3-تەتقىق ماقالىسى
42-ناخشا ئاجىزلارغا ياردەم بەر
قارارلىرىڭىز يەھۋانى خۇرسەن قىلسۇن
«يەھۋادىن قورقۇش دانالىقنىڭ باشلىنىشىدۇر، ئەڭ مۇقەددەس بولغۇچى ھەققىدىكى بىلىم ئەقىل-ئىدراكقا ئېرىشتۈرەر».—پەند. نە 9:10.
مەركىزى ئىدىيە
بىلىم، ئەقىل-ئىدراك ۋە پەرقلەندۈرۈش دانا قارارلارنى چىقىرىشىمىزغا قانداق ياردەم بېرىدىغانلىقىنى ئۆگىنىمىز.
1. بىز ھەممىمىز ھەر كۈنى نېمە قىلىشىمىز كېرەك؟
بىز ھەر كۈنى قارارلارنى چىقىرىشىمىز كېرەك. بەزى قارارلارنى چىقىرىش ئاسان، مەسىلەن ئەتىگەندە نېمە يەيمىز، كەچقۇرۇن سائەت قانچىدە ئۇخلايمىز. لېكىن، بەزى قارارلارنى چىقىرىش ئانچە ئاساسەن ئەمەس. چۈنكى، ئۇلار سالامەتلىكىمىزگە، خۇشال كەيپىياتىمىزغا تەسىر قىلغاندىن باشقا، يەنە ئۇرۇق-تۇغقان ياكى دوست-يارەنلىرىمىزگە، ھەتتا ياراتقۇچىمىز يەھۋا بىلەن مۇناسىۋىتىمىزگە تەسىر قىلىدۇ. چىقارغان قارارىمىزنىڭ ئۆزىمىزگە ۋە ئائىلىمىزدىكىلەرگە پايدىلىق بولۇشىنى خالايمىز. ئەڭ مۇھىمى، قارارلىرىمىزنىڭ يەھۋانى خۇرسەن قىلىشىنى ئۈمىد قىلىمىز.—رىملىقلار 12:1، 2.
2. قايسى قەدەم-باسقۇچلار دانا قارار چىقىرىشىمىزغا ياردەم بېرەلەيدۇ؟
2 دانا قارارلارنى چىقىرىش ئۈچۈن چوقۇم تۆۋەندىكىلەرنى قىلىش زۆرۈر: (1) ئېنىقراق چۈشەنچىگە ئىگە بولۇڭ، (2) يەھۋانىڭ قانداق كۆز قاراشتا بولىدىغانلىقى توغرۇلۇق ئويلىنىڭ، (3) ھەربىر تاللاشنى تارازىدا تارتىپ كۆرۈڭ. بۇ ماقالىدە مۇشۇ ئۈچ قەدەم-باسقۇچنى مۇھاكىمە قىلىمىز. ئۇنىڭدىن باشقا، ياخشى-ياماننى پەرقلەندۈرۈشكە نېمە ياردەم بېرىدىغانلىقىنى كۆرۈپ چىقىمىز.—پەند ن. 2:11.
ئېنىقراق چۈشەنچىگە ئىگە بولۇڭ
3. قارار چىقىرىشتىن ئاۋۋال نېمە ئۈچۈن ئېنىقراق چۈشەنچىگە ئىگە بولۇش كېرەك؟ مىسال كەلتۈرۈڭ.
