34-تەتقىق ماقالىسى
50-ناخشا خۇدانىڭ مېھىر-مۇھەببەت ئۈلگىسى
ئاقساقاللار گۇناھكارغا سۆيگۈ-مۇھەببەت ۋە رەھىم-شەپقەتنى قانداق كۆرسىتەلەيدۇ؟
«خۇدانىڭ مېھرىبانلىقى سېنى توۋا قىلىشقا باشلاش ئىكەنلىكىنى بىلمەمسەن؟»—رىملىقلار 2:4.
مەركىزى ئىدىيە
جامائەتتە ئېغىر گۇناھ ئۆتكۈزگەن كىشىلەرگە ئاقساقاللار قانداق ياردەم بېرەلەيدىغانلىقىنى ئۆگىنىمىز.
1. ئېغىر گۇناھ سادىر قىلغان كىشى ئۈچۈن قانداق پۇرسەت بار؟
ئالدىنقى ماقالىدە، كورىنت شەھىرىدىكى جامائەتتە بىرى ئېغىر گۇناھ ئۆتكۈزگەندە، پاۋلۇسنىڭ ئاشۇ مەسىلىنى قانداق ھەل قىلغانلىقىنى كۆرۈپ چىققان ئىدۇق. گۇناھ ئۆتكۈزگەن كىشى توۋا قىلمىغان ۋە ئۇنى جامائەتتىن چىقىرىشقا توغرا كەلگەن ئىدى. بىراق، بۇ ماقالىدىكى ئاساسىي ئايەتتىن شۇنى كۆرۈۋالالايمىزكى، خۇدا ئېغىر گۇناھ سادىر قىلغان كىشىلەرنى توۋا قىلىشقا باشلايدۇ (رىملىقلار 2:4). ئۇنداقتا، يەھۋا ئاقساقاللارنى ئىشلىتىپ، شۇنداق كىشىلەرنىڭ توۋا قىلىشىغا قانداق ياردەم بېرەلەيدۇ؟
2، 3. ئەگەر ئېتىقادچى قېرىندىشىمىزنىڭ ئېغىر گۇناھ قىلغانلىقىنى بىلسەك، نېمە قىلىشىمىز كېرەك ۋە نېمە ئۈچۈن؟
2 ئەگەر ئاقساقاللار بىرىنىڭ ئېغىر گۇناھ ئۆتكۈزگەنلىكىدىن خەۋەردار بولمىسا، ئۇ كىشىگە ياردەم بېرەلمەيدۇ. ئۇنداقتا، بىز بىرىنىڭ ئېغىر گۇناھ ئۆتكۈزگەنلىكىنى، يەنى جامائەتتىن چىقىرىلىشىغا سەۋەب بولىدىغان ئىشنى قىلغانلىقىنى بىلسەك، نېمە قىلىشىمىز كېرەك؟ بىز ئۇنداق كىشىنى بېرىپ، ئاقساقاللاردىن ياردەم سوراشقا دەۋەت قىلىشىمىز كېرەك.—يەشايا 1:18؛ ئەلچى. 20:28؛ 1-پېتر. 5:2.
3 گۇناھ قىلغان قېرىنداش ئاقساقاللار بىلەن سۆزلىشىشنى رەت قىلسىچۇ؟ ئۇنداقتا، بىز ئۆزىمىز ئاقساقاللارغا بېرىپ، نېمە ئىش بولغانلىقىنى ئېيتىشىمىز لازىم. شۇنداق قىلىش ئارقىلىق، بىز ئەمەلىيەتتە گۇناھكار كىشىگە سۆيگۈ-مۇھەببەت كۆرسىتىمىز. شۇندىلا، ئۇ كىشى زۆرۈر ياردەمگە ئېرىشەلەيدۇ. ئەگەر ئۇ توۋا قىلماي، گۇناھ ئۆتكۈزۈپ يۈرۈۋەرسە، ئۇنىڭ يەھۋا بىلەن بولغان دوستلۇقى بۇزۇلىدۇ. ئۇنىڭدىن باشقا، ئۇ جامائەتنىڭ نام-ئابرويىغا داغ تەگكۈزۈشى مۇمكىن. ئەلۋەتتە، ئاقساقاللارنى ئالدىغا بېرىپ، بولغان ئىشنى ئېيتىش ئاسان ئەمەس، ئەمما بىز يەھۋا خۇدانى ۋە ئېغىر گۇناھ ئۆتكۈزۈپ قويغان كىشىنى چىن قەلبىمىزدىن سۆيگەچ، جاسارەت بىلەن شۇنداق قىلىمىز.—زەبۇر 27:14.
