9-قىسم
ھازىر ۋە كەلگۈسىدە مەڭگۈ بەختلىك ياشاڭ!
خۇدا بىلەن دوستلۇق ئورناتسىڭىز، تۇرمۇشىڭىزدىن قانائەت ھاسىل قىلىپ ياشىيالايسىز
مۇقەددەس كىتابتىكى خاتىرىلەردە، ئىبراھىم پەيغەمبەر ئىمان-ئېتىقادتا كامىل كىشى دەپ تەرىپلەنگەن. ئۇ ئەسلىدە ئاۋات گۈللەنگەن شەھەر ئۇردا راھەت-پاراغەتلىك تۇرمۇش كەچۈرەتتى. كېيىن ئۇ يەردىن ئايرىلىپ، ھارانغا كېلىپ بىر مەزگىل ئۇ جايدا ئولتۇراقلاشقان. ئۇ قالغان ھاياتىنى سەرگەردان كۆچمەن بولۇپ چېدىردا ئۆتكۈزگەن. ئۇنىڭ مۇقىم تۇرالغۇ جايى بولمىغان (يارىتىلىش 12:1–3؛ ئەلچىلەر 7:2–7؛ ئىبرانىيلار 11:8–10). بىراق، مۇقەددەس كىتاب:‹ئىبراھىم تولا ياشىنىپ قېرىلىقىدا كامالىغا يېتىپ [قانائەت ھاسىل قىلىپ، ي.د.] ئاخىرقى نەپىسىنى تارتىپ ۋاپات بولغان› دەپ بايان قىلىدۇ (يارىتىلىش 25:8). نېمە ئىبراھىمنى تۇرمۇشىدا قانائەت ھاسىل قىلدۇردى؟ ئۇ پەقەت ئۆز ھايات مۇساپىسىنى بېسىپ تۈگەتكەنلىكى ئۈچۈنلا ئاخىرقى نەپسىدە قانائەت ھاسىل قىلمىغان. ئۇنىڭ خۇداغا بولغان كامىل ئىمان-ئېتىقادى سەۋەبلىك ئىبراھىم «خۇدانىڭ دوستى» دەپ ئاتالغان (ياقۇپ 2:23، ھ.ز.؛ يەشايا 41:8). ئىبراھىمنىڭ ياراتقۇچى ئىگە بىلەن يېقىن دوستلۇق مۇناسىۋىتى بولغان. بۇ مۇناسىۋەت ئىبراھىمنى ئۆز تۇرمۇشىدىن قانائەت ھاسىل قىلدۇرغان.
سىز تۇرمۇشىڭىزدا ئىبراھىم پەيغەمبەردىنمۇ كۆپرەك قانائەت ھاسىل قىلىپ ياشىيالامسىز؟
2 مۇندىن 4000 يىللار ئىلگىرى ئىبراھىم پەيغەمبەر قانداق قىلغان بولسا، سىزمۇ بۈگۈنكى كۈندە، ئەگەر خۇدا بىلەن دوستلۇق ئورناتسىڭىز، ئەھمىيەتلىك ھايات كەچۈرۈپ تۇرمۇشىڭىزدىن قانائەت ھاسىل قىلىپ ياشىيالايسىز. بەلكىم، سىز ئالەملەرنىڭ ياراتقۇچىسى بىلەن دوست بولالايدىغانلىقىڭىزنى خىيالىڭىزغا كەلتۈرۈپ باقمىغان بولۇشىڭىز مۇمكىن، لېكىن شۇنداق قىلىش تامامەن مۇمكىن. ئۇنداقتا قانداق قىلىپ؟ سىز ئۇنى تونۇشىڭىز ۋە ئۇنى سۆيىشىڭىز كېرەك (1-كورىنتلىقلار 8:3؛ گالاتىيالىقلار 4:9). ياراتقۇچىڭىز بىلەن شۇنىڭدەك مۇناسىۋەتتە بولۇش سىزنىڭ تۇرمۇشىڭىزنى ئەھمىيەتلىك ۋە بەخت-سائادەتلىك قىلالايدۇ.
