19-تەتقىق ماقالىسى
يەھۋانىڭ يېڭى دۇنيا ھەققىدىكى ۋەدىسىگە ئىشەنچىمىزنى قانداق كۈچەيتەلەيمىز؟
«[يەھۋا] بىر نېمە دېسە، ئۇنى قىلماي قويماس».—سانلار 23:19.
54-ناخشا ئىماندا چىڭ تۇرايلى!
بۇ ماقالىدەa
1، 2. يېڭى دۇنيانى ساقلاۋاتقىنىمىزدا چوقۇم نېمە قىلىشىمىز كېرەك؟
يەھۋانىڭ بۇ دۇنيانىڭ ئورنىغا، ئادىل يېڭى دۇنيانى ئالماشتۇرىدىغانلىقى ھەققىدە بەرگەن ۋەدىسى ئۈچۈن ئىنتايىن مىننەتدارمىز (2-پېتر. 3:13). گەرچە ۋەدە قىلىنغان يېڭى دۇنيانىڭ قاچان رېئاللىققا ئايلىنىدىغانلىقىنى بىلمىسەكمۇ، بۇ دۇنيادا يۈز بېرىۋاتقان ئىشلارنى كۆرگىنىمىزدە، ئاشۇ كۈننىڭ پات-يېقىندا كېلىدىغانلىقىنى بىلەلەيمىز.—مەتتا 24:32–34، 36؛ ئەلچى. 1:7.
2 شۇنىڭ بىلەن بىر ۋاقىتتا، مەيلى قانچە ئۇزۇن ۋاقىت ھەقىقەتتە بولايلى، ھەممىمىز بۇ ۋەدىگە بولغان ئىشەنچىمىزنى كۈچەيتىشىمىز كېرەك. نېمە ئۈچۈن؟ چۈنكى، كۈچلۈك ئىمان-ئېتىقادمۇ ئاجىزلاپ كېتىدۇ. ئەمەلىيەتتە، ئەلچى پاۋلۇس ئىشەنچنىڭ ئاجىزلىقىنى بىزنى «ئاسانلا چىرمىۋالىدىغان گۇناھ» دەپ ئاتىغان (ئىبرانىي. 12:1). ئېتىقادىمىزنىڭ ئاجىزلاپ كېتىشىنىڭ ئالدىنى ئېلىش ئۈچۈن يېڭى دۇنيانىڭ پات-يېقىندا رېئاللىققا ئايلىنىدىغانلىقىنى ئىسپاتلايدىغان دەلىللەر ھەققىدە قايتا-قايتا چوڭقۇر ئويلىنىپ تۇرۇشىمىز كېرەك.—ئىبرانىي. 12:1.
3. بۇ ماقالىدە نېمىلەرنى مۇھاكىمە قىلىمىز؟
3 بۇ ماقالىدە، يەھۋانىڭ يېڭى دۇنيا ھەققىدە بەرگەن ۋەدىسىگە بولغان ئىشەنچىمىزنى كۈچەيتىدىغان ئۈچ ئۇسۇل ئۈستىدە توختىلىمىز. (1) تۆلەم ئۈستىدە چوڭقۇر ئويلىنىش. (2) يەھۋانىڭ كۈچ-قۇدرىتى ھەققىدە چوڭقۇر ئويلىنىش. (3) روھىي ئىش-پائالىيەتلەر بىلەن مەشغۇل بولۇشقا ۋاقىت چىقىرىش. ئاندىن كېيىن، يەھۋانىڭ ھاباققۇققا قىلغان سۆزى بۈگۈنكى كۈندە ئىمان-ئېتىقادىمىزنى قانداق كۈچەيتەلەيدىغانلىقىنى مۇھاكىمە قىلىمىز. ئالدى بىلەن، ھازىر دۇچ كېلىشىمىز مۇمكىن بولغان بەزى ۋەزىيەتلەر ئۈستىدە ئويلىنىپ كۆرەيلى، شۇلار كېلەچەكتىكى يېڭى دۇنيا توغرىسىدىكى ۋەدىگە كۈچلۈك ئىشەنچ قىلىشىمىزنى تەلەپ قىلىدۇ.
