12-دەرس
قانداق قىلىپ خۇداغا يېقىنلىشالايسىز؟
1. خۇدا بارلىق دۇئالارغا قۇلاق سالامدۇ؟
خۇدا بارچە ئەل خەلقىنى دۇئا ئارقىلىق ئۆزىگە يېقىنلىشىشقا چاقىرىدۇ (زەبۇر 65:2). ئەمما، ئۇ بەزى دۇئالارغا قۇلاق سالمايدۇ. مەسىلەن، ئايالىغا ناچار مۇئامىلىدە بولىدىغان ئەرلەرنىڭ دۇئالىرى توسالغۇغا ئۇچرايدۇ (1-پېترۇس 3:7). قەدىمقى زاماندا ئىسرائىللار داۋاملىق يامانلىق قىلغاندا، خۇدا ئۇلارنىڭ دۇئالىرىغا قۇلاق سالمىغان. بىراق، خۇدا ھەتتا ئېغىر گۇناھ ئۆتكۈزگەنلەر توۋا قىلسا، ئۇلارنىڭ دۇئالىرىغا قۇلاق سالىدۇ. ھەقىقەتەن دۇئا قىلىش چوڭ بىر شان-شەرەپ!— يەشايا 1:15؛ 55:7-ئايەتلەرنى ئوقۇڭ.
«خۇدا بارلىق دۇئالارغا قۇلاق سالامدۇ؟» ناملىق فىلىمنى كۆرۈڭ
2. قانداق دۇئا قىلىشىمىز كېرەك؟
دۇئا بولسا ئىبادىتىمىزنىڭ مۇھىم بىر قىسمى، شۇڭا پەقەت ياراتقۇچى يەھۋاغىلا دۇئا قىلىشىمىز لازىم (مەتتا 4:10؛ 6:9). ئەمما، بىز نامۇكەممەل بولغاچ، ئەيسا مەسىھنىڭ ئىسمى بىلەن دۇئا قىلىشىمىز زۆرۈر، چۈنكى ئۇ گۇناھلىرىمىز ئۈچۈن جان پىدا قىلغان (يۇھاننا 14:6). يەھۋا بىزنىڭ دۇئا قىلغاندا، يادلىۋالغان ئوخشاش گەپلەرنى قايتا-قايتا تەكرارلىشىمىزنى ياكى دۇئالار توپلىمىدىن ئوقۇشىمىزنى خالىمايدۇ. ئەكسىچە، چىن قەلبىمىزدىن ئۇنىڭغا دۇئا قىلىشىمىزنى خالايدۇ.— مەتتا 6:7؛ فىلىپىلىكلەر 4:6، 7-ئايەتلەرنى ئوقۇڭ.
ياراتقۇچى ئىگىمىز ھەتتا ئۈنسىز دۇئالارنى ئاڭلىيالايدۇ (1-سامۇئىل 1:12، 13). ئۇ بىزنى ھەرقانداق پەيتلەردە، مەسىلەن سەھەردە ئورنىمىزدىن تۇرغاندا ۋە كەچتە ئۇخلاشقا ياتقاندا، تاماق ۋاقىتلىرىدا ۋە قىيىنچىلىقلارغا دۇچ كەلگەندە دۇئا قىلىشقا چاقىرىدۇ.— زەبۇر 55:22؛ مەتتا 15:36-ئايەتلەرنى ئوقۇڭ.
3. نېمە ئۈچۈن ئېتىقادچىلار يىغىلىپ جەم بولىدۇ؟
خۇداغا يېقىنلىشىش ئاسان ئەمەس، چۈنكى بىز خۇدانىڭ قانۇنلىرىغا ئىتائەت قىلمايدىغان ۋە ئۇنىڭ يەر يۈزىدە ئەمەلگە ئاشۇرىدىغان تىنچ-ئامانلىق ۋەدىسىگە ئىشەنچ قىلمايدىغان كىشىلەر ئارىسىدا ياشاۋاتىمىز (2-تىموتىي 3:1، 4؛ 2-پېترۇس 3:3، 13). شۇڭا، بىز ئۆز-ئارا ئىلھام بېرىدىغان ۋە ئىلھام ئالىدىغان ئېتىقادچىلار يىغىلىشىغا مۇھتاج.— ئىبرانىيلار 10:24، 25-ئايەتلەرنى ئوقۇڭ.
