يەھۋا گۇۋاھچىلىرى كونا ئەھدىگە ئىشىنەمدۇ؟
ھەئە. «پۈتۈن مۇقەددەس يازمىلار خۇدانىڭ كۆرسەتمىسى بويىچە يېزىلغان ... پايدىلىقتۇر»، يەھۋا گۇۋاھچىلىرى بۇنىڭغا ئىكەنلىكىگە ئىشىنىدۇ (تىموتىيغا 2-خەت 3:16). بۇ يازمىلارغا ئادەتتە كونا ئەھدە (تەۋرات، زەبۇر ۋە پەيغەمبەرلەر كىتابى) ۋە يېڭى ئەھدە (ئىنجىل) دەپ ئاتىلىدىغان كىتابلار كىرىدۇ. مۇقەددەس كىتابنىڭ بۇقىسىملىرىنى ئىبرانىي يازمىلار ۋە گرېك يازمىلار، دەپ ئاتايمىز. شۇنداق قىلىپ، بىز مۇقەددەس كىتابنىڭ بەزى قىسىملىرىنىڭ ۋاقتى ئۆتكەن ياكى ئانچە كېرىكى يوق، دېگەن تەسىراتنى بېرىشتىن قاچىمىز.
نېمە ئۈچۈن ئەيسانىڭ ئەگەشكۈچىلىرى ھەم كونا ئەھدىگە، ھەم يېڭى ئەھدىگە مۇھتاج؟
يەھۋا خۇدا ئەلچى پاۋلۇسقا ئىلاھىي كۆرسەتمە بېرىپ، مەسىھ ئەگەشكۈچىلىرىگە مونۇ سۆزلەرنى يازدۇرغان: «مۇقەددەس يازمىلاردىكى سۆزلەرنىڭ ھەممىسى بىزگە تەلىم بولسۇن دەپ بۇرۇنلا يېزىپ قالدۇرۇلغان» (رىملىقلارغا 15:4). شۇ سەۋەبتىن، ئىبرانىي يازمىلاردا بىز ئۈچۈن قىممەت-باھالىق مەلۇماتلار يېزىلغان. بۇ يازمىلاردا تارىخىي مەلۇماتلار ھەم پايدىلىق مەسلىھەتلەر بار.
تارىخىي مەلۇماتلار. ئىبرانىي يازمىلاردا ئادەمزاتنىڭ يارىتىلىشى ۋە گۇناھكار بولۇپ قالغانلىقى توغرىسىدا تەپسىلىي ئېيتىلىدۇ. ئەگەر بۇ مەلۇماتلار بولمىغان بولسا، «بىز قانداق پەيدا بولغان؟» ۋە «ئادەملەر نېمە ئۈچۈن ئۆلىدۇ؟»، دېگەنگە ئوخشاش سوئاللارنىڭ جاۋابلىرىنى تاپالمايتۇق (يارىتىلىش 2:7، 17). ئۇنىڭدىن باشقا، ئىبرانىي يازمىلاردا، بىزگە ئوخشاش خۇشال بولغان ۋە قىيىنچىلىقلارغا دۇچ كەلگەن ئادەملەرگە يەھۋا خۇدا قانداق مۇئامىلە قىلغانلىقى يېزىلغان (ياقۇپ 5:17).
پايدىلىق مەسلىھەتلەر. ئىبرانىي يازمىلارنىڭ بىر قىسمى بولغان پەندى-نەسىھەت ھەم ۋەز، دەپ ئاتالغان كىتابلاردا ھېچقاچان ۋاقتى ئۆتۈپ كەتمەيدىغان دانا نەسىھەت سۆزلىرى يېزىلغان. بۇ كىتابلاردا بەختلىك ھايات كەچۈرۈش (پەندى-نەسىھەت 15:17)، ئىشقا تەڭپۇڭ كۆزقاراشتا بولۇش (پەندى-نەسىھەت 10:4؛ ۋەز 4:6) ۋە ياشلار ھاياتىنى تېخىمۇ مەنىلىك ئۆتكۈزۈش ئۈچۈن نېمە قىلالايدىغانلىقى ھەققىدە مەسلىھەتلەر بار (ۋەز 11:9—12:1).
ئۇنىڭدىن باشقا، بىز تەۋراتتىكى مۇسانىڭ قانۇنىنى (مۇقەددەس كىتابنىڭ بىرىنچى بەش كىتابى) تەتقىق قىلىشتىن نۇرغۇن پايدىلىق نەرىسلەرنى ئۆگىنەلەيمىز. گەرچە ئەيسانىڭ ئەگەشكۈچىلىرى مۇسانىڭ قانۇنى بويىچە ياشىمىسىمۇ، بۇ قانۇندىكى قىممەتباھا پرىنسىپلار بەختلىك ھايات كەچۈرۈشكە ياردەم بېرىدۇ (لاۋىيلار 19:18؛ تەكرار قانۇن 6:5—7).