ئاقساقاللار ئېغىر گۇناھ ئۆتكۈزگەن كىشىگە قانداق ياردەم بېرىدۇ؟
4. ئاقساقاللار ئېغىر گۇناھ ئۆتكۈزگەن كىشى بىلەن كۆرۈشكەندە، پۈتۈن كۈچى بىلەن نېمە قىلىدۇ؟
4 جامائەتتە مەلۇم بىر قېرىنداش ئېغىر گۇناھ ئۆتكۈزۈپ قويسا، ئاقساقاللار كېڭىشى ئۈچ كىشىنى تاللاپ، بىر ھەيئەت تەشكىللەيدۇa. شۇ ئاقساقاللار كىچىك-پېئىل ۋە كەمتەر بولۇشى كېرەك. گەرچە ئۇلار گۇناھكارنىڭ توۋا قىلىشىغا ياردەم بېرىشكە تىرىشسىمۇ، ئۇلار شۇنى ئەستىن چىقارمايدۇ، يەنى گۇناھكارنى ئۆزىنى ئۆزگەرتىشكە مەجبۇرلىماسلىقى كېرەك (تەكرار. قا 30:19). ئاقساقاللار يەنە ھەربىر گۇناھكار خۇددى پادىشاھ داۋۇتقا ئوخشاش ئۆز گۇناھىغا توۋا قىلمايدىغانلىقىنى چۈشىنىدۇ (2-سام. 12:13). ئۇلارنىڭ بەزىلىرى يەھۋانىڭ نەسىھەت سۆزىگە قۇلاق سالماسلىقى مۇمكىن (يارىت. 4:6–8). مەيلى قانداق بولسۇن، ئاقساقاللارنىڭ مەقسىتى پۈتۈن كۈچى بىلەن گۇناھكار كىشىنى توۋا قىلىشقا باشلاش. ئۇنداقتا، ئاقساقاللار گۇناھكار كىشى بىلەن كۆرۈشكەندە، قايسى پرىنسىپلارنى ئەستىن چىقارماسلىقى كېرەك؟
5. ئاقساقاللار گۇناھكار بىلەن كۆرۈشكەندە، ئۇنىڭغا قانداق مۇئامىلە قىلىشى كېرەك؟ (2-تىموتىي 2:24–26) (رەسىمگە ھەم قاراڭ).
5 ئاقساقاللار گۇناھ ئۆتكۈزگەن كىشىنى ئادىشىپ قالغان قىممەتلىك قويدەك كۆرىدۇ (لۇقا 15:4، 6). شۇڭا، ئاقساقاللار گۇناھكار كىشى بىلەن كۆرۈشكەندە، ئۇنىڭغا قوپال مۇئامىلە قىلمايدۇ، ئەكسىچە مېھرىبانلىق بىلەن مۇئامىلە قىلىدۇ. ئاقساقاللار ئۇ كىشى بىلەن كۆرۈشۈپ، سۆھبەتلىشىشنى پەقەت سوئاللارنى سوراش ۋە دەلىل-ئىسپاتلارغا ئېرىشىش ئۈچۈن دەپ قارىمايدۇ. دەل ئەكسىچە، ئۇلار 2-تىموتىي 2:24–26-ئايەتلەردە (ئوقۇڭ) تىلغا ئېلىنغان، كەمتەر، مۇلايىم ۋە مېھرىبان دېگەن پەزىلەتلەرنى نامايان قىلىپ، گۇناھكار كىشىنىڭ قەلبىگە تەسىر قىلىشقا تىرىشىدۇ.