كۈچلۈك ئىشەنچ بولۇشىنى تەلەپ قىلىدىغان ۋەزىيەتلەر
4. قانداق قارارلارنى چىقىرىش كۈچلۈك ئىشەنچنىڭ بولۇشىنى تەلەپ قىلىدۇ؟
4 ھەر كۈنى بىز كۈچلۈك ئىشەنچنى تەلەپ قىلىدىغان تۈرلۈك قارارلارنى چىقىرىمىز. مەسىلەن، كىملەر بىلەن دوست بولۇش، كۆڭۈل ئېچىش، بىلىم ئېلىش، نىكاھ ۋە پەرزەنتلىك بولۇش ۋە ئىش ئورنىنى تاللاش قاتارلىق تۈرلۈك ساھەدە قارارلارنى چىقىرىمىز. ئۆز-ئۆزىمىزدىن: «قارارىم، بۇ دۇنيا تۈزۈلمىسى ۋاقىتلىق ئىكەنلىكىگە ۋە پات-ئارىدا ئۇنىڭ ئورنىنى خۇدانىڭ يېڭى دۇنياسى ئالىدىغانلىقىغا ئىشىنىدىغانلىقىمنى كۆرسىتەمدۇ؟ ياكى قارارىم، ئۆلۈم بىلەن ھەممە نەرسە ئاخىرلىشىدۇ، دەپ ياشايدىغان كىشىلەرنىڭ تەسىرىگە ئۇچرىغانمۇ؟» (مەتتا 6:19، 20؛ لۇقا 12:16–21) ئەگەر يېڭى دۇنيانىڭ پات-يېقىندا كېلىدىغانلىقىغا ئىشەنچىمىزنى كۈچەيتسەك، ئەڭ ياخشى قارارلارنى چىقىرىمىز.
5، 6. سىناقلارغا بەرداشلىق بەرگىنىمىزدە، نېمە ئۈچۈن كۈچلۈك ئىمانغا مۇھتاج بولىمىز؟ مىسال كەلتۈرۈڭ.
5 بىز يەنە كۈچلۈك ئىمان-ئېتىقادنى تەلەپ قىلىدىغان سىناقلارغا دۇچ كېلىمىز. بەلكىم، بىز زىيانكەشلىككە، سوزۇلما خاراكتېرلىك كېسەللىكلەرگە ياكى چۈشكۈنلۈككە چۈشۈرىدىغان باشقا ئىشلارغا دۇچ كېلىمىز. دەسلەپتە، سىناققا بەرداشلىق بېرەلەيدىغاندەك ھېس قىلىشىمىز مۇمكىن. ئەگەر ۋاقىت ئۇزۇنغا سوزۇلۇپ كەتسە، بەرداشلىق بېرىش ۋە يەھۋاغا خۇشاللىق بىلەن خىزمەت قىلىشنى داۋاملاشتۇرۇش ئۈچۈن كۈچلۈك ئىشەنچكە مۇھتاج بولىمىز.—رىملىقلار 12:12؛ 1-پېتر. 1:6، 7.
6 ئۇزۇنغا سوزۇلغان سىناقتا، يەھۋانىڭ ۋەدە قىلغان يېڭى دۇنياسى ھەرگىز كەلمەيدىغاندەك ھېس قىلىشىمىز مۇمكىن. ئۇ ئىمان-ئېتىقادىمىزنىڭ ئاجىزلىقىنى بىلدۈرەمدۇ؟ شۇنداق بولۇشى ناتايىن! بىر مىسالنى كۆرۈپ باقايلى. قىشنىڭ قاتتىق سوغىقى بولۇۋاتقاندا، بەلكىم ياز پەسلى ھېچقاچان كەلمەيدىغاندەك ھېس قىلىمىز. ئەمما، ياز پەسلى كېلىدۇ. خۇددى شۇنىڭغا ئوخشاش، قاتتىق ئۈمىدسىزلەنگىنىمىزدە، يېڭى دۇنيا ھەرگىز كەلمەيدىغاندەك ھېس قىلىشىمىز مۇمكىن. ئەگەر ئىمانىمىز كۈچلۈك بولسا، خۇدانىڭ ۋەدىلىرىنىڭ ئەمەلگە ئاشىدىغانلىقىنى بىلىمىز (زەبۇر 94:3، 14، 15؛ ئىبرانىي. 6:17–19). بىز شۇنداق كۈچلۈك ئىشەنچ بىلەن، يەھۋاغا خىزمەت قىلىشنى ھاياتىمىزدا داۋاملىق بىرىنچى ئورۇنغا قويالايمىز.