3 دانا قارار چىقىرىشنىڭ بىرىنچى قەدىمى — ۋەزىيەت چۈشەنچە ھاسىل قىلىش. بۇ نېمىشقا مۇھىم؟ مەسىلەن، مۇنداق ۋەزىيەتنى تەسەۋۋۇر قىلىپ باقايلى: ئېغىر كېسەل بىلەن ئاغرىغان كىشى دوختۇرغا كۆرۈنۈشكە كەلدى. دوختۇر ئۇنى تەكشۈرمەي ياكى ئاغرىقى توغرۇلۇق سوئاللارنى سورىماي، ئۇنى داۋالاشقا باشلامدۇ؟ ياق. ھەرگىز ئۇنداق قارار چىقارمايدۇ. خۇددى شۇنىڭغا ئوخشاش، بىزمۇ ئاۋۋال ۋەزىيەت ھەققىدە تەپسىلىيرەك چۈشەنچىگە ئىگە بولغاندىن كېيىن، تاللاش قىلساق، دانا قارار چىقىرالايمىز. ئۇنداقتا، بۇنى قانداق قىلالايمىز؟
4. پەندى-نەسىھەت 18:13-ئايەتكە ئاساسلانغاندا، ۋەزىيەت ھەققىدە مەلۇم چۈشەنچىگە بولۇش ئۈچۈن نېمە قىلالايسىز؟ (رەسىمگە ھەم قاراڭ).
4 بەزى سوئاللارنى قويۇش ئارقىلىق ۋەزىيەت ھەققىدە چۈشەنچىگە ئىگە بولۇڭ. مەسىلەن، بىرلىرى سىزنى ئولتۇرۇشقا چاقىردى، ئۇنداقتا، بېرىش-بارماسلىقنى قانداق قارار قىلالايسىز؟ ئەگەر ئولتۇرۇشقا چاقىرغان كىشىنى ئانچە ياخشى تونۇمىسىڭىز ياكى ئۇ ئولتۇرۇشتا قانداق ئويۇن-تاماشىلار ئورۇنلاشتۇرۇلغانلىقى توغرۇلۇق ئېنىق بىلمىسىڭىز، سىزنى چاقىرغان كىشىدىن مۇنداق سورىسىڭىز بولىدۇ: «بۇ ئولتۇرۇش قەيەردە ۋە قاچان؟ قانچە ئادەم كېلىدۇ؟ كىملەر كېلىدۇ؟ ئولتۇرۇشقا كىم مەسئۇل بولىدۇ ۋە ئولتۇرۇشتا قانداق ئويۇن-تاماشىلار ئورۇنلاشتۇرۇلدى؟ ھاراق-شاراب قويۇلامدۇ؟» بۇ سوئاللارنىڭ جاۋابىنى بىلىۋېلىش دانا قارار چىقىرىشىڭىزغا ياردەم بېرىدۇ.—پەندى-نەسىھەت 18:13-نى ئوقۇڭ.
بەزى سوئاللارنى قويۇش ئارقىلىق ۋەزىيەت ھەققىدە چۈشەنچىگە ئىگە بولۇڭ (4-ئابزاسقا قاراڭ)a
5. ۋەزىيەت ھەققىدە ئېنىقراق چۈشەنچىگە ئىگە بولغاندىن كېيىن، نېمە قىلىشىڭىز كېرەك؟
5 ۋەزىيەت ھەققىدە مەلۇم چۈشەنچىگە ئىگە بولغاندىن كېيىن، كېيىنكى قەدەمدە، ئېھتىياتچانلىق بىلەن ئويلىنىپ، پۈتۈن ۋەزىيەتنى كۆرۈنۈشنى كۆز ئالدىڭىزغا كەلتۈرۈپ كۆرۈڭ. مەسىلەن، مۇقەددەس كىتاب پرىنسىپلىرىغا سەل قارايدىغانلار بۇ ئولتۇرۇشقا كەلسە ياكى مېھمانلارغا ھاراق-شاراب قۇيسا، بىرلىرىنىڭ كۆپ ئىچىۋالماسلىقىغا مەسئۇل بولىدىغان ئادەم بولمىسا، بۇ ئولتۇرۇش ئاخىرىدا ساغلام بولمىغان ئويۇن-تاماشىغا ئايلىنىپ كېتىپ قېلىشىنى كۆرۈپ يەتتىڭىزمۇ؟ (1-پېتر. 4:3) ئەگەر بۇ ئولتۇرۇشنىڭ ۋاقتى جامائەت يىغىلىشى ۋە ۋەز خىزمەت بىلەن بىر ۋاقىتقا توغرا كېلىپ قالسىچۇ؟ مۇنداق ۋەزىيەتتە نېمە قىلىسىز؟ ۋەزىيەت ھەققىدە ئىگە بولغان چۈشەنچىڭىزنى ھەر جەھەتتىن تەھلىل قىلىپ، پۈتۈن ۋەزىيەتنى كۆرۈپ، ئېنىقراق چۈشەنچىگە ئىگە بولسىڭىز، تېخىمۇ ياخشى قارار چىقىرالايسىز. شۇنداق، سىز ۋەزىيەتنى كۆرۈپ يېتىشنى بىلىسىز. لېكىن، ھازىر يەنە بىر قەدەم-باسقۇچنى بېسىشىڭىز كېرەك. يەنى، ئۆز-ئۆزىڭىزدىن: «يەھۋا بۇنىڭغا قارىتا قانداق كۆز قاراشتا؟» دەپ سوراپ كۆرۈڭ.—پەند ن. 2:6.