خۇددى قەدىمقى زاماندىكى پادىچىلارغا ئوخشاش، بۈگۈنكى كۈندە ئاقساقاللار ئادىشىپ قالغان قوينى تېپىش ئۈچۈن قولىدىن كېلىشىچە تىرىشچانلىق كۆرسىتىدۇ (5-ئابزاسقا قاراڭ)
6. ئاقساقاللار گۇناھ ئۆتكۈزگەن كىشى بىلەن كۆرۈشۈشتىن ئاۋۋال ئۆز كۆڭلىدە قانداق تەييار قىلالايدۇ؟ (رىملىقلار 2:4)
6 ئاقساقاللار ئاۋۋال ئۆز كۆڭلىدە تەييارلىق قىلىدۇ. ئۇلار ئەلچى پاۋلۇسنىڭ «خۇدانىڭ مېھرىبانلىقى سېنى توۋا قىلىشقا باشلاش» دېگەن سۆزلىرىنى ئەستە تۇتۇپ، گۇناھ سادىر كىشىگە مۇئامىلە قىلىشتا يەھۋانى ئۈلگە قىلىدۇ (رىملىقلار 2:4-نى ئوقۇڭ). ئاقساقاللار يەنە شۇنى ئەستىن چىقارماسلىقى كېرەككى، ئۇلار ئەيسا مەسىھنىڭ كۆرسەتمىسىگە ئەگىشىدىغان پادىچىلاردۇر (يەشايا 11:3، 4؛ مەتتا 18:18–20). شۇڭلاشقا، گۇناھكار كىشى بىلەن كۆرۈشۈشتىن ئىلگىرى، ھەيئەت ئەزالىرى بولغان ئاقساقاللار ئۆزلىرىنىڭ مەقسىتى گۇناھكار كىشىنى توۋا قىلىشقا باشلاش ئىكەنلىكىنى ئەستە چىقارماسلىق ئۈچۈن، چىن كۆڭلىدىن يەھۋاغا دۇئا قىلىپ ياردەم سورايدۇ. ئۇلار مۇقەددەس كىتاب ۋە ئۇنىڭغا ئاساسەن نەشىر قىلىنغان ماتېرىياللارنى ئوقۇپ تەتقىق قىلىدۇ ۋە ئاشۇ كىشىنى ۋە ئۇنىڭ ۋەزىيىتىنى چۈشىنىش ئۈچۈن ياردەم سوراپ يەھۋاغا دۇئا قىلىدۇ. بۇ ھەيئەت ئاشۇ كىشىنىڭ بۇنداق ۋەزىيەتكە چۈشۈپ قېلىشىغا قانداق ئامىللار سەۋەب بولغانلىقىنى ئېنىقلاش ئۈچۈن، ئۇ ھەققىدە نېمىلەرنى بىلىشى كېرەكلىكى ھەققىدە چوڭقۇر ئويلىنىدۇ.—پەند. نە 20:5.
7، 8. ئاقساقاللار ئېغىر گۇناھ ئۆتكۈزگەن كىشى بىلەن كۆرۈشكەندە، يەھۋانىڭ سەۋر-تاقىتىدىن قانداق ئۈلگە ئالالايدۇ؟
7 ئاقساقاللار يەھۋادىن ئۈلگە ئېلىپ، سەۋر-تاقەتلىك بولىدۇ. ئۇلار يەھۋا خۇدا قەدىمقى زاماندا گۇناھكار كىشىلەرگە قانداق ياردەم بەرگەنلىكىنى ئېسىدە تۇتىدۇ. مەسىلەن، يەھۋا قابىلنىڭ ئەقىلنى ئىشلىتىشىگە سەۋرچانلىق بىلەن ياردەم بەرگەن، ئۇ گۇناھ ئۆتكۈزسە، ئاقىۋىتى قانداق بولىدىغانلىقى ھەققىدە ئاگاھلاندۇرغان ۋە ئىتائەتچان بولسا، قانداق بەرىكەتلەرگە ئېرىشىدىغانلىقىنى ئېيتقان (يارىت. 4:6، 7). ئۇنىڭدىن باشقا، يەھۋا خۇدا پادىشاھ داۋۇتقا نەسىھەت بېرىش ئۈچۈن ناتان پەيغەمبەرنى ئەۋەتكەن. ناتان بىر تەمسىلنى سۆزلەپ، داۋۇتنىڭ قەلبىنى تەسىرلەندۈرگەن (2-سام. 12:1–7). يەھۋا داۋاملىق ئۆز پەيغەمبەرلىرىنى ئەۋەتىپ، قايتا-قايتا ئىسيانكار ئىسرائىل خەلقىگە نەسىھەت بەرگەن (يەرەم. 7:24، 25). يەھۋا ئاشۇ گۇناھقا پاتقان خەلقى توۋا قىلغاندىن كېيىن، ئاندىن ياردەم قولىنى سۇنۇش ئۈچۈن كۈتۈپ تۇرمىغان ئىدى. باشقىچە قىلىپ ئېيتقاندا، ئۇلار گۇناھ قىلىپ يۈرگەندە، يەھۋا تەشەببۇسكارلىق بىلەن ئۇلارنى گۇناھلىرىغا توۋا قىلىشقا دەۋەت قىلغان.