7. قانداق گۇمانىي كۆز قاراشتىن ئۆزىمىزنى قەتئىي ساقلىشىمىز لازىم؟
7 ۋەز خىزمىتىدىمۇ كۈچلۈك ئىشەنچكە مۇھتاج بولىمىز. نۇرغۇن كىشىلەر خۇدانىڭ يېڭى دۇنياسى توغرىسىدىكى «خۇش خەۋەر»نى ئەمەلگە ئاشمايدىغان خام خىيالدەك ھېس قىلىدۇ (مەتتا 24:14؛ ھەزەك. 33:32). بىز كىشىلەرنىڭ شۇنداق كۆز قارىشىنىڭ تەسىرىگە ئۇچراشتىن ۋە يەھۋانىڭ ئۆگەتكەنلىرىدىن گۇمان قىلىشتىن قەتئىي ساقلىنىش ئۈچۈن، چوقۇم ئىمان-ئېتىقادىمىزنى داۋاملىق كۈچەيتىشىمىز لازىم. مۇنداق قىلىشنىڭ ئۈچ ئۇسۇلنى كۆرۈپ باقايلى.
تۆلەم ھەققىدە چوڭقۇر ئويلىنىش
8، 9. تۆلەم ئۈستىدە چوڭقۇر ئويلىنىش ئىمان-ئېتىقادىمىزنى قانداق كۈچلەندۈرەلەيدۇ؟
8 ئىمان-ئېتىقادىمىزنى كۈچەيتىشنىڭ بىر ئۇسۇلى — تۆلەم ئۈستىدە چوڭقۇر ئويلىنىش. تۆلەم بىزنى خۇدانىڭ ۋەدىلىرىنىڭ ئەمەلگە ئاشىدىغانلىقىغا ئىشەندۈرىدۇ. يەھۋانىڭ قانچىلىك قۇربان بەرگەنلىكى ھەققىدە ئەستايىدىل ئويلانغىنىمىزدا، ياراتقۇچىمىزنىڭ گۈزەل بىر دۇنيادا مەڭگۈ ھاياتلىق ۋەدىسىنىڭ چوقۇم ئەمەلگە ئاشىدىغانلىقىغا بولغان ئىشەنچىمىزنى كۈچەيتىمىز. نېمە ئۈچۈن شۇنداق دېيەلەيمىز؟
9 ئۇنداقتا، تۆلەم نېمىنى ئۆز ئىچىگە ئالغان؟ يەھۋا ئۆزىنىڭ ئەڭ يېقىن سىردىشى بولغان سۆيۈملۈك تۇنجى ئوغلىنى ئاسماندىن مۇكەممەل ئىنسان سۈپىتىدە تۇغۇلۇشقا ئەۋەتكەن. ئەيسا يەر يۈزىدە بولغىنىدا، ھەر تۈرلۈك قىيىنچىلىقلارغا بەرداشلىق بەرگەن. كېيىن، ئۇ ئازاب-ئوقۇبەت چېكىپ، ۋەھشىيلىك بىلەن ئۆلتۈرۈلگەن. يەھۋا ئىنتايىن زور بەدەل تۆلىگەن! ئەگەر يەھۋانىڭ مەقسىتى گۈزەل بىر دۇنيادا بىزنى پەقەت قىسقا ھاياتقا ئېرىشتۈرۈش بولسا، ئۇ سۆيۈملۈك ئوغلىنىڭ شۇنچە ئازاب-ئوقۇبەت چېكىپ، ئۆلۈپ كېتىشىگە يول قويمىغان بولاتتى (يۇھاننا 3:16؛ 1-پېتر. 1:18، 19). يەھۋا شۇنچە ئېغىر بەدەل تۆلىگەن ئىكەن، چوقۇم بىزنى يېڭى دۇنيادا مەڭگۈلۈك ھاياتقا ئېرىشتۈرىدۇ.