يەھۋانىڭ كۆز قارىشىنى بىلىشكە تىرىشىڭ
6. ياقۇپ 1:5-ئايەتكە ئاساسلانغاندا، نېمە ئۈچۈن يەھۋادىن ياردەم سورىشىمىز كېرەك؟
6 يەھۋاغا دۇئا قىلىپ، ئۇنىڭ ۋەزىيەتكە قارىتا قانداق كۆز قاراشتا بولىدىغانلىقىنى چۈشىنىش ئۈچۈن ياردەم سوراڭ. يەھۋا دانالىقنى «ھەممىسىگە سېخىيلىق بىلەن، تاپا-تەنە قىلماي» بېرىدۇ (ياقۇپ 1:5-نى ئوقۇڭ). ئۇ بىرگە دانالىق بېرىدىغانلىقىنى ۋەدە قىلغان. شۇ دانالىق مەلۇم بىر قارارىمىزنىڭ خۇدانىڭ كۆڭلىنى خۇرسەن قىلىدىغان ياكى قىلمايدىغانلىقىنى كۆرۈپ يېتىشىمىزگە ياردەم بېرىدۇ.
7. خۇدانىڭ قانداق كۆز قاراشتا بولىدىغانلىقىنى چۈشىنىشكە نېمە ياردەم بېرىدۇ؟ مىسال كەلتۈرۈڭ.
7 يەھۋا خۇدادىن ياردەم سوراپ دۇئا قىلغاندىن كېيىن، ئۇنىڭ دۇئايىڭىزغا قانداق جاۋاب بېرىدىغانلىقىغا ئەستايىدىل دىققەت قىلىڭ. بۇنى مۇنداق مىسال بىلەن چۈشەندۈرۈشكە بولىدۇ. سىز باشقا شەھەردە تېنەپ قالدىڭىز، ئاندىن شۇ يەرلىك بىرىدىن يول سورىدىڭىز. ئۇ سىزگە جاۋاب بېرىپ، يولنى چۈشەندۈرۈپ بېرىشتىن ئاۋۋال، ئۇنىڭ سۆزلىرىنى تىڭشىماي كېتىپ قالامسىز؟ ئەلۋەتتە، ئۇنداق قىلمايسىز. ئەكسىنچە، سىز ئۇنى دىققەت بىلەن تىڭشايسىز. شۇنىڭغا ئوخشاش، يەھۋادىن دانالىق سوراپ دۇئا قىلغاندىن كېيىن، ئۇنىڭ قانداق جاۋاب قايتۇرىدىغانلىقىغا ئەستايىدىل دىققەت قىلىڭ. بۇنىڭ ئۈچۈن ۋەزىيىتىمىزگە ماس كېلىدىغان مۇقەددەس كىتاب قانۇنلىرى ۋە قائىدە-پرىنسىپلىرى ئۈستىدە ئىزدىنىپ كۆرۈڭ. مەسىلەن، شۇ ئولتۇرۇشقا بېرىش ياكى بارماسلىقنى قارار قىلغاندا، يامان دوستلار بىلەن باردى-كەلدى قىلىش ۋە ئەيش-ئىشرەت، خۇدا پادىشاھلىقىنىڭ مەنپەئەتلىرىنى ئۆزىڭىزنىڭ خاھىشىدىن يۇقىرى قويۇش توغرۇلۇق مۇقەددەس كىتاب نېمە دەيدىغانلىقى توغرىسىدا ئويلىنىپ بېقىڭ.—مەتتا 6:33؛ رىملىقلار 13:13؛ 1-كورىنت. 15:33.