8 ئاقساقاللار ئېغىر گۇناھ ئۆتكۈزگەن كىشىلەرگە ياردەم بەرگەندە، يەھۋانى ئۈلگە قىلىدۇ. 2-تىموتىي 4:2-ئايەت بويىچە، ئاقساقاللار زور سەۋر-تاقەت بىلەن قېرىنداشلارغا چۈشەندۈرۈپ نەسىھەت بېرىشى لازىم. شۇڭا، ئاقساقال ھەردائىم ئۆزىنى تۇتۇۋېلىپ، سەۋرچان بولۇشقا تىرىشىدۇ. شۇنداق بولغاندا، گۇناھكار كىشىنىڭ توغرا ئىش قىلىش ئارزۇ-ئىستىكى كۈچەيتىشكە ياردەم بېرەلەيدۇ. ئەگەر ئاقساقال تېرىككەك بولسا ياكى ئاچچىقلىنىشقا باشلىسا، گۇناھكار نەسىھەتكە قۇلاق سالماسلىقى ياكى توۋا قىلىشنى رەت قىلىشى مۇمكىن.
9، 10. ئاقساقاللار كىشىنىڭ گۇناھ قىلىشىغا سەۋەب بولغان ئامىللار توغرۇلۇق چوڭقۇر ئويلىنىشىغا قانداق ياردەم بېرەلەيدۇ؟
9 ئاقساقاللار ئاشۇ كىشىنىڭ گۇناھ ئۆتكۈزۈشىگە سەۋەب بولغان ئامىللارنى چۈشىنىشكە تىرىشىدۇ. مەسىلەن، ئۇ كىشى مۇقەددەس كىتاب تەتقىق ئۆگىنىشىنى ياكى ۋەز قىلىشقا سەل قاراپ، نەتىجىدە بارا-بارا ئاجىزلىشىپ كەتكەنمۇ؟ ئۇ بارغانسېرى يەھۋاغا ناھايىتى ئاز دۇئا قىلىدىغان بولۇپ قالغانمۇ ياكى دۇئا قىلىشنى توختاتقانمۇ؟ خاتا-ئارزۇ-ھەۋەسلەرگە قارشى كۈرەش قىلىشقا تىرىشمايدىغان بولۇپ قالغانمۇ؟ كىم بىلەن باردى-كەلدى قىلغان؟ قانداق ئويۇن-تاماشىلارنى تاللىغان؟ ئۇنىڭ دوستلىرى ياكى تاللىغان ئويۇن-تاماشىلار ئۇنىڭ ئوي-پىكىرى ۋە ئارزۇ-ئىستەكلىرىگە قانداق تەسىر قىلغان؟ ئۇ ئۆز قارارلىرىنىڭ ۋە ئىش-ھەرىكەتلىرىنىڭ ئاسماندىكى ئاتىسى يەھۋاغا قانداق تەسىر قىلغانلىقىنى چۈشىنەمدۇ؟
10 ئاقساقاللار پەم-پاراسەت بىلەن سوئاللارنى سوراپ، گۇناھكارنىڭ شۇنداق ئېغىر گۇناھ ئۆتكۈزۈشىگە سەۋەب بولغان ئامىللار ھەققىدە ئويلىنىشىغا ياردەم بېرىدۇ. سوئاللارنى سورىغاندا، مېھرىبان ۋە سەۋرچان بولىدۇ ۋە كېرەكسىز تەپسىلاتلارنى سوراشتىن ساقلىنىدۇ (پەند. نە 20:5). ئۇنىڭدىن باشقا، خۇددى ناتان پەيغەمبەر تەمسىل كەلتۈرۈپ پادىشاھ داۋۇتقا ياردەم بەرگەندەك، ئاقساقاللار مىسال ئارقىلىق، گۇناھكار كىشىنىڭ ئۆزى ئۆتكۈزگەن ئېغىر خاتالىقىنى چۈشىنىپ يېتىشىگە ياردەم بېرىشى مۇمكىن. بەلكىم، گۇناھكار بىرىنچى قېتىم ئاقساقاللار بىلەن كۆرۈشكەندە، ئۆز قىلمىشى ئۈچۈن پۇشايمان قىلىشنى باشلىشى، ھەتتا چىن قەلبىدىن توۋا قىلىشى مۇمكىن.
11. ئەيسا مەسىھ گۇناھكارلارغا قانداق مۇئامىلە قىلغان؟
11 ئاقساقاللار ئەيسا مەسىھنى ئۈلگە قىلىشقا تىرىشىدۇ. ئەيسا تىرىلدۈرۈلگەندىن كېيىن، تارسۇسلۇق سائۇلغا ياردەم بېرىش ئۈچۈن مۇنداق سوئال سورىغان: «ئەي سائۇل، سائۇل! ماڭا نېمىشقا زىيانكەشلىك قىلىسەن؟» (ئەلچى. 9:3–6). ئەيسا مەسىھ، «ئىزەبەل» دېگەن خوتۇن ھەققىدە سۆز قىلىپ، مۇنداق دېگەن: «مەن ئۇنىڭ توۋا قىلىشى ئۈچۈن ۋاقىت بەردىم».—ۋەھىي. 2:20، 21.
12، 13. ئاقساقاللار گۇناھكارنىڭ توۋا قىلىشىغا ۋاقىت بېرىش ئۈچۈن نېمە قىلالايدۇ؟ (رەسىمگە ھەم قاراڭ).
12 ئاقساقاللار ئەيسا مەسىھنى ئۈلگە قىلىدۇ ۋە گۇناھكارنى توۋا قىلمايدۇ دەپ ئالدىراپ خۇلاسە چىقارمايدۇ. بەزىلەر ھەيئەت ئەزالىرى بولغان ئاقساقاللار بىلەن بىرىنچى قېتىم كۆرۈشكەندە، توۋا قىلىشى مۇمكىن. يەنە بەزىلىرىنىڭ توۋا قىلىشىغا كۆپرەك ۋاقىت كېتىشى مۇمكىن. شۇڭا، ئاقساقاللار گۇناھكار بىلەن بىرنەچچە قېتىم كۆرۈشۈشنى ئورۇنلاشتۇرۇشى مۇمكىن. ئېھتىمال، بىرىنچى قېتىملىق كۆرۈشۈشتىن كېيىن، ئاداشقان كىشى بولۇنغان سۆھبەت ھەققىدە چوڭقۇر ئويلىنىشى ۋە كەمتەرلىكنى كۆرسىتىپ، يەھۋادىن گۇناھى ئۈچۈن كەچۈرۈم سورىشى مۇمكىن (زەبۇر 32:5؛ 38:18). شۇنىڭ بىلەن، ئىككىنچى قېتىم كۆرۈشكەندە گۇناھكار كىشى بىرىنچى قېتىملىق كۆرۈشۈشكە قارىغاندا، باشقىچە كۆز قاراشتا بولۇشى ياكى ئىنكاس قايتۇرۇشى مۇمكىن.
13 گۇناھ ئۆتكۈزگەن كىشىنى توۋا قىلىشقا باشلاش ئۈچۈن، ئاقساقاللار ھېسداشلىق ۋە مېھرىبانلىق كۆرسىتىدۇ. ئۇلار گۇناھكارغا ياردەم بېرىش ئۈچۈن كۆرسەتكەن تىرىشچانلىقى ئۈچۈن بەرىكەت سوراپ ۋە گۇناھكارنىڭ ئەقلىنى تېپىپ، گۇناھىغا توۋا قىلىشنى ئۈمىد قىلىپ، يەھۋاغا دۇئا قىلىدۇ.—2-تىموت. 2:25، 26.