يەھۋانىڭ كۈچ-قۇدرىتى ھەققىدە چوڭقۇر ئويلىنىش
10. ئەفەسلىكلەر 3:20-ئايەتكە ئاساسلانغاندا، يەھۋا نېمە ئىش قىلىشقا قادىر؟
10 ئىمان-ئېتىقادىمىزنى كۈچەيتىشنىڭ ئىككىنچى ئۇسۇلى — ياراتقۇچى يەھۋانىڭ كۈچ-قۇدرىتى ھەققىدە چوڭقۇر ئويلىنىش. ئۇنىڭ پۈتۈن ۋەدىلىرىنى ئەمەلگە ئاشۇرۇش كۈچ-قۇدرىتى بار. بەلكىم، يېڭى دۇنيادا مەڭگۈ ياشاش ئىنسانلار ئۈچۈن ئەمەلگە ئاشمايدىغان ۋەدىدەك بىلىنىدۇ. ئەمما، ھەممىگە قادىر خۇدايىمىز يەھۋا ھەر دائىم ئىنسانلارنىڭ قولىدىن كەلمەيدىغان ئىشلارنى ۋەدە قىلىدۇ ۋە شۇ ۋەدىلىرىنى چوقۇم ئەمەلگە ئاشۇرىدۇ (ئايۇپ 42:2؛ ماركۇس 10:27). شۇڭا، ئۇ ئاجايىپ ئىشلار توغرۇلۇق ۋەدىلەرنى بەرگەندە، بۇنىڭدىن ھەرگىز ھەيران قالمايمىز.—ئەفەسلىكلەر 3:20-نى ئوقۇڭ.
11. خۇدانىڭ ئاجايىپ ۋەدىلىرىدىن بىرىنى مىسال كەلتۈرۈڭ. («بەزى ئاجايىپ ۋەدىلەر ئەمەلگە ئاشتى» ناملىق رامكىغا قاراڭ)
11 قارىماققا مۇمكىن بولمايدىغان بەزى ئىشلار توغرۇلۇق، يەھۋا ئۆتمۈشتە ئۆز خەلقىگە ۋەدە بەرگەن. شۇ ئىشلار ھەققىدە ئويلىنىپ كۆرۈڭ. ئۇ ئىبراھىم بىلەن سارانىڭ قېرىغاندا بىر ئوغۇللۇق بولىدىغانلىقىنى ئېيتقان (يارىت. 17:15–17). ئۇ يەنە ئىبراھىمغا قانان زېمىننى ئۇنىڭ ئەۋلادلىرىغا بېرىدىغانلىقىنى ۋەدە قىلغان. ئىبراھىمنىڭ ئەۋلادلىرى، يەنى ئىسرائىللار، مىسىردا ئۇزۇن يىللار قۇل بولغاندا، بۇ ۋەدىلەر ھەرگىز ئەمەلگە ئاشمايدىغاندەك كۆرۈنگەن. كېيىن، بىرىنچى ئەسىردە يەھۋا ياشىنىپ قالغان ئېلىزابېتنىڭ بالىلىق بولىدىغانلىقىنى خەۋەر قىلغان. ئۇ ئۆز ئوغلىنى مەريەم ئىسىملىك توي قىلمىغان قىزنىڭ تۇغىدىغانلىقىنى ئېيتقان. شۇنىڭ بىلەن، يەھۋا نەچچە مىڭ يىل بۇرۇن ئېرەم بېغىدا ۋەدە قىلغان يەنە بىر بېشارەت ئەمەلگە ئاشقان.—يارىت. 3:15.