8. بەزى مەلۇماتلارنى تېپىش قىيىن بولغاندا، نېمە قىلسىڭىز بولىدۇ؟ (رەسىمگە ھەم قاراڭ).
8 بەزى چاغلاردا، ئىزدىگەن مەلۇماتلارنى تېپىش قىيىن بولسا، تەجرىبىلىك قېرىنداشلاردىن ياردەم سورىسىڭىز بولىدۇ. شۇنداقتىمۇ. ئۆز ئالدىڭىزغا ئىزدىنىپ كۆرسىڭىز، بۇنىڭ تېخىمۇ پايدىسى كۆپ بولىدۇ. مەسىلەن، «يەھۋا گۇۋاھچىلىرىنىڭ ئىزدىنىش كۆرسەتكۈچى» ۋە «كۈزىتىش مۇنارى تور كۈتۈپخانىسى» دېگەن ئىزدىنىش قوراللىرىدىن كۆپلىگەن پايدىلىق مەسلىھەتلەرنى تاپالايسىز. شۇنى ئۇنتۇماڭكى، سىزنىڭ مەقسىتىڭىز بولسا يەھۋانىڭ كۆڭلىنى خۇشال قىلىدىغان دانا قارارنى چىقرىش.
يەھۋانىڭ ئوي-پىكىرى ھەققىدە ئويلىنىپ كۆرۈڭ (8-ئابزاسقا قاراڭ)b
9. چىقارغان قارارلىرىمىز يەھۋانى خۇرسەن قىلىدىغان-قىلمايدىغانلىقىنى قانداق بىلسەك بولىدۇ؟ (ئەفەسلىكلەر 5:17)
9 چىقارغان قارارلىرىمىزنىڭ يەھۋانى خۇرسەن قىلدىغان-قىلمايدىغانلىقىنى قانداق بىلسەك بولىدۇ؟ ئەڭ ئاۋۋال، يەھۋانى ناھايىتى ياخشى تونۇشىمىز كېرەك. مۇقەددەس كىتابتا: «ئەڭ مۇقەددەس بولغۇچى ھەققىدىكى بىلىم ئەقىل-ئىدراكقا ئېرىشتۈرەر»،— دەپ يېزىلغان (پەند ن. 9:10). يەھۋانىڭ پەزىلەتلىرى، ئۇنىڭ ئىرادىسى، نېمىنى ياخشى كۆرۈپ ۋە نېمىنى ئۆچ كۆرىدىغانلىقىنى ياخشى بىلىش بىزنى ھەقىقىي ئەقىل-ئىدراكقا ئىگە قىلىدۇ. ئۆزىڭىزدىن مۇنداق سوراپ كۆرۈڭ: «يەھۋا ھەققىدە بىلگەنلىرىگە ئاساسەن، قانداق قارار چىقارسام، ئۇنىڭ كۆڭلىنى خۇرسەن قىلالايمەن؟».—ئەفەسلىكلەر 5:17-نى ئوقۇڭ.