ئاقساقاللار گۇناھكارنىڭ توۋا قىلىشىغا ۋاقىت بېرىش ئۈچۈن بىرنەچچە قېتىم ئۇنىڭ بىلەن كۆرۈشۈشى مۇمكىن (12-ئابزاسقا قاراڭ)
14. گۇناھكار توۋا قىلىپ ئۆزگەرسە، كىم شان-شەرەپكە لايىق ۋە نېمە ئۈچۈن؟
14 ئەگەر گۇناھ ئۆتكۈزگەن كىشى پۇشايمان قىلىپ، چىن قەلبىدىن توۋا قىلسا، ھەممىمىز ئىنتايىن خۇشال بولىمىز! (لۇقا 15:7، 10) ئاقساقاللار گۇناھكار كىشىنىڭ توۋا قىلىپ ئۆزگىرىشىگە كۆپ ياردەم بەرگەچ، ئۇلار شان-شەرەپكە لايىق بولامدۇ؟ ياق. ئەلچى پاۋلۇسنىڭ گۇناھ قىلغان كىشىلەر ھەققىدە نېمىلەرنى يازغانلىقىنى ئېسىمىزگە ئالايلى. ئۇ: «بەلكىم، خۇدا ئۇلارنى توۋا قىلىشقا باشلار»،— دېگەن (2-تىموت. 2:25). شۇڭا، گۇناھكارنىڭ ئۆز كۆز قارىشىنى ئۆزگەرتىشىگە ئىنسان ئەمەس، ئەسلىدە يەھۋا يادەم بېرىدۇ. دېمەك، ياراتقۇچىمىز يەھۋا شان-شەرەپكە لايىقتۇر. ئەلچى پاۋلۇس يەنە گۇناھكار توۋا قىلغاندىن كېيىن، ياخشى نەتىجە بېرىدىغانلىقى ھەققىدە يازغان. توۋا قىلغان كىشى ھەقىقەت توغرۇلۇق توغرا بىلىم ئېلىپ، ئەقلىنى تېپىپ، شەيتاننىڭ تۇزىقىدىن قۇتۇلۇپ قالالايدۇ.—2-تىم. 2:26.
15. ئاقساقاللار توۋا قىلغان كىشىلەرگە ياردەم بېرىشنى قانداق داۋاملاشتۇرالايدۇ؟
15 گۇناھ ئۆتكۈزگەن كىشى توۋا قىلغاندىن كېيىن، ھەيئەت ئەزالىرى بولغان ئاقساقاللار ئۇنىڭ بىلەن داۋاملىق كۆرۈشۈپ، ئىمان-ئېتىقادى كۈچەيتىشىگە ۋە شەيتاننىڭ ئېزىقتۇرۇشلىرىغا قارشى كۈرەش قىلىشقا ياردەم بېرىدۇ (ئىبرا. 12:12، 13). ئەلۋەتتە، ئاقساقاللار شۇ كىشى قانداق گۇناھ ئۆتكۈزگەنلىكىنى باشقىلاردىن مەخپىي تۇتىدۇ. لېكىن، جامائەتنى بەزى ئىشلاردىن خەۋەردار قىلىش زۆرۈر بولۇشى مۇمكىن. ئۇنداقتا، قايسى ئىشلاردىن؟
«ھەممىسىنىڭ ئالدىدا … تەنبىھ بەرگىن»
16. 1-تىموتىي 5:20-ئايەتكە ئاساسلانغاندا، «ھەممىسىنىڭ ئالدىدا» دېگەن سۆز كىمگە قارىتىلغان؟
16 1-تىموتىي 5:20-نى ئوقۇڭ. ئەلچى پاۋلۇس بۇ سۆزلەرنى ئۆزىگە ئوخشاش ئاقساقال بولغان تىموتىيغا يازغان. ئۇنىڭغا ھەممىسىنىڭ ئالدىدا گۇناھ قىلىۋاتقانلارغا تەنبىھ بېرىشنى ئېيتقانىدى. ئۇ زادى نېمە دېمەكچى ئىدى؟ پاۋلۇس «ھەممىسىنىڭ ئالدىدا» دەپ پۈتۈن جامائەت كۆزدە تۇتقانمۇ؟ ئۇنداق بولۇشى ناتايىن. كۆپىنچە ۋەزىيەتلەردە «ھەممىسنىڭ ئالدىدا» دېگەن سۆز، ئىشلاردىن خەۋەردار بولغان ئاز ساندىكى كىشىلەرنى كۆرسەتكەن. بەلكىم، ئۇلار بولغان ئىشنى ئۆز كۆزى بىلەن كۆرگەن ياكى گۇناھكارنىڭ ئېغىزدىن ئاڭلىغان. ئاقساقاللار پەقەت ئاشۇ ئاز ساندىكى كىشىلەرگە ئىشلارنى بىر تەرەپ قىلغانلىقىنى ۋە گۇناھكارنىڭ تۈزىتىلگەنلىكىنى ئېيتىدۇ.