3 ئاشۇ ئەيسا مەسىھنىڭ تۆلەم قۇربانلىقىنى قوبۇل قىلىشنى خالايدىغانلارنىڭ بەخت-سائادەتلىك تۇرمۇش كەچۈرۈشى ئۈچۈن يەھۋا يېتەكچى پرىنسىپلار بىلەن تەمىنلەيدۇ (يەشايا 48:17). ئېسىڭىزدە بولسۇن، ئادەم-ئاتا نېمە ياخشى، نېمە ياماننى ئۆزى قارار قىلىش ئارقىلىق خۇداغا قارشى ئىسىيان كۆتەرگەن. يەھۋا ئۆز ئوغلىنىڭ تۆلەم قۇربانلىقى ئارقىلىق ئىنسانىيەتتىن ئىبارەت بۇ ئائىلىنى قايتۇرۇپ سېتىۋېلىپ، ئۇلارنىڭ گۇناھ ۋە ئۆلۈمنىڭ قۇللۇقىدىن ئازاد بولۇشنىڭ بىر يولىنى ئاچقان. بىراق، ھەربىر كىشى تۆلەم قۇربانلىقىنى قوبۇل قىلىشى ۋە ئۆزى ئۈچۈن ياخشى-يامانلىق ئۆلچىمىنى بەلگىلەشنى توختىتىشى لازىم. خۇدا ئەيسانىڭ تۆلەم قۇربانلىقىنى قوبۇل قىلغانلار ئۈچۈن تەمىنلىگەن قانۇن-نىزام ۋە قائىدە-پرىنسىپلارغا بويسۇنىشىمىز كېرەك.
‹ماڭا ئۆز يولۇڭنى كۆرسىتىپ بەر›
4 سىز مۇقەددەس كىتابنى داۋاملاشتۇرۇپ ئۆگىنىش بىلەن بىللە ئۇنىڭدىكى قائىدە-پرىنسىپلارنى ئەمەلىي ئىشلىتىڭ. شۇنداق قىلسىڭىز، خۇدانىڭ بەلگىلىگەن ياخشى-يامانلىق ئۆلچىمىنىڭ ناھايىتى پايدىلىق ئىكەنلىكىنى چوقۇم كۆرۈۋالالايسىز ۋە ئۇنىڭ ئۈچۈن تەشەككۈر ئېيتىسىز (زەبۇر 19:7–9). سىزمۇ خۇددى يەھۋانىڭ پەيغەمبىرى مۇسادەك ھاياجانلىنىپ خۇداغا: ‹مەن سېنىڭ كۆزلەرىڭنىڭ ئالدىدا ئىلتىپات تاپقان بولسام سېنىڭ كۆزلەرىڭنىڭ ئالدىدا ئىلتىپات تاپقىنىمنى تونۇماقىم ئۈچۈن ماڭا ئۆز يولۇڭنى كۆرسىتىپ بەر›، دەيسىز (چىقىش 33:13؛ زەبۇر 25:4). مۇقەددەس كىتاب قائىدە-پرىنسىپلار بىلەن تەمىنلەپ سىزنىڭ «ئاخىرقى كۈنلەردىكى تەس ۋاقىتلار»دىكى ھەرخىل قىيىنچىلىقلارغا تاقابىل تۇرۇشىڭىزغا يول كۆرسىتىپ يېتەكچىلىك قىلىدۇ (2-تىموتىي 3:1). سىزنىڭ ئۇنىڭغا بولغان مىننەتدارلىقىڭىزنىڭ ئېشىشى، سىزنى يەھۋانى تېخىمۇ ياخشىراق تونۇپ، ئۇنىڭ بىلەن دوستلۇق مۇناسىۋەتنى كۈچەيتىشكە يېتەكلەيدۇ.
5 ئىبراھىم قېرىپ ھاياتىدا قانائەت ھاسىل قىلىپ ياشىغان بولسىمۇ، ئۇ يەنىلا ئۆلۈمدىن قېچىپ قۇتۇلالمىغان. ھاياتلىق ھەقىقەتەن بەك قىسقا. مەيلى بىز قانچە ياشقا كىرەيلى، ھەممىمىز ئۇزۇنراق ھايات كەچۈرۈشنىلا ئويلايمىز، چۈنكى «[خۇدا] ئەبەدىلىكنى ئادەملەرنىڭ كۆڭۈللىرىدە قويۇپتۇر. ھەرقانداق بولسا ھېچ كىشى خۇدانىڭ دەسلىپىدىن تارتىپ ئاخىرغىچە قىلغان ئىشلىرىنى دېرەك قىلالمايدۇر [چۈشىنىپ تېگىگە يېتەلمەيدۇ]» (ۋەز 3:11). بىز مەڭگۈ ياشىغان تەغدىردىمۇ، يەھۋانىڭ ياراتقان بارلىق مەخلۇقاتلىرىنى چۈشىنىپ تېگىگە يېتەلمەيمىز. يەھۋانىڭ قىلغان ئىشلىرى ئارىسىدا، بىز تەكشۈرۈپ كۆزىتىدىغان، ئۆگىنىپ تەتقىق قىلىدىغان ۋە ھوزۇرلىنىپ مەمنۇن بولىدىغان مۆجىزىلىك ئىشلار چەكسىزدۇر! — زەبۇر 19:1–4؛ 104:24؛ 139:14.