12. يەشۇئا 23:14 ۋە يەشايا 55:10، 11-ئايەتلەر، بىزنى خۇدانىڭ كۈچ-قۇدرىتى ھەققىدە نېمىگە ئىشەندۈرىدۇ؟
12 يەھۋانىڭ بارلىق ۋەدىلىرى ۋە ئاشۇ ۋەدىلەرنى قانداق ئەمەلگە ئاشۇرغانلىقى ھەققىدە ئويلانغىنىمىزدا، ئۇنىڭ ئاجايىپ كۈچ-قۇدرىتى بارلىقىنى چۈشىنىمىز ۋە يېڭى دۇنيا توغرۇلۇق بەرگەن ۋەدىسىگە بولغان ئىشەنچىمىز تېخىمۇ كۈچىيىدۇ (يەشۇئا 23:14؛ يەشايا 55:10، 11-نى ئوقۇڭ). باشقىلارنىڭ ۋەدە قىلىنغان يېڭى دۇنيا بىر چۈش ياكى ئەپسانىۋى-رىۋايەت ئەمەسلىكىنى چۈشىنىشى ئۈچۈن ياردەم بېرىشكە ئۆزىمىزنى ياخشىراق تەييارلىيالايمىز. يەھۋا ئۆزى يېڭى ئاسمان ۋە يېڭى يەر ھەققىدە شۇنداق دېگەن: «بۇ سۆزلەر ئىشەنچىلىك ۋە ھەقتۇر».—ۋەھىي. 21:1، 5.
روھىي ئىش-پائالىيەت بىلەن مەشغۇل بولۇڭ
جامائەت ئىبادەت يىغىلىشلىرى
بۇ روھىي ئىش-پائالىيەتلەرنىڭ ھەر بىرى ئىمان-ئېتىقادىڭىزنى قانداق كۈچەيتىدۇ؟ (13-ئابزاسقا قاراڭ)
13. جامائەت يىغىلىشلىرى ئىمان-ئېتىقادىمىزنى قانداق كۈچەيتەلەيدۇ؟ چۈشەندۈرۈڭ.
13 ئىمان-ئېتىقادىمىزنى كۈچەيتىشنىڭ ئۈچىنچى ئۇسۇلى — روھىي ئىشلار بىلەن مەشغۇل بولۇشقا ۋاقىت چىقىرىش. مەسىلەن، جامائەت ئىبادەت يىغىلىشلىرىدىن قانداق پايدىلىق نەرسىلەرنى ئۆگىنەلەيدىغانلىقىمىزنى كۆرۈپ باقايلى. ھەر خىل شەكىلدىكى تولۇق ۋاقىتلىق خىزمەت بىلەن نەچچە ئون يىل مەشغۇل بولغان ئاننا ئىسىملىك قېرىنداش مۇنداق دەيدۇ: «ئىبادەت يىغىلىشلىرى ئىمان-ئېتىقادىمنى كۈچلۈك ساقلاشقا ياردەم بېرىدۇ، ھەتتا نۇتۇق ئېيتقۇچىنىڭ تەلىم بېرىش قابىلىيىتى چەكلىك بولسۇن، ياكى يېڭى بىر نەرسىنى سۆزلىمىگەن بولسۇن، مەن دائىم مېنى مۇقەددەس كىتابتىكى ھەقىقەتنى ياخشىراق چۈشىنىشكە يېتەكلەيدىغان ۋە ئىمان-ئېتىقادىمنى كۈچەيتىدىغان بەزى نەرسىنى ئاڭلايمەنb». شەك-شۈبھىسىزكى، يىغىلىشلاردا قېرىنداشلارنىڭ بەرگەن جاۋابلىرىنى ئاڭلىغاندا، ئىمان-ئېتىقادىمىزنى كۈچەيتەلەيمىز.—رىملىقلار 1:11، 12؛ 10:17.
ۋەز خىزمىتى
بۇ روھىي ئىش-پائالىيەتلەرنىڭ ھەر بىرى ئىمان-ئېتىقادىڭىزنى قانداق كۈچەيتىدۇ؟ (14-ئابزاسقا قاراڭ)
14. ۋەز خىزمىتى ئىمان-ئېتىقادىمىزنى قانداق كۈچەيتىدۇ؟
14 ۋەز خـىزمـىتـىگە قاتـناشـقـانـدىمـۇ، ئىمان-ئېتىقادىمىزنى كۈچەيتىمىز (ئىبرانىي. 10:23). يەھۋاغا 70 يىلدىن كۆپرەك خىزمەت قىلغان باربارا ئىسىملىك قېرىنداش مۇنداق دەيدۇ: «مەن ھەر دائىم ۋەز خىزمىتىنىڭ ئىمان-ئېتىقادنى كۈچەيتىدىغانلىقىنى بايقىدىم. باشقىلارغا يەھۋانىڭ ئاجايىپ ۋەدىلىرى ھەققىدە كۆپرەك ئېيتقانسېرى، ئىمان-ئېتىقادىم تېخىمۇ كۈچلۈك، مۇستەھكەم بولدى».