17. جامائەتتە كۆپىنچە قېرىنداشلار ئاللىقاچان بىرىنىڭ ئېغىر گۇناھ ئۆتكۈزگەنلىكىنى بىلگەن بولسا ياكى كېلەچەكتە بىلىشى مۇمكىن بولسا، ئاقساقاللار نېمىنى ئېلان قىلىدۇ ۋە نېمە ئۈچۈن؟
17 بەزى ۋەزىيەتتە گۇناھكارنىڭ قىلغان ئىشىنى جامائەتتىكى كۆپىنچە قېرىنداشلار ئاللىقاچان بىلگەن بولۇشى ياكى كېلەچەكتە بىلىۋېلىشى مۇمكىن. ئەگەر شۇنداق بولسا، ئۇ چاغدا «ھەممىسىنىڭ ئالدىدا» دېگەن سۆز، پۈتكۈل جامائەتنى ئۆز ئىچىگە ئالىدۇ. شۇڭا، بىر ئاقساقال پۈتكۈل جامائەتنىڭ ئالدىدا گۇناھ ئۆتكۈزگەن كىشىگە تەنبىھ بېرىپ، تۈزىتىلگەنلىكىنى ئېلان قىلىدۇ. نېمە ئۈچۈن؟ خۇددى پاۋلۇس ئېيتقاندەك، قېرىنداشلارنى ئېغىر گۇناھ ئۆتكۈزمەسلىككە ئاگاھلاندۇرۇش ئۈچۈن. ئۇ مۇنداق دېگەن: «باشقىلار ھەم ئىبرەت ئالسۇن».
18. ئەگەر قورامىغا يەتمىگەن بىرى ئېغىر گۇناھ ئۆتكۈزگەن بولسا، ئاقساقاللار نېمە قىلىشى كېرەك؟ (رەسىمگە ھەم قاراڭ).
18 سۇغا چۆمۈلدۈرۈلۈشتىن ئۆتكەن، ئەمما قۇرامىغا يەتمىگەن، يەنى 18 ياشقا تولمىغانلار ئېغىر گۇناھ ئۆتكۈزۈپ قويسىچۇ؟ ئاقساقاللار كېڭىشى ئىككى ئاقساقالنى قورامىغا يەتمىگەن ئۆسمۈر ۋە ئۇنىڭ مەسىھ ئەگەشكۈچىسى بولغان ئاتا-ئانىسىb بىلەن كۆرۈشۈشكە ئورۇنلاشتۇرىدۇ. ئاقساقاللار ئاتا-ئانىلاردىن ئۆز بالىسىنى توۋا قىلىشقا باشلاش ئۈچۈن نېمە ئىشلارنى قىلغانلىقىنى سورايدۇ. ئەگەر بالا نەسىھەتكە قۇلاق سېلىپ، ئاتا-ئانىسىنىڭ ياردىمىدە ئاللىقاچان توۋا قىلىپ ئۆزگەرگەن بولسا، ئىككى ئاقساقال بەلكىم بىر ھەيئەت تەشكىللەشنىڭ ھاجىتى يوق دەپ، بالىغا ياردەم بېرىشنى داۋاملىق ئاتا-ئانىسىغا تاپشۇرۇشنى قارار قىلىشى مۇمكىن. ئاقساقاللار شۇنى ئوبدان بىلىدۇكى، يەھۋا ئاتا-ئانىلارغا مېھىر-مۇھەببەت بىلەن بالىلارنى تۈزىتىش ۋەزىپىسىنى تاپشۇرغان (تەكرار. قا 6:6، 7؛ پەند. نە 6:20؛ 22:6؛ ئەفەس. 6:2–4). شۇنداقتىمۇ، ئۆسمۈرنىڭ زۆرۈر ياردەمگە ئېرىشەلىگەن ياكى ئېرىشەلمىگەنلىكىنى جەزملەشتۈرۈش ئۈچۈن، ئاقساقاللار ئارىلاپ-ئارىلاپ ئۇنىڭ ئاتا-ئانىسى بىلەن كۆرۈشۈپ سۆھبەتلىشىدۇ. ئەمما، قورامىغا يەتمىگەن ياش توۋا قىلماي، داۋاملىق يامان يولدا مېڭىۋەرسىچۇ؟ ئۇنداق ئەھۋالدا، ئۈچ ئاقساقالدىن تەشكىللەنگەن بىر ھەيئەت ئۇ بالا ۋە ئۇنىڭ ئاتا-ئانىسى بىلەن كۆرۈشىدۇ.