6 ئەگەر يەرشارى بۈگۈنكى كۈندە بىز كۆرۈپ تۇرۇۋاتقان قىيىنچىلىقلار بىلەن تولۇپ كەتسە، مەڭگۈ ياشاش بەلكىم سىزنى ئانچە بەك قىزىقتۇرالماسلىقى مۇمكىن. بىراق، ئەنسىرەشنىڭ ھاجىتى يوق. مۇقەددەس كىتاب: «ئۇنىڭ ۋەدىسىگە مۇۋاپىق يېڭى ئاسمانلارغا ۋە يېڭى بىر يەرگە ئىنتىزاردۇرمىز. ئۇلاردا ئادالەت ساكىن بولادۇر [ئورۇن ئالادۇر]» دەيدۇ (2-پېترۇس 3:13). «يېڭى ئاسمانلار» سۆز-ئىبارىسى يېڭى ئاسماندىكى ھۆكۈمەت يەنى خۇدانىڭ پادىشاھلىقىنى كۆرسىتىدۇ. «يېڭى بىر يەر» سۆز-ئىبارىسى ئاشۇ ساماۋى پادىشاھلىقنىڭ باشقۇرۇشىغا بويسۇنۇپ ياشايدىغان ئىنسانلاردىن تەركىپ تاپقان يېڭى بىر جەمئىيەتنى كۆرسىتىدۇ. مۇشۇ ئىشلارنى ئەمەلگە ئاشۇرۇش ئۈچۈن خۇدا ئۇزاققا قالماي «يەرنى خاراب قىلغۇچىلار»غا قارشى ھەرىكەتكە كېلىدۇ. — ۋەھىيلەر 11:18؛ 2-پېترۇس 3:10.
7 ئاشۇ ئىشلار قاچان بولىدۇ؟ ئەيسا مەسىھ «بۇ ئالەمنىڭ ئاخىرىنىڭ ئالامىتى» توغرىسىدا بىزگە كۆرسەتمە بېرىپ: دۆلەتلەر ئارا ئۇرۇشلار بولۇپ، «يەردىن يەرگە ئاچارچىلىق ۋە زىلزىلىلەر ۋەقە بولادۇر [يەر تەۋرەشلەر يۈز بېرىدۇ]»، «ۋابالار بولۇر» ۋە ‹رەزىللىكلەر كۆپىيەر› (ھ.ز.) دېگەن (مەتتا 24:3–13؛ لۇقا 21:10، 11؛ 2-تىموتىي 3:1–5). ئەيسا يەنە مۇنداق بېشارەتنى ئالدىن ئېيتقان: «بۇ ۋەقە بولغىنىنى كۆرگەندە خۇدانىڭ پادىشاھلىقىنىڭ يېقىن بولغىنىنى بىلىڭلار» (لۇقا 21:31). ھەقىقەتەن، يەھۋا رەزىل ئادەملەرنى يوق قىلىدىغان ۋاقىت-سائەت تېز يېقىنلاشماقتا.a
8 «قادىر مۇتلەق [ھەممىگە قادىر] خۇدانىڭ چوڭ كۈنى»دىن كېيىن، يەھۋا يەريۈزىدىكى رەزىللىكلەرنى تازىلاپ چىقىرىدۇ، بىز ياشاۋاتقان يەرشارى بىر جەننەتكە ئايلىنىدۇ (ۋەھىيلەر 16:14، 16؛ يەشايا 51:3). شۇ چاغدا، «ئادىللار ئۆزى يەرگە ۋارىس بولۇپ ئەبەدغىچە ئۇندا ئولتۇرۇر» (زەبۇر 37:29). ئۇنداقتا، ئۆلۈپ كەتكەن كىشىلەرچۇ؟ مەسىھ ئەيسا: «مۇنىڭغا تەئەججۈپ قىلماڭلار چۈنكى گۆرلەردىكىلەرنىڭ ھەممىسى ئۇنىڭ ئاۋازىنى ئاڭلايدۇرغان ۋاقىت كېلۇر ۋە ئۇندىن چىقىپ ياخشىلىق قىلغانلار ھايات قىيامىتىگە ۋە يامانلىق قىلغانلار ھۆكۈم قىيامىتىگە كېتەرلەر» دېگەن (يۇھاننا 5:28، 29). يەھۋا ھەربىر كىشىگە كۆڭۈل بۆلىدۇ، ئۇ ئۆلۈم ئۇيقۇسىدا ئۇخلاۋاتقان ئۆلۈكلەرنى ھاياتلىققا قايتۇرۇپ كېلىدۇ. ئېرسىيەت تەتقىقاتچىلىرى ئېرسىيەت قۇرۇلۇشى تېخنىكىسى ئارقىلىق ئىنسانلارنى كلونلاش توغرىسىدا ئىزدەنمەكتە. بىراق، ياراتقۇچى ئىگىنىڭ كلونلاش تېخنىكىسنى قوللىنىشى ھاجەتسىز. خۇدا تەرىپىدىن قۇتقۇزۇشقا لايىق دەپ قارالغان ھەربىر ئىنساننىڭ ئىنچكە تەپسىلاتلىرىنى ئۇ ئەسكە ئېلىشقا ۋە ئاشۇلارنى ھاياتلىققا قايتۇرۇپ كېلىشكە قادىردۇر. شۇنداق، سىزدە ئۆلۈپ كەتكەن يېقىن كىشىلىرىڭىز بىلەن يەريۈزى جەننەتتە جەم بولۇش ئۈمىدى بار!
9 جەننەتتىكى تۇرمۇش قانداق بولىدۇ؟ يەريۈزى خۇشال-خورام كىشىلەر بىلەن تولىدۇ، كۆپچىلىك بىرلىكتە ياراتقۇچى ئىگىنى مەدھىيلەيدۇ. «ھېچ كىشى: مەن كېسەل دۇرمەن دېمەس» (يەشايا 33:24؛ 54:13). سالامەتلىككە زىيانلىق تۇرمۇش بېسىمى ئاستىدا، ھېسسىيات ۋە روھىي جەھەتتە تۇراقسىز بولىدىغان كەيپىيات ھېچ كىمنىڭ چىرايىدا ئىپادىلەنمەيدۇ. ھەممە كىشىلەردە يەيدىغانغا يېتەرلىك تاماق بار بولىدۇ. ھەمدە ئۇلار خۇدانىڭ مەقسىتىگە ماس كېلىدىغان ئەھمىيەتلىك ئىشلارنى قىلىپ خۇشال-خۇراملىق تېپىپ ياشايدۇ (زەبۇر 72:16؛ يەشايا 65:23). ئۇلار ھايۋاناتلار بىلەن ئىناق-ئىتتىپاق بولىدۇ، ئىنسانلارمۇ بىر-بىرى بىلەن ئىناق-ئىتتىپاق ياشايدۇ. ھەممىدىن مۇھىمى، «خۇدا بىلەن ئىناق مۇناسىۋەتتە» بولىدۇ (رىملىقلار 5:1، ھ.ز.؛ زەبۇر 37:11؛ 72:7؛ يەشايا 11:6–9).
10 كەلگۈسى جەننەتتە بەخت-سائادەتلىك تۇرمۇشتىن تولۇق قانائەت ھاسىل قىلىپ ياشاش ئۈچۈن چوقۇم قانداق قىلىشىڭىز لازىم؟ مەسىھ ئەيسا مۇنداق دېگەن: «ئەبەدىي تىرىكلىك بۇ دۇركى سەن ھەقىقىي ۋاھىد [بىردىن-بىر] خۇدانى ۋە سەن ئەۋەتكەن [ئەيسا] مەسىھنى تونۇغايلار» (يۇھاننا 17:3). شۇڭا داۋاملىق يەھۋا ۋە ئەيسا مەسىھ توغرىسىدا بىلىم ئېلىپ، خۇدانىڭ سىزدىن نېمە تەلەپ قىلىدىغانلىقىنى ئۆگىنىڭ. شۇندىلا سىز، يەھۋا خۇدانى خۇرسەن قىلىشقا مۇيەسسەر بولىسىز ۋە شۇنىڭ بىلەن بىر ۋاقىتتا، تۇرمۇشىڭىز بەخت-سائادەتلىك بولۇپ ئۇنىڭدىن قانائەت ھاسىل قىلىسىز.
a مۇشۇ بېشارەت توغرىسىدا «مۇقەددەس كىتابتا زادى نېمە ھەقىقەت بار؟» دېگەن كىتابنىڭ 9-بابىدىن كۆپرەك مەلۇماتلارغا ئېرىشەلەيسىز.