабилийәтләргә еришишкә ярдәм бериду.

Күзитиш мунариниң Гилиад Муқәддәс китап мәктиви. «Гилиад» дегән сөз «гува дөңи» дегән мәнани билдүриду. Гилиад мәктиви 1943-жили тәшкил қилинған. Шу вақиттин башлап бу мәктәпни тамамлиған 8000дин ошуқ бурадәр-қериндаш «зәминниң қириғичә» гувалиқ бериш үчүн миссионер болуп тайинланған еди. (Әлчиләр 13:47). Миссионерлар Перуға биринчи қетим кәлгәндә, у йәрдә бирму җамаәт болмиған, һазир болса, у йәрдә 1000дин ошуқ җамаәт бар! Миссионерлар Япониядә хизмәт қилишни башлиғанда, у йәрдә онму Гувачи йоқ еди, һазир болса, уларниң сани 200 000дин ашти. Бу 5 айлиқ тәлим бериш курсида Худаниң Сөзи әстаидил тәтқиқ қилиниду. Бу мәктәпкә мәхсус пешқәдәмләр, миссионерлар, филиалларда хизмәт қиливатқанлар вә наһийилик назарәтчиләр тәклип қилиниду. Бу мәктәп уларни дуния йүзи бойичә атқурулуватқан паалийәтни қоллашқа тәйярлайду.

• Пешқәдәмләр мәктивиниң мәхсити немә?

• Падишалиқ җакалиғучилириға арналған мәктәп кимләр үчүн уюштурулған?