10. نېمە ئۈچۈن مۇقەددەس كىتاب پرىنسىپلىرى ئائىلىۋى ئەنئەنىلەردىن ۋە مەدەنىيىتىمىزدىن مۇھىمراق؟
10 بەزى چاغلاردا، يەھۋانى خۇرسەن قىلىش ئۈچۈن يېقىن كىشىلەرنى خاپا قىلىشىمىزغا توغرا كېلىدۇ. مەسىلەن، بەزى ئاتا-ئانىلار بويىغا يەتكەن قىزىنى باي ياكى كۆپرەك تويلۇق بېرەلەيدىغان بىرى بىلەن توي قىلىشقا ئۈندىشى مۇمكىن. لېكىن، ئۇ كىشىنىڭ يەھۋا خۇدا بىلەن بولغان مۇناسىۋىتى ئانچە ياخشى بولمىسىچۇ؟ ئەلۋەتتە، ئاتا-ئانا قىزىنىڭ پۇلدىن قىسىلماي، باياشات ياشىشىنى خالايدۇ. ئەمما، قىز ئۆز-ئۆزىدىن مۇنداق سورىسا ياخشى بولىدۇ: «تۇرمۇشقا چىقسام، يولدىشىم يەھۋا بىلەن بولغان يېقىن مۇناسىۋەتنى كۈچەيتىشىمگە ياردەم بېرەلەمدۇ؟ يەھۋا بۇنىڭغا قانداق كۆز قاراشتا؟». جاۋابى، مەتتا 6:33-ئايەتتە يېزىلغان: «خۇدانىڭ پادىشاھلىقى ۋە ئۇنىڭ ھەققانىيلىقىنى داۋاملىق ھاياتىڭلاردا بىرىنچى ئورۇنغا قويۇڭلار». بىز ئاتا-ئانىمىز ۋە ئەتراپىمىزدىكى كىشىلەرنى خۇشال قىلىشنى خالايمىز. شۇنداقتىمۇ، بىز ئۈچۈن ئەڭ مۇھىمى — ياراتقۇچىمىز يەھۋانى خۇشال قىلىشتۇر.
ھەربىر تاللاشنى تارازىدا تارتىپ كۆرۈڭ
11. ھەربىر تاللاشنى تارازىدا تارتىپ كۆرۈشكە قايسى پەزىلەت ياردەم بېرەلەيدۇ؟ (فىلىپىلىكلەر 1:9، 10)
11 قارار چىقىرىشىڭىزغا مۇناسىۋەتلىك مۇقەددەس كىتاب پرىنسىپلىرى ھەققىدە ئەستايىدىل ئويلانغاندىن كېيىن، ھەربىر تاللىشىڭىزنى تارازىدا تارتىپ كۆرۈڭ (فىلىپىلىكلەر 1:9، 10-نى ئوقۇڭ). پەرق ئېتىش قابىلىيىتىڭىز ھەربىر تاللاشنىڭ ئاقىۋىتىنى كۆرۈپ يېتىشىڭىزگە ياردەم بېرىدۇ. بەزىدە ئاسانلا قارار چىقىرالىشىڭىز مۇمكىن، ئەمما، يەنە بەزى ۋەزىيەتلەردە كۆپرەك ئامىللارنى نەزەرگە ئېلىپ ئەتراپلىق ئويلىنىشقا توغرا كېلىدۇ. شۇنداق بولسىمۇ، پەرقلەندۈرۈش قابىلىيىتى دانا قارار چىقىرىشىڭىزغا ياردەم بېرىدۇ.
12، 13. ئىش ئىزدىگەندە دانا قارار قىلىشقا پەرقلەندۈرۈش قابىلىيىتى قانداق ياردەم بېرەلەيدۇ؟
12 مۇنداق بىر ۋەزىيەتنى تەسەۋۋۇر قىلىپ باقايلى. ئائىلىڭىزنى بېقىش ئۈچۈن ئىش ئىزدەۋاتىسىز. ئىككى ئىش چىقىپ قالدى. بارچە ئامىللار ھەققىدە چۈشەنچىگە ئىگە بولدىڭىز، مەسىلەن، قانداق ئىش، ئىش ۋاقتى، ئىشقا بېرىپ-كېلىشكە كېتىدىغان ۋاقىت دېگەنلەرنى ئېنىق بىلدىڭىز. ھەر ئىككىسى مۇقەددەس كىتاب پرىنسىپلىرىغا قارشى ئەمەس. بەلكىم، سىزنىڭ مەلۇم بىر ئىشنى تاللاش خاھىشىڭىز كۈچلۈكرەك، چۈنكى ئۇ ئىشنى ياقتۇرىسىز ۋە مۇئاشى يۇقىرىراق. شۇنداقتىمۇ، قارار چىقىرىش بۇرۇن، يەنە باشقا ئامىللارنى ئويلاپ كۆرۈشىڭىز كېرەك.
