6. دۇنيانىڭ جاي-جايلىرىدىكى ۋەز قىلىش پائالىيىتى
«بۇ پادىشاھلىق خۇش خەۋىرى بارچە مىللەتلەرگە يەتكۈزۈلۈشى ئۈچۈن پۈتۈن دۇنيادا ۋەز قىلىنىدۇ».—مەتتا 24:14.
● ۋىئاتېيا، تۇئاموتۇ ئاركىپېلوگو دەپ ئاتىلىدىغان تىنچ ئوكياندىكى يىراق ئاراللارنىڭ بىرىدە ياشايدۇ. تۇئاموتۇ ئومۇمىي كۆلىمى تەخمىنەن 802900 كۋادرات كىلومېتىرغا سوزۇلغان 80گە يېقىن ئاراللاردىن تەشكىل تاپقان بولسىمۇ، پەقەت 16000 كىشى ياشايدۇ. شۇنداق بولسىمۇ، ۋىئاتېيا ۋە ئۇنىڭ قوشنىلىرى يەھۋا گۇۋاھچىلىرىنى تونۇيدۇ. نېمە ئۈچۈن؟ سەۋەبى، يەھۋا گۇۋاھچىلىرى ئادەملەر قەيەردە ياشىشىدىن قەتئىينەزەر، ھەممىسىگە خۇدا پادىشاھلىقى ھەققىدىكى خۇش خەۋەرنى يەتكۈزۈشكە تىرىشىدۇ.
دەلىل-ئىسپاتلار نېمىنى كۆرسىتىدۇ؟ پادىشاھلىق ھەققىدىكى خۇش خەۋەر دۇنيانىڭ بۇلۇڭ-پۇشقاقلىرىغىچە ۋەز قىلىنىدۇ. يەھۋا گۇۋاھچىلىرى پەقەت 2010-يىلى خۇش خەۋەرنى 236 دۆلەت ۋە رايونلاردا ۋەز قىلىپ، بىر مىليارد 600 مىليون سائەتتىن كۆپرەك ۋاقىت سەرپ قىلغان. دېمەك، ھەر بىر گۇۋاھچى ئوتتۇرا ھېساب بويىچە، ھەر كۈنى 30 مىنۇت ۋەز قىلغان. يېقىنقى ئون يىل ئىچىدە، ئۇلار مۇقەددەس كىتابقا ئاساسلانغان 20 مىلياردتىن ئارتۇق ماتېرىياللارنى نەشىر قىلىپ تارقاتقان.
كەڭ تارقالغان كۆز قاراش. مۇقەددەس كىتابتىكى خەۋەر نەچچە مىڭ يىلدىن بۇيان ۋەز قىلىنىپ كەلمەكتە.
بۇ ھەقىقەتەن شۇنداقمۇ؟ راستىنلا، كۆپ ئادەملەر مۇقەددەس كىتابتىكى خەۋەرنى ۋەز قىلىشقا تىرىشقان. ئەمما، ئۇلارنىڭ كۆپىنچىسى بۇنى قىسقا ۋاقىت ۋە كىچىك كۆلەمدە قىلغان. يەھۋا گۇۋاھچىلىرى بولسا، دۇنيا جاي-جايلىرىدا كەڭ كۆلەمدە ۋەز قىلىش پائالىيىتىنى تەشكىللىك ھالەتتە ئېلىپ بېرىۋاتىدۇ ۋە مىليونلىغان ئادەملەر خۇش خەۋەرنى ئاڭلاۋاتىدۇ. يەھۋا گۇۋاھچىلىرى ئىنسانىيەت تارىخىدىكى ئەڭ كۈچلۈك ۋە رەھىمسىز تەشكىلاتلارنىڭ قارشىلىقىغا قارىماستىن، ۋەز قىلىش خىزمىتىنى داۋاملاشتۇرغان (ماركۇس 13:13). ئۇنىڭدىن باشقا، يەھۋا گۇۋاھچىلىرى ۋەز قىلغىنى ئۈچۈن ھەق ئالمايدۇ. ئەكسىنچە، ئۇلار ئۆز ۋاقتىنى قۇربان قىلىپ، مۇقەددەس كىتابقا ئاساسەن نەشىر قىلىنغان ماتېرىياللارنى ھەقسىز تارقىتىدۇ. ئۇلارنىڭ پائالىيىتى ئىختىيارىي ئىئانىلەر بىلەن ياردىمىدە ئېلىپ بېرىلىدۇ.
سىز قانداق ئويلايسىز؟ خۇدا پادىشاھلىقى ھەققىدىكى خۇش خەۋەر ھەقىقەتەن پۈتۈن دۇنيادا ۋەز قىلىنىۋاتامدۇ؟ بۇ بېشارەتنىڭ ئەمەلگە ئېشىشى كېلەچەكتە ئاجايىپ ئىشلارنىڭ يۈز بېرىدىغانلىقىنى بىلدۈرەمدۇ؟
[قىستۇرما تېكىسىت]
«يەھۋا يول قويۇۋاتقان ئىكەن، بىز پۇرسەتنى قولىمىزدىن چىقارماي، قىزغىنلىق بىلەن خۇدا پادىشاھلىقى ھەققىدىكى خۇش خەۋەرنى داۋاملىق ۋەز قىلىمىز».—يەھۋا گۇۋاھچىلىرىنىڭ 2010-يىللىق يىلنامىسى.