شەخسىي تەتقىق ئۆگىنىشى
بۇ روھىي ئىش-پائالىيەتلەرنىڭ ھەر بىرى ئىمان-ئېتىقادىڭىزنى قانداق كۈچەيتىدۇ؟ (15-ئابزاسقا قاراڭ)
15. شەخسىي تەتقىق ئۆگىنىشى ئىمان-ئېتىقادىمىزنى قانداق كۈچەيتىدۇ؟ (رەسىملەرگە ھەم قاراڭ)
15 ئىمان-ئېتىقادىمىزنى كۈچەيتىشنىڭ يەنە بىر ئۇسۇلى — شەخسىي تەتقىق ئۆگىنىشى. ۋاقىت جەدۋىلى تۈزۈپ، شەخسىي ئۆگىنىش قىلىشنىڭ پايدىسىنى كۆرگەن سۇزان ئىسىملىك قېرىنداش مۇنداق دەيدۇ: «يەكشەنبە كۈنى كېلىدىغان ھەپتىسى تەتقىق قىلىنىدىغان ‹كۈزىتىش مۇنارى› قامالىسىنى ئۆگىنىمەن. دۈشەنبە ۋە سەيشەنبە كۈنى ھەپتە ئوتتۇرىسىدىكى يىغىلىشقا تەييارلىق قىلىمەن. قالغان كۈنلەردە شەخسىي تەتقىق ئۆگۈنۈشۈمنى داۋاملاشتۇرىمەن». سۇزان شەخسىي تەتقىق ئۆگىنىشنى پىلان بويىچە داۋاملاشتۇرغاچ، ئىمان-ئېتىقادى ئۈزلۈكسىز كۈچلەنگەن. يەھۋا گۇۋاھچىلىرىنىڭ مەركىزىي باش ئىدارىسىدە نەچچە ئون يىل خىزمەت قىلغان ئىرېن ئىسىملىك قېرىنداش مۇقەددەس كىتابتىكى بېشارەتلەرنىڭ ئىمان-ئېتىقادىنى كۈچەيتىدىغانلىقىنى ئېيتقان: «يەھۋانىڭ بېشارەتلەرنى ئەڭ ئىنچىكە تەپسىلاتلىرىغىچە ئەمەلگە ئاشۇرغانلىقىدىن ھەيران قالىمەنc».
ئۇ ئەمەلگە ئاشماي قالمايدۇ
16. نېمە ئۈچۈن يەھۋانىڭ ئېيتقان سۆزلىرى بۈگۈنكى كۈندە بىز ئۈچۈنمۇ پايدىلىق؟ (ئىبرانىيلار 10:36، 37)
16 يەھۋانىڭ بەزى خىزمەتچىلىرى بۇ دۇنيانىڭ ئاخىرلىشىش ۋاقتىنى ئۇزۇندىن بۇيان كۈتىۋاتىدۇ. ئىنسان نۇقتىئىنەزىرى بىلەن قارىغاندا، خۇدانىڭ ۋەدىسىنىڭ ئەمەلگە ئېشىشى كېچىكتۈرۈلگەندەك كۆرۈنىدۇ. بىراق، يەھۋا ئۆز خىزمەتچىلىرىنىڭ قانداق ھېس-تۇيغۇدا بولۇۋاتقانلىقىنى ئېنىق بىلىدۇ. ئەمەلىيەتتە، ئۇ ھاباققۇق پەيغەمبەرگە مۇنداق دېگەن: «چۈنكى، بۇ ۋەھىينىڭ ئەمەلگە ئېشىشى ئۈچۈن بەلگىلەنگەن ۋاقتى بار، ئەمەلگە ئېشىش ۋاقتى تېز كەلمەكتە ۋە يالغان بولۇپ چىقمايدۇ. ھەتتا، كېچىكىپ كەتكەندەك كۆرۈنسىمۇ، تەقەززالىق بىلەن ئۇنى كۈتكىن، چۈنكى ئۇ مۇتلەق ئەمەلگە ئاشىدۇ، كېچىپ قالمايدۇ!» (ھاباق. 