13 مەسىلەن، شۇ ئىشلار جامائەت يىغىلىشلىرىغا بېرىشقا قىيىنچىلىق تۇغدۇرامدۇ؟ ياكى ئائىلىڭىزنىڭ ھېس-تۇيغۇلىرىغا كۆڭۈل بۆلۈشكە ۋە يەھۋا بىلەن بولغان مۇناسىۋىتىنى كۈچلەندۈرۈشكە سەرپ قىلىدىغان ۋاقتىڭىزنى ئالامدۇ؟ شۇنداق سوئاللار ئۈستىدە ئويلانسىڭىز، پۇلدىنمۇ مۇھىمراق نەرسىلەرنى، يەنى يەھۋاغا ئىبادەت قىلىشنى ۋە ئائىلىڭىزنىڭ ئېھتىياجلىرىنى بىرىنچى ئورۇنغا قويالايسىز. بارچە ئامىللارنى نەزەردە تۇتۇپ قارار چىقارسىڭىز، يەھۋانىڭ بەرىكەتلىشىگە ئېرىشىسىز.
14. پەرقلەندۈرۈش قابىلىيىتى ۋە سۆيگۈ-مۇھەببەت باشقىلارغا پۇتلىكاشاڭ بولماسلىققا قانداق ياردەم بېرىدۇ؟
14 پەرقلەندۈرۈش قابىلىيىتى بىزنى چىقارغان قارارىمىزنىڭ باشقىلارغا قانداق تەسىر قىلىدىغانلىقى ھەققىدە ئويلىنىشقا دەۋەت قىلىدۇ (فىلىپى. 1:10). قانداق كىيىنىش ۋە ياسىنىشتەك شەخسىي قارارلارنى چىقارغاندا، بۇ بەك مۇھىم. شۇنداق قىلساق، باشقىلار ئۈچۈن پۇتلىكاشاڭ بولمايمىز. مەسىلەن، مەلۇم بىر كىيىم-كېچەك ياكى چاچ پاسونىنى ياقتۇرىسىز. لېكىن، جامائەتتىكىلەر ياكى باشقا ئادەملەر شۇ پاسونغا قانداق قارايدۇ؟ بۇ ئۇلارغا پۇتلىكاشاڭ بولمامدۇ؟ پەرقلەندۈرۈش قابىلىيىتى باشقىلارنى ھۆرمەتلەپ، ئۇلارنىڭ ھېس-تۇيغۇلىرىنى نەزەردە تۇتۇشقا ياردەم بېرىدۇ. سۆيگۈ-مۇھەببەت بىزنى باشقىلارنى ئويلاپ، كىچىك پېئىل بولۇشقا ئۈندەيدۇ (كور. 1-خ. 10:23، 24، 32؛ 1-تىموت. 2:9، 10). دېمەك، چىقارغان قارارلىرىمىز باشقىلارغا بولغان سۆيگۈ-مۇھەببەت ۋە ئىززەت-ھۆرمەتنى نامايان قىلىدۇ.