خۇدانى سۆيىدىغان كىشىلەر بىلەن جەم بولۇش خۇداغا يېقىنلىشىشىمىزغا ياردەم بېرىدۇ. يەھۋا گۇۋاھچىلىرىنىڭ يىغىلىشلىرى باشقىلارنىڭ ئىمان-ئېتىقادىدىن ئىلھام ئېلىشنىڭ ئەڭ ياخشى پۇرسىتى بىلەن تەمىنلەيدۇ.— رىملىقلار 1:11، 12-ئايەتلەرنى ئوقۇڭ.
4. قانداق قىلىپ خۇداغا يېقىنلىشالايسىز؟
سىز مۇقەددەس كىتابتىن ئۆگەنگەنلىرىڭىزنى چوڭقۇر ئويلىنىپ تەپەككۇر قىلىش ئارقىلىق يەھۋاغا يېقىنلىشالايسىز. خۇدانىڭ ئىش-ھەرىكەتلىرى، مەسلىھەت ۋە بەرگەن ۋەدىلىرى نېمە ئۆگىتىدىغانلىقىنى ئويلاش؛ دۇئا ۋە چوڭقۇر تەپەككۈر قىلىش ئۇنىڭ مېھر-مۇھەببەت ۋە ئەقىل-پاراسىتىنىڭ تەڭداشسىز ئىكەنلىكىنى چۈشىنىشىمىزگە ياردەم بېرىدۇ.— يەشۇ 1:8؛ زەبۇر 1:1–3-ئايەتلەرنى ئوقۇڭ.
پەقەت خۇداغا ئېتىقاد قىلىپ، ئىشەنچ باغلىغىنىڭىزدىلا، ئۇنىڭغا يېقىنلىشالايسىز. خۇددى ئۆسۈملۈكنىڭ ئۆسۈشى ئوزۇقلۇققا مۇھتاج بولغاندەك، ئىمان-ئېتىقادنىڭ كۈچلۈك بولۇشى بىلىمگە مۇھتاج. شۇنىڭ ئۈچۈن، ھەمىشە ئىشەنچىڭىزنىڭ ئۇل ئاساسى ھەققىدە چوڭقۇر تەپەككۈر قىلىش ئارقىلىق ئېتىقادىڭىزنى مۇستەھكەم قىلالايسىز.— مەتتا 4:4؛ ئىبرانىيلار 11:1، 6-ئايەتلەرنى ئوقۇڭ.
5. خۇداغا يېقىنلىشىش سىزنى قانداق پايدا-مەنپەئەتكە ئېرىشتۈرىدۇ؟
يەھۋانى سۆيگۈچىلەرگە، ئۇ ئۆزى غەمخورلۇق قىلىدۇ. پەرۋەردىگار ئۇلارنىڭ ئىمان-ئېتىقادى ۋە مەڭگۈلۈك ھاياتلىق ئۈمىدىگە بۇزغۇنچىلىق قىلالايدىغان ھەرقانداق نەرسىلەردىن ئۇلارنى ھىمايە قىلىدۇ (زەبۇر 91:1، 2، 7–10). ئۇ بىزنى تەن-ساغلاملىق ۋە شاد-خۇراملىقىمىزغا يامان تەسىرى بولغان ناچار تۇرمۇش ئادەتلىرىدىن خالىي بولۇشقا ئاگاھلاندۇرىدۇ. يەھۋا بىزگە ھايات كەچۈرۈشنىڭ ئەڭ ياخشى ئۇسۇلىنى ئۆگىتىدۇ.— زەبۇر 73:27، 28؛ ياقۇپ 4:4، 8-ئايەتلەرنى ئوقۇڭ.