2:3) خۇدانىڭ بۇ سۆزلىرى پەقەت ھاباققۇق پەيغەمبەرگە تەسەللى بەرگەنمۇ؟ ياكى ئۇنىڭ سۆزلىرى بۈگۈنكى كۈندە بىز ئۈچۈن ھەم پايدىلىقمۇ؟ يەھۋانىڭ كۆرسەتمىسى بىلەن، ئەلچى پاۋلۇس شۇ سۆزلەر ئارقىلىق يېڭى دۇنيانى تەشنالىق بىلەن كۈتۈۋاتقان بارلىق مەسىھ ئەگەشكۈچىلىرىگە ئىلھام-مەدەت بەرگەن (ئىبرانىيلار 10:36، 37-نى ئوقۇڭ). شۇنىڭغا ئىشىنەلەيمىزكى، يەھۋانىڭ بىزنى قۇتقۇزۇش ۋەدىسى ئەمەلگە ئاشىدىغان ۋاقىت كېچىكىپ كەتكەندەك كۆرۈنسىمۇ، «ئۇ مۇتلەق ئەمەلگە ئاشىدۇ. ئۇ كېچىپ قالمايدۇ!»
17. بىر قېرىنداش يەھۋانىڭ ھاباققۇققا بەرگەن نەسىھىتىگە قانداق قۇلاق سالغان؟
17 يەھۋانىڭ كۆپلىگەن خىزمەتچىلىرى نۇرغۇن يىللاردىن بۇيان، «ئۇنى كۈتكىن» دېگەن نەسىھەت سۆزىگە قۇلاق سېلىپ كېلىۋاتىدۇ. مەسىلەن، لۇئىز ئىسىملىك قېرىنداش 1939-يىلىدىن باشلاپ يەھۋاغا خىزمەت قىلغان. ئۇ مۇنداق دەيدۇ: «مەن ئۇ ۋاقىتتا تولۇق ئوتتۇرا مەكتەپنى پۈتتۈرۈشتىن ئاۋۋال ئارماگېدون كېلىدۇ، دەپ ئويلىغان. ئەمما، ئۇنداق بولمىدى. نۇرغۇن يىللاردىن بۇيان، مەن مۇقەددەس كىتابتىكى يەھۋانىڭ ۋەدىلىرىنى ئەمەلگە ئاشۇرۇشىنى كۈتكەن كىشىلەر ھەققىدىكى ئۈزۈندىلەرنى ئوقۇشنىڭ پايدىلىق ئىكەنلىكىنى بايقىدىم. مەسىلەن، نۇھ، ئىبراھىم، يۈسۈپ ۋە باشقىلارنىڭ يەھۋا ۋەدە قىلغان بەرىكەتلەرگە ئېرىشىشتىن بۇرۇن، ئۇزۇن ۋاقىت كۈتكەنلىكىنى ئوقۇش ماڭا ياردەم بەردى. شۇنىڭغا ئىشىنىپ كېتىۋاتىمەنكى، ئەمەلگە ئاشۇرۇلىدىغان ۋەدىلەر مەن ۋە باشقىلارنىڭ يېڭى دۇنيانىڭ ئىنتايىن يېقىن كېلىپ قالغانلىقىغا ئىشىنىشىمىزگە ياردەم بەرمەكتە». يەھۋاغا ئۇزۇندىن بۇيان خىزمەت قىلىۋاتقان باشقا نۇرغۇنلىغان گۇۋاھچىلارمۇ بۇ سۆزلەرگە قوشۇلىدۇ.