قورامىغا يەتمىگەن بىرى ئېغىر گۇناھ ئۆتكۈزگەن بولسا، ئىككى ئاقساقال ئۇ ۋە ئۇنىڭ مەسىھ ئەگەشكۈچىسى بولغان ئاتا-ئانىسى بىلەن كۆرۈشىدۇ (18-ئابزاسقا قاراڭ)
«يەھۋا ھەقىقەتەن مېھىر-شەپقەتلىك ۋە رەھىمدىل خۇدادۇر»
19. ئاقساقاللار گۇناھكار بىلەن كۆرۈشكەن چاغلاردا، يەھۋانى ئۈلگە قىلىش ئۈچۈن قانداق تىرىشچانلىقلارنى كۆرسىتىدۇ؟
19 جامائەتنىڭ پاكلىقىنى ساقلاشنى يەھۋا ئاقساقاللارغا تاپشۇرغان، شۇڭا ھەيئەت بولۇپ تەشكىللەنگەن ئاقساقاللار تاپشۇرۇلغان مەسئۇلىيەتكە ئىنتايىن ئەھمىيەت بېرىدۇ (1-كورىنت. 5:7). ئۇنىڭدىن باشقا، ئاقساقاللار گۇناھ ئۆتكۈزگەن كىشىنى توۋا قىلىشقا باشلاش ئۈچۈن قولىدىن كېلىشىچە تىرىشچانلىق كۆرسىتىدۇ. ئاقساقاللار گۇناھكار كىشىدىن ئۈمىد ئۈزمەي، ئۇنىڭغا ياردەم بېرىش ئۈچۈن ئىجابىي كۆز قاراشنى ساقلايدۇ. نېمە ئۈچۈن؟ چۈنكى، ئۇلار «ھەقىقەتەن مېھىر-شەپقەتلىك ۋە رەھىمدىل» خۇدا يەھۋانى ئۈلگە قىلىشنى خالايدۇ (ياقۇپ 5:11). ئەلچى يۇھاننا دەل شۇنداق خۇدانى ئۈلگە قىلغان. مۇنداق سۆزلەرنى يازغان: «ئەي بالىلىرىم، سىلەرنى گۇناھ قىلمىسۇن دەپ، بۇ سۆزلەرنى يېزىۋاتىمەن. ئەگەر بىرى گۇناھ قىلغان بولسا، ئاتىمىزنىڭ يېنىدا بىر ياردەمچى، ئادىل ئەيسا مەسىھ بار».—1-يۇھاننا 2:1.
20. بىز كېيىنكى ماقالىدە نېمىنى مۇھاكىمە قىلىمىز؟
20 بەك ئەپسۇسكى، بەزىدە گۇناھ ئۆتكۈزگەن مەسىھ ئەگەشكۈچىسى ئۆز گۇناھىغا توۋا قىلىشنى رەت قىلىدۇ. شۇنداق بولغاندا، ئۇ كىشى جامائەتتىن چىقىرىلىشى كېرەك. شۇنداق ۋەزىيەتلەردە، ئاقساقاللار نېمىلەرنى قىلىدۇ؟ بۇنى كېيىنكى ماقالىدە مۇھاكىمە قىلىمىز.
42-ناخشا «ئاجىزلارغا ياردەم قىل»
a بۇرۇن بۇ تەشكىللەنگەن ئاقساقاللار توپى ئەدلىيە كومىتېتى دەپ ئاتالغان. لېكىن، ھۆكۈم قىلىش ئۇلارنىڭ ۋەزىپىلىرىنىڭ پەقەت بىر قىسىمى بولغاچقا، ھازىر بۇ سۆز-ئىبارىنى ئىشلەتمەيمىز. ئۇنىڭ ئورنىغا، بىز ئاقساقاللاردىن تەشكىللەنگەن بىر ھەيئەت دېگەن سۆز-ئىبارىنى قوللىنىمىز.
b ئاتا-ئانىلار بىلەن مۇناسىۋەتلىك بۇ ئورۇنلاشتۇرۇشلار، بالىنىڭ قانۇنلۇق ۋەسىيسى (قۇرامىغا يەتمىگەن بالىلارغا غەمخورلۇق قىلىشنى ئۆز ئۈستىگە ئالغان كىشى) ياكى باشقا بالىنى بېقىش مەسئۇلىيىتى بار كىشىلەرگىمۇ ماس كېلىدۇ.