[سولدىن ئوڭغا] مارسېلو، يومارا ۋە ئايۋېر. ئۇلارنىڭ قولىدىكى ئىسپانچە ئەمالار يېزىقىدىكى «يېڭى دۇنيا تەرجىمىسى»
ئۇلار قېرىنداشلارنىڭ سۆيگۈ-مۇھەببىتىنى ھېس قىلدى
گۋاتېمالىدىكى بىر كىچىك يېزىدا يومارا، مارسېلو ۋە ئايۋېر دېگەن ئۈچ قېرىنداش ياشايدۇ. ھەدىسى يومارا يەھۋا گۇۋاھچىلىرى بىلەن مۇقەددەس كىتابنى ئۆگىنىشنى باشلىغان، كېيىن ئىككى ئىنىسىمۇ ئۇنىڭغا قوشۇلغان. بىراق، ئۈچ قېرىنداشنىڭ ھەممىسىنىڭ كۆزى كۆرمەيدۇ ۋە ئۇلار ئەمالار يېزىقىنى تونۇمىغان ئىدى. شۇ سەۋەبتىن، ئۇلار بىلەن مۇقەددەس كىتابنى ئۆگەنگەن قېرىنداش تەتقىق ئۆگىنىشىدە، كىتابنى ۋە ئايەتلەرنى ئۆزى ئوقۇپ بېرەتتى.
جامائەت يىغىلىشلىرىغا بېرىپ-كېلىش ئۇلار ئۈچۈن ئىنتايىن قىيىن بولغانىدى. چۈنكى، ئۇلارغا ئەڭ يېقىن يىغىلىش زالىغا بېرىش ئۈچۈن 40 مىنۇت كېتەتتى. بىراق، جامائەتتىكى بۇرادەرلەر ئۇلارنى ھەر قېتىم يىغىلىشلارغا ئاپىرىپ-ئەكېلىشنى ئورۇنلاشتۇردى. ئۈچىلىسى جامائەت يىغىلىشلىرىدا تاپشۇرۇقلار بىلەن چىقىشنى باشلىغاندا، قېرىنداشلار ئۇلارنىڭ ئېيتىدىغان سۆزلەرنى يادلىۋېلىشىغا ياردەم بېرەتتى.
2019-يىل، ماي ئېيىدا جامائەت يىغىلىشلىرى ئۇلارنىڭ يېزىسىدىمۇ ئۆتكۈزۈلىدىغان بولدى. شۇ چاغدا، پىدائىي ۋەز ئېيتقۇچى بولۇپ خىزمەت قىلىۋاتقان بىر جۈپ ئەر-ئايال بۇ يېزىغا كۆچۈپ كەلدى. ئۇلار ئۆزلىرى ئەمالار يېزىقىنى بىلمىسىمۇ، بۇ ئۈچ قېرىنداشقا ئەمالار يېزىقىنى ئوقۇشنى ۋە يېزىشنى ئۆگىتىش ئۈچۈن مەقسەت قويدى. بۇ ئەر-ئايال كۇتۇپخانىغا بېرىپ، ئەمالار يېزىقىنى ئۆگىتىش توغرۇلۇق مەلۇماتلارنى ئىزدەپ ئوقۇدى.
مارسېلو يىغىلىشتا جاۋاب بېرىۋاتىدۇ
بىرنەچچە ئايدىن كېيىن، يومارا، مارسېلو ۋە ئايۋېر ئەمالار يېزىقىنى ئوقۇشنى ئۆگىنىۋالدى. شۇنىڭ بىلەن، ئۇلار روھىي جەھەتتىن ئۆسۈشكە باشلىدى. ھازىر ئۇلارنىڭ ھەممىسى پىدائىي ۋەز ئېيتقۇچى بولۇپ خىزمەت قىلىۋاتىدۇ. مارسېلو ياردەمچى خىزمەتچى. ئۇلار ھەردائىم روھىي ئىشلار بىلەن ئالدىراش. بۇ ئۈچ قېرىندىشىمىزنىڭ قىزغىنلىقى باشقىلارنىڭمۇ قىزغىنلىقىنى ئاشۇرۇۋاتىدۇ.
ئۇلار جامائەتتىكى قېرىنداشلار كۆرسەتكەن مېھىر-مۇھەببىتى ۋە قوللاپ-قۇۋۋەتلىشى ئۈچۈن ئىنتايىن مىننەتدار. يومارا مۇنداق دەيدۇ: «بىرىنچى قېتىم ئۇچراشقاندىن باشلاپ گۇۋاھچىلار بىزگە ھەقىقىي مەسىھ ئەگەشكۈچىلىرىگە تەۋە مېھىر-مۇھەببەتنى كۆرسىتىپ كەلدى». مارسېلو بولسا مۇنداق دېگەن: «بىز بۇ جامائەتتە ياخشى دوستلارنى تاپتۇق. بۇنىڭدىن باشقا، بىز ئۆزئارا قېرىنداشلارغا سۆيگۈ-مۇھەببەت كۆرسىتىدىغان دۇنياۋى ئائىلىنىڭ ئەزاسى بولغانلىقىمىزدىن ئىنتايىن خۇشال!» يومارا ۋە ئۇنىڭ ئىنىلىرى يەر يۈزى جەننەتكە ئايلىنىدىغان كۈننى ئۆز كۆزى بىلەن كۆرۈشكە تەشنا!—زەبۇر 37:10، 11؛ يەشايا 35:5.