18. كائىناتتىكى مەۋجۇداتلارنى كۈزىتىش كەلگۈسى يېڭى دۇنياغا بولغان ئىشەنچىمىزنى قانداق كۈچەيتەلەيدۇ؟
18 شۇنداق، يېڭى دۇنيا تېخى كەلمىدى! ئەمما، كۆزىڭىز كۆرگەن بەزى نەرسىلەر، يەنى يۇلتۇزلار، دەل-دەرەخلەر، ھايۋاناتلار ۋە سىزگە ئوخشاش ئىنسانلار ھەققىدە ئويلاپ كۆرۈڭ. گەرچە ئىلگىرى ئۇلار مەۋجۇت ئەمەس بولسىمۇ، ھازىر ئۇلارنىڭ مەۋجۇتلىقىدىن ھېچكىم ئەسلا گۇمانلانمايدۇ. چۈنكى، ئۇلارنى يەھۋا ياراتقان (يارىت. 1:1، 26، 27). خۇدايىمىز يېڭى بىر دۇنيانى بەرپا قىلىشنى ئىرادە قىلغان ۋە ئۇ چوقۇم بۇ ئىرادىسىنى ئەمەلگە ئاشۇرىدۇ. يېڭى دۇنيادا كىشىلەر ساغلام تەن بىلەن مەڭگۈ ھاياتتىن ھۇزۇر ئالىدۇ. خۇدا بەلگۈلىگەن ۋاقىت-سائەت كەلگەندە، خۇددى كائىناتتىكى ھەممە نەرسە كۆز ئالدىمىزدا ھەقىقىي بولغاندەك، يېڭى دۇنيامۇ ھەقىقىي بولىدۇ.—يەشايا 65:17؛ ۋەھىي. 21:3، 4.
19. ئىمان-ئېتىقادىڭىزنى قانداق كۈچەيتەلەيسىز؟
19 ھازىرنىڭ ئۆزىدە ئىمان-ئېتىقادىڭىزنى كۈچەيتىش ئۈچۈن قولىڭىزدىن كەلگەن ئىشلارنىڭ ھەممىسىنى قىلىڭ. ھەر دائىم تۆلەمگە بولغان مىننەتدارلىقىڭىزنى بىلدۈرۈڭ. يەھۋانىڭ قۇدرىتى ھەققىدە چوڭقۇر ئويلىنىڭ. ھەر كۈنى روھىي ئىشلار بىلەن مەشغۇل بولۇڭ. شۇنداق قىلسىڭىز، «ئىمان ۋە سەۋر-تاقەت بىلەن ۋەدىلەرگە ۋارىس» بولىدىغانلارنىڭ ئارىسىدا بولالايسىز.—ئىبرانىي. 6:11، 12؛ رىملىقلار 5:5.
55-ناخشا سادىقلار كۆرەر مەڭگۈلۈك ھاياتنى
a مۇقەددەس كىتابتىكى يېڭى دۇنيا توغرىسىدىكى ۋەدىگە، بۈگۈنكى كۈندە نۇرغۇن كىشىلەر ئىشەنمەيدۇ. ئۇلار ئۇنى پەقەت ئەمەلگە ئاشمايدىغان چۈش ياكى ئەپسانە-رىۋايەت دەپ ئويلايدۇ. بىراق، بىز يەھۋانىڭ بارلىق ۋەدىلىرىنىڭ ئەمەلگە ئاشىدىغانلىقىغا ئىشىنىمىز. شۇنداقتىمۇ، ئىمان-ئېتىقادىمىزنى كۈچلۈك ساقلاپ قېلىش ئۈچۈن ئۇنى داۋاملىق تۈردە كۈچەيتىشىمىز زۆرۈر. بۇ ماقالىدە ئىمان-ئېتىقادىمىزنى قانداق كۈچەيتەلەيدىغانلىقىمىزنى كۆرىمىز.
b بەزى ئىسىملار ئۆزگەرتىلگەن.
c مۇقەددەس كىتابتىكى بېشارەتلەر ھەققىدىكى نۇرغۇن ماقالىلەرنى «كۈزىتىش مۇنارى ماتېرىياللار كۆرسەتكۈچى»دىكى «بېشارەت» دېگەن ماۋزۇ ئاستىدىن تېپىشقا بولىدۇ. مەسىلەن، «كۈزىتىش مۇنارى»، 2008-يىل، 1-يانۋار سانىدىن «يەھۋا خۇدانىڭ بېشارەتلىرى قانداق ئەمەلگە ئاشىدۇ؟» (باشقا تىلدا) ناملىق ماقالىنى ئوقۇڭ.