15. مۇھىم قارار قىلىشتىن ئاۋۋال، نېمە توغرۇلۇق ئويلىنىش كېرەك؟
15 مۇھىم قارار چىقارغاندا، ئۇنى ئەمەلگە ئاشۇرۇش ئۈچۈن نېمىلەرنى قىلىشىڭىز كېرەكلىكى توغرۇلۇق ئويلاپ بېقىڭ. ئەيسا پەيغەمبەر بىزگە ئاۋۋال «قانچىلىك خىراجەت كېتىشىنى ھېسابلاپ» چىقىش كېرەكلىكىنى ئېيتقان (لۇقا 14:28). شۇڭلاشقا، چىقارغان قارارىڭىزنىڭ قانچىلىك ۋاقىت، كۈچ ۋە پۇل تەلەپ قىلىدىغانلىقى توغرۇلۇق ئويلاپ كۆرۈڭ. بەزى ۋەزىيەتلەردە، ئائىلىڭىزدىكىلەر بىلەن مەسلىھەتلىشىپ، ئۇلار قارارىڭىزنى قوللاپ-قۇۋۋەتلىشى ئۈچۈن نېمىلەرنى قىلالايدىغانلىقىنى ئېنىقلاپ چىقىڭ. مەسلىھەتلەشكەندىن كېيىن، بەلكىم قارارىڭىزنى ئازىراق ئۆزگەرتىش ياكى تامامەن باشقىچە قارار قىلىش كېرەكلىكىنى كۆرۈپ يېتىسىز. ئۇنىڭدىن باشقا، ئۆيدىكىلەرنىڭ ئوي-پىكىرلىرىنى نەزەردە تۇتۇپ، ئۇلارنىڭ بەرگەن تەكلىپ پىكىرىنى قوبۇل قىلسىڭىز، چىقارغان قارارىڭىز مۇۋەپپەقىيەتلىك بولۇشى ئۈچۈن ئۇلار خۇشاللىق بىلەن سىزنى قوللاپ-قۇۋۋەتلەيدۇ.—پەند ن. 15:22.
دانا قارار چىقىرىڭ
16. دانا قارار چىقىرىشقا قايسى قەدەم-باسقۇچلار ياردەم بېرىدۇ؟ («دانا قارار چىقىرىش ئۈچۈن نېمە قىلىش كېرەك؟» دېگەن رامكىغا قاراڭ)
16 بۇ ماقالىدىكى تىلغا ئېلىنغان بارچە قەدەم-باسقۇچلار بويىچە ھەرىكەت قىلسىڭىز، دانا قارار چىقىرالايسىز. ئاۋۋال ئېنىقراق چۈشەنچىگە بولۇڭ، ئاندىن ۋەزىيەتكە ماس كېلىدىغان مۇقەددەس كىتاب پرىنسىپلىرى ئۈستىدە ئىزدىنىڭ، شۇنداق بولغاندا، يەھۋانى خۇرسەن قىلدىغان قارارنى چىقىرىش ئاسانراق بولىدۇ. ئەمدى دۇئا قىلىپ، يەھۋا خۇدادىن قارارىڭىزنىڭ مۇۋەپپەقىيەتلىك بولۇشى ئۈچۈن ياردەم سورىسىڭىز بولىدۇ.
17. دانا قارار چىقىرىشنىڭ سىرى نېمە؟
17 بەلكىم، ئىلگىرى نۇرغۇن دانا قارارلارنى چىقارغان بولسىڭىزمۇ، ئۆز ئەقلىڭىز ۋە تەجرىبىڭىزگە ئىشىنىپ كەتمەڭ. چۈنكى، دانا قارار چىقىرىشنىڭ سىرى — يەھۋانىڭ دانالىقىغا تايىنىش! پەقەت توغرا بىلىم، ئەقىل-ئىدراك ۋە پەرق ئېتىش قابىلىيىتى سىزنى ھەقىقىي دانالىققا ئېرىشتۈرىدۇ (پەند ن. 2:1–5). ئاتىمىز يەھۋانىڭ ياردىمى بىلەن، سىز ئۇنى خۇرسەن قىلىدىغان قارارلارنى چىقىرالايسىز.—زەبۇر 23:2، 3.
27-ناخشا يەھۋا تەرەپتە تۇرۇڭلار!
a رەسىملەردە: ياش قېرىنداشلار تېلېفونىغا كەلگەن ئولتۇرۇش چاقىرىقى توغرۇلۇق سۆزلىشىۋاتىدۇ.
b رەسىمدە: بىر بۇرادەر قارار قىلىشتىن ئاۋۋال ئىزدىنىش قىلىۋاتىدۇ.